1. Kijan sèwvitè a Jéova ka montré kè yonn enmé lòt ?

SÈWVITÈ a Jéova sé onsèl gran fanmi é sé lanmou ki ka soudé-yo (1 Jan 4:16, 21). Défwa, yo ka fè san sòti an wòch pou frè é sè a yo. Men pli souvan ki rarman, ou ka vwè lanmou a yo adan dé tibiten kon on tipawòl janti, oben on jès ki plen bonté. Lè nou ka fè atansyon a jan nou ka aji èvè lézòt, nou ka imité Pap’an nou ki an syèl-la (Éféz. 5:1).

2. Jézi aji èvè menm lanmou ki Papa-y. Kijan i fè sa ?

² Jézi imité Papa-y a san pou san. I toujou té ka aji èvè lézòt épi bonté. I di : « Vin owa mwen, zòtout ki las é ki ka pòté on chaj ki lou, é an ké konsolé-zòt » (Mat. 11:28, 29). Lè nou ka « sousyé-nou dè piti-la », oben lè nou ni « konsidérasyon pou sa ki fèb », nou ka imité Jézi. Sa ka fè Jéova plézi é tchè an nou kontan (Sòm 41:1 ; Nouvelle Bible Segond). An-nou vwè kijan nou pé ni konsidérasyon pou moun ki an fanmi an nou, pou frè é sè ki an kongrégasyon an nou, é pou moun nou ka jwenn an prédikasyon.

3. Kijan on mari ka montré kè i ni konsidérasyon pou madanm a-y ? (gadé prèmyé imaj a awtik-la).

³ On mari dwèt ni konsidérasyon pou moun ki an fanmi a-y. I dwèt bay lègzanp adan domenn-lasa (Éféz. 5:25 ; 6:4). Labib ka di sé mari-la kè fò-yo chèché a « konprann » madanm a yo, kivédi fò-yo « montré yo ni konsidérasyon pou yo » (1 Pyè 3:7 ; nòt). On mari ki ka konprann madanm a-y sav byen kè, adan onlo domenn, yo pa menm biten, men kè a pa pousa madanm a-y ni mwens valè ki-y (Jén. 2:18). I ka tchenn kont dè sa i ka rèsanti, i ka onoré-y é i ka rèspèkté-y. On sè ki ka viv Kanada ka di dè mari a-y : « I pa jen ka konsidéré kè sa an ka rèsanti sé ti zafè. I ka pran tan a-y pou kouté-mwen. Lè i ka édé-mwen korijé fason an ka vwè on biten, i ka fè-y èvè onlo dousè. »

4. Kijan on mari ka montré kè i ni konsidérasyon pou madanm a-y, adan konpòwtèman a-y èvè dòt madanm ?

⁴ On mari ki ka tchenn kont dè sa madanm a-y ka rèsanti pa jen ka fè bas èvè dòt madanm, é i pa ka « gadé [on dòt madanm] on mannyè ki pa dwètèt » nonplis. I pa kay si rézo sosyo pou fè sa, é i pa kay anlè sit Entèwnèt ki pa pwòp (Jòb 31:1). I ka rété fidèl a madanm a-y pas i enmé-y, pas i enmé Jéova é pas i hay sa ki pa bon (li Sòm 19:14 ; 97:10).

5. Kijan on madanm ka montré kè i ni konsidérasyon pou mari a-y ?

⁵ Lè on mari ka suiv ègzanp a chèf a-y, Jézikris, sa pli fasil pou madanm a-y dè ni « on gran gran rèspé » pou-y (Éféz. 5:22-25, 33). Lè mari a-y ni onlo biten a fè an kongrégasyon-la é lè i ni pwoblèm ki ka pran tèt a-y, on madanm ki ka rèspèkté mari a-y ka éséyé konprann sa i ka rèsanti é i ka aji èvè-y épi onlo bonté. On frè ki ka rété Anglètè di : « Défwa, madanm an mwen ka rann-li kont kè ni on biten ki ka pran tèt an mwen pas a pa konsa an yé dabitid. A moman-lasa, i ka suiv prensip-la ki an Pwovèb 20:5 la. Délè, sa vlé di kè fò i ké atann bon moman-la pou an palé sa èvè-y, si sé on biten an pé di-y. »

6. Ka noutout pé fè pou ankourajé sé timoun-la a ni konsidérasyon pou moun ki alantou a yo, é ka sa ké pòté dè bon pou yo ?

⁶ Lèwvwè sé paran-la ni konsidérasyon yonn pou lòt, yo ka ba sé timoun-la on bèl ègzanp. Sé yo osi ki dwètèt aprann timoun a yo kijan pou yo konsidéré lézòt. Pa ègzanp, sé paran-la pé aprann timoun a yo pa kouri lasal. Lèwvwè yo adan on tifèt, sé paran-la pé di timoun a yo lésé frè é sè ki ja ni on tilaj sèvi-yo an prèmyé, lè sé lè a manjé. Ou ka tou konprann kè nouchak an kongrégasyon-la pé ba sé paran-la on pal adan sa. Pa ègzanp, lè on timoun ka sonjé-nou é ka fè on biten pou édé-nou, pétèt si i wouvè pòt-la ban nou, fò-nou félisité-y. Sa ké ankourajé-y é sa ké édé-y konprann kè « on moun ka pli kontan lè i ka bay ki lè i ka rèsèvwa » (Akt 20:35).

7. Kijan Jézi aji èvè konsidérasyon épi on boug soud é ka ègzanp a-y ka aprann-nou ?

⁷ On jou, Jézi té on koté yo té ka kriyé Dékapòl é sé moun-la ki té ka rété la, menné on boug ba-y. Sété « on boug soud, lang a-y té lou » (Mawk 7:31-35). Jézi géri misyé-la, men i pa fè sa douvan toutmoun ; i menné boug-la on koté « apa ». Poukwa ? Pas i byen konprann kè davwa nonm-la té soud, i pa dwèt té ka santi-y alèz lè i té anmitan a on foulmoun. Sé vré, nou pé pa fè mirak. Men nou pé, é nou dwètèt chèché a konprann sa frè é sè an nou ka rèsanti é chèché a sav sa yo bizwen. Lapòt Pòl maké :  « An-nou voyé zyé yonn asi lòt pou yonn pé sa pousé lòt ni lanmou é fè sa ki bèl » (Ébr. 10:24). Jézi konprann sa boug soud la té ka rèsanti, é i aji èvè-y épi bonté. Mi on bèl ègzanp Jézi lésé ban nou !

8, 9. Ka nou pé fè pou montré frè é sè an nou ki ja ni on tilaj oben ki enfim kè nou ni konsidérasyon pou yo ? Bay déotwa ègzanp.

⁸ Aji èvè konsidérasyon épi frè é sè a-w ki ja ni on tilaj oben ki enfim. A pa paskè yo sé dé zouti-filé kè ou ka rèkonnèt sèwvitè a Jéova, men sé lanmou kè yo ni yonn pou lòt ki ka édé-w rèkonnèt-yo (Jan 13:34, 35). Nou enmé frè é sè an nou ki ja ni on tilaj oben ki enfim. Sa ka pousé-nou a fè tousa nou pé pou édé-yo vin réinyon, é pou édé-yo préché. Nou ka édé-yo menmsi yo pé pa fè gran zafè é menmsi sa ka mandé-nou onlo éfò (Mat. 13:23). Mikaèl sé on frè ki an chèz woulant é i ka aprésyé onlo sa fanmi a-y é sa sé frè-la ki an gwoup a prédikasyon a-y ka fè ba-y. I ka di : « Grasa sa yo ka fè ban mwen, an pé ay adan prèstout sé réinyon-la é chak mwa an kay préché. An byen enmé lè an ka fè prézantwa oben lè an ka préché an lari. »

⁹ Adan onlo Bétèl, ou ka touvé frè é sè ki ja ni on tilaj oben ki enfim. Sé rèsponsab-la ka montré kè yo ni konsidérasyon pou yo lè yo ka pran dispozisyon pou édé frè é sè a yo sèvi èvè téléfòn é èvè lèt pou yo préché. Bil, sé on frè ki ni 86 an é i ka voyé lèt ba moun ki ka rété dé koté ki lwen lwen menm. I di : « Nou kontan nou pé sèvi èvè lèt pou nou préché. » Nannsi, ki toupré touché 90 an ka di : « Pou mwen, lè an ka sèvi èvè lèt pou préché, a pa yenki plen on anvlòp. Sé préché an ka préché. Sé moun-la bizwen konnèt lavérité ! » Étèl, ki fèt an 1921, ka di : « Pa ni on jou ka pasé pou an pa ni doulè. Ni dé jou, menm pou mèt on lenj si mwen, sé on bab. » Magrésa, i enmé sèvi èvè téléfòn pou i préché é i ni déotwa bon vizit i ka fè. Bawbara, ki ni 85 an, ka di : « Konm kò-la pa gè bon, sa rèd pou mwen ay préché kaz an kaz. Men lè an ka sèvi èvè téléfòn-la pou préché, an ka pé palé ba sé moun-la. Mèsi Jéova ! » An mwens ki on lanné, on gwoup frè é sè ki ja ni on tilaj fè 1 228 è-d-tan prédikasyon, yo ékri 6 265 lèt, yo pasé pliski 2 000 koudfil, é yo ba moun 6 315 piblikasyon ! Asiré pa pétèt, tout sé éfò-la yo fè la, sa fè Jéova plézi toubònman ! (Pwov. 27:11).

10. Ka nou pé fè pou édé frè é sè an nou pwofité dè réinyon a yo anplen ?

¹⁰ Aji èvè konsidérasyon lè ou réinyon. Si nou ka konsidéré frè é sè an nou, nou ké édé-yo pwofité dè tout pwogram a réinyon-la. Kijan ? Pa ègzanp, nou ké rivé a lè pou nou pa fè-yo pèd fil a réinyon-la. Sé vré, défwa ni dé biten kè nou pa té prévwa ki pé rivé a mèt-nou anrèta. Men si nou ni labitid rivé anrèta, fò-nou éséyé vwè sa nou pé fè pou nou ni tibwen plis konsidérasyon pou frè é sè an nou. On dòt biten pou nou sonjé, sé kè sé Jéova é Jézikris ki ka envité-nou vin réinyon (Mat. 18:20). Sèten si nou rivé a lè, sa ké montré kè nou ni on gran gran rèspé pou yo !

11. Poukwa séla ki ni on pawtisipasyon an réinyon-la dwètèt mété 1 Korentyen 14:40 an pratik ?

¹¹ Si nou ni konsidérasyon pou frè é sè an nou, nou ké suiv on konsèy Bib-la ka ban-nou : « Fò tout biten fèt sèlon sa ki dwètèt é byen annòd » (1 Kor. 14:40). Sé frè-la ki ni on pawtisipasyon an réinyon-la ka suiv konsèy-lasa lè yo ka fin a lè pou yo fin. Konsa, yo ka montré kè yo ni konsidérasyon pou frè-la ki ka vin apré yo la, men osi pou tout kongrégasyon-la. Sé vré, pétèt ni sa ki ni on onlo chimen a fè pou yo rantré akaz a yo. Ni sa, fò-yo ay  pran kaw. Ni dòt ankò, moun-la yo mayé èvè-y la pa Témwen.

12. Poukwa sé ansyen-la mérité kè nou rèspèkté-yo é kè nou enmé-yo ? (gadé karé-la «  Montré kè ou ni konsidérasyon pou séla ki ka dirijé-nou la »).

¹² Sé ansyen-la ka travay rèd an kongrégasyon-la é yo prèmyé douvan an prédikasyon, kifè yo mérité kè nou rèspèkté-yo é kè nou enmé-yo (li 1 Tésalonisyen 5:12, 13). Sèten ou ka aprésyé tousa yo ka fè ba-w. Alò, kolaboré èvè yo é soutyenn-yo pou montré kè ou ni rèkonésans pou yo, pas « yo ka voyé zyé anlè [nou] akontinyé, antankè moun ki ké ni kont a rann » (Ébr. 13:7, 17).

13. Lè nou ka vwè jan Jézi té ka aji èvè sé moun-la, ka sa ka aprann-nou ?

¹³ Adan on pwofési ki anrapò èvè Jézi, Izayi di : « I pé ké kasé wozo-la ki pliyé la é i pé ké étenn mèch-la ki ka voyé lafimé la » (Iz. 42:3). Jézi té enmé sé moun-la onlo é sé pousa i té ka mété-y an plas a yo. Adan on sans, ni dé moun ki té menm biten ki on wozo ki toupré kasé, oben menmjan ki on mèch a lanp ki toupré étenn, kivédi yo té ka santi-yo dékourajé é fèb. Jézi té ka konprann sa yo ka rèsanti, kifè i té ka aji èvè yo épi bonté é èvè pasyans. Jous sé timoun-la té anvi ay owa a-y (Mawk 10:14). Sé vré, nou pé’é pé konprann moun ki an téritwa an nou, ni anségné-yo ègzaktèman, kon Jézi té ka fè-y. Men nou pé montré sé moun-la kè nou ni konsidérasyon pou yo. Nou ké fè atansyon a jan nou ka palé ba yo. Nou ké byen chwazi a ki moman nou kay préché ba yo é nou pé’é pran twòp tan a yo nonplis.

14. Poukwa fò-nou fè atansyon a jan nou ka palé ba sé moun-la ?

¹⁴ Kijan pou nou palé ba sé moun-la ?  Adan sé chèf politik la, sa ki antèt a on rèlijyon é sa ki antèt a sistèm a lajan-la, ni sa ki malonnèt é méchan. É ni milyon é milyon moun yo « kòché é yo pa [...] okipé dè yo » (Mat. 9:36). Kifè, onlo moun pa’a fè ponmoun konfyans é yo pa ni pon èspwa. Sé pousa sé mo-la nou ka itilizé la é ton a vwa an nou dwèt fè sé moun-la santi kè nou ka sousyé-nou dè yo èvè onlo bonté. Byensouvan, si onlo moun anvi kouté-nou, a pa yenki pas nou konnèt mannyé Bib-la byen. Men sé osi paskè nou ka rèspèkté-yo é nou ka sousyé-nou dè yo on mannyè ki sensè.

15. Kijan nou pé montré kè nou ni konsidérasyon pou moun ki an téritwa an nou ?

¹⁵ Ni enpé fason nou pé montré kè nou ni konsidérasyon pou moun ki an téritwa an nou. Pa ègzanp, lè nou ka pozé-yo on kèsyon, fò-nou janti é plen rèspé. Ni on pyonyé ki té ka préché adan on téritwa ki té plen moun timid. Alò, pou yo pa santi-yo jenné, i pa té ka pozé-yo dé kèsyon ki té two rèd pou yo. I pa té ka pozé-yo dé kèsyon kon : « Ès ou konnèt non a Bondyé ? », oben : « Ès ou sav ka Wayòm a Bondyé yé ? ». Olyé i fè sa, i té ka di on biten kon : « Dapré sa an aprann an Bib-la, Bondyé ni on non. Ès an pé montré-w li ? » Nou ka tou konprann kè a pa toupatou nou ké pé sèvi èvè métòd-lasa, pas toutmoun pa menm biten é kilti a yo diféran osi. Men toutlè, fò-nou aji èvè moun ki an téritwa an nou épi onlo bonté é èvè onlo rèspé. Pou nou rivé fè sa, fò-nou aprann konnèt-yo.

16, 17. Kijan nou ka montré kè nou ni konsidérasyon pou moun lè nou ka désidé a) a ki moman nou kay vwè-yo ? b) konmen tan nou ké rété palé èvè yo ?

¹⁶ A ki moman pou nou ay owa sé moun-la ? Lè nou ka préché kaz an kaz, sé moun-la pa ka atann-nou piskè yo pa envité-nou akaz a yo. Sé pousa, sa vréman enpòwtan kè nou ay vwè-yo a on moman yo ké pli fasil a kouté-nou ! (Mat. 7:12). Pa ègzanp, ès moun ki an téritwa a-w enmé lévé tibwen plita lèwikenn ? Si sé wi, ou pé koumansé préché an lari-la, ou pé fè prézantwa, oben ou pé viré vwè moun ou ja vwè é kè ou sav yo ka lévé tibwen pli bonnè.

¹⁷ Konmen tan pou nou rété ka palé èvè sé moun-la ? An jénéral, sé moun-la ni plen biten yo ka fè, kifè lè nou ka viré vwè-yo, sa té’é byen kè nou pa rété two lontan, siwtou si sé koumansé nou ka koumansé ay vwè-yo. Pisimé ou fin on konvèwsasyon rapidman ki ou rété on pakèt tan (1 Kor. 9:20-23). Si lè sé moun-la okipé, yo ka vwè kè nou ka konprann-yo, yo ké pli fasil a palé èvè nou pwochen kou nou ké vwè-yo. Lè nou ka préché, fò toutmoun vwè bèl kalité kè lèsprisen ka pwodui adan nou. Konsa, nou ka vin on moun ki ka « travay ansanm-ansanm èvè Bondyé » poudèbon. Pétèt Jéova ké jous itilizé-nou pou édé on moun konnèt lavérité ! (1 Kor. 3:6, 7, 9).

18. Lè nou ni konsidérasyon pou moun, ki bénédisyon Bondyé ké vidé si nou ?

¹⁸ Alòs, an-nou fè tousa nou pé pou montré kè nou ni konsidérasyon pou moun ki an fanmi an nou, pou moun ki an kongrégasyon an nou, é pou moun nou ka jwenn an prédikasyon. Konsa, Bondyé ké vidé on pakèt bénédisyon anlè nou, dépi konnyéla é dèmen osi. Sòm 41:1, 2 ka di : « Tchè-kontan pou sila ki ka sousyé-y dè piti-la ; Jéova ké sové-y lè jou a malè ké rivé. [...] Moun asi latè ké fè moun sav tchè a-y kontan. »