1. Konnyéla ou aprann onlo vérité ki sòti adan Bib-la, ki kèsyon ou pé ka pozé-w ?

PANNAN ou té ka étidyé liv-lasa, ou aprann onlo vérité ki sòti adan Bib-la. Pa ègzanp, ou dékouvè ka sé moun mò-la ka divini, ou aprann kè yo pé résisité, é kè Bondyé pwomèt lavi étèwnèl (Éklézyas 9:5 ; Lik 23:43 ; Jan 5:28, 29 ; Révélasyon 21:3, 4). Pétèt ou ja kay adan réinyon a Témwen a Jéova, é pétèt ou ka pansé kè yo ka adoré Bondyé kon i vlé yo adoré-y (Jan 13:35). Anplisdisa, pétèt ou ka santi kè ou ka vin  dè plizanpli pré a Jéova é ou vlé sèvi-y. Alò, ou pé ka mandé-w : « Konnyéla, ka pou mwen fè pou sèvi Bondyé ? »

2. Poukwa on moun Étyopi té vlé pran lèbatèm ?

² On moun Étyopi, ki té ka viv an tan a Jézi, té vlé sav ka pou i té fè pou sèvi Bondyé. Kèlkètan apré Jézi résisité, Filip, ki té on disip a Jézi, ay préché pou Étyopyen-la. I montré-y kè Jézi sété Mési-la. Sa Étyopyen-la aprann touché-y tèlman kè tousuit i di : « Gadé ! Mi dlo ! Ka i ka anpéché-mwen pran lèbatèm ? » (Akt 8:26-36).

3. a) Ki komandman Jézi ba disip a-y ? b) Kijan yo dwèt batizé on moun ?

³ Bib-la ka montré on mannyè ki klè ka pou-w fè si ou vlé sèvi Jéova : ou dwèt pran lèbatèm. Jézi ba disip a-y lòd-lasa : « Fè disip pawmi moun a toutkalté nasyon. Batizé-yo » (Matyé 28:19). Jézi limenm bay lègzanp lè i pran lèbatèm. A pa yenki dé tigout dlo tousèl yo vidé anlè tèt a-y : yo plonjé tout kò a-y anba dlo-la (Matyé 3:16). Menmjan-la, jòdijou, lè on krétyen ka pran lèbatèm, fò-yo plonjé tout kò a-y anba dlo-la.

4. Lè on moun ka pran lèbatèm, ka i ka montré lézòt ?

⁴ Lè on moun ka pran lèbatèm, i ka montré lézòt kè i vréman anvi vin zanmi a Bondyé é kè i anvi sèvi-y (Sòm 40:7, 8). Konnyéla, pétèt ou ka mandé-w : « Ka pou an fè pou an pran lèbatèm ? »

5. a) Pou-w pé pran lèbatèm, ka pou-w fè ? b) Poukwa sé réinyon-la enpòwtan ?

⁵ Pou-w pé pran lèbatèm, fò ou aprann konnèt  Jéova é Jézi. É sé sa ou ja koumansé fè padavwa ou ka étidyé Labib (li Jan 17:3). Men a pa sa tousèl pou fè. Labib ka èspliké kè fò-nou ni on « konésans ègzak » a sa ki volonté a Jéova (Kolosyen 1:9). Réinyon a Témwen a Jéova ké édé-w ni on lanmityé pli solid èvè Jéova. Sé on bon rézon pou-w pran labitid vin réinyon (Ébré 10:24, 25).

6. Avan ou pran lèbatèm, ki biten ou bizwen konnèt adan Bib-la ?

⁶ Ou ka tou konprann kè Jéova pa ka mandé-w konnèt tout Bib-la pakè avan ou pran lèbatèm. Jéova pa fòsé Étyopyen-la konnèt tousa ki ni adan Pawòl a-y avan i té pran lèbatèm (Akt 8:30, 31). An réyalité, nou pé ké jen fin aprann asi Jéova (Éklézyas 3:11). Men avan ou pran lèbatèm, fò ou konnèt ki biten enpòwtan Labib ka anségné é fò ou dakò èvè sa (Ébré 5:12).

7. Kijan sa ou étidyé an Bib-la édé-w ?

⁷ Labib ka di kè, san lafwa, pa ni mwayen fè Bondyé plézi (Ébré 11:6). Kivlédi, fò-w ni lafwa an Bondyé pou-w pé pran lèbatèm. Labib ka palé dè déotwa moun ki té ka rété adan vil-la yo té ka kriyé Korent, ki tann sa disip a Jézi té ka anségné. Parapòt a sa, yo « koumansé kwè é yo pran lèbatèm » (Akt 18:8). Sé menm biten-la ki fèt pou-w. Sa ou aprann adan Bib-la pannan étid a-w édé-w ni lafwa adan pwomès a Bondyé. Sa édé-w ni lafwa osi adan sakrifis a Jézi, ki pé woté-nou anba péché-la é anba lanmò (Joziyé 23:14 ; Akt 4:12 ; 2 Timoté 3:16, 17).

8. Ka i ké ba-w anvi palé èvè lézòt dè sa ou ka aprann ?

⁸ Pli ou ké konnèt sa Labib ka di, pli ou ké vwè  kijan i itil adan vi a-w, é pli fwa a-w ké vin solid. A moman-lasa, ou ké anvi palé èvè lézòt dè sa ou ka aprann (Jérémi 20:9 ; 2 Korentyen 4:13). Men èvè kimoun ou pé palé dè sa ?

9, 10. a) Ba kimoun ou pé koumansé palé dè sa ou ka aprann adan Bib-la ? b) Si ou anvi préché èvè lasanblé lokal la, ka pou-w fè ?

⁹ Pétèt ou ké anvi palé dè sa ou ka aprann èvè fanmi a-w, zanmi a-w, vwazen a-w oben èvè moun ki ka travay èvè-w. Sé on bon biten, men fò-w toujou fè-y on mannyè ki dous é ki janti. Onlè, ou ké anvi ay préché èvè lasanblé lokal la. Lè ou ké santi ou paré, fè Témwen-la ki ka étidyé Labib èvè-w la sav sa. Si i ka vwè kè ou ja paré pou préché, é si ou ka viv annakò èvè sé prensip-la ki adan Bib-la, a moman-lasa, dé ansyen a lasanblé lokal la ké fè on ti kozé èvè zòt toulédé.

¹⁰ Poukwa yo ka fè ti kozé-lasa ? Sé ansyen-la ké palé èvè-w pou yo sav si ou ka konprann sé vérité fondamantal la ki adan Labib. Sa ké pèwmèt-yo vwè osi si ou ka kwè adan sé vérité-lasa. Yo ké vlé sav si ou ka suiv sa Labib ka di adan vi a-w, é si ou anvi vin on Témwen a Jéova. Pa pè palé èvè sé ansyen-la. Pa oubliyé : yo ka pran swen a toutmoun ki an lasanblé lokal la, é voumenm adan osi (Akt 20:28 ; 1 Pyè 5:2, 3). Apré ti kozé-lasa, yo ké di-w si ou pé préché èvè lasanblé lokal la.

11. Si sé ansyen-la ka di-w kè ou ni dòt chanjman a fè, poukwa sa enpòwtan kè ou fè-yo ?

¹¹ Pétèt sé ansyen-la ké èspliké-w kè ou ni dòt chanjman a fè pou-w pé koumansé préché èvè lasanblé lokal la. Poukwa sa enpòwtan toubònman kè ou  fè sé chanjman-lasa ? Sa enpòwtan paskè lè nou ka palé moun dè Bondyé, nou ka rèprézanté Jéova. Alò, fò-nou viv on mannyè ki ka onoré-y (1 Korentyen 6:9, 10 ; Galat 5:19-21).

12. Poukwa noutout bizwen rèpanti-nou ?

¹² Pou-w pé pran lèbatèm, ni ondòt biten pou-w fè ankò. Lapòt Pyè di : « Kifè, rèpanti-zòt é viré owa Bondyé, pou péché a zòt éfasé » (Akt 3:19). Ka sa vlé di « rèpanti-w » ? Sa vlé di kè ou ka règrété vréman tousa ou fè ki pa té byen. Pa ègzanp, si ou té ka menné on vyé vi pas ou té ka fè péché sèksyèl, ou dwètèt rèpanti-w. É menmsi, pannan tout vi a-w, ou toujou chèché a fè sa ki byen, fò ou rèpanti-w kanmenm pas noutout péchè. Kifè, noutout bizwen mandé Bondyé padon (Women 3:23 ; 5:12).

13. Ka sa vlé di « viré owa Bondyé » ?

¹³ Ès sé yenki règrété sa ou fè dè mal é sé tout ? Non. Lapòt Pyè di kè fò ou « viré owa Bondyé » osi. Sa vlé di fò ou arété fè tout mové biten ou té ka fè avan é fò ou mété-w ka fè sa ki byen. An-nou pran on ègzanp : Imajiné kè sé prèmyé fwa ou kay on koté. Rivé onlè, ou ka rann-vou kont kè ou pran mové chimen-la. Ka ou ka fè ? Ou ka ralanti, ou ka arété, ou ka « viré », kivédi ou ka fè dèmi-tou, é apré ou ka pran bon chimen-la. Menmjan-la, lè ou ka étidyé Labib, ou ka rann-vou kont kè ou ni sèwten chanjman a fè adan vi a-w oben kè fò-w pèd sèwten mové labitid ou ni. Fò ou paré a « viré owa Bondyé », kivédi fò ou  dispozé a fè chanjman ki nésésè, é fò ou mété-w ka fè sa ki byen.

14. Ka sa vlé di « ba Jéova vi a-w » ?

¹⁴ Pou-w pé pran lèbatèm, ou ni ondòt biten enpòwtan pou-w fè. Fò ou ba Jéova vi a-w. Lè ou ka ba Jéova vi a-w, ou ka fè-y on pwomès. Adan on priyè, ou ka di-y kè sé yenki li ou ké adoré é kè sé volonté a-y ou ké mèt prèmyé douvan adan vi a-w (Détéwonòm 6:15).

15, 16. Ka i ka fè on moun ba Jéova vi a-y ?

¹⁵ Lè ou ka pwomèt Jéova kè sé yenki li ou ké sèvi, sé kon lè ou ka pwomèt on moun ou enmé kè ou ké pasé tout rèstan a vi a-w èvè-y. Imajiné : on misyé é on madanm ka frékanté-yo. Pli misyé-lasa ké aprann konnèt madanm-la, pli i ké enmé-y. É i ké vlé mayé èvè-y. Menmsi sé on désizyon ki vréman enpòwtan, misyé-la paré a pran rèsponsabilité a mayé épi madanm-la pas i enmé-y.

¹⁶ Pli ou ké konnèt Jéova, pli ou ké enmé-y é pli ou ké anvi fè tousa ou pé pou sèvi-y. A moman-lasa ou ké vlé fè on priyè pou di-y kè ou vlé sèvi-y. Labib ka di kè si on moun vlé vin disip a Jézi, fò i « rènyé-y » (Mawk 8:34). Sa vlé di kè sa ki pli enpòwtan an vi a-w, sé fè sa Jéova ka mandé-w. An réyalité, sa Jéova vlé lontan pli enpòwtan ki sa vou ou vlé é sa pli enpòwtan ki òbjèktif pèwsonèl a-w (li 1 Pyè 4:2).

17. Poukisa ni sèwten moun ki pa ka ba Jéova vi a yo ?

¹⁷ Ni dé moun ki pa ka ba Jéova vi a yo pas yo pè  fè-y on pwomès pou apré yo pa tchenn a mo a yo. Yo pa anvi fè-y lapenn. Oben yo ka di kè, si yo pa ba Jéova vi a yo, yo pé ké ni pon kont a rann-li pou sa yo fè.

18. Si fè Jéova lapenn ka fè-w pè, ka i ké ba-w kouraj ?

¹⁸ Si sé pè ou pè fè Jéova lapenn, lanmou ou ni pou-y ké édé-w rivé about a krent-lasa. Ou enmé Jéova, é sé pousa ou ké fè tousa ou pé pou tchenn pwomès a-w (Éklézyas 5:4 ; Kolosyen 1:10). Ou pé ké mété an tèt a-w kè sa two rèd dè fè volonté a Jéova. Lapòt Jan maké : « Mi sa enmé Bondyé vlé di : suiv komandman a-y. É poutan, komandman a-y pa fòsan » (1 Jan 5:3).

19. Poukwa ou pa bizwen pè ba Jéova vi a-w ?

¹⁹ Ou pa bizwen pawfè pou ba Jéova vi a-w. I pa jen ka mandé-w fè sa ou pé pa fè (Sòm 103:14). I ké édé-w fè sa ki byen (Izayi 41:10). Fè Jéova konfyans dè-tou-kè, é « i ké fè santyé a-w vin dwèt » (Pwovèb 3:5, 6).

20. Apré ou ba Jéova vi a-w, ka ou dwèt fè ?

²⁰ Ès ou ka santi kè ou ja paré pou ba Jéova vi a-w ? Apré ou ba Jéova vi a-w, ou paré pou pwochen étap-la. Ou dwèt pran lèbatèm.

21, 22. Kijan ou pé « anonsé douvan toutmoun » kè ou ni lafwa ?

²¹ Adan sé ansyen-la ki an lasanblé lokal a-w, ni yonn ki koòwdinatè. Ou pé di-y kè ou priyé Jéova pou ba-y vi a-w é kè ou vlé pran lèbatèm. I ké mandé déotwa ansyen ègzaminé èvè-w vérité fondamantal  ki an Bib-la. Si yo ka pansé kè ou paré, yo ké di-w kè ou pé batizé adan pwochen lasanblé a Témwen a Jéova ki ka vin la. Pannan lasanblé-lasa, ké ni on diskou ki ké èspliké ka i lèbatèm. Aprésa, oratè-la ké pozé sé moun-la ki kay batizé la dé kèsyon tousenp. Lè ou ké réponn a sé dé kèsyon-lasa, sé konsa ou  ké « anonsé douvan toutmoun » kè ou ni lafwa (Women 10:10).

²² Aprésa, yo ké batizé-w. Yo ké plonjé tout kò a-w anba dlo-la. Batèm a-w ké montré toutmoun kè ou ba Jéova vi a-w é kè konnyéla ou sé on Témwen a Jéova.

23. Ka sa vlé di batizé on moun « an non a Papa-la, an non a Gason-la é an non a lèspri sen » ?

²³ Jézi di kè yo té ké batizé disip a-y « an non a Papa-la, an non a Gason-la é an non a lèspri sen » (li Matyé 28:19). Ka sa vlé di ? Sa vlé di kè fò-w rèkonnèt otorité a Bondyé. Fò ou aksèpté jan Bondyé ka sèvi èvè Jézi pou fè sa i ni lentansyon fè. É fò-w aksèpté jan Bondyé ka sèvi èvè lèspri sen a-y pou i fè volonté a-y (Sòm 83:18 ; Matyé 28:18 ; Galat 5:22, 23 ; 2 Pyè 1:21).

24, 25. a) Ki signifikasyon a lèbatèm ? b) Ki kèsyon nou ké réponn adan dènyé chapit-la ?

²⁴ Lèbatèm ni on signifikasyon ki enpòwtan toubònman. Lè yo ka plonjé-w anba dlo-la, sé konsi ou mò parapòt a jan ou té ka viv avan, é kè ou pé ké viv konsa ankò. Sa ka montré kè ou ka abandonné vi-la ou té ka menné la. É lè ou ka sòti anba dlo-la, sa vlé di kè sé on nouvo vi ki ka koumansé ba-w, é aprézan ou ka fè volonté a Bondyé. Sa ka montré kè, konnyéla, ou pati pou sèvi Jéova. Pa oubliyé : a pa on nonm, a pa on òwganizasyon, a pa on aktivité ou ba-y vi a-w. Sé Jéova ou ba-y vi a-w !

²⁵ Ou fè Jéova on pwomès. Pwomès-lasa ké édé-w konsolidé bèl lanmityé-la ou ni èvè-y la piti-a-piti (Sòm 25:14). Sa pa vlé di kè dépi ou batizé ou sové. Lapòt Pòl ékri : « Kontinyé travay pou sové pwòp vi a zòt èvè krent é èvè onlo rèspé » (Filipyen 2:12). Lè ou pran lèbatèm, sé koumansé ou koumansé. Men si sé sa, kijan pou-w fè pou rété zanmi a Jéova ? Dènyé chapit-la ké réponn a kèsyon-lasa.