1, 2. Poukwa Labib sé vréman on bèl kado Bondyé fè-nou ?

 IMAJINÉ : alòskè ou pa ka atann-vou, on zanmi a-w ka fè-w on kado. Ka ou ka rèsanti ? Ou kontan padavwa zanmi a-w sonjé-w. Ou ka di-y mèsi. É ou présé pou wouvè kado-la.

² Labib, sé on kado Bondyé fè-nou. I ka aprann-nou dé biten nou pé pa aprann pondòt koté. Labib ka di-nou, pa ègzanp, kè sé Bondyé ki kréyé lèsyèl é latè, prèmyé misyé-la é prèmyé madanm-la. Adan-y, nou ka touvé onlo konsèy pou édé-nou lè nou ka jwenn pwoblèm. Labib ka aprann-nou osi kè Bondyé ni lentansyon fè latè vin on paradi. É i ka èspliké kijan i ké fè sa. Labib, sé on bèl kado toubònman !

3. Pannan ou ké ka étidyé Labib, ka ou ké aprann ?

³ Pannan ou ké ka étidyé Labib, ou ké aprann kè Bondyé vlé ou vin zanmi a-y. É pli ou ké aprann konnèt Bondyé, pli lanmityé a-w èvè-y ké vin solid.

4. Ka ou ka touvé èstraòwdinè anrapò èvè Labib ?

⁴ Yo ja tradui Labib adan pliski 2 800 lang. Yo ja enprimé milya é milya bib. Près toutmoun pé li Labib an lang a-y (asi 10 moun, ni 9 ki pé li-y). Chak simenn, pliski on milyon moun ka rivé pwokiré-yo on bib ! Vréman, pa ni dé liv kon Labib.

5. Poukwa nou pé di kè Labib ka vin dè Bondyé ?

 ⁵ Labib, « sé Bondyé ki enspiré-y » (li 2 Timoté 3:16) (gadé nòt n^o 2 la, paj 207). Men ka sa vlé di ? Poukwa yo ka di kè Labib ka vin dè Bondyé, alòskè sé nonm ki maké sa ki adan-y ? » Labib ka di : « Sé lèspri sen ki gidé on séri nonm pou yo té anonsé pawòl a Bondyé » (2 Pyè 1:21). Sé kon lè on patron ka mandé sèkrétè a-y ékri on lèt. Dè kimoun lèt-la ka vin ? I ka vin dè patron-la, i pa ka vin dè sèkrétè-la. Menmjan-la, menmsi sé nonm ki maké sa ki adan-y, Labib ka vin dè Bondyé. Sé Bondyé ki gidé-yo pou yo maké lidé a-y. Wi, Labib sé « pawòl a Bondyé » (1 Tésalonisyen 2:13).

6, 7. Poukwa nou pé di kè Labib pa ka kontrèdi-y ?

⁶ Sa pran pliski 1 600 lanné pou ékri Labib. Sé nonm-la ki ékri-y la viv a diféran épòk. Ni sa ki té byen enstwi, ni dòt ki pa té ni onlo enstriksyon. Yonn adan yo té dòktè. Ni dòt ki té kiltivatè, péchè, ki té ka lévé mouton, ki té pwofèt, jij oben wa. Magré sé plizyè nonm ki maké sa ki adan-y, Labib pa ka kontrèdi-y : i pa ka di on biten adan on chapit pou-w touvé lèkontrè adan ondòt chapit a.

⁷ Adan Labib, sé prèmyé chapit-la ka èspliké kijan lèmond komansé ni pwoblèm. É sé dènyé chapit-la ka di-nou kijan Bondyé ké ranjé sitiyasyon-lasa é kijan i ké fè latè vin on paradi. Labib ka rakonté sa lézòm fè pannan plizyè milyé lanné. I ka montré kè Bondyé toujou ka fè sa i désidé fè.

8. Lè i ka palé dè biten syantifik, ès sé vérité Labib ka di ? Bay déotwa ègzanp.

⁸ Labib pa on liv ki fèt pou anségné lasyans. Men, lè i ka palé dè biten syantifik, i pa jen ka fè érè. É sa nòwmal, paskè i ka vin dè Bondyé. Pa ègzanp, adan liv a Lévitik, ou ka touvé on séri lwa sé Izraélit-la té dwèt suiv pou anpéché sé maladi-la kouri. Poutan, yo té ja fin ékri Bib-la dépi lontan lè lézòm dékouvè kè mikròb é viris ka fè moun tonbé malad. Labib pa  ka tronpé-y nonplis lè i ka di kè Latè pann é kè ayen pa ka tchenbé-y (Jòb 26:7). Ni onlè, moun té ka kwè kè Latè plat. Men Labib té ja ka di kè Latè won (Izayi 40:22).

9. Sé nonm-la ki ékri Bib-la té onèt. Ka sa ka montré ?

⁹ Tousa Labib ka di asi Listwa a limanité sé vréman sa ki fèt. Ou ka touvé érè adan onlo liv yo ékri asi listwa, pas sé moun-la ki ékri-yo la pa toujou té ka di lavérité. Pa ègzanp, défwa péyi a yo pèd lagè men yo pa jen palé dè sa. Pawkont, sé nonm-la ki ékri Bib-la té onèt. Lè Izrayèl té ka pèd konba, yo pa té ka kaché sa. Yo palé dè fòt yomenm fè osi. Pa ègzanp, adan liv a Nonb, Moyiz ka di kè i fè on fòt grav é kè Bondyé pini-y pou sa (Nonb 20:2-12). Sé nonm-la ki ékri Bib-la té onèt, é sa ka montré kè Labib sé on liv ki ka vin dè Bondyé. Donk, nou pé kwè sa Labib ka di.

10. Poukwa nou pé di kè konsèy a Labib itil pou nou ?

¹⁰ Labib « sé Bondyé ki enspiré-y é i itil pou anségné, pou korijé, pou woumèt tout biten annòd » (2 Timoté 3:16). Wi, konsèy a Labib itil pou nou. Jéova sav kijan i fè-nou. I ka konprann tousa ki ka pasé an lèspri an nou é anfon a tchè an nou. I konnèt-nou plibyen ki noumenm é i vlé tchè an nou kontan. Sé pousa i konnèt sa ki bon é sa ki pa bon pou nou.

11, 12. a) Ki bon konsèy Jézi ka ban-nou adan Matyé chapit 5 a 7 ? b) Ki dòt biten nou pé touvé adan Labib ?

¹¹ Adan Matyé chapit 5 a 7, Jézi ka ban-nou onlo  bon konsèy. I ka di-nou ka pou nou fè pou tchè an nou kontan é pou nou antann-nou byen èvè lézòt. I ka di-nou osi kijan pou nou priyé é ki enpòwtans lajan dwètèt ni an vi an nou. Menmsi sa ka fè 2 000 an Jézi ban-nou sé konsèy-lasa, yo ni onlo valè toujou, é jousalè yo itil.

¹² Adan Labib, Jéova ka ban-nou dé prensip osi (gadé nòt n^o 3 la, paj 207). Sé prensip-lasa ka édé-nou rann vi a fanmi an nou pli bèl, vin pli sèryé adan travay an nou é viv byen èvè toutmoun. Kèlkèswa moun nou yé, la nou ka rété, pwoblèm nou ni, prensip a Labib ké toujou itil pou nou (li Izayi 48:17).

13. Dapré Izayi, ka ki té kay rivé Babilòn ?

¹³ Onlo pwofési a Labib ja réyalizé (gadé nòt n^o 4 la, paj 208). Pa ègzanp, Izayi té anonsé kè on vil yo té ka kriyé Babilòn té ké détwi (Izayi 13:19). É i èspliké kijan sa té ké fèt. Vil-la té ni dé kalté gwo pòt é té ni on flèv alantou a-y ki té ka pwotéjé-y osi. Men pwofèt-la té di kè sé pòt-la té ké rété ouvè é kè flèv-la té ké vin prèskè sèk. Sé solda-la té ké antré an vil-la san goumé. Izayi té jous anonsé kè sété ké on dénonmé Siris ki té ké rivé about a Babilòn (li Izayi 44:27–45:2).

14, 15. Kijan sa Izayi té anonsé anrapò èvè Babilòn réyalizé ?

¹⁴ 200 lanné apré Izayi maké pwofési-lasa, on lawmé vin pou ataké Babilòn. Kimoun ki té antèt a lawmé-lasa ? Sété Siris, wa a Lapèws, ègzaktèman kon sa té anonsé. Men ès lawmé a Siris té kay pé rantré an vil-la, kon pwofési-la té ka di ?

 ¹⁵ Lannuit-la yo ataké vil-la, moun-Babilòn té ka fété. Yo konpranndèdi yo té an sékirité pas vil a yo té lantouré èvè gran miray é èvè on gran flèv. Men andèwò a vil-la, Siris èvè lawmé a-y fouyé on kannal pou fè nivo a dlo-la désann. Konsa, sé solda-la rivé travèsé flèv-la apyé. Men piskè alantou a vil-la té ni  gran miray, kijan yo té kay fè pou yo rantré ? Konmdi-konmfèt, pòt a vil-la té ouvè. Kifè, lawmé-la rivé about a Babilòn san goumé.

16. a) Ka Izayi té anonsé anrapò èvè Babilòn ? b) Èskè sa fèt ?

¹⁶ Izayi té anonsé kè on jou pa té ké ni ponmoun ka rété Babilòn ankò. I té maké : « Ponmoun pé ké jen rété la ankò » (Izayi 13:20). Èskè sa fèt ? Wi. Alèkilé, Babilòn sé on pil wòch. Ou ka touvé débri a vil-lasa an Irak, apépré a 80 kilomèt anba Bagdad. Pa ni ponmoun ka viv la. Jéova baléyé Babilòn « èvè balyé a ladèstriksyon » (Izayi 14:22, 23) b.

17. Poukwa nou pé kwè adan pwomès a Bondyé ?

¹⁷ Onlo pwofési a Labib ja réyalizé. Donk, nou pé kwè adan sa Labib ka anonsé pou dèmen. Asiré pa  pétèt, Jéova ké tchenn pwomès a-y : i ké fè latè vin on paradi (li Nonb 23:19). Wi, nou pé èspéré ni « lavi étèwnèl (lavi pou touttan) kè Bondyé, ki pé pa manti, pwomèt » (Tit 1:2) c.

18. Ka Pòl di anrapò èvè « pawòl a Bondyé » ?

¹⁸ Nou aprann kè pa ni pondòt liv kon Labib. I pa ka kontrèdi-y. Lè i ka palé dè biten syantifik oben dè listwa, sa i ka di toujou vré. I ka ban-nou onlo bon konsèy. É ni onlo pwofési i anonsé ki ja réyalizé. Men a pa yenki pou sa tousèl Labib sé on liv èstraòwdinè. Lapòt Pòl té maké : « Pawòl a Bondyé vivan é i puisan ». Ka sa vlé di ? (Li Ébré 4:12).

19, 20. a) Kijan Labib pé édé-w sav kimoun ou yé vréman ? b) Kijan ou pé montré kè ou ka aprésyé Labib ?

¹⁹ Labib pé chanjé vi a-w. I pé édé-w sav kimoun ou yé vréman. I pé édé-w konprann plibyen sa ki ka pasé an lèspri a-w é anfon a tchè a-w. Pa ègzanp, pétèt nou sèten nou enmé Bondyé. Men pou nou montré kè nou enmé-y, nou dwètèt fè sa Labib ka di.

²⁰ Labib sé vréman on liv ki ka vin dè Bondyé. Bondyé ka mandé-nou li Bib-la, étidyé-y é pran tan aprésyé-y. Pou montré kè ou kontan ou rèsèvwa kado-lasa, kontinyé étidyé Labib. Konsa ou ké pé konprann ka Bondyé ni lentansyon fè pou limanité. Adan chapit-la ki ka vin la, ou ké ni plis détay asi sa.