LÈSON 4
Jézikri, kimoun i yé ?
1. Ki koté Jézi sòti ?
Ka ki té ka fè kè toutmoun té ka santi-yo alèz èvè Jézi ? (MATYÉ 11:29 ; MAWK 10:13-16).
Jézi pa té kon nou : avan i té vin si latè, i té ka viv an syèl-la é sété on zanj (Jan 8:23). Bondyé kréyé-y an prèmyé, é aprésa i édé Bondyé kréyé tout sélézòt biten-la. Sé li tousèl Jéova kréyé dirèktèman. Sé pousa Labib ka di kè i sé « sèl » Gason a-y (Jan 1:14). Yo ka kriyé-y « Pawòl-la » osi, pas i té ka sèvi Bondyé Pòt-Pawòl : Jéova sèvi èvè-y pou i pòté mésaj ba moun (Li Pwovèb 8:22, 23, 30 ; Kolosyen 1:15, 16).
2. Poukwa Jézi vin asi latè ?
Bondyé voyé Gason a-y si latè : i mèt vi a Jézi adan vant a on jennfi juif ki té vyèj é kè yo té ka kriyé Mari. Kifè, a pa on nonm ki té papa a Jézi (Lik 1:30-35). Jézi vin asi latè 1) pou anségné moun lavérité si Bondyé, 2) pou ban-nou lègzanp, pou nou sav kijan pou nou sèvi Bondyé menm lè nou ni pwoblèm é 3) pou i bay vi pawfè a-y pou péyé « on ranson » (Li Matyé 20:28).
3. Poukwa nou bizwen on ranson ?
On ranson, sé on pri ou ka péyé pou libéré on moun yo vlé tchouyé (Ègzòd 21:29, 30). Jòdijou, nou ka vyéyi é nou ka mò. Men a pa sa Bondyé té vlé pou nou. Kijan nou fè sav sa ? Bondyé di Adan, prèmyé nonm-la i fè la, kè si i pa obéyi, i ké mò. Donk si Adan té obéyi, kivédi si i pa té péché, i pa té’é jen mò (Jénèz 2:16, 17 ; 5:5). Labib ka aprann-nou kè sé Adan ki fè si lanmò « rantré » adan lèmond. Sa Adan lésé ba tout pitit a-y, sé péché-la é kondannasyon-la ki kay èvè péché-la : lanmò. Kifè nou bizwen on ranson pou nou sòti anba jouk a lanmò kè Adan mété anlè nou (Li Women 5:12 ; 6:23).
Kimoun ki té pé péyé ranson-lasa é fè-nou sòti anba jouk a lanmò ? Lè on moun ka mò, sé yenki pou péché a-y tousèl i ka péyé. Kifè pon nonm enpawfè pé pa péyé pou péché a lézòt (Li Sòm 49:7-9).
4. Poukwa Jézi mò ?
Jézi pa té kon nou : i té pawfè. I pa jen péché. Donk, i pa té bizwen mò pou péché a-y. Sé pou péché a lézòt i mò. Bondyé montré kè i enmé-nou fò toubònman : i voyé Gason a-y asi latè pou i mò pou nou. Jézi osi montré kè i enmé-nou : i obéyi Papa-y é i bay vi a-y pou nou (Li Jan 3:16 ; Women 5:18, 19).
Gadé vidéo-la Poukwa Jézi mò ?
5. Ka Jézi ka fè konnyéla ?
Lè Jézi té si latè, i géri moun-malad, i fè moun-mò wouviv, é i édé moun ki té ni pwoblèm. Lè i fè sa, i montré sa i ké fè plita pou tout moun ki ka obéyi Bondyé (Matyé 15:30, 31 ; Jan 5:28). Apré Jézi mò, Bondyé fè-y wouviv, i woufè-y vin on zanj (1 Pyè 3:18). Aprésa, fò Jézi té atann « adwat a Bondyé » jiskatan Bondyé ba-y pouvwa pou i gouvèné asi toutlatè (Ébré 10:12, 13). Alèla, Jézi Wa an syèl-la. Disip a-y ka anonsé bon nouvèl-lasa toupatou si latè (Li Danyèl 7:13, 14 ; Matyé 24:14).
Talè, Jézi ké itilizé pouvwa-la Jéova ba-y la antankè Wa pou woté tout kalité soufrans é pou détwi sé moun-la ki ka fè lézòt soufè la. Tousa ki ni lafwa an Jézi é ki ka obéyi-y ké viv adan on paradi asi latè (Li Sòm 37:9-11).
