Asiré pa pétèt, ansègnman fondamantal ou dékouvè an Bib-la fè lanmou a-w pou Jéova vin pli fò. Pou lanmou-lasa kontinyé grandi, fò-w toujou bay sa i bizwen (1 Pyè 2:2). Kontinyé étidyé Labib pou ou vin pli pré a Bondyé ankò. Sé yenki konsa ou ké pé ni lèspwa dè viv pou touttan (Li Jan 17:3 ; Jid 21).

Pli ou ké konnèt Bondyé, pli fwa a-w ké vin fò. Fwa a-w ké ba-w fòs pou-w fè Bondyé plézi (Ébré 11:1, 6). Sa ké ba-w balan pou rèpanti-w é chanjé sa ki mérité chanjé, é vi a-w ké vin pli bèl (Li Akt 3:19).

Noutout enmé pawtajé bon nouvèl. Alò sa nòwmal kè ou ké anvi palé èvè dòt moun dè sa ou aprann ! Si ou kontinyé étidyé Labib, ou ké aprann sèvi èvè-y pou-w pé sa èspliké-yo poukwa ou ni lafwa an Jéova é pou fè-yo sav ki bon nouvèl Bondyé ni pou nou (Li Women 10:13-15).

Onlo moun ka pawtajé bon nouvèl-la èvè zanmi a yo é èvè fanmi a yo an prèmyé. Sèlman, fò-w fè atansyon a sa ou ka di é a kijan ou ka di-y. Olyé ou di moun ki an fanmi a-w kè rèlijyon a yo pa bon, fè-yo sav sa Bondyé ka pwomèt. É sonjé kè, byen souvan, jantiyès a-w pi fasil a touché tchè a on moun ki tousa ou pé di-y (Li 2 Timoté 2:24, 25).

Lèfètkè ou ka étidyé Labib, sa ké édé-w fè pwogré. É anfinaldikont, ou ké ni on lanmityé vréman fò é èspésyal èvè Jéova. Alò, ou ké pé antré an fanmi a-y ! (Li 2 Korentyen 6:18).

Si ou kontinyé étidyé Pawòl a Bondyé, ou ké kontinyé pwogrésé (Ébré 5:13, 14). Mandé on Témwen a Jéova étidyé Labib èvè-w adan liv-la Ka Labib ka aprann-nou ? Pli ou ké étidyé Pawòl a Bondyé, pli ou ké réyisi vi a-w (Li Sòm 1:1-3 ; 73:27, 28).

Tout sé bon nouvèl-la ki adan bwochi-lasa ka vin dè Jéova, Dyé-la tchè a-y kontan la. Pou-w pé vin pi bon zanmi èvè-y, raproché-w dè moun ki ka adoré-y (Ébré 10:24, 25). Pli ou ké kontinyé fè éfò pou fè-y plézi, pli ou ké raproché-w dè vré vi-la, lavi étèwnèl. Asirésèten, vin zanmi a Bondyé, sé méyè biten ou pé fè (Li 1 Timoté 1:11 ; 6:19).