1-3. a) Ki kèsyon onlo moun ka pozé-yo asi lanmò ? b) Ka sèwten rèlijyon ka di ?

 ADAN Labib, Bondyé ka pwomèt-nou kè on jou « lanmò pé ké la ankò » (Révélasyon 21:4). Adan chapit 5 la, nou vwè kè nou ké pé viv pou touttan grasa ranson-la. Men jousalè, moun ka mò (Éklézyas 9:5). Sé pousa onlo moun ka mandé-yo : « Lè on moun mò, ka i ka divini ? »

² Sé lè ou pèd on moun ou enmé ou ka pi anvi konnèt répons a kèsyon-lasa. Ou ka mandé-w : « Ola i yé ? Ès i ka soufè ? Ès i ka vwè-mwen ? Ès i pé édé-mwen ? Ès an ké wouvwè-y on jou ? »

³ Sé rèlijyon-la ka bay diféran répons asi sé kèsyon-lasa. Ni sa ka di kè lébon kay osyèl, é kè léméchan kay an lanfè. Ni dòt ki ka di kè, lè on moun mò, i ka divini on lèspri é i kay viv owa fanmi a-y ki ja mò. É adan dòt rèlijyon ankò, yo ka di kè, apré mò a-w, ou ka pasé an jijman é ou ka wouvin adan ondòt kò, swa adan on kò a moun, swa adan on kò a bèt.

4. Ka prèstout sé rèlijyon-la ka di asi lanmò ?

⁴ Ou pé ni lenprésyon kè sé rèlijyon-la ka anségné dé biten diféran asi lanmò. Men sèlon sa près yotout ka di, lè on moun mò, ni on pati a moun-lasa ki ka kontinyé viv. Ès sé vré sa ?

5, 6. Ka nou ka divini lè nou mò ?

⁵ Jéova sav ka nou ka divini lè nou mò. I ka di-nou kè, lè on moun mò, i pa ka viv ankò. Lanmò sé kontrè a lavi. Savédi kè on moun ki mò pa ka rèsanti ayen ankò é i pa ka sonjé ayen ankò a. I pa ka vwè ayen, i pa ka tann ayen é i pa ka réfléchi nonplis.

⁶ Labib ka di kè moun-mò « pa konnèt ayen ». On moun-mò pé pa ni enmé-w ni hay-vou. « Pa ni ni travay, ni plan, ni konésans, ni sajès adan Tonm-la » (li Éklézyas 9:5, 6, 10). Adan Sòm 146:4, Bib-la ka di kè, lè on moun ka mò, « lidé a-y » ka mò osi.

7. Ka Jézi di asi lanmò ?

⁷ Laza sété on zanmi a Jézi. Lè i mò, Jézi di disip a-y : « Zanmi an nou Laza pran sonmèy. » Men Jézi pa té vlé di kè Laza té ka dòmi, pas on ti moman apré, i di : « Laza mò » (Jan 11:11-14). Donk Jézi di kè lanmò ka touvé-y kon on sonmèy. I pa di kè Laza té an syèl-la oben kè i té èvè rèstan fanmi a-y ki té ja mò. I pa di kè Laza té ka brilé an lanfè. É i pa di kè Laza wouvin adan ondòt kò nonplis. An réyalité, sété konsi Laza té ka dòmi. Ni dòt vèwsé adan Bib-la ki ka di kè lanmò sé kon on gwo sonmèy. Bib-la ka di kè, lè yo tchouyé on dénonmé Étyèn, i « pran sonmèy adan lanmò » (Akt 7:60). Lapòt Pòl osi té di kè  ni plizyè krétyen ki « pran sonmèy adan lanmò » (1 Korentyen 15:6).

8. Kijan nou fè sav kè Jéova pa té kréyé-nou pou nou mò ?

⁸ Lè Jéova kréyé Adan é Èv, ès sété pou yo viv on ti moman épi mò apré ? Non ! I té kréyé-yo pou yo té viv pou touttan èvè on santé ki pawfè. Dayè, lè i kréyé-nou, i mèt lanvi dè viv pou touttan andidan tchè an nou (Éklézyas 3:11). Pa ni pon papa ni pon manman ki anvi vwè timoun a-y vyéyi oben mò. Sé menm biten pou Jéova. Men alò, si Jéova kréyé-nou pou nou viv étèwnèlman, poukwa nou ka mò ?

9. Poukwa lòd-la Jéova té ba Adan é Èv la pa té two rèd a suiv ?

⁹ Adan Jadendédèn-la, Jéova té di Adan : « Ou pé manjé [...] adan tout pyébwa ki an jaden-la [...]. Men ou pa ni dwa manjé adan fwi a pyébwa a konésans a sa ki byen é a sa ki mal, pas jou-la ou ké manjé adan-y la, ou ké mò » (Jénèz 2:9, 16, 17). Lòd-lasa té klè, é i pa té two rèd a suiv. Piskè sé Jéova ki té kréyé Adan é Èv, i té sav ka ki té méyè pou yo. É i té andwa di-yo ka ki byen é ka ki mal. Si yo té kouté-y, yo té’é montré kè yo ka rèspèkté otorité a-y é kè yo ka aprésyé tousa i ba-yo.

10, 11. a) Kijan Satan rivé badiné Èv ? b) Poukwa pa ni pon èskiz valab pou sa Adan é Èv fè la ?

¹⁰ Malérèzman, Adan é Èv désidé dè pa kouté Jéova. Satan mandé Èv : « Ès vréman Bondyé di kè zò pa ni dwa manjé adan tout pyébwa ki an jaden-la ? » Èv réponn : « Nou pé manjé fwi a pyébwa ki an jaden-la. Men kanta fwi a pyébwa-la ki anmitan jaden-la, Bondyé di : “Zò pa ni dwa manjé adan-y, [...] sinon zò ké mò.” » (Jénèz 3:1-3).

¹¹ Alò Satan di : « Zò pé ké pon mò. Pas Bondyé sav kè, menmjou-la zò ké manjé adan-y la, [...] zò ké kon Bondyé : zò ké konnèt sa ki byen é sa ki mal » (Jénèz 3:4-6). Satan té vlé fè Èv kwè kè i té pé désidé limenm kè tèl ou tèl biten byen ou mal. É i pa di-y lavérité asi sa ki té ké rivé sianka i té dézobéyi : i di-y kè i pé ké mò. Alò Èv manjé fwi-la é i ba Adan manjé adan-y osi. Adan é Èv té sav byen kè Jéova té di-yo pa manjé fwi-la. Men yo désidé pa obéyi a lòd-lasa, on lòd ki té klè é ki pa té rèd a suiv. Lè yo manjé fwi-la, yo montré kè  yo pa té ni pon rèspé pou Papa-yo ki té enmé-yo fò. É pa ni pon èskiz valab pou sa yo fè la !

12. Ka Jéova rèsanti lè i vwè kè Adan é Èv pa té ni pon rèspé pou-y ?

¹² Lè Jéova vwè kè Adan é Èv pa té ni pon rèspé pou-y, sa désèvwa-y toubònman ! Imajiné : Ou fè tousa ou té pé pou pé sa lévé gason a-w é fi a-w byen. Men rivé onlè, yo ka ba-w do, é yo ka fè tou lèkontrè a sa ou di-yo fè. A moman-lasa, kijan ou ka santi-w ? Sa ka fann tchè a-w, pa vré ?

13. Jéova di Adan : « Ou ké rètouné an pousyè-la. » Ka sa té vlé di ?

¹³ Konm Adan é Èv dézobéyi Bondyé, yo pèd tout posibilité yo té ni dè viv pou touttan. Alò Jéova di Adan : « Ou sé pousyè é ou ké rètouné an pousyè-la » (li Jénèz 3:19). Sa vlé di kè Adan té ké wouvin an léta-la i té yé la avan Bondyé kréyé-y, kivédi an pousyè. Sété’é konsi i pa té jen ègzisté (Jénèz 2:7). Apré Adan péché, i mò : i pa té ka ègzisté ankò.

14. Poukwa nou ka mò ?

¹⁴ Si Adan é Èv té kouté Bondyé, jousalè yo té’é vivan. Men lè yo dézobéyi, yo péché é yo fin pa mò. Péché-la sé kon on maladi grav prèmyé paran an nou lésé ban nou. Noutout fèt èvè péché-la adan nou é sé pousa nou ka mò (Women 5:12). Men a pa sa  Bondyé té prévwa pou nou. I pa té vlé nou viv on ti moman pou nou mò apré. Dayè, Labib ka di kè lanmò sé on « lènmi » (1 Korentyen 15:26).

15. Poukwa nou pé di kè lè nou konnèt lavérité asi lanmò sa ka libéré-nou ?

¹⁵ Lè ou sav ka on moun ka divini lè i mò, sa ka libéré-w dè onlo mansonj. Labib ka di kè moun-mò pa ka rèsanti pon penn, ni pon doulè. Pa ni mwayen palé ba-yo é yo pé pa palé ban nou nonplis. Nou pé pa édé-yo é yo pé pa édé-nou nonplis. Yo pé pa fè-nou ayen é fò pa nou pè-yo. Poutan, onlo rèlijyon ka di kè sé mò-la ni on koté yo ka viv. Yo ka di osi kè ou pé édé-yo si ou ba on prèt oben on moun antèt a rèlijyon-la on monné (pa ègzanp pou fè on mès pou mò-la). Men lè ou konnèt lavérité asi lanmò, ou sav sé manti yo ka manti é ou pa ka pri adan sa ankò.

16. Lè yo ka palé dè lanmò, ki mansonj onlo rèlijyon ka anségné ?

¹⁶ Satan ka sèvi èvè sé fo-rèlijyon-la pou badiné-nou é pou fè-nou kwè kè sé mò-la ka kontinyé viv. Prèstout sé rèlijyon-la ka di kè, lè on moun mò, ni on pati a moun-la ki ka kontinyé viv. Èskè sé sa yo ka anségné adan rèlijyon a-w ? Oben èskè sa rèlijyon a-w ka anségné asi lanmò annakò èvè sa Labib ka di ? Satan ka fè moun kwè onlo mansonj pou yo pa rapwoché-yo dè Jéova.

17. Poukwa lè yo ka di kè moun kay brilé an lanfè, sé méprizé yo ka méprizé Jéova ?

¹⁷ Onpakèt rèlijyon ka anségné dékalté biten ! Sa ka sitrayé-w ! Pa ègzanp, ni sa ki ka di kè sé méchan-la ka brilé an lanfè étèwnèlman. Mansonj-lasa ka  méprizé Bondyé. Jéova pa té ké jen pèwmèt kè on moun soufè konsa ! (Li 1 Jan 4:8). An-nou pran on ègzanp : on moun ka mèt men a timoun a-y an difé pou pini-y. Ka ou ké pansé dè on moun konsa ? Ou ké di kè i ni malédisyon ! É sèten ou pé ké anvi vin zanmi a-y. Ében, li Satan, i vlé fè-nou konprann sé konsa Jéova yé ! I vlé fè-nou kwè kè Jéova ka fè moun soufè étèwnèlman.

18. Poukwa fò pa nou pè moun-mò ?

¹⁸ Adan sèwten rèlijyon yo ka di kè lè on moun mò, i ka vin on lèspri. Yo ka di kè fò-w ni onlo rèspé pou sé lèspri-lasa é kè fò-w jous pè-yo, pas on lèspri pé vin, swa on zanmi puisan, swa on lènmi danjéré. Onlo moun ka kwè adan mansonj-lasa, kifè yo pè moun-mò. É yo ka vénéré-yo olyé yo adoré Jéova. Men sonjé : lémò pa ka rèsanti ayen. Donk fò pa nou pè-yo. Jéova, sé Kréyatè an nou. É ni onsèl vré Dyé, sé li. Sé yenki li pou nou adoré (Révélasyon 4:11).

19. Lè nou konnèt lavérité asi lanmò, ki bénédisyon sa ka pwokiré-nou ?

¹⁹ Lè nou konnèt lavérité asi lanmò, sa ka libéré-nou dè onlo mansonj sé rèlijyon-la ka anségné. É anplis, sa ka édé-nou konprann plibyen ka Jéova ni lentansyon fè plita.

20. Dè kibiten nou kay palé adan chapit-la ki ka vin la ?

²⁰ Ni lontan dè sa, Jòb, on sèwvitè a Bondyé, pozé kèsyon-lasa : « Si on nonm mò, ès i pé wouviv ? » (Jòb 14:14). Jéova ka ban-nou répons-la adan Bib-la é répons-la bèl toubònman. Nou ké vwè sa adan chapit-la ki ka vin la.