1-2. Jòdijou, sé krétyen-la ka jwenn difikilté ki ka sanm séla Lòt jwenn la. Ki difikilté ésa ?

 LÈ NOU ka vwè mové biten sé moun-la ka fè jòdijou, nou ka rèsanti menm biten ki Lòt. I « té chouboulé akòz dè konpòwtasyon a sé moun-[la] ki pa té ni pon prensip, ki té ka aji san pon rèspé é èvè fon-é-toupé » pas i té sav kè Pap’an nou ki an syèl-la hay tout sé kalté mové konduit-lasa (2 Pyè 2:7, 8). Lòt té ka krenn Bondyé é i té enmé-y onlo, alò i té hay tout sé vyé biten-la sé moun-la ki té ka viv alantou a-y la té ka fè. Nou osi, nou lantouré èvè moun ki pa gè ni rèspé pou prensip a Bondyé oben ki pa ka rèspèkté-yo ditou. Magrésa, nou pé kontinyé aji byen si nou ka fè ansòt pou nou pa jen arété enmé Jéova é si nou ka aprann rèspèkté-y (Pwov. 14:2).

² Jéova ka édé-nou fè sa grasa sé ankourajman-la nou ka touvé adan liv a Pwovèb. Sé konsèy-la ki adan liv-lasa plen sajès. Alò, ki nou sé on krétyen ki ja ni on bèl laj, ki nou jenn, ki nou sé on madanm oben ki nou sé on misyé, siwvwè nou ka pran tan ègzaminé sé konsèy-lasa, sa ké pòté onlo bon biten pou nou.

3. Pwovèb 17:3 ka ban-nou on bon rézon pou nou pwotéjé tchè an nou. Ki rézon ésa ? (gadé imaj-la osi).

³ Konm Jéova ka ègzaminé tchè an nou, sa ka ban-nou on bon rézon pou pwotéjé-y. Sa vé di kè i ka vwè pli lwen ki sa sé moun-la ki ka gadé-nou la pé vwè ; i ka vwè ki jan dè moun nou yé vréman (li Pwovèb 17:3). Jéova ké enmé-nou si nou ka kontinyé sonjé sé konsèy-la i ka ban-nou la, ki pé édé-nou ni lavi étèwnèl (Jan 4:14). Si nou ka fè sa, nou pé’é lésé sé manti-la Satan é mond a-y ka simé la rantré an tèt an nou é nou pé’é mèt-nou ka fè sé vyé biten-la sé moun-la ki méchan la ka fè la (1 Jan 5:18, 19). Pi nou ké vin bon zanmi èvè Bondyé, pi nou ké enmé-y é pi nou ké rèspèkté-y. É konm nou pa anvi fè Pap’an nou lapenn, pa menm imajiné nou vé pa imajiné-nou ka fè on péché. Siwvwè  ni on mové biten ki ka atiré-nou, mi sa nou ké mandé-nou a moman-lasa : « Apré tousa Bondyé fè pou montré-mwen kè i enmé-mwen, poukwa an té’é fè on biten pou fè-y lapenn ? » (1 Jan 4:9, 10).

4. On sè touvé-y douvan on tantasyon pou fè on biten ki mal, men konm i té ka krenn Bondyé, sa pwotéjé-y. Kijansa ?

⁴ Marta b sé on sè ki ka viv an Kroasi é i touvé-y douvan on tantasyon pou i té fè on péché sèksyèl. Mi sa i maké : « A moman-lasa, an pa té ka réfléchi byen konm i fo ankò é konm an té anvi fè on biten ki mal, mwen té goumé èvè sa, sa pa té senp. Men konm an té ka krenn Jéova, sa pwotéjé-mwen. » Kijan sa édé Marta ? Ében Marta di kè i té ka pran on ti tan pou réfléchi asi sé mové biten-la ki té’é pé rivé-y la siwvwè i té ka fè on péché sèksyèl. Nou osi nou pé fè menm biten ki-y. Pi mové biten-la ki té’é pé rivé nou la sé kè nou fè Jéova lapenn. Anplisdisa, Jéova vlé pèwmèt-nou adoré-y pou touttan é si nou ka fè on péché, nou pé pèd posibilité-lasa (Jén. 6:5, 6).

5. Ka sa ki rivé Leo pé aprann-nou ?

⁵ On moun ki ka krenn Bondyé pa’a vin zanmi èvè moun ki ka fè mové biten. Sé sa Leo fin pa konprann. Frè-lasa ka viv o Kongo-Kinchasa. 4 an apré i pran lèbatèm, i koumansé ni mové frékantasyon. I té ka pansé kè toutotan i pa té ka fè mové biten kon zanmi a-y, i pa té ka fè ayen dè mal. Men tibwen tan apré, sé zanmi a-y la détenn asi-y é i mété-y ka bwè alkòl é ka fè péché sèksyèl. Alò i koumansé sonjé sa fanmi a-y ki té krétyen té aprann-li. I sonjé osi jan i té ni tchè-kontan avan sa, lèwvwè i té ka sèvi Jéova. Sa édé-y woupran sans a-y. I mandé sé ansyen-la édé-y é i viré anba bra a Jéova. Jòdila, i ansyen adan on lasanblé é i pyonyé èspésyal. A pa ti kontan i kontan !

6. Nou ké palé dè ègzanp a 2 madanm. Ki madanm ésa ?

 ⁶ Aprézan, an-nou gadé Pwovèb chapit 9. Adan chapit-lasa, yo ka palé dè 2 madanm : on madanm ki sòt é on madanm ki ni sajès. Sé 2 madanm-lasa sé dé senbòl ki ka montré jan ni on gran diférans antrè lèwvwè ou ni sajès é lèwvwè ou pa ni sajès c. Toupannan nou ka ègzaminé chapit-lasa, fò-nou toujou sonjé kè adan mond a Satan, sèl biten ki an tèt a sé moun-la sé tousa ki anrapò èvè péché sèksyèl é èvè pòwnografi (Éféz. 4:19). Sé pousa sa enpòwtan kè nou kontinyé krenn Jéova é kè nou ba tousa ki mal do an nou (Pwov. 16:6). Alò Pwovèb chapit 9 pé itil pou nou, ki nou sé on misyé ki nou sé on madanm. Adan chapit-lasa, chak sé madanm-la ka envité moun ki pa ni èkspéryans, kivédi moun « ki pa ni bon jijman ». Sé konsi yochak ka di : « Vin akaz an mwen é sizé pou manjé » (Pwov. 9:1, 5, 6, 13, 16, 17). Men sa ki ké rivé séla ki ké chwazi ay owa yonn adan sé madanm-lasa, pa ni ayen a vwè èvè sa ki ké rivé séla ki ké a-w owa lòt madanm-la.

7. Dapré Pwovèb 9:13-18, ka ki ké rivé moun ki k’ay aka madanm-la ki sòt la ? (gadé imaj-la osi).

⁷ Madanm-la ki sòt la ka envité moun akaz a-y. An-nou vwè kijan i ka fè sa (li Pwovèb 9:13-18). Madanm-lasa ni fon é toupé. I ka kriyé sé moun-la ki pa ni bon jijman la é i ka di-yo konsa : « Antré kotésit ! » I vé kè yo vin anmizé-yo èvè-y. Men ka ki ké rivé sé moun-lasa apré ? Labib ka ban-nou répons-la. I ka di kè « sé moun ki mò ki aka madanm-lasa ». Pétèt sa ka fè-w sonjé dòt ègzanp nou ka touvé adan sé chapit-la ki avan chapit-lasa. Pa ègzanp, Pwovèb chapit 2 ka palé dè « madanm a vis » la é dè madanm a « vyé vi » la. Sé vèwsé-lasa ka di-nou konsa : « Chimen a kaz a-y sé chimen a lanmò » (Pwov. 2:11-19). Pwovèb 5:3-10 ka avèti-nou pou nou fè atansyon a ondòt « madanm a vis », é yo ka di kè « sé adan lanmò pyé a-y ka désann ».

8. Douvan ki chwa nou pé touvé-nou ?

⁸ Séla ki ka tann ‘madanm-la ki sòt la’ ka touvé-yo douvan on chwa : swa yo ka aksèpté envitasyon a-y, swa yo ka rèfizé. Nou osi nou pé touvé-nou adan on sitiyasyon konsa. Vinvwè on moun bizwen pousé-nou fè on péché sèksyèl oben on imaj ki ni biten pòwno adan ka enki parèt douvan nou. Ka nou ké fè a moman-lasa ?

9-10. Pou ki rézon fò-nou ba tousa ki anrapò èvè péché sèksyèl gran lè a yo ?

⁹ Nou ni plizyè rézon pou nou pa fè kon sé moun-la ki ka fè péché sèksyèl la é sé dé bon rézon toubònman. ‘Madanm-la ki sòt la’ ka di : « Dlo moun ka volé bon toubònman. » Lè i ka  palé dè « dlo moun ka volé », dè kibiten i ka palé ojis ? Lè 2 moun-mayé ka ni rèlasyon sèksyèl ansanm, Labib ka konparé sa èvè on dlo ki frèch (Pwov. 5:15-18). On misyé é madanm a-y ni dwa pran plézi a yo ansanm si mayé a yo anrèjistré douvan lalwa. Men sa yo ka kriyé « dlo moun ka volé » pa ni ayen a vwè èvè sa. Okontrè, yo dwèt ka sèvi èvè èksprésyon-lasa pou palé dè rèlasyon sèksyèl moun pa ni dwa ni. An jénéral, moun ki ka fè sé biten-lasa ka fè sa an kachèt, kon on vòlè ki ka kaché-y pou volé biten a moun. Yo pé touvé ‘dlo-la yo ka volé’ la bon pas yo ka konpranndèdi ponmoun pé’é janmé sav sé mové biten-la yo ka fè la. Sé yomenm yo ka kouyonné pas Jéova ka vwè tout biten. Lè on moun ka pèd favè a Jéova, pa ni ayen ki pi anmè ki sa. Sé pi mové biten ki pé rivé on moun, alò pa ni ayen ki « bon » adan sa (1 Kor. 6:9, 10). Men a pa sa tousèl, sa k’ay pli lwen ki sa ankò.

¹⁰ Lèwvwè on moun ka fè on péché sèksyèl, aprésa i pé wont, i pé ni lenprésyon kè i pa vo ayen, i pé touvé-y ka atann on timoun kè i pa té vlé é sa pé détwi fanmi a-y. Tousa ka montré kè lèwvwè nou ka rèfizé envitasyon a ‘madanm-la ki sòt la’ é kè nou pa ka manjé sa i ka pwopozé-nou, sé on biten ki saj. Anplisdisa, onlo adan sé moun-la ki ka fè péché sèksyèl ka pèd lanmityé a yo èvè Jéova é yo pé touvé-yo èvè on maladi ki ka tchouyé-yo (Pwov. 7:23, 26). An Pwovèb chapit 9 vèwsé 18, mi sa yo ka di pou fin : « Moun i envité fon fon fon an Tonm-la. » Men si envitasyon-lasa ka menné a lanmò, poukwa ni tousa moun ki ka aksèpté-y ? (Pwov. 9:13-18).

11. Poukwa nou pé di kè pòwnografi ka fè moun soufè toubònman ?

¹¹ Alèla an-nou palé dè on zatrap onlo moun ka pri adan-y : pòwnografi. Pou sèwten moun, pa ni pon danjé adan sa. Men an réyalité, sa ka fè bon moun soufè toubònman. Yo ka vin ni lenprésyon kè yo pa vo ayen, é lèwvwè yo rantré adan vyé biten-lasa, yo pa ka rivé sòti adan fasilman. Lè on moun ka gadé imaj pòwno, sa ka rété gravé an lèspri a-y, é pou fè sa sòti, a pa ti rèd sa rèd. Anplisdisa, lè on moun ja ni dé mové lanvi, sa pa ka édé-y fè sé lanvi-lasa disparèt. Okontrè sé aprézan sé mové lanvi-lasa kay pran balan (Kol. 3:5 ; Jak 1:14, 15). Sé pousa onlo moun ki ka gadé biten pòwno ka fin pa fè péché sèksyèl.

12. Délè sèwten imaj pé mèt dé lidé ki pa pwòp adan lèspri an nou. Kijan nou pé montré kè nou ka fè atansyon a sa ?

¹² Imajiné kè on imaj ki ni pòwnografi adan ka enki parèt asi on aparèy élèktronik an nou. Ka pou nou fè ? Ében fò-nou arété gadé-y tousuit. Nou ké rivé fè sa pi fasilman siwvwè nou ka sonjé kè sa ki ni plis valè adan vi an nou, sé lanmityé an nou èvè Jéova. Délè osi, nou pé tonbé asi sèwten imaj ki pa ni pòwnografi adan men ki pé mèt dé lidé ki pa pwòp adan lèspri an nou. Poukwa fò-nou mèt sé imaj-lasa akoté osi ? Pas pa menm imajiné nou vé pa imajiné-nou ka fè on péché sèksyèl (Mat. 5:28, 29). David sé on ansyen ki ka viv an Tayland. Mi sa i ka di : « Lèwvwè sa ka rivé-mwen, an ka di-mwen : “Menmsi imaj-lasa pa ni pòwnografi adan, ès Jéova té’é kontan siwvwè an té ka gadé-y ?” Lè an ka rézonné konsa, sa ka édé-mwen aji èvè sajès. »

13. Ka ki ké édé-nou aji èvè sajès ?

¹³ Si nou pè fè on biten ki té’é pé fè Bondyé lapenn, sa ké édé-nou aji èvè sajès. Lè on moun ka krenn Bondyé, i ka « koumansé ni sajès » (Pwov. 9:10). Sé sa nou ka vwè adan prèmyé pawti a Pwovèb chapit 9. Adan sé vèwsé-lasa, yo ka konparé « vré sajès-la » èvè ondòt madanm.

14. An Pwovèb 9:1-6, nou ka touvé ondòt envitasyon. Ki envitasyon ésa é poukwa i diféran dè tala nou sòti vwè la ?

¹⁴ (Li Pwovèb 9:1-6.) Adan sé vèwsé-lasa yo ka palé dè on envitasyon Jéova ka fè-nou, li ki  sé Kréyatè an nou é ki sé Sous a tout sajès ki tini (Pwov. 2:6 ; Wom. 16:27). Yo ka palé osi dè on gran kaz ki ni 7 poto adan. Ègzanp-lasa ka montré jan Jéova donan é jan i ka akéyi moun bra gran wouvè lèwvwè yo anvi mèt konsèy a-y ki plen sajès an pratik.

15. Ka Jéova ka mandé-nou fè ?

¹⁵ Jéova donan, i ka ban-nou tout biten agogo. Sé sa madanm-la ki ni sajès la ka aprann-nou. Adan Pwovèb chapit 9, yo ka di kè i préparé vyann a-y, kè i préparé diven a-y é kè i préparé tab a-y (Pwov. 9:2). Anplisdisa, dapré sé vèwsé 4 é 5 la, mi sa i ka di sé moun-la ki pa ni bon jijman la : « Vini-zòt ! Manjé pen an mwen. » Poukwa fò-nou aksèpté envitasyon a madanm-la ki ni sajès la é manjé manjé-la i préparé la ? Pas Jéova vé timoun a-y aji èvè sajès é i vé pa pon vyé biten rivé-yo. Onlo moun ka di : « Fò ou manké néyé pou ou aprann najé ». Men Jéova vé pa sa rivé-nou é i vé pa nou soufè akòz dè sé érè-la nou fè la. Sé pousa « i ka séré sajès-la kon trézò pou moun ki dwèt » (Pwov. 2:7). Si nou ka krenn Jéova, nou ké anvi fè-y plézi, nou ké suiv sé konsèy plen sajès la i ka ban-nou la é nou ké kontan fè sa (Jak 1:25).

16. Konm Alain té ka krenn Jéova, kijan sa édé-y pran on désizyon èvè onlo sajès é ki bon biten sa pòté ba-y ?

¹⁶ An-nou vwè ègzanp a Alain. Sé on ansyen é i pwofésè adan on lékòl. Difètkè i té ka krenn Jéova, sa édé-y pran on désizyon èvè onlo sajès. Kijansa ? Mi sa i ka rakonté : « Onlo adan kolèg an mwen té ka gadé biten pòwno pas pou yo sa ka aprann moun onlo biten asi rèlasyon sèksyèl. » Men Alain pa lésé-yo détenn asi-y. Mi sa i ka di ankò : « Konm an té ka krenn Jéova é kè an pa té vé fè-y lapenn, an rèfizé gadé sé fim-lasa é an pa démòd. An èspliké kolèg an mwen poukwa an té ka aji konsa. » Alain mèt konsèy a « vré sajès-la » an pratik é i « maché asi chimen a moun ki entélijan » (Pwov. 9:6). Lè yo vwè jan Alain té karé asi sa, yo touvé sa fò é aprézan, pawmi kolèg a-y ni sa ki koumansé étidyé Labib é yo jous ka vin réinyon.

17-18. Ki bon biten moun ki ka aksèpté envitasyon a madanm-la ki ni sajès la ka trapé é ki èspwa yo ni ? (gadé imaj-la osi).

¹⁷ Jéova sèvi èvè ègzanp a sé 2 madanm-lasa, pou i montré-nou ka nou pé fè pou nou ni on bèl landèmen. Sé moun-la ki ka aksèpté envitasyon a madanm-la ki ka fè bon dézòd la é ki sòt la ka éséyé pran pyé a yo adan dé biten ki pa pwòp. Men yo pa ka rann-yo kont kè sa yo ka fè jòdila ni on éfé asi sa ki ké rivé-yo dèmen. Yo ké fin « fon fon fon an Tonm-la » (Pwov. 9:13, 17, 18).

¹⁸ Sé pé’é menm biten pou moun ki ka aksèpté envitasyon a madanm-la ki ni sajès la. Yo ké kontan davwa yo ni tousa yo bizwen pou rété  bon zanmi èvè Jéova (Iz. 65:13). Mi sa Jéova pousé Izayi maké : « Kouté-mwen byen, é manjé sa ki bon, konsa zò ké manjé sa ki méyè, agou a kè a zòt » (Iz. 55: 1, 2). Nou ka aprann enmé sa Jéova enmé é nou ka aprann hay sa i hay (Sòm 97:10). É nou kontan pas nou pé envité dòt moun pou « vré sajès-la » fè-yo dibyen osi. Nou kon sé sèwvant-la ki mèt-yo « sé koté-la ki pi ho la adan vil-la pou yo hélé fò é pou yo di : “Tousa ki pa ni èkspéryans, antré kotésit !” » Sé byenfé-la nou ka jwenn la é kè moun ki ka kouté-nou ka jwenn osi, a pa pou on ti moman men sa ké diré. Nou jous ni lèspwa kè nou ké « viv » é kè nou ké « maché asi chimen a moun ki entélijan » pou touttan (Pwov. 9:3, 4, 6).

19. Dapré Éklézyas 12:13, 14, ka fò-nou byen désidé a fè ? (gadé ti karé-la «  Krenn Bondyé ka fè-nou dibyen »).

¹⁹ (Li Éklézyas 12:13, 14.) Krenn Bondyé ké pwotéjé tchè an nou, sa ké édé-nou rété pwòp douvan Bondyé é nou ké rété bon bon zanmi èvè-y pannan sé dènyé jou-la nou ka viv la. Nou ké kontinyé envité tout sé moun-la nou pé envité la a chèché « vré sajès-la » é nou ké édé-yo vwè jan sa ka fè-yo dibyen pas nou ka rèspèkté Jéova é pas nou enmé-y èvè tout tchè an nou.