1. Poukwa tchè a moun ki ka sèvi Jéova kontan ? (gadé prèmyé imaj a awtik-la).

TÉMWEN a Jéova sé on pèp ki vréman éré. Lè yo ka jwenn, ki sé an réinyon, adan on lasanblé oben lè yo ka anmizé ansanm, ou ka tann-yo ka ri é ka bay lablag. Poukwa tchè a yo kontan konsa ? Pli gwo rézon-la, sé pas yo konnèt Jéova, pas yo ka sèvi-y é pas yo ka fè onlo éfò pou pé sa imité-y, li ki sé « Dyé-la tchè a-y kontan la » (1 Tim. 1:11 ; Sòm 16:11). Lakontantman sé on biten ki ka vin dè Jéova. Sé pousa i vlé tchè an nou kontan, é i ka ban-nou tousa ki fo pou nou éré (Dét. 12:7 ; Ékl. 3:12, 13).

2, 3. a) Lakontantman, ka sa yé ? b) Poukwa, déparfwa, sa rèd dè touvé lakontantman ?

² É voumenm ? Ès tchè a-w kontan ? Ou ka di ou pé pli kontan ki sa ankò ? Yo ka di on moun éré lè « i ka santi-y byen, lè i kontan vi-la i ka menné la oben lè i ka rèsanti on jwa ki fò toubònman ». Dapré sa Labib ka di, sé yenki lè on moun sé on zanmi a Jéova kè i pé vréman éré. Men alèkilé, sa pa toujou fasil dè ni tchè-kontan. Poukisa ?

³ Nou pé ka travèsé diféran sitiyasyon ki ka fè-nou soufè  é ki pé fè-nou pèd jwa an nou. Pétèt nou pèd on moun nou té enmé oben yo èskominyé-y. Nou pé ka sibi on divòs oben nou pé pèd travay an nou. Nou pé ni pwoblèm èvè fanmi an nou osi. Kanmarad-lékòl an nou oben kolèg-travay an nou pé ka fè jé èvè tèt an nou. Pétèt nou lajòl, oben yo ka pèwsékité-nou parapòt a fwa an nou. Anplisdisa, kò an nou pé ka désann, nou pé ni on maladi ki pa ka géri, oben nou ka soufè èvè déprésyon. Men fò-nou toujou sonjé kè Jézikris sé « sila ki ni tchè-kontan la é ki sé sèl Mèt asi tout biten ». I té enmé konsolé lézòt é i té vlé tchè a yo kontan (1 Tim. 6:15 ; Mat. 11:28-30). Adan Sèwmon-la i fè anlè montangn-la, Jézi palé dè déotwa bèl kalité ki pé rann-nou éré menm lè nou ka jwenn difikilté adan mond a Satan.

4, 5. Ka pou nou fè pou nou ni lakontantman, san janmen pèd-li ?

⁴ Prèmyé biten-la Jézi palé dè-y la enpòwtan toubònman. I di konsa : « Tchè-kontan pou séla ki ka rann-yo kont ka manké-yo èspirityalité, pas wayòm-la ki an syèl-la sé ta yo » (Mat. 5:3). Lè nou ka rann-nou kont ka manké-nou èspirityalité, nou ka konswa nou bizwen konnèt Bondyé, nou bizwen Bondyé édé-nou é kè i ban-nou konsèy. Piskè nou ka rèkonnèt sa, ka nou ka fè ? Nou ka étidyé Labib, nou ka obéyi Bondyé é nou ka mèt adorasyon a Bondyé an prèmyé adan vi an nou. Si nou ka fè sa, nou ké pli éré. Nou ké ni plis konfyans ankò kè pwomès a Bondyé toupré réyalizé. Anplisdisa, Labib ka ban-nou « èspérans-la ki ka rann-nou éré la », ki ké édé-nou tchenbé lè nou ka jwenn difikilté (Tit 2:13).

⁵ Pou nou pé sa éré menm lè nou anba éprèv, fò-nou kontinyé konsolidé lanmityé an nou èvè Jéova. Mi sa lapòt Pòl maké : « Fò tchè a zòt toujou kontan grasa [Jéova] Ségnè-la. An ka woudi-y ankò : fò tchè a zòt kontan ! » (Filip. 4:4). Pou nou pé sa ni on bèl lanmityé konsa èvè Jéova, nou bizwen sajès-la ki ka vin dè-y la. Adan Labib, nou ka li : « Tchè-kontan pou moun-la ki ka touvé sajès, é pou moun-la ki vin ni on bon jijman. Sé on pyébwa ki ka ba moun ki ka kenbé-y lavi, é moun ki ka kenbé-y fò ké kontan » (Pwov. 3:13, 18).

6. Ka nou pé fè pou nou toujou kontan ?

⁶ Men, pou nou toujou kontan, apatoudi li Labib. Anplisdisa, fò-nou kontinyé mèt an pratik sa Labib ka di. Sé sa Jézi montré lè i di : « Si zò konnèt sé biten-lasa, tchè a zòt kontan si zò ka fè-yo » (Jan 13:17 ; li Jak 1:25). Sa nésésè si nou vlé ni on bèl lanmityé èvè Jéova, é si nou vlé toujou ni lakontantman. Men kijan nou pé rivé ni lakontantman alòskè ni tousa biten ki pé fè-nou pèd jwa an nou ? An-nou gadé ka Jézi di ankò adan Sèwmon-la i fè anlè montangn-la.

7. Kijan on moun pé éré alòskè i andèy ?

⁷ « Tchè-kontan pou séla ki andèy la, pas yo ké jwenn konsolasyon » (Mat. 5:4). Pétèt ou ka mandé-w : « Kijan on moun pé éré alòskè i andèy ? » Adan vèwsé-lasa, lè yo ka di kè on moun andèy, sa vlé di moun-lasa tris toubònman. La konsa, Jézi pa té ka palé dè tout moun ki an penn. Onlo moun, ki pa ka rèspèkté Bondyé, andèy kivédi yo tris, parapòt a tout soufrans yo ka jwenn pannan dènyé jou a sistèm-lasa, ki « rèd a sipòté » (2 Tim. 3:1). Men sèl moun yo ka sonjé,  sé yo. Yo pa ka sonjé Jéova, kifè yo pa ka chèché a vin zanmi a-y, é yo pé pa ni lakontantman. Alò dè kimoun Jézi té ka palé ? I té ka palé dè moun ki ka rann-yo kont ka manké-yo èspirityalité. Si yo andèy, sé akòz dè pakèt moun-la yo ka vwè alantou a yo la ki pa’a tyenn kont dè Bondyé oben ki pa ka fè sa i ka mandé. Yo andèy osi pas yo ka konstaté kijan yo enpawfè é adan ki mové sitiyasyon lézimen yé akòz dè péché-la. Jéova ka vwè sé moun sensè lasa ; i ka sèvi èvè Labib pou konsolé-yo, i ka pèwmèt-yo ni lakontantman dépi konnyéla, é i ka ba-yo lèspérans dè viv pou touttan (li Ézékyèl 5:11 ; 9:4).

8. Poukwa lè karaktè a on moun dous, sa pé édé moun-lasa ni lakontantman ?

⁸ « Tchè-kontan pou moun karaktè a yo dous, pas latè sé ké ta yo » (Mat. 5:5). Poukwa lè karaktè a on moun dous, sa pé édé moun-lasa ni lakontantman ? Ni onlo moun lang a yo sal é yo égri, kifè yo toujou adan on bab. Men lè yo ka vin konnèt lavérité, yo ka chanjé é yo ka mèt « nouvo pèwsonalité-la » anlè yo. Yo ka aji èvè « on pityé ki plen tandrès, èvè bonté, imilité, dousè é pasyans » (Kol. 3:9-12). Sé pousa yo ka viv anpé, yo byen èvè toutmoun é tchè a yo ka pli kontan. Anplisdisa, Labib ka pwomèt kè « latè sé ké ta yo » (Sòm 37:8-10, 29).

9. a) An ki sans moun karaktè a yo dous ké ni latè pou yo ? b) Tchè a moun ki « fen é ki swèf sa ki jis » pé kontan. Poukwa ?

⁹ An ki sans moun karaktè a yo dous ké ni latè pou yo ? Sé krétyen-la ki ni lèspérans dè ay viv an syèl-la ké ni latè pou yo lè yo ké dominé asi-y antankè wa é antankè prèt (Rév. 20:6). Kanta sé milyon moun-la ki pa ni èspérans-lasa, yo ké ni latè pou yo lè yo ké pé viv asi-y pou touttan adan lapé é lakontantman, antankè moun pawfè. Aprésa Jézi di : « Tchè-kontan pou séla ki fen é ki swèf sa ki jis » (Mat. 5:6). Poukwa tchè a sé krétyen-la kontan ? Pas, kèlkèswa èspérans a yo, lè Jéova ké woté tout méchansté ki ni asi latè, yo ké rasazyé èvè jistis-la yo té ka èspéré la (2 Pyè 3:13). A moman-lasa, moun ki jis pé ké jen « andèy » ankò parapòt a moun ki ka fè sa ki mové (Sòm 37:17).

10. Lè on moun ka aji èvè pityé, ka sa vlé di ?

¹⁰ « Tchè-kontan pou moun ki ka aji èvè pityé, pas sé èvè pityé moun ké aji èvè yo » (Mat. 5:7). On moun ki ka aji èvè pityé sé on moun ki ka mété-w alèz a-w, ki ni tandrès é ki ka pran penn a moun ; i ka soufè ansanm èvè moun ki ka soufè. Sa vlé di on moun ki ka aji èvè pityé pa ka enki rèsanti on biten. Sèlon sa Labib ka di, i ka pòté mannèv pou édé lézòt.

11. Ka ègzanp a bon Samariten-la ka aprann-nou ?

¹¹ (Li Lik 10:30-37.) Ègzanp a bon Samariten-la, kè Jézi bay la, ka montré-w byen ka sa vlé di aji èvè pityé. Pas i té ni pityé dè boug-la ki té ka soufè la, Samariten-la pòté bon mannèv pou édé-y. Lè Jézi fin bay ègzanp-lasa, i di konsa : « Alé, é vou osi, fè menm biten-la. » Alò, an-nou pozé-nou sé kèsyon-lasa : « Ès an ka aji menmjan ki Samariten-la, ki té ni onlo pityé pou lézòt ? Lè on moun ka soufè, ès an ka aji avè-y èvè pityé ? Ka an pé fè ankò pou édé-y ? Pa ègzanp, ka an pé fè vréman pou édé on frè oben on sè ki ja ni on bèl laj, on sè ki pèd mari a-y oben pou édé jennmoun fanmi a yo pa ka sèvi Jéova ? Ès an pé « palé on jan pou pé sa konsolé sa ki dékourajé » ? (1 Tés. 5:14 ; Jak 1:27).

12. Poukwa lè nou ka aji èvè pityé, nou éré ?

 ¹² Men poukwa lè nou ka aji èvè pityé, nou éré ? Pas lè ou ka fè sa, sé ba ou ka ba-lézòt, é Jézi byen di kè lè ou ka ba-lézòt, sa ka rann-vou éré. Anplisdisa, nou sav nou ka fè Jéova plézi (Akt 20:35 ; li Ébré 13:16). Anrapò èvè « sila ki ka sousyé-y dè piti-la », wa David di : « Jéova ké pwotéjé-y é i ké fè-y rété vivan. Moun asi latè ké fè moun sav tchè a-y kontan » (Sòm 41:1, 2). Si nou ka aji avè lézòt èvè pityé, Jéova ké aji avè nou èvè pityé osi, é nou ké éré pou touttan (Jak 2:13).

13, 14. Poukwa « moun ki ni on tchè ki pwòp » éré ?

¹³ « Tchè-kontan pou moun ki ni on tchè ki pwòp, pas yo ké vwè Bondyé » (Mat. 5:8). Pou tchè an nou pwòp, fò-nou toujou chèché a ni lidé é lanvi ki pwòp. Sa vréman enpòwtan si nou vlé Jéova aksèpté adorasyon-la nou ka ba-y la (li 2 Korentyen 4:2 ; 1 Tim. 1:5).

¹⁴ Moun ki ni on tchè ki pwòp pé ni on bèl lanmityé èvè Jéova. I di : « Tchè-kontan pou moun ki ka lavé gran wòb a yo » (Rév. 22:14). An ki sans yo ka « lavé gran wòb a yo » ? Adan ka a sé krétyen-la ki ni lèspérans dè ay viv an syèl-la, sa vlé di Jéova ka konsidéré kè yo pwòp é kè i ké pèwmèt-yo viv an syèl-la san janmen mò, kifè yo ké pé éré pou touttan. Pou gran foulmoun-la ki ni lèspwa dè viv asi latè pou touttan, sa vlé di Jéova ka ba-yo posibilité dè ni on bèl lanmityé èvè-y, pas i ka konsidéré kè yo jis. Dépi aprézan, yo « [ka] lavé gran wòb a yo é yo [ka] blanchi sé wòb-lasa adan san a Timouton-la » (Rév. 7:9, 13, 14).

15, 16. An ki sans moun ki ni on tchè ki pwòp pé vwè Bondyé ?

¹⁵ Jéova di : « Pon nonm pé pa vwè-mwen é rété vivan » (Ègz. 33:20). Alò, kijan fè séla ki ni on tchè ki pwòp pé vwè Bondyé ? Adan vèwsé-lasa, yo itilizé lèmo « vwè », pou tradui on vèb grèk ki pé vlé di imajiné, konprann, oben sav. Moun ki ka vwè Bondyé èvè « zyé a tchè a [yo] », sé moun ki vréman konnèt-li é ki enmé bèl kalité a-y (Éféz. 1:18). Jézi imité pèwsonalité a Bondyé a san pou san, kifè i té pé di : « Sila ki vwè-mwen la, i vwè Papa-la osi » (Jan 14:7-9).

¹⁶ Anplisdisa, nou ka « vwè » Bondyé lè nou ka konstaté kijan i ka aji an favè an nou (Jòb 42:5). Ondòt jan nou pé « vwè » Bondyé, sé lè nou ka réfléchi si bénédisyon èstraòwdinè kè Bondyé ka rézèwvé ba moun ki ka fè éfò pou yo rété pwòp é pou yo sèvi-y fidèlman. É nou ka tou konprann kè sé krétyen-la ki ni lèspérans  dè ay viv an syèl-la ké vwè Jéova poudèbon, lè yo ké résisité (1 Jan 3:2).

17. Poukwa moun ki ka travay pou lapé ni tchè-kontan ?

¹⁷ « Tchè-kontan pou moun ki ka travay pou lapé » (Mat. 5:9). Lè nou ka pòté bon mannèv pou nou anpé èvè lézòt, nou pé ni tchè-kontan. Mi sa Jak, on disip a Jézi, maké : « Pou moun ki ka fè lapé, sé adan lapé ou ka simé fwi a lajistis » (Jak 3:18). Alò, si ou pa ka antann-vou byen èvè on moun an kongrégasyon a-w oben on fanmi a-w, mèt jounou atè pou mandé Jéova édé-w travay pou lapé. I ké ba-w lèspri sen a-y, é sa ké édé-w aji èvè bèl kalité on krétyen dwèt tini, é konsa, ou ké pli éré. Jézi montré kijan sa enpòwtan kè ou pòté mannèv pou ou anpé èvè lézòt, lè i di : « Si ou kay pòté ofrann a-w douvan lotèl-la, é kè lè ou la, ou ka sonjé kè frè a-w ni on biten kont vou, lésé ofrann a-w la i yé la, douvan lotèl-la, é pati. Koumansé pa wouvin byen èvè frè a-w, é aprésa rètouné fè ofrann a-w » (Mat. 5:23, 24).

18, 19. Poukwa tchè a sé krétyen-la pé kontan menmsi moun ka pèwsékité-yo ?

¹⁸ « Tchè-kontan pou zòt, lè akòz dè mwen, moun ka jiré-zòt, moun ka pèwsékité-zòt oben ka bay tout kalté manti asi zòt pou fè-zòt ditò. » Ka Jézi té vlé di pa la ? Mi ondòt biten i di : « Fò tchè a zòt kontan, fò-zòt kontan toubònman, pas zò ni on gwo rékonpans an syèl-la. Pas sé konsa yo pèwsékité sé pwofèt-la ki viv avan zòt la » (Mat. 5:11, 12). Lè yo ba sé apòt-la enpé kou é lè yo défann-yo préché, « yo sòti douvan sannédren-la, é yo té tou kontan ». Ou ka tou konprann a pa enmé yo té enmé pran kou. Yo té kontan pas Bondyé té « jijé kè yo té alahotè pou pèd lonnè a yo » pou non a Jézi (Akt 5:41).

¹⁹ A épòk an nou osi, lè moun ka pèwsékité-yo pas yo ka sèvi Bondyé, sèwvitè a Jéova ka andiré é tchè a yo kontan (li Jak 1:2-4). Menmjan ki sé apòt-la, a pa enmé nou enmé soufè. Men si nou ka rété fidèl a Bondyé, i ké ban-nou kouraj pou nou pé andiré. An-nou gadé sa ki rivé Ènrik Dòrnik é frè a-y. An out 1944, yo voyé-yo on koté yo té ka sanblé moun é yo té ka malmenné-yo toubònman. Lènmi a yo di konsa : « Pa ni mwayen fòsé-yo fè ayen. Sé jwa sa ka prokiré-yo lè yo ka soufè akòz dè fwa a yo. » Ènrik èspliké : « An pa té ka chèché a soufè pou fwa an mwen, men lèfètkè an té ni kouraj é an toujou rété fyèw dè mwen lè an té ka pran fè pou rété fidèl a Jéova, sa té ka fè tchè an mwen kontan. [...] An té ka sipliyé Jéova lè an té ka priyé-y. Sa fè-mwen vin pli pré a-y é i té toujou la pou édé-mwen. »

20. Poukwa nou éré lè nou ka sèvi « Dyé-la tchè ay kontan la » ?

²⁰ Menmsi ni moun ka pèwsékité-nou akòz dè fwa an nou, menmsi fanmi an nou ka mèt présyon si nou, menmsi nou malad oben laj-la ka monté, nou sav nou ka rann « Dyé-la tchè ay kontan la » éré, é sa ka rann-nou éré (1 Tim. 1:11). Tchè an nou kontan osi lè nou ka pran tan réfléchi asi tout pwomès èstraòwdinè Bondyé an nou ka fè-nou, li ki « pé pa manti » (Tit 1:2). Lè i ké fè tousa i pwomèt, pa menm sonjé nou pé’é sonjé penn é péripési nou ka pasé konnyéla. Prèmyé fwa nou ké rèsanti on jwa konsa adan tchè an nou ! Wi, asiré pa pétèt, « tèlman ké ni lapé, nou ké adoumanman » ! (Sòm 37:11).