1. Ka Bondyé vlé pou limanité ?

BONDYÉ prévwa onlo bèl biten pou limanité (gadé nòt n^o 6 la, paj 208). I kréyé prèmyé misyé-la é prèmyé madanm-la, Adan é Èv, pou yo té viv adan on bèl jaden. Sa i té vlé sé kè yo fè timoun, kè yo fè tout latè vin on paradi é kè yo okipé dè sé bèt-la (Jénèz 1:28 ; 2:8, 9, 15). Bondyé pa chanjé lidé. Jiskaprézan sé sa i vlé.

2. a) Kijan nou fè sav kè Jéova ké fè tousa i prévwa ? b) Dapré sa Labib ka di, kimoun ki ké viv asi latè pou touttan ?

² Ès ou ka di kè, on jou, noutout ké viv adan on paradi ? Jéova di : « An di sa [...], an ké fè-y osi » (Izayi 46:9-11 ; 55:11). Wi, i ké fè tousa i prévwa, é ayen pé’é pé arété-y. I èspliké kè a pa « pou ayen » i kréyé latè (Izayi 45:18). I vlé moun viv toupatou si latè. Ki jan dè moun ? É konmen tan i vlé yo rété asi latè ? Labib ka ban-nou répons-la : « Moun ki jis [sa ki ka kouté Bondyé], latè sé ké ta yo, é yo ké viv anlè-y pou touttan » (Sòm 37:29 ; Révélasyon 21:3, 4).

3. Lè nou ka vwè kijan noutout ka tonbé malad é kijan noutout ka mò, ki kèsyon nou pé pozé-nou ?

³ Alèkilé, noutout ka tonbé malad é noutout ka mò. Adan onlo péyi, ni lagè é yonn ka tchouyé lòt. Men, a pa sa Bondyé té vlé. Alò, ka ki pasé ? Sé yenki adan Labib ou ka touvé répons-la.

4, 5. a) Kimoun ki sèvi èvè on sèpan pou-y té palé ba Èv ? b) Kijan on moun ki té onèt ka fè vin vòlè ?

⁴ Labib ka di kè Bondyé ni on lènmi. Yo ka kriyé-y « Dyab » é « Satan » (gadé nòt n^o 7 la, paj 208). Satan sèvi èvè on sèpan pou-y té palé ba Èv adan Jadendédèn-la (Révélasyon 12:9 ; Jénèz 3:1). I fè-y kwè kè sé sèpan-la ki té ka palé ba-y.

⁵ Men, kimoun ki kréyé Satan Lèdyab ? Ès sé Bondyé ? Non ! Lè Bondyé té ka préparé latè pou Adan é Èv, té ni onlo zanj an syèl-la (gadé nòt n^o 8 la, paj 210). Yonn adan yo touné an chimen é i fin pa vin Dyab-la (Jòb 38:4, 7). Men kijan sa fè rivé ? An-nou pran on ègzanp : Kijan on moun onèt ka fè vin vòlè ? On moun pa ka fèt vòlè. Men vinvwè on jou i touvé-y anvi ni on biten ki pa ta-y, é i ka kontinyé sonjé biten-lasa. Pli i sonjé-y, pli i anvi ni-y. Aprésa, on okazyon prézanté-y é i volé biten-la. I chanjé : i fin pa vin on vòlè (li Jak 1:13-15).

6. Kijan on zanj fè vin lènmi a Bondyé ?

⁶ Sé sa ki rivé zanj-la nou palé dè-y la. Apré Jéova kréyé Adan é Èv, i di-yo fè timoun é « ranpli latè » (Jénèz 1:27, 28). A moman-lasa, pétèt zanj-la mété-y ka réfléchi é i di an tèt a-y : « Olyé tout sé moun-lasa adoré Jéova, yo té’é pé adoré-mwen plito ! » Pli i rété ka réfléchi asi sa, pli i té vlé sa Bondyé ni. I té vlé lézòm adoré-y. Alò i manti ba Èv é i rivé badiné-y (li Jénèz 3:1-5). Sé konsa i vin Satan Lèdyab, on lènmi a Bondyé.

7. a) Poukwa Adan é Èv mò ? b) Poukwa nou ka vyéyi é nou ka mò ?

⁷ Bondyé té entèwdi Adan é Èv manjé fwi a on pyébwa ki té an jaden-la. I di-yo kè si yo manjé  fwi-lasa, yo ké mò. Men Adan é Èv pa kouté Jéova é yo manjé fwi-la (Jénèz 2:17 ; 3:6). Yo péché kont Jéova (gadé nòt n^o 9 la, paj 210). É yo fin pa mò, kon Jéova té di (Jénèz 3:17-19). Piskè timoun a Adan é Èv fèt èvè péché-la adan yo, yo osi yo mò (li Women 5:12). Pou konprann poukwa timoun a Adan é Èv té péchè, an-nou pran on ègzanp : Si ou ka fè gato adan on moul kalbosé, tout sé gato-la ké sòti èvè on bòs kon ta moul-la. Lè Adan dézobéyi Jéova, péché-la antré adan-y. Konm nou sé désandan a Adan, noutout péchè. Adan on sans, nou ni on « bòs » kon ta Adan. É piskè nou péchè, nou ka vyéyi é nou ka mò (Women 3:23).

8, 9. a) Ka Satan té vlé fè Adan é Èv kwè ? b) Poukwa Jéova pa tchouyé sé rèbèl-la tousuit ?

⁸ Satan komansé lévé moun kont Jéova lè i pousé Adan é Èv dézobéyi. I té vlé fè-yo kwè kè Jéova té ka manti ba yo, kè a pa té on bon dirijan, kè i pa té vlé sa ki mèyé pou yo. Satan té ka di kè lézòm pa bizwen Bondyé di-yo sa yo dwètèt fè. I di osi kè sé Adan é Èv yomenm ki té dwèt désidé si tèl ou tèl biten byen ou mal. Kijan Jéova té kay réyaji parapòt a sa ? I té pé tchouyé sé rèbèl-la onfwa-onfwa pou i té fin èvè sa. Men, ès sa té ké pwouvé kè Satan té ka manti ? Non !

⁹ Donk Jéova pa tchouyé sé rèbèl-la tousuit. I ba-yo on sèwten tan pou yo té dirijé-yo yomenm. Sa té ké montré, on mannyè ki klè, kè Satan sé on mantè é kè Jéova sav byen ka ki méyè pou nou. Nou ké wouvin asi sa tibwen plis an détay, adan chapit 11 la. Men vou, ka ou ka pansé dè désizyon-la Adan é Èv pran la ? Ès yo té dwèt kwè Satan é dézobéyi Jéova ? Tousa yo té  ni, sé Jéova ki té ba-yo-y. Jéova té ba-yo on vi pawfè, on bèl ti koté pou yo rété, é on travay agréyab. Satan, li, pa jen fè ayen dè bon pou yo. Si ou té an plas a yo, ka ou té’é fè ?

10. Douvan ki chwa enpòwtan noutout ka touvé-nou ?

¹⁰ Jòdijou, menmjan ki Adan é Èv, noutout ni on  chwa a fè. Vi an nou ka dépann dè chwa-la nou ké fè la. Nou pé chwazi Jéova konm chèf é lésé-y dirijé-nou, konsa nou ké montré kè Satan sé on mantè. Oben nou pé chwazi Satan konm chèf (Sòm 73:28 ; li Pwovèb 27:11). Asi latè, sé yenki on tikrazi moun ki ka fè sa Bondyé vlé. An réyalité, a pa Bondyé ki ka dirijé mond-la nou ka viv adan-y la. Men si a pa Bondyé, sé kimoun ?

11, 12. a) Ka Satan pwopozé Jézi ? É ka sa ka aprann-nou ? b) Ki vèwsé an Bib-la ka montré kè sé Satan ki ka dirijé mond-lasa ?

¹¹ Jézi té sav kimoun ki ka dirijé mond-la. On jou, Satan « fè-y vwè tout wayòm [gouvènman] a mond-la èvè glwa a yo ». Apré, mi sa i pwomèt-li : « An ké ba-w tout sé biten-lasa si ou tonbé [si ou mété-w ajounou] é si ou fè on jès pou montré ou ka adoré-mwen » (Matyé 4:8, 9 ; Lik 4:5, 6). Réfléchi : Èskè Satan té’é pé ba Jézi tout sé gouvènman-lasa si a pa té ta-y ? Non. Donk, tout gouvènman ki ni an mond-lasa, sé ta Satan.

¹² Pétèt ou ka di-w : « Men kanmenm, Satan pé pa mèt a mond-la ! A pa Jéova, Dyé Toupuisan la, ki kréyé linivè alò ? » (Révélasyon 4:11). Sé vré, Jéova sé Kréyatè-la. Men sa Jézi di la té klè : i kriyé Satan « chèf a mond-lasa » (Jan 12:31 ; 14:30 ; 16:11). Lapòt Pòl kriyé Satan « dyé a mond-lasa » (2 Korentyen 4:3, 4). É lapòt Jan maké : « Lèmondantyé ka touvé-y anba pouvwa a méchan-la (sé méchan-la ki ka dirijé-y) » (1 Jan 5:19).

13. Poukwa nou bizwen on mond nouvo ?

¹³ Pli nou kay, pli mond-la ka vin danjéré.  Toupatou, ni lagè, vyolans, malonnètté é ipokrizi. Lézòm ka pòté bon mannèv pou yo réglé sé pwoblèm-lasa, men yo pa ka rivé about. Talè, adan on lagè non a-y sé Awmagédon, Bondyé ké détwi mond méchan-lasa. An plas a-y i ké mèt on mond nouvo ki ni jistis adan-y (Révélasyon 16:14, 16) (gadé nòt n^o 10 la, paj 210).

14. a) Kimoun Jéova chwazi konm Wa a wayòm a-y ? b) Ka Labib anonsé anrapò èvè Jézi ?

¹⁴ Kijan tousa ké fèt ? Sé grasa wayòm a Bondyé, kivédi gouvènman a-y ki an syèl-la (gadé nòt n^o 11 la, paj 211). Jéova chwazi Jézikri konm Wa a wayòm a-y. Ni plizyè milyé lanné dè sa, Labib té anonsé kè Jézi té ké on prens, « Prens a lapé », é kè gouvènman a-y pé ké janmé disparèt (Izayi 9:6, 7). Dayè, Jézi aprann disip a-y priyé pou gouvènman-lasa. I di-yo priyé Bondyé konsa : « Fò wayòm a-w vini. Fò volonté a-w fèt, asi latè kon an syèl-la » (Matyé 6:10). Kon nou ké vwè adan chapit 8 la, wayòm a Bondyé ké pran plas a tout gouvènman ki ni asi latè (li Danyèl 2:44). Aprésa, i ké fè latè vin on bèl paradi.

15. Ka « nouvo tè[-la] » yé ?

¹⁵ Kon Bondyé ka pwomèt-nou : « Nou ka atann [...] on nouvo syèl é on nouvo tè, é adan yo toujou ké ni lajistis » (2 Pyè 3:13 ; Izayi 65:17). Défwa, lè Labib ka palé dè « latè », sé pou palé dè moun ki ka viv asi latè (Jénèz 11:1). Donk, « nouvo tè[-la] », ki jis, sé tout moun asi latè ki ka obéyi Bondyé é ki ka rèsèvwa bénédisyon a-y.

16. a) Ki kado èstraòwdinè Bondyé ké ba moun ki ké viv adan paradi-la ? b) Ka nou dwètèt fè pou nou rèsèvwa kado-lasa ?

 ¹⁶ Jézi pwomèt kè moun ki ké viv adan mond nouvo la ké rèsèvwa « lavi étèwnèl » (Mawk 10:30). Ka pou nou fè pou nou rèsèvwa kado-lasa ? Pou ni répons-la, souplé, li Jan 3:16 é Jan 17:3. Labib ka di-nou kijan lavi ké yé asi latè, adan paradi-la. An-nou gadé sa.

17, 18. Toupatou si latè, lézòm ké ka viv anpé é ansékirité. Kijan nou fè sav sa ?

¹⁷ Laméchansté, lagè, lakriminalité, lavyolans ké disparèt. Pé ké ni ponmoun méchan asi latè ankò (Sòm 37:10, 11). Toutkoté, Bondyé ké « fè lagè arété » on fwa pou tout (Sòm 46:9 ; Izayi 2:4). Latè ké plen moun ki enmé Bondyé é ki ka obéyi-y. Ké toujou ni lapé asi latè (Sòm 72:7).

¹⁸ Toutmoun ké santi-yo ansékirité. Lè sé Izraélit-la té ka kouté Bondyé, yo té ansékirité pas Bondyé té ka pwotéjé-yo (Lévitik 25:18, 19). Adan paradi-la, nou pé ké pè ayen, ni ponmoun. Nou ké toujou santi-nou ansékirité (li Izayi 32:18 é Miché 4:4).

19. Poukwa nou pé sèten ké ni manjé pou tann-é-konprann an paradi-la ?

¹⁹ Ké ni manjé agogo. Labib ka di kè, toupatou si latè, ké ni manjé pou tann-é-konprann, jous « antèt a montangn » (Sòm 72:16). Jéova, « Bondyé an nou, ké béni-nou » é latè ké pwodui onlo biten pou nou manjé (Sòm 67:6).

20. Kijan nou fè sav kè latè ké vin on paradi ?

²⁰ Tout latè ké vin on paradi. Toutmoun ké ni on bèl kaz, on bèl jaden (li Izayi 65:21-24 é Révélasyon 11:18). Kon Jadendédèn-la té bèl, sé konsa osi tout latè  ké bèl toubònman. Jéova ké toujou ban-nou tousa nou bizwen. Labib ka di, an palan dè Jéova : « Ou ka wouvè men a-w é ou ka rasazyé anvi a tousa ki ka viv » (Sòm 145:16).

21. Kijan nou fè sav kè lézòm ké viv anpé èvè lézannimo ?

²¹ Lézòm é lézannimo ké viv anpé. Pon bèt pé ké ataké ponmoun ankò. Sé timoun-la ké pé ay owa nenpòt ki bèt, menm owa sa ki danjéré konnyéla la (li Izayi 11:6-9 é Izayi 65:25).

22. Ka Jézi ké fè pou sa ki malad ?

²² Ponmoun pé ké malad. Lè Jézi té asi latè, i géri onpakèt moun (Matyé 9:35 ; Mawk 1:40-42 ; Jan 5:5-9). Men, antankè Wa a wayòm a Bondyé, i ké géri toutmoun. Si ni on pawòl ponmoun pé ké jen di ankò, sé : « An malad » (Izayi 33:24 ; 35:5, 6).

23. Ka Bondyé ké fè pou moun ki mò ?

²³ Moun ki mò ké wouviv. Bondyé pwomèt kè i ké résisité milyon é milyon moun. Labib ka di : « Ké ni on rézirèksyon ki pou moun jis, ki pou moun ki pa jis » (li Jan 5:28, 29 ; Akt 24:15).

24. Ès ou té ké enmé viv adan paradi-la ? Poukisa ?

²⁴ Noutout ni on chwa a fè. Nou pé chwazi dè aprann konnèt Jéova é dè fè sa i ka mandé-nou. Oben nou pé chwazi dè viv vi an nou jan nou vlé. Si nou chwazi dè fè sa Jéova ka di-nou, dèmen, vi an nou ké bèl toubònman. On jou, alòskè Jézi té kay mò, on misyé mandé-y dè pa oubliyé-y lè i ké résisité. Jézi fè-y on pwomès, i di-y : « Ou ké èvè mwen adan paradi-la » (Lik 23:43). Adan sé chapit-la ki ka vin la, nou ké aprann plis biten asi Jézi é nou ké vwè kijan i ké réyalizé tout bèl pwomès Bondyé fè-nou.