Kréyatè an nou lontan pli saj ki nou. I sé Pap’an nou : i enmé-nou é i ka sousyé-y dè nou. Anplisdisa, i pa fè-nou pou nou viv san-y (Jérémi 10:23). Donk noutout bizwen dirèksyon a-y, menmjan on timoun bizwen dirèksyon a fanmi a-y (Izayi 48:17, 18). Sé pousa Bondyé fè-nou on kado : i ban-nou prensip a Labib pou gidé-nou (Li 2 Timoté 3:16).

Sé lwa-la é sé prensip-la ki ka vin dè Jéova ka anségné-nou méyè fason pou nou viv jòdila. Yo ka montré-nou osi kijan nou pé rèsèvwa bénédisyon pou touttan. Konm sé Bondyé ki kréyé-nou, sa nòwmal kè nou suiv dè tout tchè an nou dirèksyon-la i ka ban-nou la (Li Sòm 19:7, 11 ; Révélasyon 4:11).

On prensip sé on vérité fondamantal. Lwa-la li kanta-y, ou ka apliké-y adan dé ka byen prési (Détéwonòm 22:8). Pou sav kijan pou apliké on prensip a Labib lè ou ka vin touvé-w douvan on sitiyasyon, ou oblijé réfléchi (Pwovèb 2:10-12). Pa ègzanp, Labib ka anségné kè lavi sé on kado Bondyé fè-nou. Prensip-lasa enpòwtan ; i pé édé-nou adan travay an nou, akaz an nou é adan alé é vini an nou. I ka fè-nou pran prékosyon an nou (Li Akt 17:28).

Jézi palé dè dé prensip ki enpòwtan toubònman. Prèmyé prensip-la ka montré lézòm pou ki rézon yo asi latè : pou konnèt Bondyé, enmé-y, é sèvi-y fidèlman. Nou dwètèt tchenn kont dè prensip-lasa adan tout désizyon nou ka pran (Pwovèb 3:6). Moun ki ka fè éfò pou aji konsa ka vin zanmi a Bondyé, yo ka ni tchè-kontan, é yo ké ni lavi étèwnèl (Li Matyé 22:36-38).

Dézyèm prensip-la ka édé-nou viv anpé èvè lézòt (1 Korentyen 13:4-7). Nou ka apliké prensip-lasa lè nou ka aji èvè lézòt kon Bondyé ka aji èvè yo (Li Matyé 7:12 ; 22:39, 40).

Adan Labib, ni déotwa prensip ka aprann sé fanmi-la sa yo dwèt fè pou rété soudé grasa lanmou (Kolosyen 3:12-14). Labib ka pwotéjé sé fanmi-la osi lè i ka aprann-yo suiv prensip-lasa : lè ou mayé, sé pou lavi (Li Jénèz 2:24).

Lè nou ka suiv prensip a Labib, sa ka édé-nou ni sa nou bizwen pou nou viv, é sa ka trankilizé tchè an nou. Byensouvan, on patron ké préféré travay èvè on moun ki ka rèspèkté prensip a Labib paskè moun-lasa onèt é i pa pè travay (Pwovèb 10:4, 26 ; Ébré 13:18). Anplisdisa, Labib ka aprann-nou kontanté-nou dè sa nou bizwen é i ka aprann-nou ba lanmityé an nou èvè Bondyé plis enpòwtans ki byen matéryèl (Li Matyé 6:24, 25, 33 ; 1 Timoté 6:8-10).

Prensip a Labib ka pwotéjé santé an nou (Pwovèb 14:30 ; 22:24, 25). Pa ègzanp, lè nou ka rèspèkté lwa a Bondyé ki ka di pa bwè a dépasé, sa ka pwotéjé-nou kont sèwten maladi grav é sa pé évité-nou fè aksidan (Pwovèb 23:20). Jéova ka pèwmèt-nou bwè alkòl, dépi nou pa’a bwè twòp (Sòm 104:15 ; 1 Korentyen 6:10). Prensip a Bondyé bon pou nou : yo ka aprann-nou fè atansyon a sa nou ka fè, men osi a sa ki an lèspri an nou (Sòm 119:97-100). Si sèwvitè a Bondyé ka rèspèkté prensip a-y é lwa a-y, a pa yenki pou rèsèvwa bénédisyon. Sé pou onoré Jéova (Li Matyé 5:14-16).