1, 2. a) A ki moman on kado ni valè pou-w ? b) Poukwa ranson-la sé pli bèl kado Bondyé fè-nou ?

 KI PLI bèl kado yo ja fè-w an vi a-w ? On kado pa bizwen kouté chè pou ni valè pou-w. Lè on kado ka fè-w plézi oben lèwvwè sé on biten ou byen bizwen, ou ka ba-y onlo valè.

² Adan tout kado Bondyé ja fè-nou, ni yonn nou bizwen lontan plis ki lézòt. Sé pli bèl kado Bondyé fè lézòm. Adan chapit-lasa, nou ké aprann kè Jéova voyé Jézi asi latè pou nou pé sa viv pou touttan (li Matyé 20:28). Lè i voyé Jézi bay vi a-y an ranson, Jéova ban-nou on prèv kè i enmé-nou toubònman.

3. Poukwa nou ka mò ?

³ Ranson-la sé mwayen-la Jéova prévwa la pou woté-nou anba péché-la é anba lanmò (Éfézyen 1:7). Pou nou konprann poukwa ranson-la té nésésè, fò-nou konnèt sa ki pasé adan Jadendédèn-la ni plizyè milyé lanné dè sa. Prèmyé paran an nou, Adan é Èv, péché. Padavwa yo péché, yo mò. É nou ka mò paskè yo lésé péché-la an éritaj pou nou (gadé nòt n^o 9 la, paj 210).

4. Kimoun Adan té yé ? É ka Jéova té bay ?

 ⁴ Lè Jéova kréyé prèmyé nonm-la, Adan, i bay on biten ki ni onlo valè : on vi pawfè. Adan té ni on entélijans pawfè é on kò pawfè. I pa jen té ka tonbé malad, i pa té ka vyéyi é i pa té pou mò. Piskè Jéova té kréyé-y, Jéova té kon on papa pou Adan (Lik 3:38). I té ka palé èvè Adan souvan. Jéova byen èspliké-y sa i té dwèt fè. É i bay on bon ti travay (Jénèz 1:28-30 ; 2:16, 17).

5. Labib ka di Bondyé kréyé Adan « pòtré a-y ». Ka sa vlé di ?

⁵ Bondyé kréyé Adan « pòtré a-y » (Jénèz 1:27). Lè i kréyé-y, i ba-y onlo bèl kalité kè limenm tini, kon lanmou, sajès, jistis, é puisans. Anplis, Adan té lib dè fè chwa a-y. A pa té on robo. I té lib dè chwazi dè fè sa ki byen oben dè fè sa ki mal. Si i té chwazi kouté Bondyé, i té’é viv pou touttan adan paradi-la.

6. a) Lè Adan dézobéyi Bondyé, ka i pèd ? b) Ka dézobéyisans a Adan pòté pou nou ?

⁶ Lè Adan dézobéyi, Bondyé kondanné-y a mò. I pèd onlo biten : lanmityé èspésyal a-y èvè Bondyé, vi pawfè a-y, é paradi-la i té ka viv adan-y la (Jénèz 3:17-19). Adan é Év chwazi dézobéyi Bondyé, kifè pa té tini pon èspwa pou yo ankò. Akòz dè sa Adan fè la, « péché-la rantré an mond-la [...], é lanmò rantré pa péché-la, kifè lanmò rantré asi toutmoun pas toutmoun té péché » (Women 5:12). Lè Adan péché, limenm « vann »-li pou i té vin èsklav a péché-la é a lanmò. É i « vann »-nou pou nou té vin èsklav ansanm èvè-y (Women 7:14). Ès ni on èspwa pou nou ? Wi. Jéova prévwa a on ranson !

7, 8. Ka ki on ranson ?

 ⁷ Ka ki on ranson ? On ranson, sé lajan-la ou ka péyé la pou libéré on moun oben pou rékipéré on biten. Adan Labib, on ranson sé osi lajan-la ki fo la pou pé sa réparé déga ki fèt.

⁸ Lè Adan péché é lè i fè-nou érité lanmò, i fè gwo déga menm. Ponmoun asi latè pa té’é pé péyé pou réparé sé déga-lasa. Men Jéova touvé on mwayen pou woté-nou anba péché-la é anba lanmò. An-nou gadé kijan Jéova prévwa a ranson-la é ki bénédisyon ranson-la pé pòté pou nou.

9. Ka ki té nésésè pou péyé ranson-la ?

⁹ Ponyonn adan nou pa té’é pé péyé ranson-la pou vi pawfè la Adan pèd la. Poukwa ? Paskè nou ponyonn asi latè pa pawfè (Sòm 49:7, 8). Sa ki té nésésè pou péyé ranson-la, sété vi a ondòt moun pawfè. Sé pousa Labib ka palé dè « ranson ki ka korèsponn » (1 Timoté 2:6). Ranson-la té dwèt ni menm valè ki vi-la Adan té pèd la.

10. Kijan Jéova prévwa a ranson-la ?

¹⁰ Kijan Jéova prévwa a ranson-la ? I voyé Gason a-y asi latè, sila i té pli enmé la é kè i té kréyé an prèmyé (1 Jan 4:9, 10). Jézi té dakò pou lésé Papa-y é lésé syèl-la, la i té ka rété la (Filipyen 2:7). Jéova mèt vi a Jézi, ki té an syèl-la, adan vant a Mari, ki té asi latè. Lè Jézi fèt, sété on moun pawfè, kivédi san péché (Lik 1:35).

11. Kijan fè on sèl nonm sèvi ranson pou tout limanité ?

 ¹¹ Padavwa prèmyé nonm-la, Adan, dézobéyi Jéova, tout moun asi latè pèd laposibilité dè ni on vi pawfè. Men ès onsèl nonm té ké pé woté tout pitit a Adan anba lanmò ? Wi (li Women 5:19). Jézi pa jen péché é i bay vi pawfè a-y an ranson (1 Korentyen 15:45). É vi pawfè lasa té kay pé sèvi pou woté tout pitit a Adan anba lanmò (1 Korentyen 15:21, 22).

12. Poukisa fò Jézi té soufè konsa ?

¹² Labib ka èspliké kè Jézi soufè toubònman avan i mò. Yo bay koudfwèt pa méchansté, yo kloué-y asi on poto é i soufè onlo jiskatan i mò (Jan 19:1, 16-18, 30) (gadé nòt n^o 15 la, paj 213). Poukisa fò Jézi té soufè konsa ? Paskè Satan té di kè ponmoun pa té’é rété fidèl a Bondyé anba éprèv ki rèd. Jézi bay laprèv kè on nonm ki pawfè pé rété fidèl a Bondyé menm lè i ka soufè onlo. Jéova dwèt té kontan Jézi toubònman ! (Pwovèb 27:11).

13. Ka ki fèt pou ranson-la péyé ?

¹³ Ka ki fèt pou ranson-la péyé ? An lanné 33, lè 14 Nizan (on mwa a kalandriyé juif-la), Jéova pèwmèt kè lènmi a Jézi tchouyé-y (Ébré 10:10). Twa jou apré, i résisité Jézi. Men Jéova pa woufè-y vin on nonm, i woufè-y vin on zanj. Aprésa, Jézi rètouné an syèl-la é i parèt douvan Jéova èvè ranson-la, kivédi valè a vi pawfè la i té ni la lè i té on nonm (Ébré 9:24). Konnyéla ranson-la péyé, sa posib pou nou dè sòti anba péché-la é anba lanmò (li Women 3:23, 24).

14, 15. Ka pou nou fè pou Bondyé padoné péché an nou ?

¹⁴ Dépi aprézan, nou ja pé pwofité dè pli bèl kado-la Bondyé fè-nou la. É dèmen osi nou ké pé pwofité dè kado-lasa. An-nou vwè kijan.

¹⁵ Bondyé ka padoné péché an nou. Sa pa fasil dè toujou fè sa ki byen. Nou ka fè érè é sa ka rivé-nou dè di oben dè fè on biten ki pa bon. Ka nou dwètèt fè pou Bondyé padoné-nou ? Fò-nou règrété sa nou fè, poudèbon. Anplisdisa, nou dwètèt montré-nou toupiti é mandé Jéova padon. A moman-lasa, nou pé sèten Bondyé ké padoné péché an nou (Kolosyen 1:13, 14 ; 1 Jan 1:8, 9).

16. Ka fò-nou fè pou konsyans an nou nèt ?

¹⁶ Nou pé ni on konsyans nèt. Lè konsyans an nou ka di-nou kè nou fè on biten ki pa bon, nou ka santi-nou koupab. Défwa, nou jous ka kwè kè nou pa vo ayen. Men fò pa nou dékourajé-nou. Jéova vlé nou palé-y dè féblès an nou é dè pwoblèm an nou (Ébré 4:14-16). Si nou mèt jounou atè pou mandé Bondyé padon, nou pé sèten i ké kouté-nou é i ké padoné-nou (Ébré 9:13, 14). A moman-lasa, nou ké pé ni on konsyans nèt douvan Bondyé.

17. Grasa ranson-la, ki bénédisyon nou pé risivwè ?

¹⁷ Nou ni lèspwa nou ké viv pou touttan. « Sa péché-la ka bay konm pèy, sé lanmò, men don-la [kado-la] Bondyé ka bay la, sé lavi étèwnèl pa Kris Jézi » (Women 6:23). Jézi mò pou nou, kifè nou ni lèspwa nou ké viv pou touttan é nou ni lèspwa  nou ké ni on santé ki pawfè (Révélasyon 21:3, 4). Men ka pou nou fè pou risivwè sé bénédisyon-lasa ?

18. Ka ki ka fè-nou di kè Jéova enmé-nou ?

¹⁸ Lè yo ka fè-nou on bèl kado, nou ka kontan toubònman. Pa ni pondòt kado ki ni plis valè ki ranson-la. Donk, fò-nou montré Jéova nou plen rèkonésans pou kado-lasa. Jan 3:16 ka di kè « tèlman Bondyé té enmé lèmond, i bay sèl Gason a-y ». Tèlman Jéova enmé-nou, i ban-nou sa ki té ni plis valè pou-y : Gason a-y. É nou sav kè Jézi enmé-nou osi, paskè i té paré a mò pou nou (Jan 15:13). Ranson-la sé on kado ki ka montré-w kè Jéova é Jézi enmé-w (Galat 2:20).

19, 20. a) Kijan ou pé vin zanmi a Jéova ? b) Kijan ou pé montré kè ou ni fwa adan ranson-la ?

¹⁹ Nou aprann kè Jéova plen lanmou. Men kijan nou pé vin zanmi a-y ? Sa pa fasil dè enmé on moun nou pa konnèt. Jan 17:3 ka di kè nou pé rivé konnèt Jéova. Si ou aprann konnèt Jéova, ou ké enmé-y pli fò, ou ké anvi fè-y plézi é ou ké vin zanmi a-y. Donk kontinyé étidyé Labib (1 Jan 5:3).

²⁰ Fò-w ni fwa adan ranson-la. Labib ka di kè « sila ki ka montré i ni fwa adan Gason-la ni lavi étèwnèl » (Jan 3:36). Ka sa vlé di « montré [nou] ni fwa » ? Sa vlé di fè sa Jézi mandé-nou fè (Jan 13:15). Apatoudi di nou ka kwè adan Jézi. Fò sa nou ka fè  montré kè nou ni fwa adan-y. Adan Jak 2:26, nou ka li : « San aksyon, lafwa mò. »

21, 22. a) Poukisa nou dwètèt vin sélébré Mémoryal a mò a Jézi chak lanné ? b) Dè kibiten sé chapit 6 é 7 la ké palé ?

²¹ Vin sélébré Mémoryal a mò a Jézi. Jézi vlé nou sonjé kè i bay vi pawfè a-y an ranson pou nou. Avan Jézi té mò, lavèy oswa, i té di disip a-y : « Kontinyé fè sa pou zòt sonjé-mwen » (li Lik 22:19). Sé sa Témwen a Jéova ka fè chak lanné. Yo ka sélébré sa yo ka kriyé « Mémoryal »-la oben « Rèpa a Ségnè » la (1 Korentyen 11:20 ; Matyé 26:26-28). Lè ou ka sélébré Mémoryal-la, ou ka montré kè ranson-la ni onlo valè pou-w é kè ou ka sonjé kè Jéova é Jézi enmé-w fò toubònman (gadé nòt n^o 16 la, paj 214).

²² Pa ni pli bèl kado ki ranson-la (2 Korentyen 9:14, 15). Kado-lasa ké jous pòté bénédisyon pou plizyè milyon moun ki mò. Chapit 6 la é chapit 7 la ké èspliké kijan sa pé fèt.