29 avril – 5 mé
SÒM 34-35
Kantik 10 é priyè | Pawòl pou koumansé (1 min)
1. « Louwé Jéova toutlè »
(10 min)
David té ka louwé Jéova menm lè i té ka jwenn bout-rèd (Sòm 34:1 ; w07-F 1/3 22 § 11).
Olyé David blagé parapòt a limenm, i té ka ba Jéova glwa (Sòm 34:2-4 ; w07-F 1/3 22 § 13).
Sa David té ka di pou louwé Jéova té ka konsolidé fwa a sé boug-la ki té èvè-y la (Sòm 34:5 ; w07-F 1/3 23 § 15).
Apré David rivé chapé anba men a Abimélèk, 400 nonm ki té trapé pwoblèm èvè Sayil vin jwenn David adan dézè-la (1S 22:1, 2). David dwèt té ka sonjé sé nonm-lasa lè i maké sòm-lasa (Sòm 34, sa ki maké antèt a sòm-la).
MANDÉ-W : « Kijan an té’é pé louwé Jéova lè an ké palé èvè on moun adan pwochen réinyon a lasanblé-la ? »
2. Trézò èspirityèl
(10 min)
-
Sòm 35:19 : Lè David mandé Jéova pa lésé séla ki hay-li la « fè on sign èvè zyé a yo », ka i té vlé di pa la ? (w06-F 15/5 20 § 1).
-
Ki trézò èspirityèl ou jwenn adan lèkti biblik a simenn-lasa ?
3. Lèkti a Labib
(4 min) Sòm 34:1-22 (th lèson 5)
4. Lè ou ka koumansé on ti kozé
(2 min) ADAN ALÉ É VINI A-W. Ti kozé-la ka bout avan ou ni tan ba moun-la témwagnaj-la (lmd lèson 1 pwen no 4).
5. Lè ou ka viré palé èvè on moun
(4 min) ADAN ALÉ É VINI A-W. (lmd lèson 2 pwen no 4).
6. Èspliké kwayans a-w
(5 min) Démonstrasyon. ijwfq 59. Tèm : Kijan Témwen a Jéova ka rivé sav si on fèt bon oben si i pa bon ? (th lèson 17)
Kantik 59
7. Twa mannyè nou pé louwé Jéova adan réinyon an nou
(15 min) Ti kozé.
Sé réinyon a lasanblé-la ka ban-nou dé bèl lokazyon toubònman pou louwé Jéova. Mi twa mannyè.
Ti kozé : Palé dè bonté a Jéova lè ou ka kozé èvè lézòt (Sòm 145:1, 7). Ès ou tann oben ou li on biten byen prési ki fè-w dibyen ? Ès ou viv on bèl ti biten an prédikasyon ? Ès on moun di oben fè on biten ki ankourajé-w ? Ès ou vwè on biten adan kréyasyon-la ki fè-w rété èstèbèkwè ? Tousa sé kado a Jéova (Jk 1:17). Rivé tibwen pli bonnè pou ni tan palé èvè lézòt.
Komantè : Éséyé bay omwen on komantè adan chak réinyon (Sòm 26:12). Ou pé réponn dirèktèman a kèsyon-la oben bay on komantè asi ondòt lidé enpòwtan, on vèwsé, sé imaj-la oben kijan ou pé apliké lidé-la. Konm dòtmoun dwèt ké lévé men a yo anmenmtan ki-w, préparé plizyè komantè. Plis moun ké pé « ba Bondyé on sakrifis a louwanj » si komantè an nou pa’a dépasé 30 sègond (Éb 13:15).
Kantik : Chanté sé kantik-la èvè onlo chalè (Sòm 147:1). Pétèt yo pé ké ba-w réponn adan chak réinyon, siwtou si ou adan on gran lasanblé, men ou toujou ké pé chanté sé kantik-la. Menmsi ou ni lenprésyon kè ou pa on bon chantè, lè ou ka fè tousa ou pé, sa ka fè Jéova plézi toubònman ! (2Ko 8:12). Ou pé antréné-w chanté sé kantik-la akaz a-w.
Montré VIDÉO-la On ti vwayaj adan istwa an nou : Sé kantik-la sé dé bèl ti kado (1é pati). Aprésa pozé kèsyon-lasa :
An koumansman a òwganizasyon a Jéova a jòdijou, ka ki ka montré kè sa té ja enpòwtan dè chanté louwanj ba Jéova ?
