Adan awtik-la ki té avan la, nou ègzaminé sign-la Jézi anonsé la. Sign-lasa ka montré on mannyè ki klè kè Bondyé mèt wayòm a-y anplas an syèl-la, é kè Jézikri antèt a-y antankè Wa.

Labib ka di kè lè Jézi koumansé gouvèné, i mèt Satan é démon a-y dèwò an syèl-la. Dépi sa, sé enki asi latè yo pé aji. Sé on rézon ki ka fè si sitiyasyon-la ka vin dè plizanpli mové dépi 1914 (Révélasyon 12:7, 9).

Magré sitiyasyon a mond-la ka dégrenné, Jézi antankè Wa adan wayòm a Bondyé, ka fè onlo biten pou édé lézimen. I té anonsé kè té’é ni on pwogram pou anségné Labib toupatou si latè. Grasa pwogram-lasa, onlo moun ka dékouvè prensip a Labib é yo ka apliké-yo adan vi a yo (Izayi 2:2-4). Ni milyon é milyon moun ki aprann kijan vi a fanmi a yo pé vin pli bèl, é kijan pou yo pa lésé travay a yo é byen matéryèl vin sa ki pli enpòwtan an vi a yo. Yo ka aprann viv pibyen dépi konnyéla é yo ka vin dé moun kè Bondyé té’é vlé ni anba dominasyon a-y.

Menmsi Jézi ja ka gouvèné an syèl-la, sé gouvènman a lézimen ki ka dirijé asi latè toujou. Kanmenmsa, Bondyé ba Jézi lòd-lasa : « Ay anmitan a lènmi a-w, é dominé asi yo » (Sòm 110:2). Talè Jézi ké détwi séla ki kont Wayòm-la konplètman, é sé ké on bèl soulajman pou touséla ki ka obéyi Bondyé dè-tou-kè.

Annatandan, mi sa wayòm a Bondyé kay fè :

• I ké fè tout sé fo rèlijyon-la disparèt. Sé rèlijyon-la ki anségné mansonj asi Bondyé é ki malmenné sé moun-la ké disparèt. Labib ka konparé tout sé fo rèlijyon-la èvè on pwòstitiyé. Sa ké choké onlo moun lèwvwè pwòstitiyé-lasa ké détwi (Révélasyon 17:15, 16).

• I ké fè dominasyon a lézimen disparèt. Wayòm a Bondyé ké fè ansòt pou lézimen pa jen dominé ankò (Révélasyon 19:15, 17, 18).

• I ké détwi sé méchan-la. Ka ki ké rivé séla ki byen désidé a fè sa ki pa bon, é ki vé pa obéyi Bondyé ? « Kanta sé méchan-la, yo ké woté-yo asi latè » (Pwovèb 2:22).

• I ké détwi Satan é sé démon-la. Satan é sé démon-la pé’é pé ‘kouyonné sé nasyon-la’ ankò (Révélasyon 20:3, 10).

Kijan lavi ké yé pou lézimen anba dominasyon a Bondyé ?

Antankè Wa an syèl-la, Jézi ké fè lontan plis biten ki sa nenpòt dirijan asi latè té’é pé fè. Ni 144 000 moun, kè Bondyé chwazi pawmi lézimen, ki ké dirijé ansanm èvè-y (Révélasyon 5:9, 10 ; 14:1, 3). I ké fè ansòt pou volonté a Bondyé fèt asi latè. Ki bon biten wayòm a Bondyé ké pòté pou moun ki ka viv si latè ?

• I ké fè lamaladi é lanmò disparèt. « Pa ni ponmoun an péyi-la ki ké di : “An malad” », é « lanmò pé ké la ankò » (Izayi 33:24 ; Révélasyon 21:4).

• I ké mèt lapé é lasékirité poudèbon. « Pitit a-w ké viv adan lapé », é « yochak ké sizé anba pyé-rézen a yo é anba pyé fig-fwans a yo, é ponmoun pé ké fè-yo pè » (Izayi 54:13 ; Miché 4:4).

• I ké ba lézimen on travay ki ké pèwmèt-yo ni on satisfaksyon. « Sé moun-la an chwazi la ké pwofité dè travay a dé men a yo toubòlman. Yo pé ké travay rèd pou ayen » (Izayi 65:22, 23).

• I ké fè tousa ki ka détwi latè disparèt. « A pa ti kontan dézè-la é péyi-la ki sèk la ké kontan. Dézè-la ki plat la ké ni tchè-kontan, é i ké fè flè kon pyé-safran-la » (Izayi 35:1).

• I ké anségné lézimen ka pou yo fè pou yo viv pou touttan. « Mi sa lavi étèwnèl vlé di : fò-yo rivé konnèt-vou, vou, sèl vré Dyé-la, é sila ou voyé la, Jézikri » (Jan 17:3).

Bondyé vlé ou pwofité dè sé bénédisyon-lasa (Izayi 48:18). Awtik-la ki ka vin la ka èspliké sa ou pé fè dépi konnyéla pou-w pwofité dè bèl landèmen-lasa.