Sé bon nouvèl-la ka vin dè Jéova, Dyé-la tchè a-y kontan la. I vlé sé fanmi-la ni tchè-kontan osi (1 Timoté 1:11). Mayé, sé on biten Bondyé limenm mèt anplas. Mayé douvan lalwa, sa vréman nésésè pou toutmoun éré an fanmi-la : sa ka fè sé timoun-la é sé paran-la santi-yo plis ansékirité. Sé krétyen-la dwèt rèspèkté lwa ki tini la yo ka rété la, anrapò èvè jan yo ka anrèjistré on mayé (Li Lik 2:1, 4, 5).

Kijan Bondyé ka vwè mayé ? Pou-y, mayé-la ka ini on misyé é on madanm pou yo rété ansanm tout vi a yo. I vlé kè on mari é madanm a-y rété fidèl yonn a lòt (Ébré 13:4). Jéova hay divòs (Malaki 2:16). Sèlman, i ka pèwmèt on krétyen divòsé é woumayé si moun-la ki mayé èvè-y la tronpé-y (Li Matyé 19:3-6, 9).

Adan on mayé, ki misyé-la ki madanm-la ni wòl a yo, é yonn ka konplété lòt. Sé sa Jéova té vlé lè i kréyé-yo (Jénèz 2:18). Konm mari-la sé chèf a fanmi-la, i ni rèsponsabilité. Fò i ba madanm a-y é timoun a-y sa yo bizwen pou yo viv. Fò i palé-yo dè Bondyé é fò i anségné-yo osi. Fò i enmé madanm a-y é fò i paré a fè sakrifis pou-y. On misyé é madanm a-y dwèt enmé-yo é rèspèkté-yo. Tout mari é tout madanm ka fè érè, donk fò yo aprann padoné. Sé konsa yo ké ni tchè-kontan adan mennaj a yo (Li Éfézyen 4:31, 32 ; 5:22-25, 33 ; 1 Pyè 3:7).

Si sa pa kay èvè mari a-w oben èvè madanm a-w, fò-zòt toulédé fè onlo éfò pou aji èvè lanmou yonn èvè lòt (1 Korentyen 13:4, 5). Pawòl a Bondyé pa ka konséyé moun-mayé séparé pou yo réglé nenpòt ti pwoblèm yo ka jwenn an mennaj a yo (Li 1 Korentyen 7:10-13).

Jéova vlé tchè a-w kontan. I ka ba-w méyè konsèy ki tini, pou-w pé sa pwofité dè jennès a-w. I vlé kè ou kouté fanmi a-w, ki ni plis sajès é plis èkspéryans ki-w (Kolosyen 3:20). Anplis, Kréyatè a-w vlé ou rèsanti jwa-la ki ni la lè ou ka travay pou Li é pou Gason a-y (Li Éklézyas 11:9–12:1 ; Matyé 19:13-15 ; 21:15, 16).

Sé vré, fò-w travay rèd pou ba timoun a-w bwè é manjé, on koté pou yo rété é lenj pou yo mété anlè yo (1 Timoté 5:8). Men pou tchè a yo kontan, fò ou aprann-yo enmé Bondyé é aprann-yo lésé Bondyé anségné-yo (Éfézyen 6:4). Si mannyè ou ka viv ka montré kè ou enmé Bondyé, sa pé rivé a touché tchè a yo. Si édikasyon-la ou ka ba-yo la bazé asi Labib, sa pé aji anbyen anlè mannyè yo ka pansé (Li Détéwonòm 6:4-7 ; Pwovèb 22:6).

Lè ou ka ankourajé sé timoun-la é lè ou ka félisité-yo, sa ni on bon éfé asi yo. Men sé timoun-la mérité osi ou korijé-yo é yo bizwen ou aprann-yo obéyi. Fòwmasyon-lasa ké pwotéjé-yo : i ké anpéché-yo fè dé biten ki té’é rann-yo tris tout vi a yo (Pwovèb 22:15). Men lè ou ka korijé timoun a-w, fò pa ou jen two rèd, oben two brital (Li Kolosyen 3:21).

Témwen a Jéova pibliyé plizyè liv ki fèt èspésyalman pou édé sé paran-la é sé timoun-la. Sé liv-lasa bazé si Labib (Li Sòm 19:7, 11).