1, 2. Ki kèsyon onlo moun ka pozé-yo ?

 ON SIKLÒN ravajé enpé tililèt. On misyé tiré enpé koudfizi adan on légliz : i blésé é i tchouyé plizyè moun. On madanm mò pas i té ni on kansè : toulésenk timoun a-y ka touvé-yo san manman.

² Lè on katastròf oben on malè rivé, onlo moun ka mandé-yo : « Poukwa ni tousa soufrans é poukwa moun hay moun konsa ? » É-w menm, ès ou ja pozé-w kèsyon-lasa ?

3, 4. a) Ka Abakik mandé Jéova ? b) Ka Jéova réponn Abakik ?

³ Dapré sa Labib ka di, menm dé moun ki té ni on gran fwa pozé-yo kèsyon-lasa. Pa ègzanp, pwofèt Abakik mandé Jéova : « Poukwa ou ka lésé-mwen vwè mové biten ki ka fèt ? Poukwa ou ka lésé yonn maché asi lòt konsa ? Poukwa ni tout dèstriksyon-lasa é tout vyolans-lasa alantou an mwen ? Poukwa ni tousa babyé é tousa goumé ? » (Abakik 1:3).

⁴ Bondyé réponn Abakik. Adan Abakik 2:2 é 3, i pwomèt-li kè i ké ranjé sitiyasyon-la. Jéova enmé lézimen toubònman. Labib ka di : « I ka sousyé-y dè zòt » (1 Pyè 5:7). An réyalité, Bondyé hay vwè soufrans lontan pliski nou (Izayi 55:8, 9). Men alò, poukwa ni tousa moun ka soufè ?

5. a) Ka onlo rèlijyon ka di anrapò èvè soufrans ? b) Ka Labib ka aprann-nou asi soufrans ?

⁵ Byensouvan, ki labé, ki pastè, é menm moun ki ka anségné adan dòt rèlijyon, ka di kè lè on moun ka soufè, sé Bondyé ki vlé sa. Défwa yo ka di osi kè, pou chakmoun, Bondyé ka désidé tout biten alavans, menm sa ki mové, é kè nou pé’é jen konprann poukwa. Anplisdisa, lè on moun ka mò, yo ka di kè Bondyé pran-y pou i viv an syèl-la owa a-y. Pa ègzanp, lè sé on timoun ki mò, yo ka di kè Bondyé té bizwen on tizanj owa a-y. Men tousa sé mansonj. Jéova pa jen dèyè pon malè ki ka rivé. Labib ka di kè Bondyé pé pa fè ayen pa méchansté, ni ayen ki mal (Jòb 34:10).

6. Poukwa onlo moun ka di kè sé Bondyé ki dèyè tout soufrans ki asi latè ?

⁶ Pou onlo moun, sé Bondyé ki dèyè tout soufrans ki tini. Poukwa yo ka di sa ? Yo ka di sa, pas an tèt a yo, sé li ki mèt a mond-lasa. Men adan chapit 3 la, nou aprann kè chèf a mond-la sé Satan Lèdyab.

7, 8. Poukwa ni tousa soufrans asi latè ?

⁷ Labib ka di kè « lèmondantyé ka touvé-y anba pouvwa a méchan-la » (1 Jan 5:19). Satan, Chèf a mond-la, méchan toubònman. I « ka kouyonné lèmondantyé » (Révélasyon 12:9). É onlo moun ka imité-y. Sé poukwa ni tousa mansonj, tousa henn é tousa méchansté.

⁸ Nou ka soufè pou dòt rézon ankò. Lè Adan é Èv ba Jéova do, yo vin péchè é yo fè désandan a yo érité péché-la. Akòz dè péché-la, moun ka fè moun soufè.  Byensouvan, yonn vlé dominé asi lòt. Moun ka babyé, yonn ka britalizé lòt, é yo ka fè lagè (Éklézyas 4:1 ; 8:9). Délè, sé on évènman kè nou pa té prévwa ki ka fè-nou soufè (Éklézyas 9:11). On moun pé fè on aksidan, oben on malè pé rivé-y, pas i ka touvé-y on mové koté, a on mové moman.

9. Poukwa nou sèten kè Bondyé ni on bon rézon pou lésé soufrans diré konsa ?

⁹ Soufrans pa jen ka vin dè Jéova. A pa li ki ka fè si ni lagè, krim é vyolans. Lè ni katastròf natirèl kon tranmanndtè, siklòn oben dlo ka monté, a pa-y nonplis ki dèyè sa. Men, pétèt ou ka pozé-w kèsyon-lasa : « Si sé Jéova ki pli puisan adan tout linivè, poukwa i ka lésé tout sé malè-lasa rivé ? » Nou sav kè Bondyé enmé-nou, donk si i ka lésé moun soufè, sé kè i dwèt ni on bon rézon (1 Jan 4:8).

10. Ka Satan fè Adan é Èv kwè ?

¹⁰ Adan Jadendédèn-la, Satan Lèdyab badiné Adan é Èv. I fè Bondyé pasé pou on mové dirijan. É i di Adan é Èv kè Bondyé té ka privé-yo dè on bon biten. Satan fè-yo kwè kè i té ké dirijé plibyen ki Jéova é kè yo pa té bizwen Bondyé (Jénèz 3:2-5) (gadé nòt n^o 27 la, paj 222).

11. A ki kèsyon nou kay réponn ?

¹¹ Adan é Èv pa kouté Jéova é yo ba-y do. Pou yo, yo té ni dwa désidé yomenm dè sa ki byen é dè sa ki mal. Kijan Jéova té kay pwouvé kè sé rèbèl-la té ni tò, é kè i sav sa ki méyè pou nou ?

12, 13. a) Poukwa Jéova pa tchouyé Adan é Èv tousuit ? b) Poukwa Jéova pèwmèt Satan vin chèf a mond-la ? c) Poukwa i lésé lézimen dirijé-yo yomenm ?

 ¹² Jéova pa tchouyé Adan é Èv tousuit. I lésé-yo fè timoun. Konsa, tout désandan a Adan é Èv té ké pé chwazi yomenm kimoun yo vlé konm chèf. Bondyé té vlé latè ranpli èvè moun pawfè. É sé sa ki ké fèt, magré tout mannèv a Satan (Jénèz 1:28 ; Izayi 55:10, 11).

¹³ Lè Satan di kè Bondyé sé on mové chèf, plizyè milyon zanj té ka kouté (Jòb 38:7 ; Danyèl 7:10). Sé pousa Jéova ba Satan tan pou i té pwouvé si i té ni rézon akizé Bondyé. I ba lézimen tan osi pou yo té mèt gouvènman a yo an plas anba dominasyon a Satan. Sa té ké ba-yo lokazyon montré si yo kapab dirijé-yo yomenm, san èd a Bondyé.

14. Ni bon tibwen tan lézòm ka dirijé, ka nou ka konstaté ?

¹⁴ Ja ni plizyè milyé lanné lézòm ka éséyé dirijé-yo yomenm. Men yo pa ka rivé. Sé laprèv kè Satan sé on mantè. Lézòm bizwen èd a Bondyé. Pwofèt Jérémi té ni rézon lè i di : « O Jéova, an sav byen kè on nonm pé pa touvé chimen a-y tousèl. On nonm ka maché pa ni a désidé ki koté pou i mèt pyé a-y » (Jérémi 10:23).

15, 16. a) Poukwa Jéova ka lésé moun soufè konsa dépi tousa tan ? b) Poukwa Jéova pa réglé pwoblèm Satan mété asi latè ?

¹⁵ Poukwa Jéova ka lésé moun soufè konsa dépi tousa tan ? Poukwa i ka lésé malè rivé ? Fò té lésé tan pasé pou montré kè dominasyon a Satan pa bon.  Lézòm ja éséyé tout kalité gouvènman ki tini, men ponyonn pa pòté ayen dè bon. Menmsi lézòm ja fè onlo pwogré an syans é an tèknoloji, sé alè ki ni plis enjistis, plis mizè, plis krim é lagè. Sa ka montré kè lézòm pa kapab dirijé-yo yomenm, san Bondyé.

¹⁶ Jéova pa réglé pwoblèm Satan mété asi latè. Si i té fè sa, sé édé i té ké édé Satan dirijé mond-la. É asiré pa pétèt, i pé’é jen soutyenn dominasyon a Dyab-la ! Anplisdisa, lézimen té’é kwè kè yo kapab dirijé-yo yomenm, alòskè a pa vré. Jéova pé’é jen fè ayen pou soutyenn mansonj-lasa ! I pa jen ka manti (Ébré 6:18).

17, 18. Kijan Jéova ké réparé tout déga Satan fè ?

¹⁷ Satan ba Bondyé do, lézòm osi ba Bondyé do, é sa fè onlo déga. Èskè Jéova pé woumèt tout biten annòd ? Wi. Pou Bondyé, tout biten posib. Jéova sav a ki moman ké ni asé prèv kè tousa Satan di asi-y sé manti. Sé a moman-lasa i ké fè latè vin on paradi, kon i té prévwa odépa. Toutmoun ki adan sé tonm-la é ki an mémwa a Jéova ké wouviv (Jan 5:28, 29). Ponmoun pé’é jen tonbé malad ankò é ponmoun pé’é mò ankò. Jézi ké réparé tout déga Satan fè. Jéova ké sèvi èvè Jézi pou « détwi travay a Dyab-la » (1 Jan 3:8). Annatandan, nou byen kontan Bondyé ka pran pasyans èvè nou. Sa ka ban-nou lokazyon aprann konnèt-li é désidé si nou vlé-y konm Chèf (li 2 Pyè 3:9, 10). É lè nou ka soufè, i ka édé-nou sipòté (Jan 4:23 ; li 1 Korentyen 10:13).

¹⁸ Jéova pa ka fòsé ponmoun chwazi-y konm Chèf. I fè-nou on bèl kado : nou lib dè chwazi sa  nou vlé fè. An-nou gadé kijan nou pé itilizé bèl kado-lasa.

19. Ki bèl kado Bondyé fè-nou ? É poukwa nou dwètèt aprésyé kado-lasa ?

¹⁹ Libèté-la Jéova ban-nou la pou nou désidé dè noumenm, sé on kado èstraòwdinè. Sa ka fè on gwo diférans ant nou é sé zannimo-la. Yo pwogramé pou yo fè dé biten natirèlman. Yo pa kapab désidé si on biten byen ou mal. Pawkont nou, nou pé chwazi ki jan dè vi nou vlé ni, é nou pé désidé dè fè Jéova plézi (Pwovèb 30:24-28). Nou pa fèt menmjan ki on machin nonplis. On machin ka fè sa ou ka mandé-y fè. Men nou, nou lib dè chwazi zanmi an nou, ki jan dè moun nou vlé divini, sa nou vlé fè adan lavi. Jéova vlé kè vi an nou bèl.

20, 21. Ki méyè chwa ou pé fè jòdila ?

²⁰ Jéova vlé nou enmé-y (Matyé 22:37, 38). I kon on papa ki kontan lè timoun a-y ka di-y èvè tout tchè a-y, san ponmoun fòsé-y, « Papa, an enmé-w ». Jéova lésé-nou lib dè désidé si nou ké sèvi-y ou non. Satan é Adan é Èv désidé pa sèvi Jéova. É vou, kijan ou ké sèvi èvè libèté-la Bondyé ba-w la ?

²¹ Plizyè milyon moun chwazi kouté Jéova olyé yo kouté Satan. Vou osi, itilizé libèté-la ou ni la pou sèvi Jéova (Pwovèb 27:11). Adan mond nouvo la, Jéova ké fè tout soufrans disparèt. Ka ou pé fè pou-w viv adan mond nouvo lasa ? Ou ké touvé répons-la adan pwochen chapit-la.