LÈSON 7
Ka wayòm a Bondyé yé ?
1. Ka wayòm a Bondyé yé ?
Poukwa Jézi sé méyè Wa ki tini ? (MAWK 1:40-42).
Wayòm a Bondyé sé on gouvènman ki an syèl-la. I ké ranplasé tout sélézòt gouvènman-la é sé grasa-y volonté a Bondyé ké fèt an syèl-la é asi latè. Mi on bon nouvèl mi ! Sa lézòm bizwen, sé on bon gouvènman. É sé sa yo ké ni èvè wayòm a Bondyé. Grasa wayòm-lasa, toutmoun asi latè ké viv ansanm-ansanm (Li Danyèl 2:44 ; Matyé 6:9, 10 ; 24:14).
Tout wayòm ni on wa. Jéova chwazi Gason a-y, Jézikri, pou vin Wa a wayòm a-y (Li Révélasyon 11:15).
Gadé vidéo-la Ka Wayòm a Bondyé yé ?
2. Poukwa Jézi sé méyè Wa ki tini ?
Gason a Bondyé sé méyè Wa ki tini pas i bon é i toujou ka défann sa ki byen (Matyé 11:28-30). Anplisdisa, sé dépi syèl-la i ké ka gouvèné latè. Donk, i ni puisans-la ki fo la pou i pé sa édé lézòm. Apré i résisité, i rètouné an syèl-la é i sizé « adwat a Bondyé » annatandan kè i vin Wa (Ébré 10:12, 13). É aprésa, Bondyé fè-y vin Wa a wayòm a-y (Li Danyèl 7:13, 14).
3. Kimoun ki ké gouvèné èvè Jézi ?
On gwoup yo ka kriyé « moun-sen » ké gouvèné èvè Jézi an syèl-la (Danyèl 7:18). Sé prèmyé moun-sen la Jéova chwazi la, sété apòt fidèl a Jézi. Jousalè, Jéova ka kontinyé chwazi moun fidèl, ki misyé, ki madanm. Menmjan ki Jézi, sé moun-lasa ka résisité èvè on kò èspirityèl, ki pa fèt ni èvè chè ni èvè san (Li Jan 14:1-3 ; 1 Korentyen 15:44).
Anfinaldikont, konmen moun ki ké ay an syèl-la ? Jézi di sé té ké on « piti twoupo », kivédi on piti gwoup-moun (Lik 12:32). Yo ké a 144 000 moun é yo ké gouvèné latè èvè Jézi (Li Révélasyon 14:1).
4. Ka ki pasé lè Jézi vin Wa ?
Bondyé mèt wayòm a-y an plas an 1914 *. Ki prèmyé biten Jézi fè lè i vin Wa ? I jété Satan é démon a-y asi latè. Tèlman Satan té kòlè, i komansé mété dézòd toupatou si latè (Révélasyon 12:7-10, 12). Dépi sa, ni dè plizanpli malè ka rivé lézòm. Ni lagè, tranmanndtè, moun ka mò-fen, maladi ka tchouyé moun. Tousa ka fè pati a on « sign » ki ka montré-nou kè talè, wayòm a Bondyé ké mèt tout biten annòd asi latè (Li Lik 21:7, 10, 11, 31).
5. Ka wayòm a Bondyé ka fè konnyéla ?
Grasa prédikasyon-la, wayòm a Bondyé ka pèwmèt on gran foulmoun ki sòti an tout péyi viv ansanm-ansanm. Plizyè milyon moun ki enb, ki misyé, ki madanm, dakò pou yo mété-yo anba dominasyon a Jézi. Wayòm a Bondyé ké pwotéjé-yo lè i ké détwi mond-lasa. Donk tout moun ki vlé risivwè bénédisyon wayòm-lasa ka pòté dwèt chwazi Jézi antankè Wa é obéyi-y (Li Révélasyon 7:9, 14, 16, 17).
Pannan 1 000 an, Wayòm-la ké réyalizé sa Bondyé té ni lentansyon fè pou lézòm dépi okoumansman. Toutlatè ké vin on paradi. É finalman, Jézi ké wouba Papa-y Wayòm-la (1 Korentyen 15:24-26). Ès ni on moun ou té’é anvi palé dè wayòm a Bondyé ? (Li Sòm 37:10, 11, 29).
^ par. 6 Si ou vlé sav kijan on pwofési a Labib té anonsé kè wayòm a Bondyé té ké koumansé gouvèné an 1914, gadé paj 217 a paj 220 a liv-la Ka Labib ka aprann-nou ?
