1, 2. Ki kèsyon nou ka pozé-nou lèplisouvan ?

 TIMOUN ka pozé onlo kèsyon. É souvan, lè ou ka èspliké-yo on biten, yo ka mandé-w : « Poukwa ? » É lè ou éséyé ba-yo on répons, yo ka wouviré mandé-w : « Men poukwa ? »

² Noutout, nou ni dé kèsyon nou ka pozé-nou. Pa ègzanp : « Ka an kay manjé ? Ki lenj an kay mèt ? Ka an bizwen achté ? » Anplisdisa, ni dé kèsyon nou ka pozé-nou asi lavi é asi sa ki ké fèt dèmen. Men byensouvan, lè nou pa ka touvé sé répons-la, nou ka enki arété chèché.

3. Onlo moun ka kwè kè yo pé ké jen touvé répons a kèsyon enpòwtan yo ka pozé-yo. Poukwa yo ka kwè sa ?

³ Ès Labib ka réponn a kèsyon enpòwtan nou ka pozé-nou ? Ni moun ki ké réponn wi, men anmenmtan yo ké di-w kè Labib two rèd a konprann. Pou yo, sé yenki labé, pastè, oben moun ki ka anségné adan on rèlijyon ki konnèt sé répons-la. Ni sa osi ki pa vlé rèkonnèt kè yo pa ni sé répons-la.

4, 5. a) Ki kèsyon enpòwtan ou ka pozé-w ? b) Poukwa fò-w kontinyé chèché sé répons-la ?

⁴ Sèten ou anvi konnèt répons a dé kèsyon kon : « Poukwa nou asi latè ? Ka nou ka divini lè nou mò ? Ki jan dè moun Bondyé yé ? » Jézi, ki sé pli gran anségnan ki ja pasé asi latè, té di : « Kontinyé mandé, é yo ké ba-w ; kontinyé chèché, é ou ké touvé »  (Matyé 7:7). Alò, kontinyé chèché jiskatan ou touvé sé bon répons-la.

⁵ É wi, si ou « kontinyé chèché », ou ké touvé sé répons-la : yo an Bib-la (Pwovèb 2:1-5). Épi yo pa two rèd a konprann. Sa ou ké aprann ké rann vi a-w pli bèl é ou ké ni on bèl èspwa pou dèmen. Konnyéla, an-nou palé dè on kèsyon onpakèt moun ka pozé-yo.

6. Pou onlo moun, Bondyé pa ka okipé-y dè nou. Poukwa yo ka kwè sa ?

⁶ Pou onlo moun, mandé Bondyé menm si nou ka ègzisté ! Pou yo, si Bondyé té ka okipé-y dè nou, a pa konsa ditou ditou lèmond té’é yé. Toutkoté, yonn hay lòt, ni lagè, mizè é katastròf. Moun ka tonbé malad, yo ka soufè é yo ka mò. Ni sa ki ka mandé-yo : « Men si Bondyé ka sousyé-y dè nou, poukwa i pa ka fè soufrans disparèt ? »

7. a) Ni moun ki ka kwè kè Bondyé méchan. Ka i ka fè-yo kwè sa ? b) Lè on malè rivé, fò pa nou akizé Bondyé. Poukwa ?

⁷ Défwa, adan sèwten rèlijyon, séla ki ka anségné la ka fè Bondyé pasé pou on méchan. Lè on malè rivé, yo ka di kè sété volonté a Bondyé. Men lè ou byen gadé, lè yo ka di sa, sé Bondyé yo ka akizé. Labib ka anségné kè Bondyé pa janmé rèsponsab a malè ki ka rivé. Jak 1:13 ka èspliké kè i pa ka mèt ponmoun a léprèv, sètadi i pa ka tèsté ponmoun èvè biten ki pa bon. Vèwsé-la ka di : « Fò pa ponmoun, lè i ka jwenn éprèv, di : “Sé Bondyé ki ka mété-mwen a léprèv.” Pas pa ni mwayen mété Bondyé a léprèv èvè biten ki pa bon é limenm pa ka mété ponmoun a léprèv  èvè biten konsa. » Savédi kè, menmsi Bondyé pa ka anpéché malè rivé, a pa jen li ki ka fè si sa ka rivé (li Jòb 34:10, 12).

8, 9. Lè nou ka jwenn pwoblèm, poukwa sa pa té ké jis dè di kè sé fòt a Bondyé ? Bay on ègzanp.

⁸ An-nou pran on ègzanp : On jenn ki majè ka viv aka fanmi a-y. Papa-y enmé-y onlo é i aprann-li pran bon désizyon. On jou, jennboug-la désidé dè pa kouté papa-y ankò, é i pran bò a-y. I mété-y ka menné on vyé vi é i fin pa ni gwo pwoblèm. Ès ou ké di sé fòt a papa-la ? Ès ou ké di sé paskè papa-y lésé-y pati tiboug-la vin ni pwoblèm ? Ében non ! (Lik 15:11-13). Menmjan-la, ni sèwten moun ki désidé dè ba Bondyé do é dè fè sa ki mal. Kon papa-la adan ègzanp-la, Bondyé pa ka anpéché-yo fè sa yo vlé. Alò, lè on malè rivé, fò-nou sonjé kè a pa Bondyé ki rèsponsab. Sa pa té ké jis kè nou akizé-y.

⁹ Poukwa Bondyé poko fè tousa ki ka fè-nou soufè disparèt ? Sé kè i ni on bon rézon. Ou ké vwè ka Labib ka di asi sa adan chapit 11 la. Men ni on biten ou pé sèten, sé kè Bondyé enmé-nou é kè a pa fòt a-y si nou ka jwenn pwoblèm. Dayè, sé li tousèl ki pé réglé pwoblèm an nou (Izayi 33:2).

10. Poukwa nou pé sèten Bondyé ké fè laméchansté disparèt ?

¹⁰ Bondyé sen (Izayi 6:3). Tousa i ka fè toujou pwòp é toujou byen. Donk nou pé fè-y konfyans. Pawkont, lézòm pa kon Bondyé. Sa ka rivé-yo dè fè dé biten ki pa bon. É menm chèf politik la ki pli onèt la pé pa réparé tout déga sé méchan-la fè. Bondyé lontan pli fò ki toutmoun. Li Bondyé, i pé fè laméchansté disparèt  pou touttan, é i ké fè-y. É tout déga sé méchan-la fè, i ké réparé-yo osi (li Sòm 37:9-11).

11. Lè Bondyé ka vwè-w ka soufè, ka i ka rèsanti ?

¹¹ Lè Bondyé ka vwè tousa ki ka pasé asi latè é lè i ka vwè-w ka soufè, ka i ka rèsanti ? Labib ka di kè Bondyé « enmé lajistis » (Sòm 37:28). I enmé vwè moun fè lèbyen, men i pa enmé vwè-yo fè sa ki pa bon. I hay vwè moun ka soufè. An tan a Noé, lè i vwè kantité méchansté ki té ni asi latè, sa fè-y lapenn (Jénèz 6:5, 6). É Bondyé pa chanjé (Malaki 3:6). Labib ka di kè Bondyé ka sousyé-y dè nou poudèbon (li 1 Pyè 5:7).

12, 13. a) Poukwa nou ni lanmou pou lézòt ? Ka nou ka rèsanti lè nou ka vwè moun ka soufè toupatou si latè ? b) Poukwa nou pé sèten Bondyé ké woté tout soufrans é tout enjistis ki tini ?

¹² Labib ka di osi kè Bondyé kréyé-nou pòtré a-y (Jénèz 1:26). Sa vlé di kè i kréyé-nou on mannyè pou nou ni menm kalité ki-y. Pa ègzanp, Labib ka aprann-nou kè « Bondyé sé lanmou » (1 Jan 4:8). Tousa i ka fè, i ka fè-y èvè lanmou. Donk, si nou ni lanmou sé pas Bondyé ni lanmou. Sèten sa ka fè-w lapenn lè ou ka vwè moun inosan ka soufè. Alò, ou ka tou konprann kè Bondyé lontan pli tris lè i ka vwè sa !

¹³ Réfléchi si sa : si ou té pé fè tout soufrans é tout enjistis disparèt, ès ou té’é fè-y ? Sèten ou té’é fè-y, pas ou ni lanmou pou lézòt. Bondyé, li, i ni pouvwa-lasa, é pas i enmé-nou, i ké woté tout soufrans é tout enjistis ki tini ! Okoumansman a liv-la, ou ka touvé déotwa pwomès Bondyé fè-nou. Yotout ké réyalizé.  Ou pé sèten dè sa ! Men pou-w pé sa kwè adan sé pwomès-lasa, sa ka mandé kè ou aprann konnèt Bondyé plibyen.

14. a) Ki non a Bondyé ? b) Kijan nou fè sav kè fò-nou itilizé non a Bondyé ?

¹⁴ Si ou vlé vin zanmi a on moun, ki prèmyé biten ou ké di-y ? Ou ké ba-y non a-w, pa vré ? É Bondyé, ès i ni on non ? Onlo rèlijyon ka di kè non a-y sé Bondyé oben Ségnè. Men an réyalité, sé kon lè ou ka kriyé on moun « prézidan » oben « wa », a pa pa non a-y ou ka kriyé-y. Bondyé ka di-nou kè non a-y sé Jéova. An Sòm 83:18, nou ka li : « Sé pou moun sav kè vou, non a-w sé Jéova, sé-w tousèl ki Pli-Ho la asi tout latè ! » Sé nonm-la ki ékri Bib-la itilizé non a Bondyé pliski 7 000 fwa. Jéova vlé ou konnèt non a-y é kè ou itilizé-y. Si i ka di-w non a-y, sé pas i vlé ou vin zanmi a-y.

15. Non a Bondyé sé « Jéova ». Ka non-lasa vlé di ?

¹⁵ Non a Bondyé, « Jéova », ni on gran signifikasyon. Non-lasa vlé di kè Bondyé pé réyalizé nenpòt ki projé i ni, é nenpòt ki pwomès i fè.  Ayen pé pa arété-y. Dayè, sé yenki Jéova ki pé pòté non-lasa a.

16, 17. Poukwa Labib ka di kè Bondyé a) « Toupuisan » ? b) « Wa étèwnèl » ? c) « Kréyatè » ?

¹⁶ An Révélasyon 15:3, nou ka li : « Jéova Dyé, Toupuisan la, sa ou fè èstraòwdinè é sa bèl toubònman. Wa étèwnèl, tout chimen a-w dwèt é yo sé vérité. » Lè  Labib ka di kè Bondyé « Toupuisan », ka sa vlé di ? Sa vlé di kè, adan tout linivè, sé Jéova ki pli fò. É lè Labib ka di kè Bondyé « Wa étèwnèl », ka sa vlé di ? Sa vlé di kè Bondyé pa ni ni koumansman ni fen. Sòm 90:2 ka èspliké kè i toujou té la é kè i ké toujou la. Sa èstraòwdinè, pa vré ?

¹⁷ Ni onsèl Kréyatè : sé Jéova. An Révélasyon 4:11, nou ka li : « Jéova, Dyé an nou, ou mérité rèsèvwa glwa-la é lonnè-la é ou mérité ni tout puisans-la ou ni la, pas sé vou ki kréyé tout biten, é si yo vin ka ègzisté é si ou kréyé-yo, sé pas ou té vlé. » É wi ! Ki sé zanj, zétwal, zozyo, pwason, fwi é tout sélézòt biten-la, sé Jéova ki fè-yo !

18. Pou onlo moun, pa ni mwayen vin zanmi a Bondyé. Ka i ka fè-yo di sa ? É ka Labib ka di asi sa ?

¹⁸ Ni dé moun, lè yo ka vin konnèt bèl kalité a Jéova, yo ka rété réfléchi é yo ka di : « Men, Bondyé tèlman puisan, tèlman sen é i tèlman lwen an nou, an pa’a vwè poukwa i té’é sousyé-y dè mwen ? » Men ès sé sa Bondyé vlé nou mété an tèt an nou ? Non ! Bondyé vlé vin Zanmi a-w. I vlé vin pli pré a-w. Labib ka di i « pa lwen a ponyonn adan nou » (Akt 17:27). É i vlé ou rapwoché-w dè-y. I ka pwomèt-vou kè, si ou fè sa, « i ké rapwoché-y dè[-w] » (Jak 4:8).

19. a) Ka ou dwètèt fè pou-w vin zanmi a Bondyé ? b) Adan tout bèl kalité kè Jéova ni, kilès ou pli enmé ?

¹⁹ Ka ou dwètèt fè pou-w vin zanmi a Bondyé ? Jézi di : « Mi sa lavi étèwnèl vlé di : fò-yo rivé konnèt-vou, vou, sèl vré Dyé-la, é sila ou voyé la, Jézikri » (Jan 17:3). Kontinyé aprann konnèt Jéova é Jézikri. Konsa, ou ké pé ni lavi étèwnèl, savédi ou ké pé viv pou touttan. Pa ègzanp, ou ja aprann kè « Bondyé sé lanmou » (1 Jan 4:16). Men i ni onlo dòt bèl kalité ankò. Labib ka di Bondyé ka pran penn an nou é i plen tandrès, “i pa ka fè kòlè vit, i plen lanmou, on lanmou ki fidèl, é i toujou ka di lavérité” (Ègzòd 34:6). I « enmé sa ki byen é [i] paré pou padoné » (Sòm 86:5). Bondyé ni pasyans é i fidèl osi (2 Pyè 3:9 ; Révélasyon 15:4). Toupannan ou ka li Labib, ou ké aprann plis biten ankò asi Bondyé é asi bèl kalité kè i ni.

20, 21. Kijan ou pé vin zanmi a Bondyé alòskè ou pa ka vwè-y ?

²⁰ Kijan ou pé vin zanmi a Bondyé alòskè ou pa ka  vwè-y ? (Jan 1:18 ; 4:24 ; 1 Timoté 1:17). Pli ou ké li Labib, pli ou ké konsidéré Jéova kon on moun byen réyèl (Sòm 27:4 ; Women 1:20). Pli ou ké konnèt Bondyé byen, pli ou ké enmé-y é pli lanmityé a-w èvè-y ké vin fò.

²¹ Ou ké konprann kè Jéova sé Pap’an nou : sé li ki ban-nou lavi, é i vlé nou ni méyè vi ki tini (Matyé 6:9). Sé sa tout papa ki enmé timoun a yo vlé pou yo (Sòm 36:9). Labib ka montré-nou kè nou pé vin zanmi a Bondyé (Jak 2:23). Ou ka rann-vou kont ? Jéova, Kréyatè a linivè, vlé ou vin zanmi a-y !

22. Si ni moun ki vlé ou arété étidyé Labib, ka pou-w fè ?

²² Pétèt ni moun ki ké vlé ou arété étidyé Labib. Pétèt sé pè yo pè ou chanjé rèlijyon. Men pa lésé ponmoun anpéché-w vin zanmi a Bondyé. Méyè Zanmi ou pé ni, sé Jéova.

23, 24. a) Poukwa fò-w kontinyé pozé kèsyon ? b) Dè kibiten nou kay palé an chapit-la ki ka vin la ?

²³ Pannan ou ké ka étidyé Labib, ni dé biten kè ou pé ké konprann tousuit. Adan dé ka konsa, pa pè pozé kèsyon oben pa pè mandé on moun édé-w. Jézi di kè fò-nou kon sé timoun-la (Matyé 18:2-4). Lèplisouvan, lè on timoun pa konnèt on biten, i pa ka wont mandé, é i ka pozé onlo kèsyon. Bondyé vlé kè ou touvé répons a tout sé kèsyon-la ou ka pozé-w la. Alò, étidyé Labib byen pou-w sèten kè sa ou ka aprann sé lavérité (li Akt 17:11).

²⁴ Méyè biten a fè pou aprann konnèt Jéova sé étidyé Labib. Adan chapit-la ki ka vin la, ou ké vwè poukwa Labib pa on liv kon lézòt.