Lézòm ké viv pou touttan asi latè : sé adan Labib ou ka touvé bon nouvèl-lasa (Sòm 37:29). Adan Bib-la, ni 66 liv. Bondyé sèvi èvè apépré 40 nonm fidèl pou ékri sé liv-lasa. Sé senk prèmyé liv-la, sé Moyiz ki ékri-yo ni anviwon 3 500 zan. Dènyé liv-la, sé lapòt Jan ki ékri-y ja ni pliski 1 900 zan. Sé nonm-la Bondyé itilizé la, ès sé lidé a yomenm yo maké ? Non, yo maké lidé a Bondyé. Bondyé sèvi épi lèspri sen a-y pou i té pé sa kominiké èvè yo (2 Samiyèl 23:2). Kivédi sé Jéova ki Lotè a Labib (Li 2 Timoté 3:16 ; 2 Pyè 1:20, 21).

Gadé vidéo-la Kimoun ki lotè a Labib ?

Nou sav Labib ka vin dè Bondyé paskè lè i ka anonsé on biten ké fèt, i ka bay onlo détay é i pa jen ka tronpé-y. Pon nonm pa kapab fè sa (Joziyé 23:14). Sé yenki Bondyé Toupuisan-la ki pé sav alavans ka dèmen ké pòté pou lézòm (Li Izayi 42:9 ; 46:10).

On liv ki ka vin dè Bondyé pé pa ka sanm pondòt liv. É sé vré, Labib pa ka sanm pondòt liv : i ka ègzisté an plizyè santenn lang. É yo ja enprimé milya é milya bib. Menmsi sa ka fè lontan yo ékri Labib, lè i ka palé dè sijé syantifik, pa jen ni érè. Sé ékriven-la pa jen té an kontradiksyon *. Mésaj a lanmou la ki adan Labib pé vin yenki dè vré Bondyé-la, Bondyé-la ki plen lanmou la. É jous alajouné jòdi, Labib kapab chanjé vi a on moun pou fè-y vin plibèl. Tousa ka fè ni plizyè milyon moun ki sèten Labib sé Pawòl a Bondyé (Li 1 Tésalonisyen 2:13).

 Dépi tan-la yo fè Bib-la, ès yo pa chanjé dé biten adan-y ? Lè nou ka gadé maniskri a Labib ki ni pliski 2 000 an, nou ka rann-nou kont kè mésaj-la ki adan Pawòl a Bondyé toujou rété menm biten-la (Izayi 40:8). Bondyé pa lésé ponmoun tòd Pawòl a-y (Li Sòm 12:6, 7 ; 1 Pyè 1:24, 25).

Gadé vidéo-la Kijan nou pé sèten Labib ka vin dè Bondyé ?

Labib ka palé onlo dè bon nouvèl-lasa : Bondyé ni on pwojé plen lanmou pou lézòm. I ka èspliké kijan, granbonnè, lézòm pèd posibilité yo té ni dè viv adan paradi-la. Men i ka èspliké osi kè anfilnaldikont, on jou, yo ké viv adan on paradi si latè (Li Révélasyon 21:4, 5).

Adan Labib nou ka touvé lwa, prensip é konsèy. Nou ka touvé osi istwa ki ka montré kijan Bondyé ka aji èvè lézòm. Sé istwa-lasa ka aprann-nou ki jan dè moun Bondyé yé. Donk, Labib pé édé-w konnèt Bondyé. I ka èspliké kijan ou pé vin zanmi a-y (Li Sòm 19:7, 11 ; Jak 2:23 ; 4:8).

Bwochi-lasa ké édé-w konprann Labib pas i ka itilizé menm métòd ki Jézi. Jézi té ka pran dé pasaj adan Lézékriti é i té ka èspliké sa yo té « vlé di » (Li Lik 24:27, 45).

Sé bon nouvèl-la ki ka vin dè Bondyé entérésan toubònman ! Magrésa, ni dé moun sa pa ka entérésé ditou. Ni dòt ki vlé pa tann palé dè sa menm. Men vou, pa lésé sa dékourajé-w. Sé sèlman si ou aprann konnèt Bondyé ou ké pé ni lèspwa viv pou touttan (Li Jan 17:3).