LIMANITÉ

Mi sa Labib ka di : Bondyé ‘pa kréyé latè pou ayen, men i fè-y pou moun rété asi-y’ (IZAYI 45:18).

PLANÈT AN NOU

Mi sa Labib ka di : « On jénérasyon ka alé, é on jénérasyon ka vini, men latè, i la pou touttan » (ÉKLÉZYAS 1:4).

SA SA VLÉ DI : Dapré Labib, latè pé’é jen détwi é toujou ké ni moun ki ké rété asi-y. Alò, ka « fen a mond-la » vlé di ?

RÉFLÉCHI ASI SA : Labib ka konparé fen a mond-la ki ka vin la èvè on évènman ki fèt an tan a Noé. A épòk-lasa, latè té « plen vyolans » (Jénèz 6:13). Men Noé sé té on nonm ki té jis. Alò Bondyé sové Noé é fanmi a-y, men i détwi sé méchan-la èvè on délij. Mi sa Labib ka di anrapò èvè évènman-lasa : « Mond a tan-lasa vin détwi, lè i touvé-y kouvè èvè dlo » (2 Pyè 3:6). Sé té fen a mond-la ki té ka ègzisté an tan-lasa. Men ka ki vin détwi ojis ? A pa latè, men sé sé moun méchan la ki té ka viv anlè-y la. Kifè, lè Labib ka palé dè fen a mond-la, i pa’a palé dè dèstriksyon a planèt-la. Olyé dè sa, i ka palé dè dèstriksyon a sé moun méchan la ki ka viv anlè-y la é dè sa yo mèt anplas.

PWOBLÈM É MÉCHANSTÉ

Mi sa Labib ka di : « On titak tan ankò, é sé méchan-la pé ké la ankò ; ou ké gadé la yo té yé la, é yo pé ké la. Men, moun ki ni imilité, toutlatè sé ké ta yo, é tèlman ké ni lapé, yo ké adoumanman » (SÒM 37:10, 11).

SA SA VLÉ DI : A épòk a Noé, délij-la pa fè laméchansté disparèt onfwa pou tout. Apré délij-la, sé méchan-la rikoumansé fè moun bon méchansté. Men talè, Bondyé ké fè laméchansté disparèt. Kon moun-la ki maké déotwa sòm di, « sé méchan-la pé ké la ankò ». Bondyé ké fè laméchansté disparèt grasa wayòm a-y, on gouvènman ki ké dirijé tout latè dépi syèl-la. A moman-lasa, latè ké ranpli èvè moun ki ka obéyi Bondyé.

RÉFLÉCHI ASI SA : Ès moun ki ka dirijé lèmond konnyéla ké akéyi wayòm a Bondyé bra gran wouvè ? Labib ka montré kè sa pé’é pasé konsa. Yo ké aji on mannyè ki sòt, yo ké opozé-yo a wayòm a Bondyé (Sòm 2:2). Ki konsékans sa ké ni ? Wayòm a Bondyé ké pran plas a tout gouvènman ki asi latè, é « sé li tousèl ki ké rété pou touttan » (Danyèl 2:44). Men poukwa fò dominasyon a lézòm fin ?

Mi sa Labib ka di : « An sav byen kè on nonm pé pa touvé chimen a-y tousèl » (JÉRÉMI 10:23).

SA SA VLÉ DI : Lézòm pa fèt pou yo dirijé-yo yomenm a yo. Yo pa’a rivé gouvèné nonm kon yomenm é yo pa’a touvé on solisyon pou pwoblèm yo ka jwenn.

RÉFLÉCHI ASI SA : On ansiklopédi Britannica Academic ka di kè pa ni pon gouvènman ki kapab « rézoud pwoblèm a limanité, kon moun ki anmizè, moun ki ka mò-fen, maladi, katastwòf natirèl é lagè oben dòt kalté vyolans ankò ». I ka di osi kè dapré sèwten moun, « sé sèlman on gouvènman mondyal ki ké pé aji on mannyè ki éfikas kont sé pwoblèm-lasa ». Men, menmsi tout sé gouvènman-la ki asi latè té’é mèt-yo ansanm-ansanm, mond-la té’é toujou anba dominasyon a nonm enpawfè ki pa kapab janmbé sé difikilté-la nou palé talè la. Wayòm a Bondyé, sé sèl gouvènman ki kapab rézoud tout pwoblèm a limanité poudèbon.

Kifè dapré Labib, fen a mond-la, kivédi mond méchan a jòdila, a pa on biten lébon dwèt pè. Olyé dè sa, sé on biten kè nou dwèt présé vwè pas Bondyé ké ranplasé vyé mond-lasa èvè mond nouvo a-y ki ké bèl toubònman !

Kitan sa ké fèt ? Dékouvè sa Labib ka di asi sa adan awtik-la ki ka vin la.