Labib pa ka di-nou poukwa. Men i ka ban-nou déotwa détay ki entérésan é ki pé édé-nou konprann pou ki rézon pétèt yo fè chwa-lasa.

On zanj di Mari kè i té’é ansent é kè i té’é fè on tigason. Lè zanj-la vin ba Mari mésaj-lasa, Mari té ka viv Nazarèt, on vil ki té an Galilé é Jozèf té ka rété Nazarèt osi (Lik 1:26-31 ; 2:4). Aprésa lèwvwè yo sòti an Éjipt, yo viré Nazarèt. Sé koté-lasa Jézi grandi é i vin on moun-Nazarèt (Mat. 2:19-23). Sé pousa lèwvwè nou ka tann non a Jézi, Jozèf é Mari, sé Nazarèt ki ka vin an lèspri an nou.

Mari té ni on fanmi ki té ka rété an Jida. Non a-y sé té Élizabèt. Sé té madanm a on prèt non a-y sé té Zakari é sé-y ki vin manman a Jan Lèbatis (Lik 1:5, 9, 13, 36). Mari té vin vwè Élizabèt é i rété 3 mwa akaz a-y an Jida. Aprésa Mari viré Nazarèt (Lik 1:39, 40, 56). Donk sa vé di kè Mari té konnèt téritwa a Jida.

Plita, Jozèf obéyi lwa-la ki té ka mandé moun ‘ay anrèjistré-yo’ adan vil-la yo té fèt la. Alò Jozèf sòti Nazarèt pou ay Bétléèm. Yo ka kriyé Bétléèm osi « vil a David » é sé koté-lasa pwofési-la té anonsé kè Mési-la té’é fèt (Lik 2:3, 4 ; 1 Sam. 17:15 ; 20:6 ; Mich. 5:2). Apré Mari fè Jézi, Jozèf pa fè-y fè tout pakèt chimen-la pou viré Nazarèt èvè on tibébé asi bra a-y. Alò yo rété Bétléèm. Vil-lasa té ka touvé-y a 9 km dè Jérizalèm. Kifè, yo té’é pé menné timoun-la pi fasilman adan Tanp-la é yo té’é pé fè ofrann-la Lwa-la té ka mandé-yo fè la (Lév. 12:2, 6-8 ; Lik 2:22-24).

Kèlkè tan avan, zanj a Bondyé té di Mari kè gason a-y té’é ni « dominasyon a David » é kè i té’é « gouvèné ». Pétèt kè Jozèf é Mari rivé konprann kè sa té enpòwtan kè Jézi té fèt adan « vil a David » (Lik 1:32, 33 ; 2:11, 17). Pétèt osi yo pansé kè sa té’é pi saj si yo té ka rété Bétléèm é kè yo té ka atann kè Bondyé di-yo ka pou yo fè apré.

Nou pa sav konmen tan yo té ja ka rété Bétléèm lèwvwè sé astwològ-la rivé akaz a yo. Men a moman-lasa, fanmi-la té ka viv adan on kaz é Jézi pa té on tibébé ankò (Mat. 2:11). I ka sanm sa olyé yo té viré Nazarèt, yo rété Bétléèm on bon ti moman é yo enstalé-yo la.

Éwòd mandé pou yo tchouyé « tout tigason ki té ni 2 zan oben ki té pi piti é ki té ka rété Bétléèm » (Mat. 2:16). Konm on zanj vin avèti Jozèf, alò li é Mari kouri kaché an Éjipt èvè Jézi é yo rété la joustan Éwòd mò. Plita, Jozèf viré Nazarèt èvè fanmi a-y. Poukwa yo pa viré Bétléèm ? Ében sé paskè a épòk-lasa, gason a Éwòd, Awkélayis, té ka gouvèné an Jidé é sé té on boug ki té mové toubònman. Alò on zanj wouvin owa Jozèf pou di-y kijan sa té’é danjéré si yo té ka viré la. A Nazarèt, Jozèf té’é ansékirité pou lévé Jézi (Mat. 2:19-22 ; 13:55 ; Lik 2:39, 52).

I ka sanm sa Jozèf mò avan Jézi té wouvè chimen-la pou moun résisité an syèl-la. Kifè, Jozèf ké résisité asi latè. Onlo moun ké pé vwè-y é a moman-lasa yo ké pé palé-y dè chwa-la i fè la, lèwvwè li é Mari rété Bétléèm apré Jézi fèt, é mandé-y déotwa détay asi sa.