LÈSON 01
Bib-la pé chanjé vi a-w
Près noutout té’é anvi sav poukwa nou si latè é kijan lavi ké yé dèmen. Nou té’é anvi sav osi poukwa nou ka soufè é poukwa nou ka mò. Anplisdisa, noutout ni difikilté an nou. Pa ègzanp, nou ka mandé-nou kijan nou pé fè ansòt pou fanmi an nou ni on dèkwa oben kijan nou pé fè pou i ni tchè-kontan. Ni onlo moun ki ka touvé répons a sé kèsyon-la yo ka pozé-yo la adan Labib. Anplisdisa, i ka ba-yo onlo bon konsèy ki ka édé-yo adan vi a yo touléjou. É vou, ka ou ka pansé ? Ou ka di Labib pé édé-nou ?
1. A ki kèsyon Bib-la ka réponn ?
Labib ka réponn a sé kèsyon enpòwtan lasa : Kijan nou fè asi latè ? Poukwa nou la ? Poukwa ni tousa inosan ka soufè ? Ka i ni apré lanmò ? Si toutmoun enmé lapé, poukwa ni lagè konsa ? Ka latè ké divini ? Si on moun ka pozé-y sé kèsyon-lasa, sa toutafè nòwmal. Plizyè milyon moun touvé sé répons-la an Bib-la. É yo ni konfyans adan sé répons-lasa a san pou san.
2. Bib-la pé édé-w chakjou Bondyé fè jou. Kijansa ?
A pa tibwen bon konsèy ki ni an Bib-la ! Pa ègzanp, i ka di sé fanmi-la ka pou yo fè pou yo ni tchè-kontan. I ka di-nou ka pou nou fè lè nou istrésé, é i ka ban-nou konsèy pou nou enmé travay an nou. Adan sélézòt lèson-la ki ka vin la, ou ké dékouvè ka Labib ka di asi sé sijé-lasa é asi dòt sijé ankò. Sèten ou ké ni lokazyon konstaté kè ‘tout Ékriti-la, [kivédi tousa ki adan Labib] pé itil ba-w’ (2 Timoté 3:16).
Piblikasyon-lasa ka ankourajé-w étidyé Labib, men i pa’a pran plas a Bib-la. Sé pousa, pa pè li sé vèwsé-la ki adan sé lèson-la é gadé kijan yo lyanné èvè sa ou ka aprann.
AN-NOU FOUYÉ PI FON
An-nou vwè kijan Labib édé sèwten moun, ka ou pé fè pou ou li-y èvè plézi, é poukwa ou ka rivé konprann-li pibyen lè on moun ka édé-w.
3. Labib pé gidé-nou
Labib ka touvé-y kon on lanp ki ka kléré fò toubònman. I ka édé-nou pran bon désizyon, é grasa-y nou pé sav ka ki ké fèt dèmen.
Li Sòm 119:105 é fè on ti kozé asi sé kèsyon-lasa :
-
Ki valè nonm-la ki maké sòm-lasa té ka ba Bib-la ?
-
É-w menm, ka Bib-la ka rèprézanté ba-w ?
4. Labib ka réponn a sèwten kèsyon nou ka pozé-nou
Adan Bib-la, on madanm touvé répons a kèsyon i té ka pozé-y dépi plizyè lanné. Gadé VIDÉO-la é fè on ti kozé asi sé kèsyon-la ki ka vin la.
-
Ki kèsyon madanm-lasa té ka pozé-y ?
-
Ka étid-la pòté dè bon ba-y ?
Labib limenm a-y ka di kè fò-nou pozé kèsyon. Li Matyé 7:7 é fè on ti kozé asi kèsyon-lasa :
-
Répons a ki kèsyon ou té’é enmé touvé an Bib-la ?
5. Ni mwayen ou pran plézi lè ou ka li Bib a-w
Ni onlo moun ki enmé li Labib, é yo ka di kè sa ka fè-yo dibyen. Gadé VIDÉO-la, é fè on ti kozé asi sé kèsyon-la ki ka vin la.
-
Adan vidéo-lasa, ès sé jenn-la enmé li ?
-
Men poukwa yo enmé li Labib ?
Sa ki maké adan Labib ka konsolé-nou é ka ban-nou on èspwa. Li Women 15:4 é fè on ti kozé asi kèsyon-lasa :
-
Ès ou té’é anvi konnèt plis biten asi konsolasyon-la é asi èspwa-la Labib ka pwomèt-nou la ?
6. Nou ka konprann Bib-la pibyen lèwvwè on moun ka édé-nou
Ni onlo moun ki enmé li Bib a yo, men yo byen enmé palé dè sa ki maké adan-y èvè dòt moun pas sa ka édé-yo konprann-li pibyen. Li Akt 8:26-31 é fè on ti kozé asi kèsyon-lasa :
-
Si nou vé konprann Labib, ka nou pé fè ? (gadé sé vèwsé 30 é 31 la).
Fonksyonnè étyopyen la té bizwen on moun édé-y pou konprann sa i té ka li. Jòdijou osi, ni onlo moun ki enmé lè yo ka édé-yo konprann sa ki an Bib-la.
MI SA MOUN KA DI : « Lè ou ka étidyé Labib, sé tan a-w ou ka pèd. »
-
É-w menm, ka ou ka di dè sa ? Poukwa ou ka di sa ?
ON TI RÉZIMÉ
Labib ka ban-nou onlo bon konsèy ki ka édé-nou adan lavi, i ka réponn a onlo kèsyon enpòwtan nou ka pozé-nou, i ka konsolé-nou é i ka ban-nou on èspwa.
Ka ou woutyenn
-
Ki jan dè konsèy nou ka touvé an Bib-la ?
-
Adan Labib, nou ka touvé répons a sèwten kèsyon enpòwtan. Pawmi sé kèsyon-lasa, ès ou pé bay déotwa ?
-
Ka ou té’é enmé aprann grasa Labib ?
AY GADÉ SA OSI
Jousalè, sé konsèy-la ki an Bib-la itil toujou.
« Une sagesse à l’épreuve du temps » (Tou dè Gad no 1 a 2018)
On misyé pa té ka santi-y byen an po a-y dépi lè i té toupiti. Gadé kijan Labib édé-y.
Gadé ki konsèy itil Labib ka ba sé fanmi-la.
« 12 clés du bonheur familial » (Réveillez-vous ! no 2 a 2018)
Kimoun ki mèt a mond-lasa ? Labib ka korijé on érè onlo moun ka fè lè yo ka réponn a kèsyon-lasa.
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
