1, 2. Noutout ni on chwa a fè, kilès ? É poukwa sa enpòwtan ?

 DAPRÉ sa ou aprann an Bib-la, ou ka rann-vou kont kè onlo moun ka di yo ka adoré Bondyé, alòskè yo ka anségné oben yo ka fè dé biten kè Bondyé hay toubònman (2 Korentyen 6:17). Sé pousa Jéova ka di-nou sòti adan fo-rèlijyon-la, kivédi « Gran Babilòn-la » (Révélasyon 18:2, 4). Alò, ka ou ké fè ? Noutout ni on chwa a fè. Swa nou ka désidé adoré Bondyé kon i ka mandé, oswa nou ka adoré-y kon nou vlé.

² Si ou ja lagé fo-rèlijyon-la, sé on bon biten. Men, pétèt kè jousalè ni désèrten tradisyon oben désèrten fèt kè ou enmé toujou. An-nou palé dè déotwa adan yo. Ou ké konprann poukwa sa enpòwtan kè nou konsidéré-yo kon Jéova ka konsidéré-yo.

3. a) Ni dé moun ki ka touvé sa rèd dè adoré Bondyé san sèvi èvè imaj. Poukisa ? b) Ni moun ka sèvi èvè imaj pou yo adoré Bondyé, ka Labib ka di asi sa ?

³ Ni dé moun, sa ka fè lanné é lanné yo ka sèvi èvè imaj, èstati oben tichapèl pou yo adoré Bondyé. Si sé ka a-w, pétèt ou tèlman abityé èvè sé biten-lasa kè ou ka touvé sa dwòl dè pa sèvi èvè yo. Pétèt osi kè pou-w, sa pa byen dè adoré Bondyé san sé biten-lasa. Men pa oubliyé sa : sé Jéova ki andwa di-nou kijan pou nou  adoré-y. É Bib-la klè asi sa : i vé pa nou sèvi èvè imaj pou nou adoré-y (li Ègzòd 20:4, 5 ; Sòm 115:4-8 ; Izayi 42:8 ; 1 Jan 5:21).

4. a) Poukwa nou pa dwèt onoré zansèt an nou ? b) Poukwa Jéova té di sèwvitè a-y pa chèché palé èvè moun-mò ?

⁴ Ni moun ka fè onlo dépans, ka pasé onlo tan é ka pòté bon mannèv pou fè zansèt a yo plézi. Pa ègzanp, yo ka nétwayé tonm a zansèt a yo, yo kay liminé oben yo ka fè mès pou fanmi a yo ki mò. Men nou aprann kè moun-mò pé pa fè ayen ban nou é yo pé pa fè-nou ayen nonplis. Yo pa ni ponkoté yo ka viv. É nou vwè kè sa danjéré dè chèché antré an kontak èvè yo, pas lè on moun konpwanndèdi sé on moun-mò ki mandé-y fè on biten, pannansitan sé on démon ki ka palé ba-y. Sé pousa Jéova té ba sé Izraélit-la on lòd. I di-yo pa éséyé palé èvè moun-mò. É i di-yo pa fè pon kalté biten pou chèché antré an kontak èvè sé démon-la (Détéwonòm 18:10-12 ; gadé sé nòt n^o 26 la é 31 la, paj 221 é 223).

5. Si ou ni labitid sèvi èvè imaj pou adoré Bondyé, oben si ou ni labitid onoré zansèt a-w, ka ki pé édé-w arété fè sa ?

⁵ Si ou ni labitid sèvi èvè imaj pou adoré Bondyé, oben si ou ni labitid onoré zansèt a-w, ka ki pé édé-w arété fè sa ? Fò ou li Labib é fò ou pran tan réfléchi si jan Jéova ka vwè sé biten-lasa. Sé dé biten kè i « hay toubònman », sa ka bay malokè (Détéwonòm 27:15). Priyé Jéova chak jou pou i édé-w vwè sé biten-lasa kon i ka vwè-yo é pou i édé-w adoré-y kon i ka mandé (Izayi 55:9). Asiré pa pétèt, i ké ba-w fòs-la ou bizwen la pou-w pé débarasé-w dè tousa ki ni on rapò èvè fo-rèlijyon-la.

6. Moun ki té antèt a Légliz désidé fété anivèwsè a Jézi lè 25 désanm. Poukwa ?

⁶ Toupatou asi latè, Nwèl sé on fèt ki trè popilè. Pou onlo moun, sé jou a anivèwsè a Jézi. Men, Nwèl ni on rapò èvè fo-rèlijyon-la. Adan on ansiklopédi, yo ka èspliké kè sé Women-la té ka fété anivèwsè a solèy-la lè 25 désanm. Yo té dé payen, kivédi dé moun ki té ka adoré plizyè dyé. Sé moun-la ki té antèt a Légliz té anvi sé payen-la vin krétyen. Alò yo désidé fété anivèwsè a Jézi lè 25 désanm, menmsi a pa jou-lasa i fèt (Lik 2:8-12). Disip a Jézi pa té ka fété Nwèl. On liv ka èspliké kè, apré Jézi fèt, pannan 200 lanné, « ponmoun pa té sav ki jou Jézi té fèt ègzaktèman, é sa pa té ka entérésé gran zafè a moun » (Sacred Origins of Profound Things). An réyalité, yo komansé fété Nwèl anviwon 300 lanné apré Jézi fèt.

7. Poukwa sé vré krétyen-la pa ka fété Nwèl ?

⁷ Onlo moun sav kè Nwèl é tradisyon a Nwèl (kon bòdé é fè-moun kado) sòti owa sé payen-la. Dayè, ni apépré 350 lanné dè sa, an Anglètè é sèwten koté an Amérik di Nò, sété défandi fété Nwèl, pas fèt-lasa sòti koté sé payen-la. Yo té ka pini touséla ki té ka fété-y la. Men plita, moun woukoumansé fété Nwèl ankò. Poukwa sé vré krétyen-la pa ka fété Nwèl ? Pas yo anvi fè Bondyé plézi.

8, 9. Poukwa sé prèmyé krétyen-la pa té ka fété anivèwsè ?

⁸ Onlo moun ka fété anivèwsè a yo. Adan Bib-la, yo ka palé-nou dè anivèwsè é sé moun ki pa té ka adoré Bondyé ki òwganizé-yo (Jénèz 40:20 ; Mawk 6:21). Sé  payen-la té ka fété anivèwsè pou yo té onoré sé fo-dyé-la. Sé pousa, pou sé prèmyé krétyen-la, « fété anivèwsè a nésans sété mès é labitid a payen » (The World Book Encyclopedia).

⁹ Sé Women-la é sé Grèk-la té ka kwè kè jou-la on moun fèt la, té ka korèsponn èvè jou a anivèwsè a on dyé. Pou yo, té ni on lèspri ki té an kontak èvè dyé-lasa, é lèspri-la té la lè moun-la té ka fèt. Fò moun-la té fété anivèwsè a-y pou lèspri-la té pwotéjé-y. Sé pousa sé prèmyé krétyen-la pa té ka fété anivèwsè.

10. Poukwa sé vré krétyen-la pa ka fété anivèwsè ?

¹⁰ Sèlon vou, ès Jéova dakò èvè fèt ki ni on rapò èvè fo-rèlijyon-la ? (Izayi 65:11, 12). Non. Sé pousa sé vré krétyen-la pa ka fété anivèwsè, ni pondòt fèt ki ni on rapò èvè fo-rèlijyon-la.

11. a) Poukwa sèwten moun ka fété fèt ki payen ? b) Ka ki dwètèt pli enpòwtan pou-w ?

¹¹ Onlo moun sav kè Nwèl é dòt fèt ankò sòti owa sé payen-la. Men yo ka kontinyé fété-yo toujou. Yo ka di kè sé fèt-lasa sé on lokazyon pou yo pasé on moman èvè fanmi a yo. É vou, ka ou ka di dè sa ? Lè on moun vlé pasé on moman èvè fanmi a-y, pa ni ayen dè mal adan sa. Sé Jéova ki kréyé fanmi-la, é i vlé nou antann-nou byen èvè fanmi an nou (Éfézyen 3:14, 15). Men nou pa dwèt fété fèt a fo-rèlijyon-la pou fè fanmi an nou plézi. Sa ki pli enpòwtan pou nou, sé chèché a ni on lanmityé solid èvè Jéova. Dayè, lapòt Pòl di : « Toujou vérifyé sa ki ka fè Ségnè-la plézi » (Éfézyen 5:10).

12. Poukwa Jéova pa dakò èvè sèwten fèt ?

 ¹² Pou onlo moun, sa pa nésésè kè ou konnèt ola on fèt sòti. Men a pa konsa Jéova ka vwè sa. I pa dakò èvè fèt ki ka sòti adan fo-rèlijyon-la oben ki ka pòté on moun ou on péyi anlè. Pa ègzanp, sé Éjipsyen-la té ka fè onlo fèt pou fo-dyé a yo. Lè sé Izraélit-la sòti an Éjipt, yo fè kon sé Éjipsyen-la. Yo fè on fèt é yo di sé « on fèt pou Jéova ». Men Jéova pini-yo pou sa (Ègzòd 32:2-10). Izayi, on pwofèt, di kè fo pa nou « mannyé ayen ki pa pwòp » (li Izayi 52:11).

13. Lèjou ou ké désidé arété fété fèt ki payen, pétèt ou ké pozé-w sèwten kèsyon. Kilès ?

¹³ Lèjou ou ké désidé arété fété fèt ki payen, pétèt ou ké pozé-w onlo kèsyon. Pa ègzanp : « Ka pou an fè si an travay an mwen yo ka mandé-mwen poukwa an pa ka fété Nwèl èvè yo ? Ka pou an fè si on moun ka ban-mwen on kado pou Nwèl ? É si madanm an mwen oben mari an mwen vlé an fété on fèt payen, ka pou an fè ? Padavwa timoun an mwen pa ka fété fèt payen oben anivèwsè a yo, ka an pé fè pou yo pa tris ? »

14. Si yo swété-w « Jwayé Nwèl ! » é « Bònané ! », ka ou pé fè ?

¹⁴ Kèlkèswa sitiyasyon-la, pou-w sav ka pou-w di oben ka pou-w fè, fò-w ni bon jijman. Pa ègzanp, si on moun ka swété-w « Jwayé Nwèl ! » ou « Bònané ! », pa fè konsi ou pa tann. Ou pé di-y mèsi tou senplèman. Men déparfwa, ni dé moun ki vlé sav poukwa ou pa ka fété sé fèt-lasa. A moman-lasa, ou pé ba-yo on èsplikasyon. Men toujou fè sa èvè onlo rèspé é toujou montré-w janti. Pa réponn-yo chou pou chou.  Labib ka di : « Fò pawòl a zòt toujou ni dousin adan-y, fò yo sézonné èvè sèl, pou sav kijan pou zòt réponn chakmoun » (Kolosyen 4:6). Pa ègzanp, ou pé èspliké kè ou byen enmé pasé on ti moman èvè lézòt é kè ou byen enmé ba-yo on tikado, men ou pa ka atann sé fèt-lasa pou fè-y.

15. Si yo ba-w on kado pou Nwèl oben pou anivèwsè a-w, ka ou pé fè ?

¹⁵ Ka pou-w fè si on moun ba-w on kado pou Nwèl oben pou anivèwsè a-w ? Labib pa ka ban-nou on règ pou chak sitiyasyon, men i ka di-nou kè fò-nou toujou chèché a ni on bon konsyans (1 Timoté 1:18, 19). Moun-la ki ka ba-w kado-la pa oblijé sav kè ou pa ka fété fèt-lasa. Oben i pé di-w : « An sav ou pa ka fété fèt-lasa, men an té anvi ba-w on tikado kanmenm. » Adan toulédé sitiyasyon-la, ou pé désidé aksèpté oben rèfizé. Men kèlkèswa sa ou désidé, toujou chèché a ni on bon konsyans. Nou pa anvi fè ayen pou chouboulé lanmityé an nou èvè Jéova.

16. Si fanmi a-w vlé fété on fèt payen, ka ou dwèt fè ?

¹⁶ Ka pou-w fè si fanmi a-w vlé fété on fèt payen ? Ou pa bizwen babyé èvè yo. Yo lib dè fè sa yo vlé. Montré-w janti é rèspèkté chwa a yo, menmjan ou té’é vlé kè yo rèspèkté chwa a-w (li Matyé 7:12). Men asipozé kè fanmi a-w vlé ou fété ansanm èvè yo, ka pou-w fè ? Prèmyé biten pou-w fè, sé priyé Jéova pou mandé-y édé-w pran bon désizyon-la. Aprésa, pran on tan pou réfléchi asi jan Bondyé ka vwè fèt-lasa, é fè rèchèch adan liv ki bazé si Labib é dòt liv ki ka di-w  ola fèt-lasa sòti. É pa oubliyé kè ou toujou vlé fè Jéova plézi.

17. Pou timoun a-w pa tris lè yo ka vwè lézòt ka fété fèt ki payen, ka ou pé fè ?

¹⁷ Lè timoun a-w ka vwè lézòt ka fété fèt ki payen, ka ou pé fè pou yo pa tris ? Dè tanzantan, ou pé òwganizé on tibiten èspésyal pou yo. Ou pé ba-yo on tikado lè yo pa ka atann-yo. Pasé on moman èvè timoun a-w é montré-yo kè ou enmé-yo, sa ka fè pati a pli bèl kado kè ou pé ba-yo.

18. Poukwa sa nésésè ay adan sé réinyon-la ?

¹⁸ Pou fè Jéova plézi, fò-w sòti adan fo-rèlijyon-la é fò-w lagé fèt é koutim ki adan-y. Men anplisdisa, fò ou adoré Bondyé kon i vlé. Kijan ou pé fè sa ? On biten pou-w fè, sé pran labitid ay adan sé réinyon-la (li Ébré 10:24, 25). Sé réinyon-la ni on plas ki enpòwtan toubònman adan vré adorasyon-la (Sòm 22:22 ; 122:1). É sé lokazyon pou yonn ankourajé lòt (Women 1:12).

19. Poukwa sa enpòwtan dè palé dè sa ou aprann adan Bib-la ?

¹⁹ Ondòt biten pou-w fè pou adoré Bondyé kon i vlé, sé palé èvè lézòt dè sa ou aprann an Bib-la. Ni onlo moun ki enkyèt parapòt a kantité méchansté ki ka fèt asi latè. Pétèt kè ou konnèt dé moun ki konsa. Palé-yo dè èspérans a-w, on èspérans ki bèl toubònman. Afòs ou ay an réinyon é afòs ou palé èvè lézòt dè vérité ki an Bib-la, ou pé’é vlé rété adan pon fo-rèlijyon ankò é ou pé’é vlé suiv tradisyon a yo nonplis. Ou pé sèten : si ou chwazi adoré Jéova kon i vlé, i ké béni éfò a-w é ou ké ni lakontantman (Malaki 3:10).