1. Dè ki biten enpòwtan Jézi palé pannan dènyé swaré-la i pasé la èvè disip a-y ?

JÉZI palé dè lanmou prèskè 30 fwa pannan dènyé swaré-la i pasé la èvè disip a-y. I di-yo fò yonn enmé lòt (Jan 15:12, 17). Tèlman yo té’é enmé-yo fò, toutmoun té ké rèkonnèt kè yo sé vré disip a Jézi (Jan 13:34, 35). Lè Jézi palé dè lanmou, a pa dè on santiman tousèl i té ka palé. I té ka palé dè on lanmou ki fò toubònman é ki pa ka atann ayen an rètou. I di : « Ponmoun pa ni pli gran lanmou ki sila ki ka bay vi a-y pou zanmi a-y. Zò sé zanmi an mwen si zòt ka fè sa an ka mandé-zòt » (Jan 15:13, 14).

2. a) Kijan nou pé rèkonnèt sèwvitè a Bondyé jòdijou ? b) A ki kèsyon nou kay réponn adan awtik-lasa ?

² Sèwvitè a Bondyè ni on lanmou sensè yonn pou lòt, on lanmou ki pa ka atann ayen an rètou, é anplisdisa yo soudé. Jòdijou, sé grasa sa nou pé rèkonnèt kè yo sé pèp a Bondyé (1 Jan 3:10, 11). Toupatou si latè, sèwvitè a Jéova enmé-yo toubònman, kèlkèswa nasyonalité a yo, tribi a yo, lang-la yo ka palé la, orijin a yo oben jan yo lévé ! Men  poukwa lanmou sé on biten ki vréman nésésè jòdijou ? Kijan Jéova é Jézi ka sèvi èvè lanmou pou rann-nou pli fò ? É kijan nou pé enmé lézòt on jan ki ka konsolé-yo é ki ka fòwtifyé-yo ? (1 Kor. 8:1).

3. Nou ka viv dé « tan [ki] rèd ». Ki éfé sa ni asi nou ?

³ Nou ka viv dé « tan ki rèd », é lavi-la « plen èvè malè é èvè tristès » (Sòm 90:10 ; 2 Tim. 3:1-5). Ni onlo moun ki anvi mò tèlman yo ka soufè. Chak lanné, pliski 800 000 moun ka suisidé-yo, kivédi on moun tou lé 40 sègond. Malérèzman, jous ni déotwa frè é sè an nou ki suisidé-yo.

4. An Bib-la ni moun ki di kè yo té anvi mò. Kimoun ésa ?

⁴ An tan a Labib, sèwten sèwvitè fidèl a Bondyé té ka santi-yo tèlman dékourajé kè yo té anvi mò. Pa ègzanp, tèlman Jòb té ka soufè, i di : « An hay vi an mwen ; an pa anvi viv ankò » (Jòb 7:16 ; 14:13). Sa ki rivé Jonas pannan misyon a-y désèvwa-y tèlman kè i di : « Tanprisouplè Jéova, aprézan, woté vi an mwen, paskè an pisimé mò ki rété vivan » (Jon. 4:3). Pwofèt Éli té ni menm santiman-la. I di : « An pé pa ankò ! Jéova, pran vi an mwen » (1 Wa 19:4). Men Jéova té enmé sèwvitè fidèl a-y é i té vlé kè yo viv. I pa rèpwoché-yo santiman-la yo té ni la. Olyé dè sa, i rèba-yo lanvi dè viv pou yo té kontinyé sèvi-y fidèlman.

5. Poukwa frè é sè an nou bizwen nou ba-yo onlo lanmou jòdijou ?

⁵ Jòdijou, ni onlo adan frè é sè an nou ki ka touvé-yo adan dé sitiyasyon ki ka chouboulé-yo toubònman. Kifè, yo bizwen nou ba-yo lanmou. Ni sa, yo ka fè jé èvè yo, é ni sa, yo ka pèwsékité-yo. Ni sa, kolèg-travay a yo ka kritiké-yo é ka malpalé-yo. Oben, ni sa ki las, pas patron a yo ka mandé-yo travay plis é ka mèt bon présyon asi yo. Ni dòt ankò, sé akaz a yo kè yo ni pwoblèm. Pétèt mari a yo oben madanm a yo ki pa Témwen toujou ka kritiké-yo. Akòz dè sa, é pou dòt rézon ankò, onlo frè é sè ka santi kè yo pa ni fòs ankò, é yo ka fin pa kwè kè yo pa vo ayen. Kimoun ki pé ba-yo fòs pou kontinyé ?

6. Kijan Jéova ka ba sèwvitè a-y fòs ?

⁶ Jéova ka trankilizé sèwvitè a-y lè i ka fè-yo sav kè i enmé-yo, kè i ké toujou enmé-yo. Sa ka ba-yo fòs. Éséyé imajiné jan sé Izrayélit-la té kontan lè Jéova di-yo : « Ou vin ni onlo valè pou mwen, an pòté-w anlè, é an enmé-w. [...] Pa pè, pas an èvè-w » (Iz. 43:4, 5). Vou osi, konm ou ka sèvi Jéova, ou pé sèten kè i enmé-w èvè onlo tandrès *. Bib-la ka fè-nou on pwomès : « Konm sé on Dyé ki fò, i ké sové-w. Tèlman i ké kontan-w, jwa a-y ké débòdé » (Sof. 3:16, 17).

7. An ki sans nou pé di kè lanmou a Jéova kon ta on manman ki ka ba timoun a-y tété ? (gadé prèmyé imaj a awtik-la).

⁷ Jéova pwomèt kè i ké soutyenn sèwvitè a-y é kè i ké konsolé-yo, kèlkèswa penn é péripési yo ké pasé. Gadé kijan i palé dè sa i ka rèsanti pou  yo : « Zò ké tété, é yo ké pòté-zòt asi hanch a yo é yo ké fè-zòt maté asi jounou a yo. Menmjan on manman ka konsolé pitit a-y, sé konsa an ké kontinyé konsolé-zòt » (Iz. 66:12, 13). Ou ja vwè jan on timoun kontan lè manman-y ka pòté-y asi hanch a-y é lè i ka fè-y maté asi jounou a-y ? Sa bèl toubònman, pa vré ? Sé imaj-lasa Jéova ka pran pou montré-nou kè i enmé-nou fò, èvè onlo tandrès. Ou ni onlo valè pou-y. Mèt sa fon an tèt a-w ! (Jér. 31:3).

8, 9. Kijan lanmou-la Jézi ni pou nou la pé fòwtifyé-nou ?

⁸ Ni ondòt rézon ki ka fè kè nou sèten Jéova enmé-nou : i té « tèlman [...] enmé lèmond, i bay sèl Gason a-y, pou tout moun ki ka montré yo ni fwa adan-y pa détui men ni lavi étèwnèl » (Jan 3:16). Fò Jézi osi té enmé-nou toubònman, pou i té bay vi a-y pou nou ! É lanmou-lasa ka ban-nou bon fòs ! Bib-la ka pwomèt kè pa menm « tribilasyon [oben] détrès » pé pa « séparé-nou dè lanmou-la Kris ni pou nou la » (Wom. 8:35, 38, 39).

⁹ Défwa nou ka débat anba éprèv ki ka lasi-nou, ki ka fatigé lèspri an nou é ki pé fè-nou pèd jwa an nou adan sèwvis an nou pou Jéova. Adan dé ka konsa, fò-nou sonjé kè Jézi enmé-nou fò ; sa ké ban-nou fòs pou nou tchenbé (li 2 Korentyen 5:14, 15). Menm lè nou adan on gwo éprèv, pa ègzanp, apré on katastròf natirèl, lè yo ka pèwsékité-nou, lè on biten ka désèvwa-nou oben lè nou enkyèt, lanmou-la Jézi ni pou nou la ka édé-nou tchenbé.

10, 11. Kimoun ki dwètèt fòwtifyé moun ki dékourajé ? Èspliké.

¹⁰ Jéova ka sèvi èvè kongrégasyon-la osi pou i pé sa fòwtifyé-nou èvè onlo lanmou. Si nou enmé frè é sè an nou, nou ka montré kè nou enmé Jéova.  Nou ka fè tousa nou pé pou montré-yo kè yo ni onlo valè pou Jéova é kè i enmé-yo (1 Jan 4:19-21). Mi sa lapòt Pòl maké : « Fò yonn kontinyé ankourajé lòt é fò yonn kontinyé fòwtifyé lòt, kon zò ja ka fè-y dayè » (1 Tés. 5:11). Men a pa yenki sé ansyen-la pou fè sa. Noutout an kongrégasyon-la pé fè sa Jéova é Jézi ka fè. Nou pé konsolé frè é sè an nou (li Women 15:1, 2).

¹¹ Adan kongrégasyon-la, ni déotwa frè é sè ki ja fè gwo déprésyon, é pétèt yo bizwen vwè on èspésyalis é suiv on trètman (Lik 5:31). Sé ansyen-la é sélézòt frè é sè la ka rèkonnèt kè yo pa dòktè. Men yo pé ba séla ki malad la on bèl pal lè yo ka suiv konsèy-lasa : « Fò-zòt palé on jan pou pé sa konsolé sa ki dékourajé, soutyenn sa ki fèb, pran pasyans èvè toutmoun » (1 Tés. 5:14). Éséyé mété-w an plas a yo pou konprann sa yo ka rèsanti. Pran pasyans èvè yo, é palé on jan pou pé sa konsolé sa ki dékourajé. Ès ou ka fè éfò pou fòwtifyé lézòt ? Ka ki pé édé-w fè sa plibyen ankò ?

12. On sè vin touvé-y ni plis fòs pas kongrégasyon a-y ba-y onlo lanmou. Kijan sa fèt ?

¹² On sè ki ka viv an Éwòp di : « Délè, an ka santi an té’é suisidé-mwen. Men onlo moun ka soutyenn-mwen. Kongrégasyon-la an adan-y la sové vi an mwen. Sé frè é sè la toujou ka ankourajé-mwen é yo plen lanmou. A pa yotout ki sav kè an ka soufè èvè déprésyon, men yo toujou la èvè mwen. Ni on frè é madanm a-y ki ka pran swen an mwen konsi an sé timoun a yo. An pé konté asi yo 24 si 24. » Sé vré, ni sa ki pé ké pé fè otan ki lézòt. Men noutout pé fè onlo biten pou nou pé sa soutyenn frè é sè an nou ki ka soufè *.

13. Ka pou nou fè pou nou fòwtifyé lézòt ?

¹³ Pran tan a-w pou kouté byen (Jak 1:19). Lè ou ka kouté on frè oben on sè ki dékourajé èvè konpasyon, sé on jès plen lanmou. Éséyé imajiné sa ou té ké rèsanti si ou té an plas a-y. Pou édé-w konprann sa i ka rèsanti pli byen, pozé-y kèsyon san bouskilé-y. Asi figi a-w, fò moun-la vwè kè ou ka sousyé-w dè-y poudèbon. Si lè i ka palé i anvi ba-w onlo détay, pran pasyans é fè éfò pou pa koupé-y. Si ou pran tan a-w pou kouté-y, ou ké konprann sa i ka rèsanti pli byen. Konsa i ké pé fè-w konfyans é i ké pli fasil a kouté-w lè ou ké ka chèché a fòwtifyé-y. Lè frè é sè a-w ka vwè kè ou ka sousyé-w dè yo vréman, sa ka konsolé-yo onlo.

14. Poukwa nou vé pa kritiké lézòt ?

¹⁴ Pa kritiké. Si on moun ki dékourajé ni lenprésyon kè nou ka jijé-y, i ké santi-y pli dékourajé ankò. Sa pé tchouyé tout travay-la nou ka fè la pou pé sa édé-y. « Pawòl moun ka di san réfléchi ka touvé-yo kon koudépé, men lang a moun ki saj ka géri » (Pwov. 12:18). On biten ki sèten, sé kè a pa jen pa èspré nou ké di on moun ki dékourajé on pawòl ki pé rivé a blésé-y. É menmsi a pa pa èspré nou blésé-y, sa pé rivé a fè-y mal kanmenm. Sé pousa fò-nou pran  tan réfléchi avan nou palé ba-y. Pou nou fòwtifyé-y èvè lanmou, fò-nou fè-y santi kè nou ka éséyé konprann vréman adan ki sitiyasyon i yé (Mat. 7:12).

15. Ki zouti filé nou pé itilizé pou konsolé lézòt ?

¹⁵ Sèvi èvè Pawòl a Bondyé pou konsolé lézòt (li Women 15:4, 5). Labib ka vin dè « Dyé-la ki ka ban-nou andirans-la é konsolasyon-la », kifè sa pa ka étoné-nou si nou ka touvé onlo rékonfò adan-y. Anplisdisa, nou ni onlo zouti biblik a dispozisyon an nou, kon Index des publications des Témoins de Jéhovah oben Guide de recherche la. Sé zouti-lasa ké pé édé-nou touvé dé vèwsé oben dé piblikasyon kè nou ké pé itilizé pou pé sa konsolé oben ankourajé frè é sè an nou.

16. Ki kalité nou ké bizwen pou fòwtifyé on frè ki dékourajé ?

¹⁶ Aji èvè tandrès é dousè. Jéova sé « Papa-la ki ka pran penn an nou èvè tandrès é Dyé a tout konsolasyon-la » ; i ni on « konpasyon ki plen tandrès » pou sèwvitè a-y (li 2 Korentyen 1:3-6 ; Lik 1:78 ; Wom. 15:13). Pòl imité Jéova adan domenn-lasa. Sé pousa i sé on bèl ègzanp ban nou. I maké : « Nou vin dous lè nou té èvè zòt, menmjan on manman ka ba timoun a-y tété é ka okipé dè yo èvè tandrès. É konm nou té ni on lanmou ki plen tandrès pou zòt, nou té byen désidé a di-zòt bon nouvèl a Bondyé, men osi a ba-zòt vi an nou menm, pas zò té ni onlo valè pou nou » (1 Tés. 2:7, 8). Lè nou ka aji èvè menm tandrès é menm dousè ki Jéova, pétèt nou ké pé ba on frè rékonfò-la i ka mandé Bondyé la adan priyè a-y.

17. Pou ankourajé frè é sè an nou, kijan pou nou vwè-yo ?

¹⁷ Pa èspéré kè frè é sè a-w aji kon dé moun pawfè. Gadé tèt a-w si zépòl a-w. Si ou ka èspéré kè yo aji kon dé moun pawfè, yo pé rivé a désèvwa-w (Ékl. 7:21, 22). Sonjé sa : Jéova pa jen ka mandé sèwvitè a-y on biten ki two fò ba yo. Si nou ka suiv ègzanp a-y, nou ké pran pasyans èvè lézòt (Éféz. 4:2, 32). Nou pé ké jen ba frè é sè an nou lenprésyon kè yo pa’a fè asé, ni konparé-yo èvè lézòt. Okontrè, fò-nou ankourajé-yo é fò-nou félisité-yo pou sa yo ka fè. Sa ké édé-yo ni tchè-kontan adan sèwvis a yo pou Jéova (Gal. 6:4).

18. Poukwa nou vlé fòwtifyé lézòt èvè lanmou ?

¹⁸ Pou Jéova, chak sèwvitè a-y ni onlo valè. Jézi ka konsidéré-yochak menmjan-la (Gal. 2:20). Konm nou enmé frè é sè an nou onlo, nou vlé aji èvè yo épi tandrès. Nou ka « kouri dèyè biten ki ka mété lapé é dèyè biten ki ka fè yonn fòwtifyé lòt » (Wom. 14:19). A pa ti présé nou présé viv adan paradi-la, on koté ayen pé ké dékourajé ponmoun ankò ! Maladi ké fin, pé ké ni lagè ankò. Moun ké arété mò akoz dè péché-la nou érité la. Moun pé ké pèwsékité moun ankò, pwoblèm an fanmi ké fini, lavi pé ké désèvwa ponmoun ankò. Lè sé mil lanné-la ké bout, toutmoun ké pawfè. Séla ki ké rété fidèl adan dènyé éprèv-la, Jéova ké adòpté-yo antankè gason a-y ki asi latè é yo ké ni « libèté ki plen glwa a timoun a Bondyé » (Wom. 8:21). Alò, an-nou kontinyé aji èvè lanmou-la ki ka fòwtifyé la, pou yonn édé lòt rantré adan mond nouvo la !