Sa pou ou fè pou viv adan mond nouvo la
Sé awtik-la ki té avan tala montré kè Bondyé kay fin èvè vyé mond méchan lasa é èvè tout sé pwoblèm-la ki ka fè limanité soufè konnyéla. Nou pé sèten sa ké fèt. Poukwa ? Pas Pawòl a Bondyé, Labib, ka fè pwomès-lasa :
« Mond-lasa, sé disparèt i ka disparèt » (1 JAN 2:17).
Nou pé sèten ké ni moun ki ké rété vivan, pas vèwsé biblik lasa ka pwomèt osi :
« Sila ki ka fè volonté a Bondyé ké viv pou touttan. »
Kifè, si nou vlé rété vivan, fò nou fè volonté a Bondyé. Pou nou sav ka ki volonté a Bondyé, fò nou koumansé pa aprann konnèt-li.
« APRANN KONNÈT BONDYÉ » POU RÉTÉ VIVAN LÈ LAFEN KÉ RIVÉ
Jézi di : « Mi sa lavi étèwnèl vlé di : fò yo aprann konnèt-vou, vou, sèl vré Dyé-la » (Jan 17:3). Alò pou rété vivan lè fen a mond-la ké rivé é viv pou touttan, fò nou aprann konnèt Bondyé. Fò pa nou kontanté-nou dè kwè an Bondyé oben dè konnèt sèwten biten asi-y. Nou bizwen vin bon bon zanmi èvè-y. Si nou vlé lanmityé an nou èvè on moun vin solid, fò nou pasé tan èvè-y. É sé menm biten pou lanmityé an nou èvè Bondyé. An-nou ègzaminé déotwa vérité fondal ki sòti an Bib-la ki ka édé-nou konstwi on lanmityé solid èvè Bondyé.
LI PAWÒL A BONDYÉ, LABIB, TOULÉJOU
Pou rété vivan lè fen a mond-lasa ké rivé, priyé Bondyé pou i édé-w fè sa ki ka fè-y plézi.
Pou nou rété vivan fò nou manjé touléjou. Men Jézi di : « A pa pen tousèl on moun bizwen pou i viv, men i bizwen tout pawòl ki ka sòti an bouch a Jéova » (Matyé 4:4).
Jòdijou, pawòl a Jéova ka touvé-y adan Labib. Si ou étidyé liv sakré lasa, ou ké dékouvè dé vérité fondal parapòt a sa Bondyé fè dan lèpasé, sa i ka fè jòdijou é sa i ké fè dèmen.
PRIYÉ BONDYÉ POU I ÉDÉ-W
Ka ou pé fè si ou vlé obéyi Bondyé men kè ou pa’a rivé lagé sèwten biten kè i pa enmé ? Adan ka-lasa, si ou aprann konnèt Bondyé sa pé ba-w bon fòs.
On madanm nou ké kriyé Sandra té ka menné on vyé vi. Lè i koumansé étidyé Labib, i dékouvè kè Bondyé ban-nou komandman-lasa : « Kouri douvan tout péché sèksyèl » (1 Korentyen 6:18). Kifè, i priyé Bondyé pou i té ba-y fòs é sa édé-y lagé sé vyé biten-la i té ka fè la. Men fò i kontinyé goumé lèwvwè i douvan tantasyon. Mi sa i ka di : « Lèwvwè lidé ki pa pwòp ka travèsé lèspri an mwen, an ka palé dè sa franchman èvè Jéova adan lapriyè, pas an sav kè an pé’é pé goumé tousèl. Fòs a lapriyè fè-mwen vin pli pré Jéova. » Kon Sandra, plizyè milyon moun ka aprann konnèt Bondyé, é Bondyé ka ba-yo fòs pou chanjé tousa ki fo pou yo viv on mannyè ki ka fè-y plézi (Filipyen 4:13).
Pli ou ké aprann konnèt Bondyé, pli Bondyé ké ‘konnèt-vou’ é pli ou ké vin pi bon zanmi èvè-y (Galat 4:9 ; Sòm 25:14). Sé yenki si ou fè sa kè ou ké pé rété vivan lè fen a mond-lasa ké rivé é kè ou ké pé rantré adan mond nouvo a Bondyé. Men kijan mond nouvo lasa ké yé ? Sé sa awtik-la ki ka vin apré la ka èspliké.
a Jéova sé non a Bondyé kon Bib-la ka montré-nou-y.