LÈSON 03
Ès nou pé ni konfyans adan sa Labib ka di ?
Nou ka touvé onlo pwomès é onlo konsèy an Bib-la. Pétèt kè ou byen anvi sav ka i ka anségné men anmenmtan, ou ka mandé-w si ou pé fè-y konfyans. Labib sé on vyé liv, alò ès ou ka di kè nou pé ni konfyans adan sé pwomès-la é adan sé konsèy-la ki adan-y la ? Èskè sa Labib ka di pé itil pou nou jòdijou ? É lè i ka palé dè sa ki ké fèt dèmen, ès nou pé kwè-y ? Ni plizyè milyon moun ki ka kwè kè nou pé fè Labib konfyans. Ében, ni mwayen ou vwè sa menmjan ki yo.
1. Èskè sé tim-tim-bwasèk ki an Bib-la oben sé lavérité i ka di ?
Labib limenm a-y ka di kè sé pawòl-la ki adan-y la sé vérité é kè nou pé fè-yo konfyans zyé-fèmé (Éklézyas 12:10). Labib ka palé dè biten ki fèt poudèbon é dè moun ki ègzisté vréman osi (li Lik 1:3 ; 3:1, 2). Ni onlo èspésyalis a listwa é onlo awkéològ ki montré kè lè Labib ka palé dè sèwten dat, dè sèwten moun, dè sèwten koté é dè sèwten biten ki fèt, sé lavérité i ka di.
2. Poukwa nou pé di kè Bib-la pé’é jen pasé dimòd ?
Adan onlo domenn, Labib té ja prèmyé douvan. Pa ègzanp, i té ja ka palé dè sèwten biten sé syantifik-la sòti dékouvè. É lèwvwè Bib-la té ja ka palé dè sé biten-lasa, lamajorité a sé moun-la pa té dakò èvè sa i té ka di. Men sa sé syantifik-la touvé jòdijou ka montré kè sa Labib té ka di sé té lavérité. Jousalè, nou pé ni konfyans adan sa Labib ka di é nou ké pé fè-y konfyans pou touttan (Sòm 111:8).
3. Lè Labib ka palé dè sa ki ké fèt dèmen, ès nou pé fè-y konfyans ?
Adan Labib, nou ka touvé sèwten pwofési a ki « ka anonsé sé biten-la ki poko fèt la » (Izayi 46:10). I anonsé plizyè évènman lontan avan yo té fèt. É i anonsé onlo détay asi sa nou ka vwè ki ka fèt alantou an nou jòdijou. Adan lèson-lasa, nou k’ay ègzaminé déotwa pwofési ki an Bib-la. É lè ou ké vwè jan yo réyalizé, ou ké rété èstèbèkwè !
AN-NOU FOUYÉ PI FON
An-nou vwè déotwa prèv ki ka montré kè Labib annakò èvè lasyans é an-nou ègzaminé déotwa pwofési ki an Bib-la é ki èstraòwdinè toubònman.
4. Labib annakò èvè lasyans
An tan lontan, onlo moun té ka kwè kè latè té pozé asi on biten. Gadé VIDÉO-la.
Gadé sa liv a Jòb té ka di, ja ni 3 500 lanné dè sa. Li Jòb 26:7 é fè on ti kozé asi kèsyon-lasa :
-
Dépi an tan a Jòb, Lézékriti té ja ka di kè ‘pa ni ayen ka tchenbé latè’. Poukwa sa ka siwprann onlo moun ?
Solèy-la ka frapé anlè dlo a lanmè-la, kifè, dlo-la ka évaporé é i ka monté an syèl-la. Aprésa, lapli ka tonbé asi latè é dlo-la ki tonbé la ka viré an lanmè-la. Sé yenki adan lézanné 1800 kè sé syantifik-la rivé konprann byen konm i fo ki chimen dlo-la ka fè, alòskè Labib té ja ka di sa ni enpé milyé lanné. Li Jòb 36:27, 28 é Éklézyas 1:7, é fè on ti kozé asi sé kèsyon-lasa :
-
Labib ka palé dè chimen-la dlo-la ka pran la on mannyè ki tou senp. Poukwa sé on biten ki fò toubònman ?
-
Èskè sé vèwsé-la nou sòti li la ka ba-w konfyans an Bib-la ?
5. Labib anonsé sèwten évènman enpòwtan
Li Izayi 44:27 – 45:2 é fè on ti kozé asi kèsyon-lasa :
-
Désanzan avan yo té rivé about a Babilòn, Labib té ja anonsé kijan sa té’é fèt. Ki détay i té ka ban-nou asi sa ?
Dapré sa listwa ka rakonté, Siris, wa a Lapèws, é lawmé a-y rivé about a Babilòn an 539 avan épòk an nou. Yo fè flèv-la ki té ka pwotéjé vil-la fè ondòt chimen. Pou yo té rantré an vil-la, yo pa menm té bizwen goumé pas sé Babilonyen-la té lésé sé pòt-la gran wouvè. Jòdijou, plis ki 2 500 lanné apré yo rivé about a Babilòn, vil-lasa sé on pil wòch. An-nou vwè ka Labib té anonsé anrapò èvè sa.
Li Izayi 13:19, 20 é fè on ti kozé asi kèsyon-lasa :
-
Kijan pwofési-lasa réyalizé ?
Jòdijou, Babilòn sé on pil wòch. Ou ka touvé rèstan a-y an Irak.
6. Labib té ja anonsé sa nou ka vwè jòdijou
Adan Labib, yo ka kriyé épòk an nou « sé dènyé jou-la » (2 Timoté 3:1). An-nou gadé ka Labib té ja anonsé anrapò èvè sa :
Li Matyé 24:6, 7 é fè on ti kozé asi kèsyon-lasa :
-
Dapré sa ki maké an Bib-la, ka ki té’é fèt pannan sé dènyé jou-la ?
Li 2 Timoté 3:1-5 é fè on ti kozé asi sé kèsyon-lasa :
-
Dapré Labib, ki mantalité sé moun-la té’é ni pannan sé dènyé jou-la ?
-
Pawmi tout sé konpòwtèman-lasa, kilès ou ka vwè alantou a-w ?
MI SA MOUN KA DI : « Sé nonm ki maké Labib. »
-
Sèlon vou, poukwa nou sèten a san pou san kè nou pé fè Labib konfyans ?
ON TI RÉZIMÉ
Listwa, lasyans é sé pwofési-la ka montré kè nou pé ni konfyans adan sa ki maké an Bib-la.
Ka ou woutyenn
-
Èskè sé envanté yo envanté sa ki maké an Bib-la oben sé vérité ki maké adan-y ?
-
Ka ki ka montré kè Bib-la annakò èvè lasyans ?
-
Dapré-w, ès Labib pé anonsé sa ki ké fèt dèmen ? Poukwa ou ka di sa ?
AY GADÉ SA OSI
Dapré sa lasyans dékouvè, ès ni érè an Bib-la ?
« La science est-elle d’accord avec la Bible ? » (on awtik ki asi jw.org)
Lè nou ka gadé sa ki ka fèt alantou an nou, ka sa ka montré anrapò èvè « sé dènyé jou-la » ?
« 6 prophéties qui se réalisent sous vos yeux » (Tou dè Gad a 1é mé 2011 an fransé)
Kijan sa Labib anonsé anrapò èvè wayòm a sé Grèk-la réyalizé ?
Grasa sé pwofési-la ki an Bib-la, on misyé pa ka vwè Labib menmjan-la ankò.
« Pour moi, Dieu n’existait pas » (Tou dè Gad no 5 a 2017 an fransé)
a On pwofési sé on mésaj ki ka vin dè Bondyé. Pa ègzanp, mésaj-lasa pé ka anonsé on biten ki ké fèt plita.
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
