Adan é Èv fè timoun. Latè vin plen moun. Lèwgadé, tin zanj ki pran pou Satan. Yo ba Bondyé do osi.

Yo vin si latè é yo chanjé kò a-yo an kò a nonm pou yo té pé sa mayé èvè fanm. Timoun a-yo té pli gran, pli fò é pli brital ki on nonm.

Latè vin plen é moun ki té ka fè sa ki mové. Labib ka di sé moun-la té méchan toubòlman ; sèl biten ki té an tèt a-yo sété fè sa ki pa bon.

Noé sété on bon moun. Jéova di Noé I kay détui sé méchan-la èvè on délij. Sa té vlé di dlo té ké kouvè tout latè.

Bondyé mandé Noé fè on gwo bato : on lawch. Fò Noé té fè fanmi a-y é tout kalité bèt antré adan-y.

Noé avèti sé moun-la on délij té kay vin, men yo pa kouté-y. Ni sa ki fè jé épi-y, ni sa ki té hay li.

Apré Noé fin fè lawch-la, i fè sé zannimo-la antré adan-y.