LÈSON 6
Ki èspwa ki ni pou lémò ?
1. Ki bon nouvèl ki ni anrapò èvè lémò ?
Jézi té ni on zanmi yo té ka kriyé Laza, ki té ka rété Bétanni, on vil ki té toupré Jérizalèm. On jou, zanmi a-y mò, é lè Jézi rivé Bétanni, i té ja mò dépi kat jou. Jézi ay owa tonm-la èvè Mawt é Mari, sè a Laza. Adan on ti moman, onpakèt moun sanblé. Lèwgadé, Jézi wouba Laza lavi. A pa ti kontan Mawt é Mari dwèt té kontan ! (Li Jan 11:21-24, 38-44).
Mawt té ja konnèt ki bon nouvèl ki ni anrapò èvè lémò. I té sav Jéova té kay résisité moun-mò pou yo wouviv asi latè (Li Jòb 14:14, 15).
2. Ka i ni apré lanmò ?
Bondyé di Adan : « Ou sé pousyè é ou ké rètouné an pousyè-la » (JÉNÈZ 3:19).
Lézòm fèt èvè pousyè (Jénèz 2:7 ; 3:19). Nou fèt èvè chè é èvè san. Nou pa ni pon nanm imòwtèl andidan kò an nou. Kifè, lè nou ka mò, pa ni ayen adan nou ka kontinyé viv. Lè on moun ka mò, sèwvo a-y ka mò osi. I pé pa ni réfléchi, ni rèsanti ayen ankò. Lè on moun mò, i pa ka rann-li kont dè ayen. Dayè pou yonn, lè Laza mò é i résisité, i pa jen rakonté ayen asi pon vi apré lanmò (Li Éklézyas 9:5, 6, 10).
Ès Bondyé ka fè moun soufè adan flanm-difé apré yo mò ? Labib ka aprann-nou kè lémò pa ka rann-yo kont dè ayen. Donk ansègnman-la konmkwa Bondyé ka voyé moun brilé an lanfè, sé on mansonj ki ka sali non a Bondyé. Dayè pou yonn, lidé-lasa menm, dè fè moun soufè adan flanm-difé, ka ba-y malokyè (Li Détéwonòm 12:31).
Gadé vidéo-la Ka i ni apré lanmò ?
3. Ès moun-mò pé palé ban nou ?
Moun-mò pé pa ni palé ni tann (Sòm 115:17). Men ni dé zanj méchan ki ka palé ba moun pou fè-yo kwè kè sé èvè moun-mò yo ka palé (2 Pyè 2:4). Jéova ka défann-nou éséyé palé èvè moun-mò (Li Détéwonòm 18:10, 11).
4. Kimoun ki ké résisité ?
Ni plizyè milyon moun ki mò ki ké résisité pou yo wouviv asi latè. Menm dé moun ki pa té konnèt Bondyé é ki fè dé biten ki pa té bon ké résisité (Li Lik 23:43 ; Akt 24:15).
Moun ki ké résisité ké ni lokazyon aprann kimoun Bondyé yé vréman é si yo kouté-y, yo ké pé montré yo ni lafwa an Jézikri (Révélasyon 20:11-13). Sa ki ké fè lèbyen ké pé viv asi latè pou touttan (Li Jan 5:28, 29).
5. Ka larézirèksyon ka aprann-nou asi Jéova ?
Bondyé voyé Gason a-y mò pou nou asi latè. Donk sé grasa Bondyé si ni on èspwa pou moun ki mò. Larézirèksyon ka ban-nou prèv kè Bondyé enmé-nou é kè i bon èvè nou, menmsi nou pa menm mérité sa. Lè moun-mò ké résisité, kimoun ou té ké plis anvi wouvwè ? (Li Jan 3:16 ; Women 6:23).
