Gadé sa ki adan

Ay adan lis a sé sijè-la

2 wa ki anripaj an tan a lafen

2 wa ki anripaj an tan a lafen

Sé pwofési-la ki asi chéma-lasa ka palé dè évènman ki ka fèt anmenmtan. Yochak ka pòté on prèv ki ka montré kè nou ka viv « an tan a lafen » (Dan. 12:4).

  • Vèwsé Rév. 11:7 ; 12:13, 17 ; 13:1-8, 12

    Pwofési « Bèt sovaj la » ka gouvèné moun ki asi latè pannan plizyè milyé lanné. An tan a lafen, yo ka blésé 7èm tèt-la. Plita, tèt-lasa ka géri é ‘toutlatè’ ka suiv bèt-la. Satan ka sèvi èvè-y pou i ‘fè lagè èvè rèstan wen-la’.

    Kijan sa ka réyalizé Apré délij-la, sèwten gouvènman ki lènmi èvè Jéova ka koumansé dirijé. Plis ki 3 000 an apré, pannan 1é Gè mondyal la, gouvènman a Langlètè pèd bon tibwen adan pouvwa-la i té ni la. Lè Lézétazini ka alyansé èvè-y, i ka woupran fòs. An tan a lafen, Satan ka itilizé gouvènman ki asi latè pou pèwsékité pèp a Bondyé.

  • Vèwsé Dan. 11:25-45

    Pwofési Wa di Nò la é wa di Sid la ka goumé pou pran pouvwa-la.

    Kijan sa ka réyalizé Lalmagn ka goumé èvè Lamérik é Langlètè. An 1945, sé Linyon sovyétik é sé péyi-la ki alyansé èvè-y la ki ka vin wa di Nò. An 1991, Linyon sovyétik disparèt é piti-a-piti Larisi é sé péyi-la ki alansyé èvè-y la vin wa di Nò.

  • Vèwsé Iz. 61:1 ; Mal. 3:1 ; Lik 4:18

    Pwofési Jéova ka voyé « mésajé » a-y pou ‘trasé on chimen’ avan i mèt wayòm a Mési-la anplas. « Mésajé »-lasa koumansé « pòté bon nouvèl ba moun ki ni imilité ».

    Kijan sa ka réyalizé Lè lézanné 1870 koumansé, frè Russell é séla ki ka kolaboré èvè-y la ka mèt-yo ka étidyé Labib oséryé pou yo konprann sa i ka anségné vréman. Pannan lézanné 1880, yo ka montré kijan sa enpòwtan kè sèwvitè a Bondyé préché. É pousa, yo ka pibliyé plizyè awtik. Pa ègzanp, « Recherchons 1 000 prédicateurs » é « Oints pour prêcher ».

  • Vèwsé Mat. 13:24-30, 36-43

    Pwofési On lènmi ka simé vyé zèb adan on chan a séréal ; yo ka lésé vyé zèb-la é séréal-la pousé jistan vyé zèb-la kouvè séréal-la ; lè lè a larékòlt rivé, yo ka séparé séréal-la é vyé zèb-la.

    Kijan sa ka réyalizé Lè lézanné 1800 k’ay bout, ou ka vwè pi fasilman ki diférans ki ni ant on vré krétyen é on fo krétyen. An tan a lafen, sé vré krétyen-la pa’a mélanjé-yo èvè sé fo krétyen-la ankò é yo ka mèt-yo ansanm pou fòwmé onsèl lasanblé.

  • Vèwsé Dan. 2:31-33, 41-43

    Pwofési Sé pyé an fè la é an awjil la sé ta on èstati ki fèt èvè plizyè métal diféran.

    Kijan sa ka réyalizé Awjil-la sé moun ki anba dominasyon a Langlètè é Lézétazini é ki ka rèbélé-yo kont sé gouvènman-lasa. Akòz dè sé moun-lasa, sé gouvènman-lasa pé pa itilizé pouvwa a yo kon yo té’é vlé.

  • Vèwsé Mat. 13:30 ; 24:14, 45 ; 28:19, 20

    Pwofési Yo ka ranmasé « blé-la » é yo ka mété-y adan « dépo »-la. Yo ka chwazi « èsklav fidèl é prévwayan »-la pou i okipé dè sé « domestik »-la. Yo ka koumansé préché « bon nouvèl a Wayòm-la » asi « toutlatè ».

    Kijan sa ka réyalizé An 1919, yo ka mèt èsklav fidèl la anplas pou i okipé dè pèp a Bondyé. A moman-lasa, Étidyan a Labib ka koumansé pòté plis mannèv an prédikasyon. Jòdijou, Témwen a Jéova ka préché adan plis ki 200 péyi é téritwa, é yo ka fè piblikasyon ki bazé asi Labib adan plis ki 1 000 lang.

  • Vèwsé Dan. 12:11 ; Rév. 13:11, 14, 15

    Pwofési On bèt ki ni 2 kòn ka di moun ki asi latè ‘fè pòtré a bèt sovaj la’ ki ni 7 tèt la é i ka ‘ba imaj-lasa lavi’.

    Kijan sa ka réyalizé Lè Sosyété a sé Nasyon-la ka vwè jou, sé Langlètè é Lamérik ki antèt a sa. Ni dòt nasyon osi ki ka rantré adan òwganizasyon-lasa. Wa di Nò la ka fin pa rantré adan òwganizasyon-lasa osi, men i ka rété adan-y sèlman dè 1926 a 1933. Sé moun-la ka konpranndèdi kè sé Sosyété a sé Nasyon-la oben Lénasyonzini ki ké mété lapé asi latè, alòskè sé yenki wayòm a Bondyé ki pé fè sa.

  • Vèwsé Dan. 8:23, 24

    Pwofési On wa ki ka sanm on mons ka fè onpakèt déga é ponmoun pa té’é pé imajiné sa.

    Kijan sa ka réyalizé Langlètè é Lamérik ka fè gwo déga. Pa ègzanp, pannan 2èm Gè mondyal la, Lézétazini ka voyé 2 bonb atomik si on nasyon ki lènmi èvè yo ; sé prèmyé fwa on zam ka fè tousa déga.

  • Vèwsé Dan. 11:31 ; Rév. 17:3, 7-11

    Pwofési ‘Bèt sovaj wouj’ a 10 kòn-la ka sòti an tou-la ki pa ni fon la é sé-y ki 8èm wa-la. Adan liv a Danyèl, yo ka di kè wa-lasa sé on « biten ki ka bay malotchè é ki ka fè onlo déga ».

    Kijan sa ka réyalizé Pannan 2èm Gè mondyal la, Sosyété a sé Nasyon-la mò. Lè lagè-lasa fin, yo ka mèt Lénasyonzini si pyé. Yo ka ba-y glwa kon yo té ka ba Sosyété a sé Nasyon-la glwa, alòskè sé wayòm a Bondyé tousèl ki mérité sa. Onlè, i ké ataké sé rèlijyon-la.

  • Vèwsé 1 Tés. 5:3 ; Rév. 17:16

    Pwofési Sé nasyon-la ka anonsé « lapé é lasékirité » é apré, sé « 10 kòn-la » é « bèt sovaj » la ka ataké « pwòstitiyé »-la é ka détwi-y. Aprésa, Bondyé ka fin bat èvè sé nasyon-la.

    Kijan sa ka réyalizé Sé nasyon-la ka fè moun kwè kè yo rivé mèt lapé é lasékirité asi latè. Aprésa, sé nasyon-la ki ka fè pawti a Lénasyonzini ka détwi sé fo rèlijyon-la. Sé konsa gwo tribilasyon-la ka koumansé. Tribilasyon-lasa ké fin lè Bondyé ké fè sistèm a Satan fè pach pannan Awmagédon.

  • Vèwsé Ézék. 38:11, 14-17 ; Mat. 24:31

    Pwofési Gòg ka anvayi péyi a pèp a Bondyé. Aprésa, sé zanj-la ka sanblé ‘séla Bondyé chwazi la’.

    Kijan sa ka réyalizé Wa di Nò la é sélézòt gouvènman-la ka ataké pèp a Bondyé. On ti moman apré, Jéova ké sanblé rèstan wen-la an syèl-la.

  • Vèwsé Ézék. 38:18-23 ; Dan. 2:34, 35, 44, 45 ; Rév. 6:2 ; 16:14, 16 ; 17:14 ; 19:20

    Pwofési Boug a « chouval blan » la ka détwi Gòg é lawmé a-y é sé konsa i ka « fin gangné konba-la ». Yo ka jété « bèt sovaj la » adan « létan a difé la » é yo ka fè gran gran èstati-la fè pach.

    Kijan sa ka réyalizé Jézi, Wa a Wayòm-la, ka vin sové pèp a Bondyé. Jézi, sé 144 000 la é sé zanj-la ka détwi tout sé nasyon-la ki ka ataké pèp a Bondyé. A moman-lasa, mond a Satan ké disparèt.