Kitan lafen ké rivé ? Sa Jézi di
Kon nou vwè-y adan awtik-la ki té avan tala, lè Labib ka palé dè fen a mond-la, i pa’a palé dè dèstriksyon a latè ni dè ta limanité. I ka palé plito dè fen a sistèm malonnèt a mond-lasa é dè tout sé moun-la ki ka soutyenn-li la. Men ès Labib ka di kitan fen-lasa ké rivé ?
AN-NOU GADÉ 2 BITEN JÉZI DI ANRAPÒ ÈVÈ LAFEN :
« Donk rété véyatif, pas zò pa konnèt ni jou-la ni lè-la » (MATYÉ 25:13).
« Fè atansyon, rété véyatif, pas zò pa sav kitan moman-la ki fiksé la ké rivé » (MAWK 13:33).
Kifè ponmoun asi latè pa sav ègzaktèman kitan fen a mond-lasa ké rivé. Men Bondyé fiksé on moman byen prési kivédi ‘on jou é on lè’ pou lafen rivé (Matyé 24:36). Ès sa vlé di kè pa ni pon mwayen sav kitan lafen ké toupré ? Anponjan ! Jézi di disip a-y véyé plizyè évènman ki té ké montré kè lafen té’é toupré rivé.
SIGN-LA
Sé évènman-lasa té’é montré kè « mond-la kay bout ». Jézi anonsé : « Nasyon ké lévé kont nasyon é wayòm kont wayòm, é moun ké mò-fen é ké ni tranmanntè on koté apré lòt » (Matyé 24:3, 7). I anonsé osi kè té’é ni « épidémi » (Lik 21:11). Ès ou ka vwè sé évènman-la Jézi anonsé la ka réyalizé ?
Jòdijou, moun ka soufè akòz dè lagè, moun ka mò-fen é tranmanntè é épidémi ka fè onlo déga asi latè. Pa ègzanp, en 2004, on gwo tranmanntè ki fèt adan loséan Endyen pwovoké on sounami ki tchouyé 225 000 moun. An 3 an, pandémi a Covid-19 la tchouyé 6,9 milyon moun adan lèmond. Jézi di kè dé évènman kon séla té’é montré kè fen a mond-la toupré rivé.
« SÉ DÈNYÉ JOU-LA »
Labib ka kriyé péryòd-la ki avan fen a mond-lasa « sé dènyé jou-la » (2 Pyè 3:3, 4). 2 Timoté 3:1-5 ka di kè adan sé dènyé jou-la, sé moun-la té’é lagé prensip a Bondyé anrapò èvè sa ki byen é sa ki mal (gadé ti karé-la « Péryòd-la ki avan fen a mond-la »). Ès ou ka vwè jòdla jan sé moun-la égoyis, jan yo toujou vlé ni plis, jan yo ka fè moun bon atrosité é jan yo pa ni lanmou pou lézòt ? Sé ondòt prèv ki ka montré kè fen a mond-lasa toupré rivé.
Konmen tan sé dènyé jou-la ké diré ? Dapré Labib, sé yenki « on titak tan ». Aprésa Bondyé ké « détwi séla ki ka détwi latè » (Révélasyon 11:15-18 ; 12:12).
LATÈ TOUPRÉ VIN ON PARADI !
Bondyé ja fiksé jou-la é lè-la i ké fin èvè mond méchan lasa (Matyé 24:36). É mi ondòt bon nouvèl : Bondyé « vé pa ponmoun détwi » (2 Pyè 3:9). I ka ba toutmoun lokazyon viv annakò èvè volonté a-y. Pou ki rézon ? Pas i vlé nou rété vivan lè fen a mond-lasa ké rivé é kè nou viv adan mond nouvo a-y, lè latè ké vin on paradi.
Bondyé mèt anplas on pwogram pou aprann moun asi tout latè kijan yo pé fè pawti a moun ki ké viv adan mond nouvo la, anba dominasyon a wayòm a-y. Jézi di kè yo té’é préché bon nouvèl-la anrapò èvè wayòm a Bondyé « toupatou asi latè » (Matyé 24:14). Adan lèmondantyé, Témwen a Jéova pasé plizyè milya è-d-tan ka préché é ka anségné mésaj a Labib ki ka ban-nou on èspwa. Jézi di kè aktivité a prédikasyon-lasa té’é fèt toupatou asi latè avan lafen rivé.
Dominasyon a lézòm près fin. Men bon nouvèl-la, sé kè ou pé rété vivan lè fen a mond-lasa ké rivé é viv adan paradi-la Bondyé pwomèt la si latè. Awtik-la ki ka vin la ka montré sa pou ou fè pou viv adan mond nouvo la.
Pwofési a Jézi asi « sé dènyé jou-la » ka ban-nou dé rézon pou èspéré.
Ay gadé sa osi...
TOU DÈ GAD LA
Kitan wayòm a Bondyé ké dirijé latè ?
Sèwten disip fidèl a Jézi chèché a sav sa osi. Kijan Jézi réponn kèsyon a yo ?
