TOUPATOU asi latè, sé ansyen-la kontan sé rèsponsabilité-la yo ni la adan pèp a Bondyé. Yo sé on vré bénédisyon pou noutout ! Men pa ni lontan, ni on chanjman ki fèt. Yo mandé sé ansyen-la ki ja ni on bèl laj dè lésé déotwa rèsponsabilité kè yo té ni, ba dé ansyen ki pli jenn. Ka ki chanjé ègzaktèman ?

Nouvo dispozisyon-la sé kè, sé sèwvitè a siwkonskripsyon la é sé frè-la ki fòwmatè adan sé lékòl biblik la ka arété fè sé jan dè sèwvis-lasa lè yo trapé 70 an. Ondòt biten ankò : lè yo ni 80 an, sé frè-la ki koòwdinatè a on komité a filyal oben ki koòwdinatè a on komité a ansyen ka ba dé ansyen ki pli jenn sé rèsponsabilité-lasa. Kijan sé ansyen-la ki ni on bèl èkspéryans réyaji parapòt a chanjman-lasa ? Yo montré-yo fidèl a Jéova é a òwganizasyon a-y !

Kèn, ki té koòwdinatè a on komité a filyal pannan près 49 lanné, di : « An té toutafè dakò èvè désizyon-lasa. Dayè, menmjou-la an vin sav kè té ni on chanjman, an té di  Jéova adan on priyè kè nou té bizwen on koòwdinatè pli jenn. » Ni onlo frè toupatou asi latè ki réyaji menmjan ki Kèn. Konm yo té enmé sa yo té ka fè ba frè a yo, nou ka tou konprann kè, odépa, déotwa adan yo té tibwen tris.

Èspérandyo, ki té koòwdinatè a on komité a ansyen, di : « An té on ti jan tris. » Men i admèt : « An té bizwen tibwen plis tan pou pran swen a santé an mwen. » Kon zò pé imajiné, Èspérandyo ka kontinyé sèvi Jéova fidèlman é, jous alè, i sé on bénédisyon pou kongrégasyon a-y.

É sa ki té oblijé arété sèwvis a yo adan siwkonskripsyon-la ? Alàn, ki té sèwvitè a siwkonskripsyon pannan 38 an, admèt : « Lè yo di-mwen sa, sa chouboulé-mwen ! » Men i ka rèkonnèt kè sé on bon biten dè fòwmé sé jenn frè-la, é i ka kontinyé sèvi Jéova fidèlman.

Risèl ki té ka vizité sé kongrégasyon-la é ki té fòwmatè adan dé lékòl biblik pannan 40 an ka èspliké kè, odépa, sa té on ti jan rèd pou-y é pou madanm a-y. « A pa ti enmé nou té enmé sèwvis an nou, é nou té ka santi kè nou té ni fòs pou nou kontinyé fè-y. » Aprézan, yo ka itilizé fòwmasyon a yo é èkspéryans a yo la yo ka rété la, é frè é sè a kongrégasyon a yo kontan toubònman.

Pétèt sa pa jen rivé-w dè rèsanti sé kalté santiman-la nou sòti vwè la. Men an 2 Samiyèl, ni on istwa ki ké édé-w konprann moun ki pasé pa la.

Sonjé lè Absalon lévé kont papa-y David ki té wa. David lésé Jérizalèm pou chapé jous Maanayim, ki té a lès a Jouden-la. Lè David é sé boug-la ki té èvè-y la rivé, yo pa té ni asé manjé é té ka manké-yo dòt biten ki té nésésè. Ou ka sonjé sa ki pasé ?

Twa moun-donan ki té ka viv an sèktè-la menné matla, nouriti, é tout kalté biten yo té bizwen. Bawzilay té yonn adan yo (2 Sam. 17:27-29). Lè yo rivé about a sé rèbèl-la, David, wa-la, rantré Jérizalèm, é Bawzilay ay èvè-y jous owa Jouden-la. David di-y vin rété Jérizalèm èvè-y. Wa-la di-y kè sé akaz a-y i té’é ka manjé. Apapoudi Bawzilay té bizwen manjé, pas i « té rich toubònman » (2 Sam. 19:31-33). Men David dwèt té ka aprésyé kalité a Bawzilay, é i té vlé bénéfisyé dè tout ti konsèy i té’é pé ba-y. Asiré pa pétèt, sé té ké on bèl privilèj dè viv akaz a wa-la é dè travay pou-y !

Bawzilay té konnèt byen ki limit i té ni é sété on boug ki té ni tèt a-y si zépòl a-y. Sé pousa i fè David sonjé kè i té ni 80 an. Aprésa, i di-y : « Ou ka di an pé vwè ka ki byen é ka ki mal toujou ? » Ka i té vlé di pa la ? Asiré pa pétèt, Bawzilay dwèt vin ni onlo sajès padavwa ni lontan i té asi latè. É i té pé  ba moun bon konsèy toujou, menmjan dé « gran nonm » té ké fè-y plita pou wa Roboam (1 Wa 12:6, 7 ; Sòm 92:12-14 ; Pwov. 16:31). Sé pousa lè Bawzilay palé dè « vwè ka ki byen é ka ki mal toujou », pétèt i té ka sonjé kè akòz dè laj-la, kò a-y pa té bon ankò. I admèt kè, a laj a-y, i pa té ka pran gou a manjé-la é i pa té ka tann vwa a sé chantè-la kon avan (Ékl. 12:4, 5). Kifè, Bawzilay di David pisimé i pran Kimam èvè-y, on jenn boug ki, pétèt, té gason a-y (2 Sam. 19:35-40).

Sa Bawzilay di ka fè-nou sonjé chanjman-la nou palé la an komansman a awtik-la. Lè yo désidé fè chanjman-lasa, nou ka tou konprann kè pa té ni mwayen tyenn kont dè kapasité é dè posibilité a chak sé frè-la yonn pa yonn. Fò-yo té chèché a vwè sa ki té vréman méyè pou tout ansyen ki ja ni on bèl laj toupatou si latè.

Konm yo sav kè yo pé pa fè kon avan, sé ansyen-la ki ni rèsponsabilité dépi lontan rèkonnèt san pwoblèm kè sa té’é byen dè lésé sé rèsponsabilité-lasa ba dé ansyen ki pli jenn, pas kay ni bon travay adan òwganizasyon a Jéova. Adan onlo ka, sé dé frè ki ni on bèl laj ki fòwmé sé pli jenn-la, menmjan sé Bawzilay ki dwèt fòwmé gason a-y, é menmjan lapòt Pòl fè èvè Timoté (1 Kor. 4:17 ; Fil. 2:20-22). Aprézan, sé frè pli jenn-la sé dé « nonm [nou rèsèvwa] konm kado », ki pé édé pou « konstwi kò a Kris » (Éf. 4:8-12 ; konparé èvè Nonb 11:16, 17, 29).

Onlo frè ki ni on laj é ki lésé désèwten rèsponsabilité kè yo té ni, ka pé sèvi Jéova onlo dòt mannyè aprézan.

Marko, ki té sèwvitè a siwkonskripsyon pannan 19 an, ka èspliké : « Adan kon-grégasyon-la, ni dé sè mari a yo pa Témwen. Grasa nouvo sitiyasyon an mwen, an pé entérésé-mwen a sé misyé-lasa. »

Jéraldo, ki té ka vizité sé kongrégasyon-la pannan 28 an di : « Òbjèktif an nou sété dè édé frè é sè ki arété préché é nou té vlé étidyé Labib èvè plis moun ». I di osi kè, jòdila, yo ni 15 étid biblik é kè plizyè frè é sè ki té arété préché ka vin lasal aprézan.

Talè la nou palé dè Alàn. Mi sa i di : « Konnyéla, nou ka pé fè on méyè travay adan prédikasyon-la. Nou enmé fè témwagnaj piblik (prézantwa, préché an lari,..), oben préché adan boutik, adan biwo, la moun ka travay. Nou enmé préché ba vwazen an nou osi. Dayè pou yonn, ni dé adan yo ki vin lasal. »

Si ou sé on frè ki ni kapasité é ki fidèl, é kè yo ba-w ondòt rèsponsabilité, ou pé kolaboré èvè Jéova ondòt jan ankò. Ou pé pawtajé bèl èkspéryans a-w èvè sé jenn frè-la. Nou palé dè Risèl talè la. Mi sa i di : « Jéova ka fòwmé é i ka sèvi èvè dé jenn, kò a yo bon toubònman. Lè yo ka anségné yo ni bon balan é yo ka pòté bon mannèv pou pran swen a sé frè é sè la, é sa ka fè sé frè-la dibyen ! » (gadé karé-la «  Édé sé frè-la ki pli jenn la pou yo pé sèvi èvè tout kapasité kè yo ni »).

Si sa pa’a fè lontan yo ba-w ondòt rèsponsabilité, rété pozitif. Ou travay rèd, é sa ja fè onlo moun dibyen, é ou pé kontinyé fè sa. Onlo moun té enmé-w, é jousalè, sèten ni moun ka aprésyé-w toujou.

Pli enpòwtan-la, sé kè alè ou ni on plas adan tchè a Jéova. I pé’é jen oubliyé tousa « ou fè é lanmou-la ou montré la pou non a-y lè ou té ka sèvi lésen é lè ou ka kontinyé sèvi-yo » (Ébr. 6:10). Vèwsé-lasa ka montré kè a pa yenki sa ou ja fè dan lèpasé Jéova ka sonjé. Ou ni tèlman valè pou Jéova kè nonsèlman i pa ka oubliyé tout sé éfò-la ou ja fè la, men i pa ka oubliyé sa ou ka kontinyé fè nonplis !

 É si chanjman-la nou té ka palé talè la pa ka konsèwné-w dirèktèman ? Pétèt kè i ka konsèwné-w tibwen kanmenm. Ka nou vlé di pa la ?

Asiré pa pétèt, gason a Bawzilay dwèt té ka palé onlo èvè papa-y é i dwèt té ni onlo rèkonésans pou fòwmasyon-la papa-y té ka ba-y la. É pétèt sa té ka rivé-y dè mandé papa-y konsèy. Ki lèson ki ni pou nou ? Si on frè fidèl ki ni on bèl laj, é ki rèsèvwa on nouvo rèsponsabilité, rivé an kongrégasyon a-w, ou pé bénéfisyé dè sajès a-y. Pa ézité mandé-y konsèy. É gadé kijan i ka sèvi fidèlman èvè tousa i aprann dépi lanné é lanné.

Ou sé on ansyen ki ni on bèl laj èvè on nouvo rèsponsabilité ? Ou sé on frè oben on sè ki pé bénéfisyé dè èkspéryans a frè ki ja ni on laj ? Toujou sonjé kè Jéova vréman kontan fidélité a sa ki rété onlo lanné ka sèvi-y é ki ka kontinyé fè-y.