• Sé Bondyé ki té’é chwazi-y. « Sé mwenmenm ki mèt wa an mwen anplas [...] An ké ba-w sé nasyon-la konm éritaj é chak bout a latè sé ké ta-w » (Sòm 2:6, 8).

• Sé té’é érityé a wa David. « Nou vin ni on timoun, yo ban-nou on gason [...]. Gouvènman a-y ké toujou ni plis pouvwa é ké toujou ni lapé, anlè twòn a David é adan wayòm a-y. I ké rété byen doubout » (Izayi 9:6, 7).

• I té’é fèt a Bétléèm. ‘O Bétléèm, sé adan-w sila ki ké dirijé pou mwen la ké sòti. Dominasyon a-y ké rivé jis an bout a latè’ (Miché 5:2, 4).

• Moun pa té’é aksèpté-y é yo té’é tchouyé-y. « Yo té ka méprizé-y é i pa té ni valè an zyé an nou. [...] Yo pèsé-y pou péché an nou, é yo krazé-y pou fòt an nou » (Izayi 53:3, 5).

• I té’é résisité é yo té’é ba-y glwa. « Ou pé’é lésé-mwen adan Tonm-la. Ou pé’é kité sèwvitè fidèl a-w rété adan tou-la. [...] Adwat a-w ni tchè-kontan pou touttan » (Sòm 16:10, 11).

Pawmi tout sé moun-la ki ja viv si latè, ni onsèl adan yo ki ka korèsponn èvè tout sé détay-la nou sòti vwè la, é moun-lasa, sé Jézikri. On zanj di Mari, manman Jézi : « [Bondyé] ké ba-y dominasyon a David zansèt a-y [...], é wayòm a-y pé ké jen bout » (Lik 1:31-33).

Pannan i té ka viv si latè, Jézi pa jen vin chèf. I ké dirijé limanité dépi an syèl-la antankè Wa a wayòm a Bondyé. Kijanfè i sé méyè dirijan-la ? An-nou palé dè sa i fè lè i té si latè.

•   I té ka fè lézòt dibyen. Jézi té ka édé ki misyé, ki madanm, ki timoun, ki vyémoun, kèlkanswa koté-la yo sòti la, é ki yo té rich, ki yo té maléré (Matyé 9:36 ; Mawk 10:16). Lè on nonm ki té ni lalèp sipliyé Jézi é i di-y : « Si ou vlé, ou pé rann-mwen pwòp », sa fè Jézi lapenn é i géri nonm-lasa (Mawk 1:40-42).

• I anségné kijan pou fè Bondyé plézi. Jézi di : « Zò pé pa travay kon èsklav pou Bondyé é pou Lajan. » Ondòt biten i di-nou, sé kè fò-nou aji èvè lézòt menmjan nou té’é enmé yo aji èvè nou. I montré kè Bondyé pa ka enki pran tan gadé sa nou ka fè, men i ka pran tan gadé sa nou ka pansé é sa nou ka rèsanti osi. Kifè, si nou vé fè Bondyé plézi, fò-nou métrizé sa nou ka rèsanti an fon a tchè an nou (Matyé 5:28 ; 6:24 ; 7:12). Anplisdisa, i montré on mannyè ki klè kè pou nou vréman ni tchè-kontan adan vi an nou, fò-nou fè 2 biten : aprann kijan Bondyé vlé nou aji, é aji kon i ka mandé-nou (Lik 11:28).

• I anségné ka sa vlé di enmé lézòt. Sa Jézi té ka di é sa i té ka fè té ka rété an lèspri a sé moun-la ki té ka kouté-y la, é sa té ka touché tchè a yo. « Foul-la rété èstèbèkwè lè yo vwè mannyè i té ka anségné, pas i té ka anségné antankè moun ki ni otorité » (Matyé 7:28, 29). I di-yo : « Enmé lènmi a zòt ». I jous priyé pou séla ki té rèsponsab dè mò a-y. I di : « Padoné-yo, Papa, pas yo pa sav sa yo ka fè » (Matyé 5:44 ; Lik 23:34).

Jézi ni tout sé kalité-la pou dirijé latè on mannyè ki pawfè. Sé on dirijan ki plen lanmou é ki plen bonté. Men kitan i ka koumansé gouvèné ?