1, 2. Kimoun ki pé vin a sèkou an nou jòdila ?

IMAJINÉ : ni on mové tan é ou ka maché déwò-la. Syèl-la ka vin nwè. Ni loraj é zéklè é on gwo lapli ka tonbé. Ou ka chèché on koté pou kouri kaché. É finalman, ou ka touvé-y. Ou dwèt ka santi-w soulajé, pa vré ?

² Jòdila, nou ka touvé-nou adan menm sitiyasyon-la. Toupatou si latè, pli nou kay é pli biten-la ka vin rèd. Pétèt ou ka mandé-w : « Ola an pé kouri kaché ? » On sèwvitè a Bondyé maké : « An vlé di Jéova : “Ou sé abri an mwen [...], ou sé Dyé an mwen é sé adan-w an ni konfyans” » (Sòm 91:2). Wi vréman, Jéova ka ban-nou on soulajman é i ka ban-nou on bèl èspwa pou dèmen.

3. Ka nou dwèt fè pou Jéova vin a sèkou an nou ?

³ Kijan Jéova ka vin a sèkou an nou ? I pé édé-nou tchenbé douvan nenpòt ki pwoblèm. É kèlkèswa moun-la ki té ké anvi fè-nou ditò, Jéova lontan pli puisan ki-y. É menmsi on malè rivé, nou pé séten kè, talè, Jéova ké woté tousa ki ka fè-nou soufè. Labib ka ankourajé-nou « rété adan lanmou a Bondyé » (Jid 21). Pou Jéova édé-nou lè nou an difikilté, nou dwèt rété zanmi a-y. Men kijan nou pé rivé fè sa ?

4, 5. Kijan Jéova ka montré-nou i enmé-nou ?

⁴ Pou nou rété zanmi a Jéova, nou dwèt konprann  kè i enmé-nou onlo. Sonjé tousa i fè pou nou. I ban-nou Latè, ki vréman bèl, i mèt zannimo é bèl flè toupatou asi-y. I ka ban-nou manjé ki ni bon gou toubònman é on bon dlo pwòp pou nou bwè. Èvè Bib-la, Jéova ka fè-nou konnèt non a-y é bèl kalité kè i ni. É plis ankò, i montré lanmou a-y pou nou, lè i voyé Jézi asi latè, Gason-la kè i té enmé onlo la, pou i bay vi a-y pou nou (Jan 3:16). Grasa sakrifis-lasa, nou ni on bèl èspwa pou dèmen.

⁵ Jéova établi Wayòm a-y, é sé Mési-la ki ka dirijé-y. Gouvènman-lasa, ki an syèl-la, ké fè tout soufrans disparèt talè é i ké fè latè vin on paradi. Adan Paradi-la, toutmoun ké viv pou touttan, yo ké adoumanman é yo ké viv anpé (Sòm 37:29). Jéova ka montré-nou lanmou a-y ondòt jan ankò. I ka èspliké-nou sa pou nou fè pou nou ni pli bèl vi-la ki tini la. Anplisdisa, i ka ankourajé-nou priyé-y, é i toujou paré a kouté-nou. Jéova ka montré-nouchak, on mannyè ki klè, kè i enmé-nou.

6. Jéova ka montré-w kè i enmé-w. Ki atitid ou dwèt ni anrètou ?

⁶ Jéova ka montré-w kè i enmé-w. Ki atitid ou dwèt ni anrètou ? Montré-y kè ou ka aprésyé tousa i ka fè ba-w. Malérèzman, jòdila, ni onlo moun ki engra. Lè Jézi té asi latè, sa té ja konsa. On jou, i géri 10 moun ki té ni lalèp, men adan yotout, sé onsèl ki di-y mèsi (Lik 17:12-17). Nou vlé fè kon misyé-lasa. Nou toujou vlé montré Jéova kè nou ni rèkonésans pou sa i ka fè pou nou.

7. Kijan nou dwèt enmé Jéova ?

⁷ Ondòt biten pou nou fè, sé montré kè nou enmé Jéova. Jézi di disip a-y kè yo dwèt enmé Jéova « èvè  tout tchè a yo », « èvè tout nanm a yo » é « èvè tout entélijans a yo » (li Matyé 22:37). Ka sa vlé di ?

8, 9. Kijan nou pé montré Jéova kè nou enmé-y ?

⁸ Ès sé yenki di kè nou enmé Jéova ? Non. Si nou enmé Jéova « èvè tout tchè an nou », « èvè tout nanm an nou » é « èvè tout entélijans an nou », sa nou ka fè ké montré kè nou enmé-y (Matyé 7:16-20). Labib klè asi sa : si nou enmé Bondyé, nou ké suiv komandman a-y. Ès sa two rèd a fè ? Non, pas komandman a-y « pa fòsan » (li 1 Jan 5:3).

⁹ Si nou ka kouté Jéova, vi an nou ké bèl (Izayi 48:17, 18). Men ka ki ké édé-nou rété zanmi a Jéova ? An-nou gadé sa.

10. Poukwa ou dwèt kontinyé aprann konnèt Jéova ?

¹⁰ Kijan ou vin zanmi a Jéova ? Ou étidyé Bib-la, kifè piti-a-piti ou vin konnèt Jéova, é lanmityé a-w èvè-y vin dè plizanpli solid. Lanmityé-lasa, sé kon on difé ki limé. Si ou vé pa difé-la étenn, fò-w mèt bwa adan-y. Menmjan-la, si ou vlé lanmityé a-w èvè Jéova rété solid, ou dwèt kontinyé aprann konnèt-li (Pwovèb 2:1-5).

11. Kijan sa Labib ka anségné ké aji asi-w ?

¹¹ Si ou kontinyé étidyé Labib, sa ké pèwmèt-vou aprann dé biten ki ké touché tchè a-w poudèbon. Gay kijan dé disip a Jézi réyaji lè Jézi ba-yo on èsplikasyon asi pwofési ki adan Labib. Mi sa yo di : « Tchè an nou, ès i pa té ka brilé, lè i té ka palé ban nou asi chimen-la, lè i té ka èspliké-nou Lézékriti on mannyè ki klè ? » (Lik 24:32).

12, 13. a) Ka ki pé rivé lanmou an nou pou Bondyé ? b) Ka nou dwèt fè pou lanmou an nou pou Bondyé rété fò ?

 ¹² Lèwvwè disip a Jézi konprann Lézékriti, sa touché-yo an plen tchè. Menmjan ki yo, ou dwèt té kontan osi lè ou koumansé konprann Labib ! Sa pèwmèt-vou konnèt Jéova, é sé sa ki fè-w enmé-y. Pa lésé lanmou-lasa vin fwèt, kivédi pa lésé-y fébli (Matyé 24:12).

¹³ Konnyéla ou vin zanmi a Jéova, pou lanmityé a-w èvè-y rété solid, fò ou fè bon éfò. Kontinyé aprann konnèt Jéova é Jézi. Réfléchi asi jan ou pé mèt sa ou ka aprann an pratik (Jan 17:3). Lè ou ka li Labib oben lè ou ka étidyé-y, réfléchi asi sa ou aprann é mandé-w : « Ka sa ka aprann-mwen asi Jéova ? Kijan sa an aprann la pé édé-mwen enmé-y pli fò ? » (1 Timoté 4:15).

14. Grasa lapriyè, lanmou an nou pou Jéova pé rété fò. Poukwa nou pé di sa ?

 ¹⁴ Lè ou ni on bon zanmi, ou ka palé èvè-y toutlè, é sé sa ki ka fè si lanmityé a-w èvè-y ka rété solid. Sé menm biten osi lè nou ka palé ba Jéova souvan, kivédi lè nou ka priyé-y, lanmou an nou pou-y ka rété fò (li 1 Tésalonisyen 5:17). Lapriyè sé on bèl kado toubònman Pap’an nou ki an syèl-la fè-nou. Fò-nou toujou di-y sa ki anfon a tchè an nou (Sòm 62:8). Fò pa nou ka répété priyè nou aprann pakè, men fò sa nou ka di sé sa nou ka pansé. Pou lanmou an nou pou Jéova rété fò, nou dwèt kontinyé étidyé Labib é priyé Jéova èvè tout tchè an nou.

15, 16. Kijan ou ka konsidéré prédikasyon-la ?

¹⁵ Pou rété zanmi a Jéova, nou dwèt palé èvè lézòt dè sa nou aprann adan Bib-la osi. Lè nou ka palé dè Jéova, sé on bèl biten é sé on gran lonnè toubònman (Lik 1:74). É sé on rèsponsabilité kè Jézi ba tout sé krétyen-la. Noutout nou dwèt préché bon nouvèl a Wayòm a Bondyé. É vou, ès ou ja ka fè sa ? (Matyé 24:14 ; 28:19, 20).

¹⁶ Pou lapòt Pòl, prédikasyon-la té ni onlo valè. I di kè sé on « trézò » (2 Korentyen 4:7). Pa ni pon aktivité ou pé fè ki pli enpòwtan ki palé èvè lézòt dè Jéova é dè sa i ka pwomèt. Sé on mannyè pou nou sèvi Jéova. É Jéova kontan toubònman dè sa ou ka fè ba-y (Ébré 6:10). Anplisdisa, prédikasyon-la ka pòté bon biten pou moun ki ka kouté-w é pou-w menm osi. Lè ou ka  préché, ou ka édé ki lézòt ki voumenm a vin pli pré Bondyé é a ni lavi étèwnèl (li 1 Korentyen 15:58). Ou ka di i ni ondòt aktivité ki pé rann-vou pli kontan ki prédikasyon-la ?

17. Préché, sé on biten nou dwèt fè san tadé. Poukwa ?

¹⁷ Prédikasyon-la, sé on travay pou nou fè san tadé. Nou dwèt « préché pawòl-la » é nou dwèt « fè-y san pèd tan » (2 Timoté 4:2). Fò lézòm tann palé dè wayòm a Bondyé. Labib ka di : « Gran jou a Jéova toupré ! I toupré, é i ka vin vit menm ! » Lafen « pé ké anrèta ! » (Sofoni 1:14 ; Abakik 2:3). Talè, Jéova ké détwi mond méchan lasa, ki an men a Satan. Men avan sa rivé, fò sé moun-la sav sa ki kay fèt, pou yo pé sa chwazi sèvi Jéova.

18. Poukwa nou dwèt adoré Bondyé èvè dòt vré krétyen ?

¹⁸ Jéova vlé kè nou adoré-y èvè dòt krétyen ki ka sèvi-y. Labib ka di : « An-nou voyé zyé yonn asi lòt pou yonn pé sa pousé lòt ni lanmou é fè sa ki bèl, san nou abandoné réinyon an nou, kon sé labitid a déotwa, men fò yonn ankourajé lòt, é an-nou fè sa plis ankò davwa nou ka vwè jou-la ka rivé » (Ébré 10:24, 25). Nou dwèt fè tousa nou pé pou nou ay adan tout réinyon an nou. Sé réinyon-la ka pèwmèt kè yonn ankourajé lòt.

19. Ka ki pé édé-nou enmé frè é sè an nou ?

¹⁹ Lè ou ka vin réinyon, ou ké touvé dé bon zanmi. Yo ké pé édé-w adoré Jéova. Ou ké rankontré diféran frè é sè. Menmjan ki-w, yo ka fè tousa yo pé pou adoré Bondyé. Menmjan ki-w osi, yo enpawfè é yo ka fè érè. Sé pousa lè sa ka rivé, fò-nou paré pou padoné-yo (li Kolosyen 3:13). Frè é sè an nou ni bèl kalité, é sé  toujou sa pou-w rété gadé. Sa ké édé-w enmé-yo é sa ké édé-w vin pli pré a Jéova ankò.

20, 21. Ka ki « vré vi-la » ?

²⁰ Jéova vlé kè tout zanmi a-y ni méyè vi ki tini. Labib ka anségné kè, on jou, vi-la nou ké ni la pé ké ni ayen a vwè èvè jan nou ka viv jòdila.

²¹ On jou, nou ké ni « lavi étèwnèl ». Nou pé ké viv 70 oben 80 lanné tousèl. Nou ké ni on santé ki ké pawfè é nou ké viv anpé adan Paradi-la. Bib-la ka kriyé vi-lasa « vré vi-la ». Jéova ka pwomèt-nou kè i ké ban-nou vi-lasa. Men nou dwèt fè tout posib an nou pou nou « tchenbé vré vi-la fò » dépi aprézan (1 Timoté 6:12, 19).

22. a) Kijan nou pé « tchenbé vré vi-la fò » ? b) Poukwa nou pé pa mérité lavi étèwnèl ?

²² Kijan nou pé « tchenbé vré vi-la fò » ? Nou dwèt « travay pou fè sa ki byen » é nou dwèt fè onpakèt bon biten (1 Timoté 6:18). Sa vlé di kè sa nou ka aprann adan Bib-la, fò-nou mété-y an pratik. Men a pa paskè nou ka fè gwo éfò sa vé di nou ké ni lavi étèwnèl. Anponjan, nou pé pa mérité lavi étèwnèl. Sé on kado Jéova ka fè-nou, on « favè nou pa mérité » (Women 5:15). Pap’an nou ki an syèl-la vlé fè sèwvitè fidèl a-y kado-lasa.

23. Poukwa ou dwèt pran bon désizyon onfwa-onfwa ?

²³ Posé-w kèsyon-lasa : « Èskè jan-la an ka adoré Bondyé la ka fè-y plézi ? » Si ou ni chanjman a fè an vi a-w, fè-y onfwa-onfwa. Si nou ka fè tousa nou pé pou nou obéyi Jéova é si nou ni konfyans adan-y, i ké on abri pou nou. I ké pwotéjé sèwvitè fidèl a-y  pannan dènyé jou a mond a Satan. Aprésa, i ké fè ansòt pou nou viv adan Paradi-la pou touttan, kon i té pwomèt. Si ou pran bon désizyon san tadé, ou ké pé pwofité dè vré vi-la !