LÈSON 2
Kimoun ki Bondyé ?
1. Poukisa nou dwètèt adoré Bondyé ?
Sé Bondyé ki kréyé tout biten. I pa ni komansman é i pé ké jen ni fen : i toujou té la é i ké toujou la (Sòm 90:2). Sé Bondyé ki ka ban-nou sé bon nouvèl-la nou ka touvé adan Labib (1 Timoté 1:11). Sé Bondyé ki ban-nou lavi. Donk sé yenki li nou dwètèt adoré (Li Révélasyon 4:11).
2. Ki jan dè moun Bondyé yé ?
Ponmoun po’o jen vwè Bondyé pas sé on lèspri (sé lèspri-la lontan pli entélijan é pli fò ki nou ; kò a yo pa fèt ni èvè chè ni èvè san, é yo pa ka viv si latè) (Jan 1:18 ; 4:24). Men nou pé konprann kijan Bondyé ka pansé é sa i ka rèsanti si nou pran tan gadé sa i kréyé. Pa ègzanp, lè nou ka vwè tout kalté modèl fwi é flè ki ni asi latè, nou ka konstaté kijan Bondyé plen lanmou é plen sajès. É lè nou ka rété gadé grandè a linivè, nou ka vwè puisans a Bondyé (Li Women 1:20).
Nou pé aprann plis biten ankò asi Bondyé lè nou ka li Labib. Pa ègzanp, Labib ka fè-nou sav sa i enmé é sa i pa enmé, jan i ka aji èvè nou é jan i réyaji douvan sèwten sitiyasyon (Li Sòm 103:7-10).
3. Ès Bondyé ni on non ?
Jézi di : « Pap’an nou ki an syèl-la, fò non a-w vin sen » (Matyé 6:9). Bondyé ni onlo tit, men i ni onsèl non. Yo pa ka di non-lasa menmjan-la adan tout sé lang-la. An kréyòl, nou plito ka di « Jéova ». Men ni moun osi ka di « Yavé » (Li Sòm 83:18).
Adan onlo vèrsyon a Labib, yo woté non a Bondyé é an plas a-y, yo mèt tit kon Sényè, Létèwnèl oben Bondyé. Alòskè lè yo ékri Labib, ou té ka touvé non a Bondyé près 7 000 fwa adan-y. Jézi té ka fè moun konnèt non-lasa lè i té ka palé-yo dè Bondyé (Li Jan 17:26).
Gadé vidéo-la Ès Bondyé ni on non ?
4. Ès Jéova ka sousyé-y dè nou ?
Menmjan ki papa-lasa ki plen lanmou, Bondyé vlé kè nou byen pou lontan.
Ni onlo soufrans asi latè. Ès sa vlé di Jéova pa ka sousyé-y dè nou ? Ni moun ka di sé Bondyé ki ka fè-nou soufè pou i vwè kijan nou ka réaji, men a pa vré (Li Jak 1:13).
Lè i ba lézòm libèté-la dè fè pwòp chwa a yo, Bondyé ba-yo valè. A pa ti kontan nou kontan dè ni libèté-lasa ! Ès pa vré ? Nou pé sèvi Bondyé pas sé sa nou désidé fè (Joziyé 24:15). Malérèzman, ni onlo moun ka chwazi fè lézòt sibi méchansté. Sé pousa ni tousa soufrans. Lè Jéova ka vwè tout sé enjistis-lasa, sa ka fè-y lapenn (Li Jénèz 6:5, 6).
Jéova ka sousyé-y dè nou. I vlé nou viv èvè tchè-kontan. Talè, i kay woté soufrans ; é séla ki ka fè lèzòt soufè la, i ké fè-yo disparèt. Annatandan, i ka pèwmèt sé soufrans-lasa, men sé pou on bon rézon. Nou ké dékouvè rézon-lasa adan lèson 8 la (Li 2 Pyè 2:9 ; 3:7, 13).
5. Kijan nou pé vin zanmi a Bondyé ?
Jéova ka ankourajé-nou a vin zanmi a-y. Pousa, fò-nou palé ba-y, fò-nou priyé-y. I ka okipé-y dè nouchak (Sòm 65:2 ; 145:18). I ka padoné-nou volontyé. I ka vwè éfò nou ka fè pou fè-y plézi, menmsi sa pa toujou fasil. Donk, menmsi nou pa pawfè, nou pé vin zanmi a Bondyé (Li Sòm 103:12-14 ; Jak 4:8).
Jéova ban-nou lavi. Kifè, sé li nou dwèt enmé pliski pondòt moun (Mawk 12:30). Kijan ou pé montré kè ou enmé Bondyé ? Aprann konnèt-li, é fè sa i ka mandé-w. Pli ou ké fè sa, pli ou ké pré Bondyé (Li 1 Timoté 2:4 ; 1 Jan 5:3).
