1, 2. a) Ki travay Jézi mété douvan adan vi a-y, é poukwa ? b) Ka pou nou fè pou « travay ansanm-ansanm èvè Bondyé » toujou plibyen ?

JÉZIKRI té ka fè chawpant, é i té ka anségné bon nouvèl-la (Mawk 6:3 ; Wom. 15:8). Kò a-y té bon toubònman adan toulédé aktivité-lasa. I aprann mannyé zouti pou fè biten an bwa, é i té konnèt Lézékriti byen toubònman. I sèvi èvè sa i aprann adan Pawòl a Bondyé pou fè moun ki pa fè gran lékòl konprann sé vérité-la ki adan-y la (Mat. 7:28 ; Lik 24:32, 45). Lè i té ni 30 an, i arété fè chawpant pou fè ondòt travay pli enpòwtan, prédikasyon-la. I di kè on rézon kifè Bondyé voyé-y si latè, sété pou « anonsé bon nouvèl a wayòm a Bondyé » (Mat. 20:28 ; Lik 3:23 ; 4:43). Kifè, adan vi a-y, i mété travay-lasa douvan é i té vlé kè dòt moun fè travay-lasa osi (Mat. 9:35-38).

² Pétèt nou pa chawpantyé, men noutout ka anségné bon nouvèl-la. Piskè nou ka fè sa, nou pé di kè nou ka « travay ansanm-ansanm èvè Bondyé ». Ou ka tou konprann kè travay-lasa enpòwtan toubònman ! (1 Kor. 3:9 ; 2 Kor. 6:4). Nou sav kè « sa ki an nannan a pawòl a [Jéova], sé vérité » (Sòm 119:159, 160). Sé pousa, lè nou ka préché, nou ka fè atansyon pou nou « èspliké pawòl a vérité-la byen konm i fo » (li 2 Timoté 2:15). Kifè, nou toujou ka chèché a mannyé Bib-la plibyen, pas sé pli gwo zouti nou ni pou anségné lavérité asi Jéova, asi Jézi é asi Wayòm-la. Pou kò an nou vin plibon  adan prédikasyon-la, òwganizasyon a Jéova ka ban-nou dòt zouti enpòwtan. Fò-nou aprann sèvi èvè yo byen osi. Nou ka touvé sé zouti-lasa adan sa nou ka kriyé « bwèt a zouti pou anségné ».

3. Ki òbjèktif pou nou ni pannan ti moman-la ka rété-nou la, é kijan Akt 13:48 ka édé-nou fè sa ?

³ Pétèt ou ka mandé-w poukwa nou chwazi non-lasa, « bwèt a zouti pou anségné », é nou pa mèt « bwèt a zouti pou préché ». Lè on moun ka « préché », i ka anonsé on mésaj. Men lè i ka « anségné », i ka fè on moun konprann mésaj-lasa é i ka fè-y désann an tchè a-y, pou sa pousé-y a mèt an pratik sa i ka aprann. Pa’a rété-nou onlo tan adan sistèm-lasa. Alò, fò-nou chèché a koumansé étid biblik é anségné moun lavérité pou yo vin disip a Jézikris. Pou sa, fò-nou chèché « toutmoun ki [...] ni mantalité-la ki fo la pou ni lavi étèwnèl », é édé-yo sèvi Jéova. Sé on travay pou nou pran oséryé (li Akt 13:44-48).

4. Kijan nou pé touvé moun « ki [...] ni mantalité-la ki fo la pou ni lavi étèwnèl » ?

⁴ Kijan nou pé touvé moun « ki [...] ni mantalité-la ki fo la pou ni lavi étèwnèl » ? Pou sé prèmyé krétyen-la, sèl mwayen ki té ni pou touvé sé moun-lasa, sété préché. Jézi té di-yo : « Lè zò ké rantré adan on vil oben on vilaj, chèché on moun ki byen dispozé pou kouté mésaj a zòt » (Mat. 10:11). Sé menm biten pou nou fè jòdijou. Nou sav byen kè si on moun ni òwgèy, oben si i pa ka mélé-y an Bondyé, i pé’é gè kouté bon nouvèl-la. Nou ka chèché moun ki sensè, ki ka montré-yo toupiti douvan Bondyé é ki vréman vlé konnèt lavérité. Nou pé konparé sa nou ka fè pou chèché sé moun-lasa, èvè travay a chawpantyé la Jézi té ka fè la. Pou i té fè on mèb, on pòt, on jouk, oben ondòt biten, fò i té touvé bwa-la ki té fo la. Aprésa, fò i té sèvi èvè zouti i té ni é èvè sa i té sav fè, pou i té fè travay-lasa. Menmjan-la jòdijou, nou ka koumansé pa touvé moun ki sensè. Aprésa, nou ka sèvi èvè zouti nou ni é èvè sa nou aprann, pou édé-yo vin disip a Jézi (Mat. 28:19, 20).

5. Ka nou bizwen sav asi zouti ki adan bwèt a zouti an nou ? Bay on ègzanp (gadé prèmyé imaj a awtik-la).

⁵ Adan on bwèt a zouti, chak sé zouti-la ni wòl a-y. Pa ègzanp, an-nou gadé èvè ki zouti Jézi sèvi pou fè travay a chawpantyé a-y *. I té bizwen zouti pou miziré, pou maké, pou koupé, siyé, pèsé, é pou tayé sé pyès bwa-la. I té bizwen zouti osi pou i té mété sé pyès bwa-la a nivo, pou i té mété-yo aplon é pou kolé-yo ansanm. Menmjan-la, adan bwèt a zouti an nou pou anségné, chak sé zouti-la ni on wòl byen prési. Alò, an-nou gadé ka ki adan bwèt a zouti an nou pou sav kijan pou nou sèvi èvè chak sé zouti-la.

6, 7. a) Kijan ou ka sèvi èvè sé kat jw.org la ? b) Sé envitasyon-la pou vin réinyon ni dé òbjèktif. Kilès ?

⁶ Kat jw.org. Yo toupiti, men yo vréman itil pou fè moun sav kimoun nou yé é pou voyé-yo anlè sit entèwnèt an nou jw.org. Èvè sit-lasa, sé moun-la pé konnèt-nou tibwen plibyen é yo pé jous mandé on étid biblik. Alajouné jòdi, pliski 400 000 moun ja mandé on étid biblik asi jw.org, é chak jou, nou ka risivwè plizyè santenn dèmann ! Ès ou toujou ni déotwa kat jw.org anlè-w, pou pé sa palé ba moun ou ka rankontré ?

⁷ Envitasyon. Mi sa nou ka li anlè-y : « Nou ka envité-w étidyé Labib èvè  Témwen a Jéova. » É envitasyon-la ka présizé kè ou pé fè-y swa « pannan réinyon an nou », swa « èvè on moun ka anségné-w ». Kifè, sé envitasyon-la ka pèwmèt moun konnèt kimoun nou yé. Men anplisdisa, yo ka ankourajé « séla ki ka rann-yo kont ka manké-yo èspirityalité » étidyé Labib èvè nou (Mat. 5:3). Men, ki yo ka étidyé Labib, ki yo pa ka étidyé-y, nou ka akéyi toutmoun ki ka vin réinyon bra gran wouvè. Konsa, yo ké pé dékouvè yomenm kè ni on pakèt biten yo pé aprann adan Labib.

8. Poukwa sa enpòwtan kè nou kontinyé envité moun adan réinyon an nou, menmsi sé onsèl fwa yo ka vin ? Bay on ègzanp.

⁸ Sa enpòwtan kè nou kontinyé envité moun adan réinyon an nou, menmsi sé onsèl fwa yo ka vin. Poukwa ? Konsa, yo ké pé vwè kè Témwen a Jéova ka anségné vérité-la ki an Bib-la é kè yo ka édé moun konnèt Bondyé, alòskè dòt rèlijyon pa ka fè sa (Iz. 65:13). Sé sa Rèy é Linda, on misyé é madanm a-y ki ka rété o Zétazini, konstaté ni déotwa lanné dè sa. Yo té ka kwè an Bondyé é yo té anvi konnèt-li plibyen. Kifè, yo désidé sèvi Bondyé adan on rèlijyon. Adan vil-la yo té ka rété la, yo pasé adan chak sé légliz-la, yonn apré lòt. É a pa yonndé tousèl i té ni ! Dépi odépa, yo té di kè yo té’é chwazi rèlijyon a yo parapòt a dé biten : fò-yo té aprann on nouvo biten chakfwa yo té alé, é fò sé moun-la an légliz-la té abiyé kon dé moun ki ka sèvi Bondyé. Sa pran plizyè lanné pou yo fè tout sé légliz-la, magrésa yo pa jen touvé sa yo té ka chèché. Yo pa aprann ayen menm, é moun ki té adan sé légliz-la pa té abiyé kon i té fo pou sèvi Bondyé. Lè yo sòti adan dènyé légliz-la yo té prévwa fè la, Linda ay travay é Rèy rantré akaz a-y. Pannan i té an chimen, Rèy vwè on Sal di Wayòm é i di : « An té’é byen rantré la pou gadé ka i ka pasé ! » Asiré pa pétèt, pa té ni méyè èkspéryans ki sila ! Toutmoun té janti, yo mété-y alèz a-y é yo té byen abiyé menm. Rèy sizé douvan, an prèmyé ranjé-la é i té kontan sa i aprann toubònman ! I té kon misyé-la Pòl té ka palé la, ki vin pou prèmyé fwa adan on réinyon krétyèn é ki di : « Bondyé vréman èvè zòt » (1 Kor. 14:23-25). Alò, Rèy vin chak dimanch. Aprésa, i koumansé vin réinyon lasimèn osi. Linda pa tadé a fè kon-y, é alòskè yo té ja ni pliski 70 an, yo koumansé étidyé Labib é yo pran lèbatèm.

9, 10. a) Kijan ou ka sèvi èvè sé trak-la pou koumansé on ti kozé èvè on moun ? b) Èspliké kijan pou-w sèvi èvè trak-la Ka Wayòm a Bondyé yé ?.

⁹ Trak. Adan bwèt a zouti an nou, nou ni uit trak. Sa fasil dè sèvi èvè yo, é yo vréman itil pou koumansé on ti kozé. Dépi sé trak-la koumansé parèt an 2013, nou ja enprimé senk milya. Sa ki byen èvè sé zouti-lasa, sé kè lè ou konnèt sèvi èvè yonn, ou konnèt sèvi èvè yotout ! Kijan ou pé sèvi èvè on trak pou koumansé on ti kozé èvè on moun ?

¹⁰ Imajiné ou chwazi sèvi èvè trak-la Ka Wayòm a Bondyé yé ?. Ou pé montré moun-la kèsyon-la ki asi prèmyé paj a trak-la é ou pé di-y : « Ès ou ja mandé-w ka Wayòm a Bondyé yé ? Sèlon vou, sé... » Mandé-y adan sé twa répons-la yo ka pwopozé la, kilès i té’é chwazi. Olyé ou di-y si répons a-y bon oben si i pa bon, montré-y andidan a trak-la pati-la yo ka kriyé « Mi sa Labib ka di », é li Danyèl 2:44 é Izayi 9:6. Pou bout ti kozé-la, pozé-y kèsyon-la « Kijan lavi ké yé anba Wayòm a Bondyé ? », ki ka touvé-y an do a trak-la anba soutit-la « Réfléchi si sa ».  Pwochen fwa ou ké vin, ou ké pé réponn a kèsyon-lasa. Pa oubliyé kè ou pé sèvi osi èvè kèsyon 7 a bwochi-la Bon nouvèl ki ka vin dè Bondyé !. Yo ka palé dè-y adan dènyé paj a trak-la. Bwochi-lasa, sé on zouti nou ka itilizé pou nou koumansé étid biblik.

11. Ka nou ka touvé adan jounal an nou ? É ka pou nou sav asi yo ?

¹¹ Jounal. Pa ni pon jounal yo pibliyé é yo tradui pliski Tou dè Gad la é Réveillez-vous !. Konm sé dé jounal ki ka parèt toupatou si latè, anlè prèmyé paj a sé jounal-lasa, ou ka touvé dé tèm ki fèt pou entérésé tout sòt dè moun. Nou dwèt itilizé sé zouti-lasa pou édé moun entérésé-yo a sa ki pli enpòwtan. Men avan nou rivé fè sa, fò-nou sav pou ki jan dè moun sé jounal-lasa fèt.

12. a) Ba ki moun Réveillez-vous ! fèt, é ki òbjèktif a-y ? b) Ki bon rézilta ou trapé èvè zouti-lasa dènyéman ?

¹² Réveillez-vous ! sé on jounal ki fèt pou moun ki pa konnèt gran zafè asi Labib, oben ki pa konnèt-li ditou. Pétèt sé moun-lasa pa konnèt ayen asi sa Jézikri anségné, pétèt yo pa ni konfyans adan larèlijyon, oben yo pa sav kè Labib pé ba-yo on bèl pal adan vi pèwsonèl a yo. Yonn adan pli gwo òbjèktif a Réveillez-vous !, sé ba moun prèv kè Bondyé ka ègzisté pou yo pé sa kwè adan-y (Wom. 1:20 ; Ébr. 11:6). I ka édé-yo osi a ni fwa kè Labib « sé vréman [...] pawòl a Bondyé » (1 Tés. 2:13). Pou lanné 2018, mi tit a sé twa niméwo-la : « Le chemin du bonheur », « 12 clés du bonheur familial » é « De l’aide pour les endeuillés ».

13. a) Édisyon piblik a Tou dè Gad la fèt ba ki moun ? b) Ki bon rézilta ou trapé èvè zouti-lasa dènyéman ?

¹³ Tou dè Gad la (édisyon piblik) ka èspliké sa Labib ka anségné ; i fèt pou moun ki ja ni on ti rèspé pou Bondyé é pou Pawòl a-y. Pétèt yo konnèt Labib tibwen, men yo ni difikilté pou konprann sa i ka anségné (Wom. 10:2 ; 1 Tim. 2:3, 4). Pou lanné 2018, mi tit a sé twa niméwo-la : « La Bible : actuelle ou dépassée ? », « Que nous réserve l’avenir ? » é « Dieu se soucie-t-il de vous ? ».

14. a) Ki òbjèktif a sé kat vidéo-la ki adan bwèt a zouti an nou ? b) Ki bon rézilta ou trapé èvè sé vidéo-lasa ?

¹⁴ Vidéo. A épòk a Jézi, on chawpantyé té ka sèvi yenki èvè zouti ki té ka fè men a-y travay onlo. Men aprézan, sa ki ka travay bwa ka sèvi èvè zouti élèktrik osi kon : si élèktrik, pèwsèz, ponsèz, machin pou klouwé, é dòt machin ankò. Menmjan jòdila, nou ni piblikasyon ki enprimé, men nou ni osi dé bèl vidéo nou pé montré sé moun-la. Adan bwèt a zouti an nou, ou ka touvé kat adan yo : Étidyé Labib, poukisa ?, On lèson biblik : kijan sa ka pasé ?, Ka ki ka fèt adan on Sal di Wayòm ? é Témwen a Jéova : Kimoun nou yé ojis ?. Lè sé prèmyé fwa ou ka jwenn on moun, sé vidéo-la ki ka diré mwens ki dé minit pé fè on bèl travay. Séla ki pli long la pé sèvi si ou jwenn on moun ki ni tibwen plis tan, oben lè ou ka viré vwè on moun. Sé vidéo-lasa, sé dé bèl zouti toubònman pou ba moun anvi étidyé Labib é vin an réinyon an nou.

15. Ki éfé sa pé ni asi on moun si i gadé on vidéo adan pwòp lang a-y ? Bay on ègzanp.

¹⁵ An-nou gadé sa ki rivé on sè. I rankontré on madanm ki sòti Mikronézi ki té ka palé on lang yo ka kriyé yapwa. I té sòti koumansé montré-y vidéo-la Étidyé Labib, poukisa ? adan lang a-y, é madanm-la mété-y ka di : « Men sé lang  an mwen. An pa ka rivé kwè sa ! Asi jan i ka palé, an ka vwè sé on moun ki sòti an péyi an mwen. I ka palé menm lang ki mwen ! » Aprésa, i di kè i kay li é i kay gadé tousa ki ni adan lang a-y asi jw.org (konparé èvè Akt 2:8, 11). Mi sa ki rivé ondòt sè ki ka rété o Zétazini èvè menm vidéo-la. I voyé on adrès entèwnèt ba nivé a-y ki té ka rété ondòt koté, pou i pé sa gadé menm vidéo-lasa adan lang a-y. Pou i té réponn tant a-y, mi sa nivé-la ékri adan on mésaj entèwnèt : « Ni on mòso a vidéo-la an touvé entérésan toubònman. Sé lè i ka èspliké kè ni on puisans dyabolik ki ka dominé mond-la. An mandé on étid biblik. » É on ti présizyon nou pé bay, sé kè nivé-la ka rété on koté nou pé pa sèvi Jéova jan nou vlé.

16. Ki wòl a sé bwochi-lasa a) Kouté Bondyé : Ou ké viv pou touttan, b) Bon nouvèl ki ka vin dè Bondyé ! é c) Kimoun ki ka fè volonté a Jéova ?.

¹⁶ Bwochi. Kijan ou pé anségné on moun lavérité si i pa’a li byen oben si pa ni pon piblikasyon an lang a-y ? Nou ni zouti-la ki fo la : sé bwochi-la Kouté Bondyé : Ou ké viv pou touttan *. Anplisdisa, nou ni bwochi-la Bon nouvèl ki ka vin dè Bondyé !, ki sé on zouti-filé pou koumansé on étid biblik. Ou pé montré on moun sé 14 tèm-la ki an do a bwochi-la é mandé-y kilès i préféré. Aprésa, koumansé on étid dirèktèman asi tèm-la i chwazi la. Ès ou ja éséyé métòd-lasa lè ou ka viré vwè on moun ? Adan bwèt a zouti an nou, twazyèm bwochi-la sé Kimoun ki ka fè volonté a Jéova ?. I ka fè sé étidyan-la konnèt òwganizasyon an nou. Cahier pour la réunion Vie chrétienne et ministère a Maws 2017 ka èspliké kijan pou sèvi èvè-y.

17. a) Ki òbjèktif a chak sé liv-la ki fèt pou étidyé la ? b) Si on étidyan ka pran batèm alòskè i po’o fin toulédé liv-la, ka fò i kontinyé fè é poukisa ?

¹⁷ Liv. Lè ou koumansé on étid èvè on bwochi, a nenpòt ki moman ou pé kontinyé èvè liv-la Ka Labib ka aprann-nou ?. Zouti-lasa pé édé moun konnèt plis asi ansègnman dè baz a Labib. Si étidyan-la fin liv-la é kè i fè progré, ou pé kontinyé fè étid a-y adan liv-la Restez dans l’amour de Dieu. Zouti-lasa ké montré étidyan-la kijan pou i mèt an pratik prensip a Labib adan vi a-y. Sonjé : menmsi i pran batèm, fò i kontinyé étid a-y jiskatan i fin toulédé liv-la. Sa ké édé-y konsolidé fwa a-y an Jéova é sa ké édé-y rété fidèl (li Kolosyen 2:6, 7).

18. a) 1 Timoté 4:16 ka ankourajé-nou a fè ki biten, é ki rézilta sa ké pòté ? b) Ki òbjèktif pou nou ni, lè nou ka sèvi èvè bwèt a zouti an nou pou anségné ?

¹⁸ Antankè Témwen a Jéova, nou ni on rèsponsabilité. Fò-nou préché « mésaj a lavérité, bon nouvèl-la ». Sa pé édé moun ni lavi étèwnèl (Kol. 1:5 ; li 1 Timoté 4:16). Pou édé-nou fè sa, òwganizasyon-la ka ban-nou on bwèt a zouti ki ni ègzaktèman sa nou bizwen (gadé «  Bwèt a zouti an nou pou anségné »). An-nou fè tousa nou pé pou sèvi èvè sé zouti-lasa kon i fo. Sé chak proklamatè ki ka désidé ki piblikasyon i ké pwopozé, é a ki moman i ké fè-y. Men nou pa la sèlman pou nou ba moun piblikasyon ; é nou pa ka ba moun piblikasyon an nou si mésaj-la pa ka entérésé-yo. Sé moun ki sensè, ki ka montré-yo toupiti douvan Bondyé, ki vlé vréman konnèt Bondyé, ki « ni mantalité-la ki fo la pou ni lavi étèwnèl », nou vlé édé pou yo vin disip a Jézi (Akt 13:48 ; Mat. 28:19, 20).