1. Nou kay palé dè on priyè onlo moun konnèt. Kilès la ?

 NI PLIZYÈ milyon moun ki konnèt lè Notrè-Pè. Jézi sèvi èvè priyè-lasa pou i té aprann disip a-y priyé. Ka Jézi mandé an priyè-lasa ? É poukwa nou ka ba priyè-lasa onlo valè ?

2. Jézi aprann-nou priyé pou twa biten enpòwtan. Kilès ?

² Jézi di : « Mi sé konsa pou zòt priyé : “Pap’an nou ki an syèl-la, fò non a-w vin sen. Fò wayòm a-w vini. Fò volonté a-w fèt asi latè, kon an syèl-la” » (li Matyé 6:9-13). Poukwa Jézi aprann-nou priyé pou sé twa biten-lasa ? (Gadé nòt n^o 20 la, paj 216).

3. Ka nou bizwen sav asi wayòm a Bondyé ?

³ Nou aprann kè non a Bondyé sé Jéova. Nou vwè osi ka Bondyé ni lentansyon fè pou limanité é pou latè. Men lè Jézi di : « Fò wayòm a-w vini », ka i té vlé di ? Adan chapit-lasa, nou ké vwè ka wayòm a Bondyé yé, ka wayòm-lasa ké fè, é kijan i ké fè non a Bondyé vin sen.

4. Ka wayòm a Bondyé yé, é kimoun ki Wa a-y ?

⁴ Jéova mèt on gouvènman anplas an syèl-la. Labib ka kriyé gouvènman-lasa wayòm a Bondyé. É Wa-la Jéova chwazi la, sé Jézi. Jézi sé « Wa a sa ki ka  dirijé antankè wa é Ségnè a sa ki ka dirijé antankè ségnè » (1 Timoté 6:15). Èvè pouvwa-la i ni la, Jézi pé fè onlo bon biten, pliski nenpòt ki chèf politik ki asi latè. É menm ou té’é sanblé-yotout, i pli fò ki yo.

5. a) Ola wayòm a Bondyé yé ? b) Asi kibiten wayòm a Bondyé ké dominé ?

⁵ Jéova résisité Jézi, é 40 jou apré, Jézi rètouné an syèl-la. Apré, Jéova fè-y vin Wa a Wayòm-la (Akt 2:33). Labib ka di kè wayòm a Bondyé sé on « wayòm [...] ki an syèl-la » (2 Timoté 4:18). É toupannan i an syèl-la, i ké dirijé latè (Révélasyon 11:15).

6, 7. Poukwa nou pé pa konparé Jézi èvè pondòt wa asi latè ?

⁶ Pa ni mwayen konparé Jézi èvè pondòt wa asi latè. Dayè, Bib-la ka di-nou kè sé-y tousèl ki « imòwtèl [i pé pa mò] » (1 Timoté 6:16). Tout sé chèf politik la ka fin pa mò on jou, men li Jézi pé ké jen mò. Donk, tousa i ké fè ban nou ké diré pou touttan.

⁷ Adan Labib, Bondyé ka pwomèt-nou kè Jézi ké on Wa jis é plen lanmou : « Lèspri a Jéova ké pozé asi-y, lèspri pou ni sajès é entélijans, lèspri pou i bay bon konsèy é pou ni fòs, lèspri pou ni konésans é pou krenn Jéova ; é plézi a-y sé ké krenn Jéova. » I pé ké jijé yenki sèlon sa zyé a-y vwè, ni dapré sa i ké tann-di. « I ké jijé lépiti [lémaléré] on mannyè ki jis » (Izayi 11:2-4). Ou pa té’é enmé sé on wa kon tala ki dirijé latè ?

8. Kijan nou fè sav kè Jézi pé ké tousèl ka dirijé ?

⁸ Bondyé chwazi sèwten moun asi latè pou vin wa an syèl-la èvè Jézi. Lapòt Pòl di Timoté : « Si nou  kontinyé tchenbé, nou ké dirijé èvè-y osi antankè wa » (2 Timoté 2:12). Konmen moun ké wa ansanm èvè Jézi ?

9. a) Konmen wa ké dirijé èvè Jézi ? b) Dépi kitan Jéova komansé chwazi sé wa-lasa ?

⁹ Adan chapit 7 a liv-lasa, nou palé dè sa Lapòt Jan vwè adan on vizyon. I vwè Jézi Wa an syèl-la èvè 144 000 dòt wa. Kimoun sé wa-lasa yé ? Jan di kè yo ni « non a-y [non a Jézi] é non a Papa-y maké asi fon a yo ». É aprésa i di : « Sé séla ki ka kontinyé suiv Timouton-la [Jézi] kèlkèswa la i kay. Yo achté-yo pawmi lézòm » (li Révélasyon 14:1, 4). Sé 144 000 la sé dé krétyen fidèl kè Bondyé chwazi pou yo « dirijé latè antankè wa » èvè Jézi. Lè yo mò, Bondyé ka résisité-yo an syèl-la (Révélasyon 5:10). Sé dépi an tan a lézapòt Jéova komansé chwazi krétyen ki fidèl pou fè pati a sé 144 000 wa-lasa.

10. Jéova prévwa kè Jézi é sé 144 000 la dirijé latè. Poukwa sa ka montré kè i enmé-nou ?

¹⁰ Tèlman Jéova enmé-nou, i chwazi moun kon noumenm pou vin wa èvè Jézi. Jézi ké on bon dirijan. I pé konprann-nou pas onlè, li osi té on nonm é i konnèt ka ki soufrans. Pòl di kè Jézi ka pran penn an nou. I di osi kè Jézi pé konprann féblès an nou é kè « yo mété[-y] a léprèv an tout sans, kon nou » (Ébré 4:15 ; 5:8). Sé 144 000 la osi pé konprann pa ki difikilté nou ka pasé : menmjan ki nou, yo lité kont féblès a yo é yo tonbé malad. Donk nou pé sèten kè Jézi é sé 144 000 la ké konprann sa nou ka rèsanti é ki pwoblèm nou ka rankontré.

11. Jézi aprann disip a-y priyé pou volonté a Bondyé fèt an syèl-la. Poukisa ?

¹¹ Jézi aprann disip a-y priyé pou volonté a Bondyé fèt an syèl-la. Poukisa ? Adan chapit 3 la, nou aprann kè Satan viré kont Jéova. Aprésa, pannan on sèwten tan, Jéova pèwmèt kè Satan èvè sélézòt zanj rèbèl la (sé démon-la) rété an syèl-la. Kifè, pannan tout tan-lasa, a pa toutmoun an syèl-la ki té ka fè volonté a Bondyé. Adan chapit 10 la, nou ké aprann plis biten asi Satan é asi sé démon-la.

12. Révélasyon 12:10 ka palé dè dé évènman enpòwtan. Kilès ?

¹² Sèlon Labib, Jézi té ké vin Wa é, on ti moman apré, i té ké fè lagè kont Satan (li Révélasyon 12:7-10 a). Révélasyon 12:10 ka palé dè dé évènman enpòwtan : 1) Wayòm a Bondyé, kè Jézi ka dirijé, ka komansé gouvèné. 2) Yo ka fè Satan sòti an syèl-la é yo ka jété-y asi latè. Sé dé évènman-lasa ja fèt. Nou ké wouvin asi sa plita.

13. Lè yo fè Satan sòti an syèl-la, ka ki pasé ?

¹³ Bib-la ka di kè, lèwvwè yo fè Satan é sé démon-la sòti an syèl-la, sé zanj fidèl la pa té pé pi kontan ki sa. Labib ka di : « Zò pé kontan toubònman, syèl, é zòt ki ka rété adan-y ! » (Révélasyon 12:12). Konnyéla, an syèl-la, toutmoun ka viv dan lapé é linité pas yotout ka fè volonté a Bondyé.

14. Dépi yo mété Satan dèwò an syèl-la, ka ki ka pasé asi latè ?

 ¹⁴ Asi latè, sitiyasyon-la pa menm biten ditou : lézòm ka sibi onlo malè. Poukwa ? « Pas Dyab-la désann » é i « anrajé, pas i sav sé yenki on titak tan ki ka rété-y » (Révélasyon 12:12). Satan kòlè toubònman. Yo fè-y sòti an syèl-la, é i sav kè yo pé ké tadé a détwi-y. Donk, i ka fè tousa i pé pou nou ni pwoblèm é pou nou soufè.

15. Ki volonté a Bondyé pou latè ?

¹⁵ Volonté a Bondyé pou latè pa chanjé. Sa Jéova vlé sé kè dé moun pawfè viv pou touttan adan on paradi asi latè (Sòm 37:29). Men kijan Wayòm-la ké fè ansòt kè volonté a Bondyé fèt ?

16, 17. Adan Danyèl 2:44, ka nou ka aprann asi wayòm a Bondyé ?

¹⁶ Mi sa Danyèl 2:44 ka di : « An tan a sé wa-lasa, Dyé a syèl-la ké mété on wayòm anplas, on wayòm yo pé ké janmé détwi. É wayòm-lasa pé ké pasé an men a pondòt pèp. I ké krazé tout sé wayòm-lasa é i ké fin èvè yo, é sé li tousèl ki ké rété pou touttan. » Ka pwofési-lasa ka aprann-nou asi Wayòm a Bondyé ?

¹⁷ 1) Wayòm a Bondyé té ké komansé gouvèné « an tan a sé wa-lasa ». Sa vlé di kè, lè wayòm a Bondyé té ké komansé dominé, té’é ka rété dòt gouvènman asi latè toujou. 2) Wayòm a Bondyé ké la pou touttan é pondòt gouvènman pé’é jen pran plas a-y. 3) Ké ni on lagè ant wayòm a Bondyé é tout sélézòt gouvènman-la. É sé wayòm a Bondyé ki ké gangné. A moman-lasa, onsèl gouvènman ké ka dirijé tout latè : sé méyè la nou té’é pé ni la.

18. Ké ni on lagè ant wayòm a Bondyé é tout sélézòt gouvènman-la. Ki non a lagè-lasa ?

 ¹⁸ Kijan wayòm a Bondyé ké rivé dirijé tout latè ? Ké ni on lagè ant wayòm a Bondyé é tout sélézòt gouvènman-la. Non a lagè-lasa sé Awmagédon (gadé nòt n^o 10 la, paj 210). Ka ki ké fèt tibwen avan ? Sé démon-la ké rivé badiné « sé wa-la ki asi tout latè, pou sanblé-yo pou lagè a gran jou a Bondyé Toupuisan la » (Révélasyon 16:14, 16). Tout sélézòt gouvènman-la ké goumé èvè wayòm a Bondyé.

19, 20. Poukwa nou bizwen wayòm a Bondyé ?

¹⁹ Poukwa nou bizwen Wayòm a Bondyé ? Pou omwen twa rézon. 1) Nou bizwen wayòm a Bondyé pas noutout péchè é akòz dè sa, nou ka tonbé malad é nou ka mò. Men Bib-la ka di kè, lè wayòm a Bondyé ké ka dirijé latè, nou ké viv pou touttan. Jan 3:16 ka di : « Tèlman Bondyé té enmé lèmond, i bay sèl Gason a-y, pou tout moun ki ka montré yo ni lafwa adan-y pa détwi men ni lavi étèwnèl. »

²⁰ 2) Nou bizwen wayòm a Bondyé pas nou lantouré èvè moun méchan. Onlo moun ka manti é yo madragè. Ni sa ki ka menné on vyé vi oben ki ka viv dan lè péché. Nou pé pa anpéché-yo fè sé mové biten-lasa. Men lè Awmagédon ké fèt, Bondyé ké détwi tousa ki pa vlé ranjé kò a yo (li Sòm 37:10). 3) Nou bizwen wayòm a Bondyé pas ni onlo gouvènman ki pé pa fè gran zafè pou pèp a yo, é ni sa ki ka fè onlo atrosité oben ki malonnèt. Yo pa ka  ankourajé sé moun-la kouté Bondyé. Bib-la ka di kè lòm toujou dominé lòm pou fè-y ditò (Éklézyas 8:9).

21. Kijan Wayòm-la ké fè ansòt kè volonté a Bondyé fèt asi latè ?

²¹ Apré Awmagédon, Wayòm-la ké fè ansòt kè volonté a Bondyé fèt asi latè. Pa ègzanp, i ké fè Satan é sé démon-la disparèt (Révélasyon 20:1-3). É anfinaldikont, ponmoun pé ké tonbé malad é ponmoun pé ké mò ankò. Grasa ranson-la, tousa ki ké rété fidèl a Bondyé ké viv pou touttan adan paradi-la (Révélasyon 22:1-3) (gadé nòt n^o 21 la, paj 216). Wayòm-la ké fè non a Bondyé vin sen. Sa vlé di kè, lè i ké ka dirijé latè, toutmoun ké onoré non a Bondyé : ponmoun pé ké ni di, ni fè ayen pou sali non a Jéova.

22. Jézi pa vin Wa lè i té asi latè ni lè i té sòti résisité. Kijan nou fè sav sa ?

²² Mi sa Jézi aprann disip a-y mandé adan priyè a yo : « Fò wayòm a-w vini. » Donk wayòm a Bondyé té ké vin plita. Adan on prèmyé tan, fò Jéova té mèt  Wayòm-la anplas é fò-y té fè Jézi vin Wa a Wayòm-la. Lè Jézi rètouné an syèl-la, ès i vin Wa tousuit ? Non. Fò-y té atann. Kijan nou fè sav sa ? Tibwen tan apré Jézi résisité, Pyè é Pòl di kè Sòm 110:1 té ka palé dè Jézi. Adan pwofési-lasa, Jéova mandé Jézi « sizé adwat [a-y] » é atann « jiskatan [i] mèt lènmi [a-y] » anba pyé a-y (Akt 2:32-35 ; Ébré 10:12, 13). Konmen tan Jézi rété ka atann ?

23. a) Kitan Jézi vin Wa a wayòm a Bondyé ? b) Ka nou ké vwè adan chapit-la ki ka vin la ?

²³ Plizyè lanné avan 1914, déotwa krétyen ki té vlé konnèt lavérité mèt-yo ansanm pou étidyé sé pwofési-la ki an Bib-la, é sa édé-yo konprann kè 1914 té ké on lanné enpòwtan (gadé nòt n^o 22 la, paj 217). Dépi 1914, sa ki ka fèt toupatou asi latè ka montré kè yo té ni rézon. Sé lanné-lasa Jézi vin Wa (Sòm 110:2). Tibwen tan apré, yo jété Satan asi latè. Aprézan, « sé yenki on titak tan ki ka rété-y » (Révélasyon 12:12). Adan chapit-la ki ka vin la, nou ké vwè kè nou adan « titak tan »-lasa. Nou ké vwè osi kè talè, grasa Wayòm-la, volonté a Bondyé ké fèt asi latè.