1, 2. a) Ka Jézi réponn Pyè, lè Pyè di-y kè fo i janti èvè limenm ? (gadé prèmyé imaj a awtik-la). b) Poukwa Jézi réponn konsa ?

DISIP a Jézi ni dimal a kwè sa yo sòti tann ! Yo konpranndèdi kè Jézi té kay woumèt Wayòm a Izrayèl si pyé, é mi i sòti di kè, talè, i kay soufè é yo ké tchouyé-y. Prèmyé moun ki réyaji sé lapòt Pyè. I di Jézi : « É non Ségnè, fò-w janti èvè-w. Sa pé ké rivé-w. » Jézi réponn-li : « Pasé dèyè mwen, Satan ! Ou kon on wòch ki la pou fè-mwen tribiché, pas a pa lidé a Bondyé ou ni an tèt a-w, men sé ta lézòm » (Mat. 16:21-23 ; Akt 1:6).

² Lè Jézi di sé pawòl-lasa, i té ka montré kè lidé a Jéova pa ni ayen a vwè èvè lidé a mond-la Satan ka dirijé la (1 Jan 5:19). Pyè té ka ankourajé Jézi a ni menm mantalité égoyis ki onlo moun an mond-lasa. Men li Jézi té sav kè sa Jéova té vlé, sé kè i maré ren a-y solid paskè i té kay soufè é i té kay pran mò a-y. Sa Jézi réponn Pyè montré on mannyè ki klè kè i té dakò a san pou san èvè sa Jéova té ka pansé. An menm balan-la, Jézi montré osi kè i pa té dakò ditou-ditou èvè lidé a mond-lasa.

3. Poukwa sa rèd dè rézonné kon Jéova alòskè sa fasil dè rézonné kon mond-la ?

 ³ É nou aprézan ? Lidé a kimoun nou adòpté ? Ta Bondyé oben ta mond-la ? Antankè krétyen, sèten nou ka fè tousa nou pé pou ni on konpòwtèman ki ka fè Jéova plézi. Men ka nou pé di dè sa ki an lèspri an nou ? Ès nou ka travay rèd pou nou rézonné menmjan ki Jéova ? Sa ka mandé onlo éfò. Pawkont, nou pa ni pon éfò a fè pou adòpté lidé a sé moun-la ki alantou an nou la, paskè lèspri a mond-la toupatou (Éféz. 2:2). É konm sé moun-la ki an mond-la ka ankourajé-nou sonjé yenki noumenm, sa pé ban-nou anvi kouté-yo. Sé on vérité : sa rèd dè rézonné menmjan ki Jéova, men sa fasil toubònman dè rézonné kon mond-la.

4. a) Ka ki ké rivé si nou ka lésé mond-la détenn asi lèspri an nou ? b) Ka nou ké vwè adan awtik-lasa ?

⁴ Si nou ka lésé mond-la détenn asi lèspri an nou, sa pé rann-nou égoyis é pétèt nou ké vlé désidé noumenm ka ki byen é ka ki mal (Mawk 7:21, 22). Kifè, sa enpòwtan kè nou fè éfò pou nou ni « lidé a Bondyé », é pou nou pa ni « ta lézòm ». Awtik-lasa ké édé-nou fè sa. Nou ké vwè poukwa lè nou ni menm lidé ki Jéova sa pa fòsan, men sé pou byen an nou. Nou ké vwè osi ka nou pé fè pou nou pa lésé mond-lasa détenn asi nou. Adan awtik-la ki ka vin la, nou ké vwè kijan nou pé rivé konprann sa Jéova ka pansé adan diféran domenn. Nou ké vwè osi ka pou nou fè pou nou vwè léchòz menmjan ki Jéova.

5. Poukwa sèwten moun vé pa pon kalté moun dirijé lèspri a yo ?

⁵ Ni sèwten moun ki vé pa pon kalté moun dirijé lèspri a yo. Yo préféré réfléchi yomenm a yo. Pétèt yo vlé pran désizyon a yo yomenm, paskè pou yo, yo ni dwa fè sa. Yo vé pa ponmoun di-yo kijan pou yo rézonné. Pou yo, sé « chak tèt chak èspri * ».

6. a) Ki libèté Jéova ka ban-nou ? b) Ès sa vlé di nou lib dè fè sa nou vlé ?

⁶ On biten nou pé sèten, sé kè menmsi nou ka vwè léchòz kon Jéova ka vwè-yo, sa pa ka anpéché-nou ni pwòp lidé an nou kanmenm. Kon nou ka li adan 2 Korentyen 3:17 : « La lèspri a Jéova yé, sé la libèté-la yé. » Jéova ka lésé-nou lib dè chwazi kijan dè moun nou vlé divini. Nouchak pé ni pwòp gou an nou é nouchak pé entérésé-nou a sa nou vlé. Lè Jéova fè-nou, i ban-nou libèté-lasa. Men sa pa vlé di kè nou lib dè fè tousa nou vlé (li 1 Pyè 2:16). Lè nou ni a désidé si tèl biten bon oben mové, Jéova vlé kè nou lésé Pawòl a-y gidé-nou. Èskè i ka mandé-nou twòp, oben sa i ka mandé-nou sé pou byen an nou ?

7, 8. Lè nou ka vwè léchòz menmjan ki Jéova, ès sa fòsan ? Bay on ègzanp.

⁷ An-nou pran on ègzanp. Pa ni pon paran ki pa vlé lévé timoun a-y byen konm i fo. I ka aprann-yo kijan pou yo vin onèt é kijan pou yo pòté mannèv adan travay a yo. I ka aprann timoun a-y ni rèspé pou lézòt. Men sa pa ka anpéché sé timoun-la viv. Okontrè, sé paran-la ki ka fè sa la ka ba timoun a yo on fòwmasyon pou yo réyisi vi a yo. Lè sé timoun-lasa ké vin gran é ké pran bò a yo, yo ké lib dè fè pwòp chwa a yo. Si yo désidé kontinyé tchenn kont dè sa paran a yo aprann-yo, sa ké édé-yo pran bon  désizyon é sa ké évité-yo onpakèt difikilté. Konsa, yo pé ké ni a règrété chwa a yo, é yo pé ké toujou enkyèt.

⁸ Jéova osi sé on bon Papa. Sé pousa i vlé kè timoun a-y ni méyè vi ki tini (Iz. 48:17, 18). I ka aprann-nou sa pou nou fè pou nou ni on bon konduit é kijan pou nou viv byen èvè lézòt. I ka ankourajé-nou a vwè léchòz menmjan ki-y é a viv annakò èvè prensip a-y. Sa i ka mandé-nou pa fòsan é sa pa ka anpéché-nou viv. Okontrè, sa ka édé-nou rézonné byen konm i fo (Sòm 92:5 ; Pwov. 2:1-5 ; Iz. 55:9). Si nou fè sa, vi an nou ké bèl é nou ké ni tchè-kontan (Sòm 1:2, 3). Asiré pa pétèt, lè nou ka vwè léchòz kon Jéova ka vwè-yo, sé enki bon biten sa ka pòté ban nou !

9, 10. Ki prèv nou ni kè jan-la Jéova ka rézonné la lontan pli bon ki ta lèmond ?

⁹ Jan-la Jéova ka rézonné la lontan pli bon ki ta lèmond. Sé pou sa osi nou vlé rézonné menmjan ki Jéova. Ni dé moun an mond-lasa ki ka konséyé moun. Yo ka di-yo ka pou yo fè pou yo menné vi a yo, pou vi a fanmi a yo bèl, pou yo réyisi adan lavi é adan dòt domenn ankò. Men lamajorité a sé konsèy-lasa pa annakò ditou-ditou èvè sa Jéova ka pansé. Pa ègzanp, mond-la ké di-w kè fò-w chèché a rivé adan sistèm-lasa. I ké di-w kè si on moun ka fè on péché sèksyèl, pa ni ayen adan sa. Délè, yo ka konséyé moun séparé oswa divòsé menmsi yo pa ni pon rézon valab, siwtou si sé moun-la ka kwè kè yo ké pli éré konsa. Sé jan dè konsèy-lasa pa ni ayen a vwè èvè sa Labib ka anségné. Men, a épòk an nou, èskè sé konsèy-la lèmond ka bay la pli itil ki séla ki an Bib-la ?

¹⁰ Jézi di : « Sé sèlon sa on moun ka fè ou ka vwè si i ni sajès » (Mat. 11:19). Lèmond ja fè pwogré adan latèknoloji toubònman. Magrésa, i pa réyisi rézoud sé gwo pwoblèm-la ki ka anpéché moun ni lakontantman, kon lagè, krim é pwoblèm a ras. É lèfètkè adan mond-la, moun pa ka ézité fè tout kalté péché sèksyèl ki tini, ka sa ka pòté ? Onlo moun dakò pou di kè sa ka détwi sé fanmi-la. Santé a sé moun-la ki ka menné vyé jan dè vi-lasa ka dégrenné oben yo ka jwenn dòt pwoblèm ankò. Pawkont, pou séla ki ka mèt an pratik konsèy a Jéova, vi a fanmi a yo pli bèl. Yo ka ni on pli bon santé, é yo ka viv byen èvè frè é sè èspirityèl a yo toupatou si latè (Iz. 2:4; Akt 10:34, 35; 1 Kor. 6:9-11). Ès a pa on prèv kè jan-la Jéova ka rézonné la lontan pli bon ki ta lèmond ?

11. Kimoun Moyiz lésé aji anlè sa i té ka pansé, é ka sa pòté ?

¹¹ Sèwvitè a Jéova an tan lontan té sav kè jan-la Jéova ka rézonné la lontan pli bon. Pa ègzanp, menmsi yo té lévé Moyiz « adan tout sajès a sé Éjipsyen-la », i té sav kè sé owa Jéova i té’é touvé vré sajès-la (Akt 7:22 ; Sòm 90:12). Sé pousa i mandé Jéova : « Fè-mwen konnèt jan ou ka aji » (Ègz. 33:13). Moyiz té ka lésé Jéova aji anlè sa i té ka pansé, kifè Jéova sèvi èvè-y on fason èstraòwdinè pou akonpli volonté a-y. Adan Pawòl a-y, Jéova onoré Moyiz lè i di kè sété on nonm ki té ni on gran fwa (Ébr. 11:24-27).

12. Asi ki biten Pòl té ka bazé rézònman a-y ?

¹² Lapòt Pòl té on nonm entélijan é i té fè gran lékòl. I té sav palé Ébré é Grèk (Akt 5:34 ; 21:37, 39 ; 22:2, 3). Kanmenmsa, pou sav si on biten té bon oben si i pa té bon, i pa té ka bazé-y asi sajès a mond-la. I té ka rézonné parapòt  a sa Lézékriti té ka di (li Akt 17:2 ; 1 Korentyen 2:6, 7, 13). Sé pousa, Jéova béni sèwvis a-y onlo é Pòl té ka atann-li a ni on rékonpans étèwnèl (2 Tim. 4:8).

13. Poukwa nou pé di kè sé a nouchak dè fè éfò pou vwè léchòz menmjan ki Jéova ?

¹³ Asiré pa pétèt, jan-la Jéova ka rézonné la lontan pli bon ki ta mond-la. Si nou ka suiv prensip a Bondyé, nou ké vréman éré é vi an nou ké bèl. Men Jéova pa ka fòsé-nou a ni menm lidé ki-y. Ki sé « èsklav fidèl é prévwayan » la, ki sé sé ansyen-la, yo ponyonn pa ni dwa kontwolé lèspri an nou (Mat. 24:45 ; 2 Kor. 1:24). Byen okontrè, sé a nouchak dè fè éfò pou vwè léchòz menmjan ki Jéova. Kijan nou pé fè sa ?

14, 15. a) Asi ki biten fò-nou pran tan réfléchi, si nou vlé vwè léchòz kon Jéova ? b) Poukwa sa enpòwtan kè nou pa lésé lidé a mond-la détenn asi nou ? Bay on ègzanp.

¹⁴ Adan Women 12:2, nou ka li : « Pa lésé mond-lasa détenn anlè zòt ankò, men kontinyé chanjé mantalité a zòt pou transfòwmé-zòt, pou zò pé sa vérifyé zòtmenm ka volonté a Bondyé yé, on volonté ki bon, ki agréyab, é ki pawfé. » Vèwsé-lasa ka montré kè kèlkèswa sa ki té ka aji asi lèspri an nou avan nou vin konnèt lavérité, nou pé chanjé mantalité an nou pou i korèsponn toujou plis èvè mantalité a Bondyé. Sé on vérité, ni dé biten nou érityé dè fanmi an nou ki oblijé ka aji asi jan nou ka pansé. Ni dé sitiyasyon kè nou viv ki ka aji menmjan la asi nou. Men toujou ni mwayen chanjé mantalité an nou. Sé siwtou sèlon sa nou ka chwazi mété an lèspri an nou kè mantalité an nou ké chanjé. Si nou ka rété réfléchi asi jan Jéova ka pansé, nou ké pé konstaté kè jan i ka pansé toujou bon, é tou natirèlman, sa ké ban-nou anvi pansé kon-y.

¹⁵ Pawkont, si nou vlé chanjé mantalité an nou é si nou vlé rivé a vwè léchòz kon Jéova ka vwè-yo, ni ondòt biten a fè. Nou pa dwèt lésé mond-la détenn asi nou. Kivédi, nou pa dwèt gadé, ni li, ni kouté dé biten ki pa annakò èvè lidé a Bondyé. An-nou pran on ègzanp. On moun ka chèché a ni on méyè santé. Pousa, i ka manjé manjé ki pé ba-y bon vitamin. Men tout éfò-la i ka fè la pa’a sèvi ayen, si anmenmditan i ka manjé manjé gaté. Sé menm biten osi, si nou ka fè éfò pou nou aprann ni menm lidé ki Jéova, é anmenmditan, nou ka lésé lidé a mond-la détenn asi nou, sa pé ké sèvi ayen.

16. Kont ki biten fò-nou pwotéjé-nou ?

¹⁶ Ès ni mwayen pa ni pon kontak èvè lidé a mond-la ? Non, sa pa posib. Ki nou vé ki nou vé pa, nou ké toujou an kontak èvè lidé a-y, pas nou ka viv adan mond-la (1 Kor. 5:9, 10). Menm lè nou ka préché, nou ka kontré moun ki ka palé-nou dè lidé é dè kwayans ki pa bon. Men, nou pa oblijé lésé sé lidé-lasa détenn asi nou, é nou pa oblijé aksèpté-yo. Kon Jézi té ka fè, fò-nou rèfizé lidé a mond-la tousuit pou yo pa rantré an lèspri an nou, kon Satan té’é vlé. Nou pé pwotéjé-nou osi lè nou pa ka rété an kontak initilman èvè sa mond-la ka pansé (li Pwovèb 4:23).

17. Kijan nou pé évité mété-nou an kontak èvè lidé a mond-la ?

¹⁷ Pa ègzanp, fò-nou fè atansyon lè nou ka chwazi zanmi an nou. Labib ka avèti-nou kè si nou ka frékanté moun ki pa ka sèvi Jéova, mantalité a yo ké détenn asi nou (Pwov. 13:20 ; 1 Kor. 15:12, 32, 33) Fò-nou fè atansyon lè nou ka chwazi anmizman an nou osi.  Ni sa ki ka fè piblisité ba dé biten kon téori a lévolisyon, ba vyolans oben ba péché sèksyèl. Lè nou ka rèfizé sé lidé-lasa, nou ka anpéché lidé ki « kont konésans a Bondyé » pwazonné lèspri an nou (2 Kor. 10:5).

18, 19. a) Èvè ki lidé a mond-la fò-nou véyé-nou ? b) Ki kèsyon nou dwèt pozé-nou, é poukisa ?

¹⁸ Lèwvwè sé lidé ki lanmòd é ki pa ka sanm sa yo mové, fò-nou véyatif osi. Fò-nou sav rèkonnèt-yo é fò-nou évité-yo. Pa ègzanp, an télé-la, ni dé rèpòwtaj ki fèt on jan pou soutyenn lidé a moun ki ka fè politik. Ni dòt ki ka montré vi a moun ki réyisi swadizan. An réyalité, sé rèpòwtaj-lasa ka soutyenn òbjèktif kè lèmond enmé. Ni fim é ni liv ka ankourajé a rézonné konsa : « mwen prèmyé », « fanmi an mwen ka pasé avan ». Sé lidé-lasa ka parèt byen entérésan ; ou pé ni lenprésyon osi kè sa toutafè nòwmal é kè on moun andwa rézonné konsa. Men jan-la mond-la ka pansé la pa ka tchenn kont dè sa Labib ka di : pou nou èvè fanmi an nou vréman éré, fò lanmou an nou pou Jéova prèmyé douvan an vi an nou (Mat. 22:36-39). Menm adan kont pou timoun ki ka sanm sa yo byen, ou pé touvé dé lidé ki piti-a-piti pé menné on timoun a aksèpté on konpòwtèman ki pa pwòp.

¹⁹ Sa pa vlé di kè sé défandi anmizé. Men nou dwèt mandé-nou : « Ès an kapab rèkonnèt on lidé a mond-la, menmsi i pa’a sanm sa i mové ? Ès an ka pran tout prékosyon an mwen pou désèrten liv oben désèrten émisyon an télé-la pa détenn asi mwen é asi timoun an mwen ? Ès an ka édé timoun an mwen a vwè léchòz menmjan ki Jéova, pou lidé a mond-lasa pa détenn asi yo ? » Si nou sav byen ki diférans ki ni ant jan Jéova ka pansé é jan mond-la ka pansé, nou pé ké lésé mond-lasa détenn anlè nou.

20. Sa ki ka détenn asi nou ka dépann dè kibiten ?

²⁰ Sonjé sa byen : sé yenki dé koté tousèl enfòwmasyon ka sòti. Swa yo ka vin dè Jéova, swa yo ka vin dè mond a Satan. Kilès adan yo ki ka aji asi-w ? Sa ka dépann dè ola ou kay chèché enfòwmasyon. Si ou dakò èvè pansé a mond-la, mond-la ké détenn asi-w, é ou ké mété-w ka pansé é ka aji kon sé moun-la ki an mond-la. Sé pousa sa enpòwtan toubònman kè nou fè atansyon lè nou ka chwazi sa nou ka gadé, sa nou ka li, sa nou ka kouté, é sa nou ka mèt andidan lèspri an nou.

21. Ka nou ké vwè adan awtik-la ki ka vin la ?

²¹ Kon nou vwè, pou mantalité an nou korèsponn toujou plis èvè mantalité a Jéova, apatoudi rèfizé mové lidé a mond-la. Fò-nou pran tan réfléchi osi asi sa Jéova ka pansé pou nou pé sa vwè léchòz menmjan ki-y. Nou ké vwè kijan nou pé fè sa adan awtik-la ki ka vin la.