1, 2. a) Lapriyè sé on bèl kado toubònman. Sèlon vou, poukwa ? b) Poukwa sa enpòwtan kè nou konnèt ka Labib ka di asi lapriyè ?

 LATÈ toupiti owa linivè. Lè Jéova ka gadé Latè, pou-y, sé nasyon-la kon on gout dlo (Sòm 115:15 ; Izayi 40:15). Menmsi nou toupiti owa linivè, Sòm 145:18 é 19 ka di : « Jéova toupré a toutmoun ki ka kriyé-y [ki ka priyé-y], a toutmoun ki ka kriyé-y on mannyè ki sensè. I ka rasazyé anvi a moun ki ka krenn-li, i ka tann lè yo ka kriyé-y o sèkou, é i ka sové-yo. » Kifè, Jéova, Kréyatè toupuisan la, vlé rapwoché-y dè nou : i vlé vin Zanmi an nou ! É i vlé kouté priyè an nou ! Lapriyè sé on bèl kado toubònman é lè nou ka priyé Bondyé, sé on gran gran lonnè kè Jéova ka fè-nouchak.

² Men Jéova ké kouté-nou yenki si nou ka palé ba-y on mannyè ki agou a-y. Alò, an-nou vwè ka Labib ka di asi lapriyè.

3. Poukwa fò-w priyé Jéova ?

³ Jéova vlé kè ou priyé-y, kè ou palé èvè-y. Kijan nou fè sav sa ? Li Filipyen 4:6 é 7. Réfléchi asi sa Bondyé vlé ou fè : Kréyatè a linivè ka sousyé-y dè-w onlo é i vlé kè ou palé-y dè sa ki an tchè a-w é dè pwoblèm ou ni.

4. Si ou ka priyé Jéova souvan, lanmityé a-w èvè-y ké vin dè plizanpli fò. Poukwa ?

 ⁴ Lapriyè ké édé-w ni on lanmityé solid èvè Jéova. Lè dé zanmi ka palé souvan dè sa yo ka pansé, é lè yonn ka rakonté lòt tipwoblèm a-y é sa ki an tchè a-y, lanmityé a yo ka vin pli solid. Sé menm biten ki ka fèt lè ou ka priyé Jéova. Adan Labib, Jéova ka di-w sa i ka pansé, sa i ka rèsanti é sa i ké fè plita. Ou pé palé èvè-y souvan, ou pé jous di-y sa ou ni anfon a tchè a-w. Si ou fè sa, lanmityé a-w èvè Bondyé ké vin dè plizanpli fò (Jak 4:8).

5. Kijan nou fè sav kè Jéova pa ka kouté tout priyè ?

⁵ Èskè Jéova ka kouté tout priyè ? Non. Antan a pwofèt Izayi, Jéova di sé Izraélit-la : « Zò ka priyé-mwen onlo, men an pa ka kouté : men a zòt plen san » (Izayi 1:15). Si nou pa fè atansyon, nou pé rivé a fè  dé biten ki pé menné-nou lwen a Jéova. Adan on ka konsa, i pé ké kouté priyè an nou.

6. a) Poukwa lafwa enpòwtan konsa ? b) Kijan ou pé montré kè ou ni lafwa an Bondyé ?

⁶ Si nou vlé kè Jéova kouté priyè an nou, fò-nou ni fwa adan-y (Mawk 11:24). Mi sa Lapòt Pòl ka èspliké : « San lafwa, pa ni mwayen fè Bondyé plézi, pas moun-la ki ka vansé owa Bondyé dwèt kwè kè i ka ègzisté é kè i ka divini sila ki ka rékonpansé moun ki ka chèché-y vréman » (Ébré 11:6). Men apatoudi di nou ni lafwa an Bondyé. Nou ka montré fwa an nou lè nou ka obéyi Jéova touléjou (li Jak 2:26).

7. a) Poukwa, lè nou ka priyé Jéova, nou dwètèt toupiti douvan-y é nou dwèt ni rèspé ba-y ? b) Kijan nou pé montré kè nou sensè lè nou ka priyé Dyé ?

⁷ Lè nou ka priyé Jéova, fò-nou toupiti douvan-y é fò-nou palé ba-y èvè rèspé. Poukwa ? Asipozé fò-nou palé ba on wa oben on prézidan, sèten nou ké fè-y èvè rèspé. Jéova sé Dyé Toupuisan la. Kifè, lè nou ka palé ba-y nou dwèt ni plis rèspé ankò é nou dwèt montré-nou pli piti ankò douvan-y (Jénèz 17:1 ; Sòm 138:6). Anplisdisa, lè nou ka priyé Jéova, fò sa nou ka di sòti anfon a tchè an nou. Si nou sensè, nou pé ké mété-nou ka répété menm biten-la touttan, kon moun ki ka sèvi èvè liv a priyè (Matyé 6:7, 8).

8. Lè nou ka priyé pou on biten, ka nou dwèt fè ?

⁸ Lè nou ka priyé pou on biten, fò aksyon an nou ay an sans a priyè an nou. Pa ègzanp, nou pé pa ka mandé Bondyé ban-nou sa nou bizwen pou viv, é anmenmditan nou ka fè fennyan. Nou pé ké rété ka atann Jéova ban-nou tout biten alòskè nou pé travay. Nou dwèt pòté bon mannèv é aksèpté nenpòt  travay nou pé fè (Matyé 6:11 ; 2 Tésalonisyen 3:10). É si nou priyé Jéova pou i édé-nou arété fè on biten ki mal ? Adan on ka konsa, fò-nou fè ansòt pou nou pa touvé-nou adan pon kalté sitiyasyon ki té’é pé tanté-nou (Kolosyen 3:5). Aprézan, an-nou réponn a déotwa kèsyon onlo moun ka pozé-yo asi lapriyè.

9. a) Kimoun nou dwèt priyé ? b) Ka Jan 14:6 ka aprann-nou asi lapriyè ?

⁹ Kimoun nou dwèt priyé ? Jézi aprann-nou priyé « Pap’an nou ki an syèl-la » (Matyé 6:9). I di osi : « Sé mwen ki chimen-la, sé mwen ki vérité-la é sé mwen ki lavi. Ponmoun pé pa ay owa Papa-la si i pa pasé pa mwen » (Jan 14:6). Kifè, sé yenki Jéova pou nou priyé. É nou dwèt pasé pa Jézi. Ka sa vlé di ? Pou Jéova aksèpté priyè an nou, nou dwèt rèspèkté wòl-la i ba Jézi la. Nou té vwè kè Jézi té vin asi latè pou woté-nou anba péché-la é anba lanmò (Jan 3:16 ; Women 5:12). Anplisdisa, Jéova mèt Jézi Gran Prèt é Jij osi (Jan 5:22 ; Ébré 6:20).

10. Ès nou bizwen mété-nou adan on pozisyon èspésyal pou nou priyé ?

¹⁰ Ès nou bizwen mété-nou adan on pozisyon èspésyal pou nou priyé ? Non. Jéova pa ka mandé-nou ni mèt-nou ajounou, ni sizé ni doubout pou nou priyé-y. Labib ka montré-nou kè nou pé priyé adan nenpòt ki pozisyon, dépi sé on pozisyon ki plen rèspé (1 Kronik 17:16 ; Néémi 8:6 ; Danyèl 6:10 ; Mawk 11:25). Pou Jéova, a pa pozisyon an nou ki ka konté, men sé sa nou ni anfon a tchè an nou é jan nou ka palé ba-y ki enpòwtan. Nou pé priyé Bondyé an tchè  an nou oben nou pé palé ba-y tou wo. Nou pé priyé kèlkèswa koté-la nou yé la é a nenpòt ki moman, lajouné kon lannuit. Menmsi pondòt moun pa ka tann-nou lè nou ka priyé, nou pé sèten kè Jéova ké tann-nou (Néémi 2:1-6).

11. Dè kibiten nou pé palé Jéova ?

¹¹ Dè kibiten nou pé palé lè nou ka priyé ? Nou pé priyé Jéova pou nenpòt biten ki annakò èvè volonté a-y. Labib ka di : « Kèlkèswa sa nou mandé-y, dépi sa annakò èvè volonté a-y, i ka kouté-nou » (1 Jan 5:14). Ès on moun pé priyé pou on biten ki ka konsèwné-y ? Wi. Lè ou ka priyé Jéova, sé konsi ou ka palé èvè on bon zanmi. Nou pé palé-y dè tousa ki ka chaléré lèspri an nou é dè tousa nou ka rèsanti (Sòm 62:8). Nou pé mandé Jéova lèspri sen a-y, ki puisan, pou édé-nou fè sa ki byen (Lik 11:13). Anplisdisa, nou pé mandé-y sajès pou nou pran bon désizyon é fòs pou nou pé sa goumé lè nou an difikilté (Jak 1:5). Nou dwèt mandé-y padoné péché an nou (Éfézyen 1:3, 7). Fò-nou priyé pou lézòt osi, pa ègzanp pou fanmi an nou é pou frè é sè an nou adan lasanblé-la (Akt 12:5 ; Kolosyen 4:12).

12. Ka pou nou mèt prèmyé douvan adan priyè an nou ?

¹² Lè nou ka priyé, ka pou nou mèt prèmyé douvan ? Sé Jéova é volonté a-y. Nou dwèt di-y mèsi dè-tou-kè, pou tousa i ka fè pou nou (1 Kronik 29:10-13). Kijan nou fè sav sa ? Lè Jézi té si latè, i aprann disip a-y priyé (li Matyé 6:9-13). I di fò-nou priyé an prèmyé pou non a Bondyé vin sen (kivédi fò-nou ni on gran gran rèspé pou non a-y). Apré, nou dwèt priyé pou Wayòm a-y vini, é pou volonté a-y fèt asi latè. I èspliké kè  sé yenki apré nou priyé pou sé biten enpòwtan lasa, kè nou pé priyé pou sa nou bizwen. Lè nou ka mété Jéova é volonté a-y prèmyé douvan an priyè an nou, nou ka montré sa ki pli enpòwtan pou nou.

13. Lè nou ka priyé, ès fò priyè-la long oben ès fò i kout ?

¹³ Lè nou ka priyé, ès fò priyè-la long oben ès fò i kout ? Labib pa ka di-nou ki longè priyè an nou dwèt ni. Yo pé kout kon yo pé long, sa ka dépann dè  sitiyasyon-la. Pa ègzanp, avan nou manjé, nou pé fè on tipriyè toukout. Men nou pé fè on priyè pli long lè nou ka di Jéova mèsi oben lè nou ka palé-y dè tipwoblèm an nou (1 Samiyèl 1:12, 15). Nou pa vlé fè priyè ki long pou fè moun vwè, kon sèwten moun té ka fè an tan a Jézi (Lik 20:46, 47). Sé kalté priyè-lasa pa ka ban-nou plis valè douvan Jéova. Sa ki ka konté pou-y, sé kè priyè an nou sòti anfon a tchè an nou.

14. Ès fò-nou priyé souvan ? É ka sa ka aprann-nou asi Jéova ?

¹⁴ Ès fò-nou priyé souvan ? Wi. Fò nou toujou palé ba Bondyé. Sé sa i ka mandé-nou. Labib ka di kè fò « pa [nou] arété priyé », i ka di-nou « kontinyé priyé » é « priyé toutlè » (Matyé 26:41 ; Women 12:12 ; 1 Tésalonisyen 5:17). Jéova toujou paré pou kouté-nou.  Touléjou, nou pé di-y mèsi pou lanmou a-y é pou tousa i ka fè pou nou. Anplisdisa, nou pé mandé-y gidé-nou, konsolé-nou é ban-nou fòs. Si nou ka vwè lapriyè kon on lonnè Jéova ka fè-nou, nou ké priyé-y chakfwa nou ké ni lokazyon.

15. Lè priyè-la fin, poukwa fò-nou di « amèn » ?

¹⁵ Lè priyè-la fin, poukwa fò-nou di « amèn » ? « Amèn » vlé di « asirésèten » oben « sé konsa menm pou sa fèt ». Di « amèn » sé on mannyè pou montré kè nou sensè, kè sa nou ka di sé sa nou ka pansé vréman (Sòm 41:13). Labib ka aprann-nou osi kè sa byen dè di « amèn » (an tchè an nou oben tou wo) lè yo fin di on priyè douvan toutmoun. Sa ka montré kè nou dakò èvè priyè-la (1 Kronik 16:36 ; 1 Korentyen 14:16).

16. Ès Jéova ka réponn lè nou ka priyé ?

¹⁶ Ès Jéova ka réponn lè nou ka priyé ? Wi. Labib ka di kè i sé Sila « ki ka tann priyè-la » (Sòm 65:2). Jéova ka kouté priyè sensè a milyon é milyon moun, é i ni plizyè mannyè i ka réponn-yo.

17. Jéova ka itilizé lézanj é sèwvitè a-y ki asi latè, pou i réponn a priyè an nou. Kijan i ka fè sa ?

¹⁷ Jéova ka itilizé lézanj é sèwvitè a-y ki asi latè, pou i réponn a priyè an nou (Ébré 1:13, 14). Pa ègzanp, ni onlo moun ki priyé Bondyé pou i édé-yo touvé-y oben pou i édé-yo konprann Labib. É on ti moman apré, on Témwen a Jéova vin akaz a yo. Sa ka montré kè lézanj ka jouwé on wòl adan prédikasyon a « bon nouvèl »-la é kè yo ka dirijé sé prédikatè-la owa moun ki sensè (li Révélasyon 14:6). Anplisdisa, onlo adan nou ja priyé pou on pwoblèm nou té ni oben pou on biten prési  nou té bizwen, é aprésa, on frè oben on sè ban-nou èd-la nou té bizwen la (Pwovèb 12:25 ; Jak 2:16).

18. Jéova ka itilizé lèspri sen a-y é Labib pou réponn a priyè an nou. Kijan i ka fè sa ?

¹⁸ Lè nou ka priyé-y, Jéova ka itilizé lèspri sen a-y osi pou i réponn. Lè nou ka goumé èvè on pwoblèm é nou ka mandé-y èd a-y, i ka itilizé lèspri sen a-y pou i gidé-nou é pou i ban-nou fòs (2 Korentyen 4:7). I ka itilizé Labib osi pou i réponn a priyè an nou é pou i édé-nou pran bon désizyon. Pannan nou ka li Labib, nou pé touvé dé vèwsé ki ké édé-nou. Anplis, Jéova pé fè ansòt kè, pannan on réinyon, on moun di sa nou bizwen tann. Oben i pé fè ansòt kè on ansyen a lasanblé-la bay on tipansé biblik ki itil ban nou (Galat 6:1).

19. Délè, nou pé ni lenprésyon kè Jéova pa ka réponn a priyè an nou. Poukwa ?

¹⁹ Men délè, sa pé rivé kè nou mandé-nou : « Poukwa Jéova pòkò réponn a priyè an mwen ? » Jéova sav kitan é kijan pou i réponn a priyè an nou. É i sav ka nou bizwen. Adan sèwten sitiyasyon, nou dwèt kontinyé priyé Jéova pou montré-y kè nou sensè. Sa ka montré osi kè nou ni konfyans adan-y vréman (Lik 11:5-10). Déparfwa, i ka réponn a priyè an nou on mannyè kè nou pa ka atann-nou. Pa ègzanp, lè nou ka priyé-y parapòt a on sitiyasyon ki rèd, olyé Jéova fè sitiyasyon-lasa disparèt, i pé ban-nou fòs pou sipòté-y (li Filipyen 4:13).

20. Poukwa fò-nou priyé Jéova souvan ?

²⁰ Priyé Jéova : mi on gran lonnè mi ! Nou pé sèten i ka kouté-nou (Sòm 145:18). Pli nou ké priyé-y èvè tout tchè an nou, pli lanmityé an nou èvè-y ké vin solid.