1. Poukwa nou dwètèt konnèt kimoun sé zanj-la yé ?

 JÉOVA anvi nou konnèt fanmi a-y. É adan fanmi a Jéova, ou ka touvé lézanj (gadé nòt n^o 8 la, paj 210). Adan Bib-la, yo ka kriyé-yo « gason a Bondyé » (Jòb 38:7). Ka sé zanj-la ka fè ? Kijan yo édé sèwten moun an tan lontan ? Jòdijou, ès yo pé édé-nou ?

2. a) Kimoun ki kréyé sé zanj-la ? b) Konmen zanj ki tini ?

² Pou komansé, fò-nou sav kè sé Jéova ki kréyé sé zanj-la. Prèmyé zanj i kréyé sé Jézi. Aprésa i « kréyé tout sélézòt biten-la an syèl-la é asi latè », sèlon sa Kolosyen 1:16 ka di. Konmen zanj i kréyé ? Labib ka di kè ni plizyè milyon zanj (Sòm 103:20 ; Révélasyon 5:11).

3. Ka Jòb 38:4 a 7 ka aprann-nou asi lézanj ?

³ Labib ka aprann-nou osi kè Jéova kréyé sé zanj-la avan i kréyé latè. Lè sé zanj-la vwè latè, kijan yo santi-yo ? Lè nou ka li liv a Jòb, nou ka vwè kè yo té kontan toubònman. Sété on fanmi byen soudé ki té ka sèvi Jéova ansanm-ansanm (Jòb 38:4-7).

4. Kijan nou fè sav kè sé zanj-la toujou entérésé-yo a moun ki asi latè ?

⁴ Sé zanj-la toujou entérésé-yo a moun ki asi latè é a sa Bondyé vlé fè pou latè é pou lézimen (Pwovèb 8:30, 31 ; 1 Pyè 1:11, 12). Lè sé zanj-la vwè kè Adan é  Èv ba Bondyé do, sa dwèt fè-yo lapenn toubònman. É jòdijou, yo dwèt pli tris ankò lè yo ka vwè kè on majorité a moun pa ka kouté Jéova. Men lè on moun ka règrété péché i fè, lè i ka chanjé konpòwtèman é lè i ka wouvin an bra a Jéova, sé zanj-la kontan toubònman (Lik 15:10). Yo paré pou édé nenpòt ki sèwvitè a Bondyé. Jéova ka itilizé-yo pou édé sèwvitè a-y ki asi latè é pou pwotéjé-yo osi (Ébré 1:7, 14). An-nou pran déotwa ègzanp.

5. Ka sé zanj-la fè pou édé sèwvitè a Bondyé ?

 ⁵ Avan i té détwi Sodòm é Gomò, Jéova voyé dé zanj pou sové Lòt é fanmi a-y (Jénèz 19:15, 16). Plizyè lanné apré, yo jété pwofèt Danyèl adan on gran tou plen liyon. Men ayen pa rivé-y, pa menm on ti griji, pas « Bondyé [...] voyé zanj a-y é i fèmé gèl a sé liyon-la » (Danyèl 6:22). Kèktan apré, lè lapòt Pyè té lajòl, Jéova voyé on zanj pou libéré-y (Akt 12:6-11). Plizyé zanj vin édé Jézi osi lè i té asi latè. Pa ègzanp, apré i batizé, ni zanj ki vin okipé dè-y (Mawk 1:13). É jis avan i mò, on zanj vin ba-y fòs (Lik 22:43).

6. a) Kijan nou fè sav kè sé zanj-la ka kontinyé édé sèwvitè a Jéova ? b) A ki kèsyon nou kay réponn konnyéla ?

⁶ Aprézan, zanj pa ka parèt douvan moun ankò. Men Bondyé toujou ka itilizé-yo pou édé sèwvitè a-y. Labib ka di : « Zanj a Jéova ka kanpé alantou a moun ki vé pa fè [Bondyé] lapenn, é i ka sové-yo » (Sòm 34:7). Poukwa nou bizwen pwotèksyon ? Pas lènmi an nou puisan é yo vlé fè-nou ditò. Kimoun yo yé ojis ? Ola yo sòti ? Ki mannèv yo ka pòté pou yo pé sa fè-nou ditò ? Pou réponn a sé kèsyon-lasa, an-nou gadé ka ki pasé on ti moman apré Bondyé kréyé Adan é Èv.

7. Poukwa Satan ka chèché tronpé lézòm ?

⁷ Adan chapit 3 la, nou aprann kè ni on zanj ki viré Bondyé do. I té vlé dominé asi lézòt. Adan Labib yo ka kriyé-y Satan Lèdyab (Révélasyon 12:9). I té vlé osi kè lézòm ba Bondyé do. Alò prèmyé biten i fè, i tronpé Èv, é apré i mété-y ka tronpé près toutmoun. Men ni  déotwa moun kon Abèl, Énòk é Noé ki rété fidèl, yo pa jen lagé Bondyé (Ébré 11:4, 5, 7).

8. a) Ka ki fè déotwa zanj vin démon ? b) Ka sé démon-la fè pou yo pa mò adan délij-la ?

⁸ An tan a Noé, ni zanj ki ba Bondyé do. Yo sòti an syèl-la pou yo té viv kon nonm asi latè. Poukwa yo fè sa ? Labib ka di-nou kè yo té vlé ni madanm (li Jénèz 6:2). Men on zanj pa té dwèt fè on biten konsa (Jid 6). A épòk-lasa, onpakèt moun mété-yo ka fè dé biten ki pa bon é yo vin brital kon sé zanj méchan la. Alò Jéova désidé détwi-yo èvè on délij, kivédi tout latè té anba dlo. Men Jéova sové sèwvitè a-y ki té fidèl (Jénèz 7:17, 23). Pou yo pa té mò, sé zanj méchan la wouviré an syèl-la. Adan Labib, yo ka kriyé-yo démon oben mové-lèspri. Yo chwazi dè pran bò a Satan. Yo osi, yo ba Bondyé do, é Satan vin chèf a yo (Matyé 9:34).

9. a) Lè sé démon-la viré an syèl-la, ka ki rivé-yo ? b) Ka nou kay vwè konnyéla ?

⁹ Konm sé démon-la sé dé rèbèl, Jéova pa té vlé-yo adan fanmi a-y ankò (2 Pyè 2:4). Konnyéla, yo pé pa touné an nonm ankò, men yo ka kontinyé « kouyonné lèmondantyé » (Révélasyon 12:9 ; 1 Jan 5:19). An-nou vwè kijan yo ka fè pou tronpé tousa moun (li 2 Korentyen 2:11).

10. Kijan on moun ka pri adan on zatrap a démon ?

¹⁰ Pou yo rivé tronpé lézimen, sé démon-la ka itilizé plizyè métòd. Pou yo antré an kontak èvè lèmond-dé-zèspri, onlo moun kay owa gadèdzafè, oben owa moun ka fè sòsyé. Ni sa osi ka fè tibiten a yo  yomenm. An réyalité, sé moun-lasa ka antré an kontak èvè lédémon. Labib ka di-nou rété lwen a tousa ki ni on rapò èvè démon (Galat 5:19-21). Poukwa ? Pas, menmjan on chasè ka sèvi èvè on zatrap pou i tchenbé on bèt, sé konsa osi sé démon-la ka itilizé diféran zatrap pou yo pyéjé lézòm é pou yo fè sa yo vlé èvè yo (gadé nòt n^o 26 la, paj 221).

11. a) Èvè ki zatrap sé démon-la ka sèvi ? b) Poukwa fò-nou rété lwen a sé biten-lasa ?

¹¹ Ni moun ka chèché gadé sa ki ké fèt dèmen oben konnèt sèwten biten grasa on pouvwa mistik. Sa sé on zatrap ! Pou éséyé sav sa ki ké fèt, sé moun-la ka tiré kat, yo ka sèvi èvè boul-kristal, yo ka èspliké rèv, yo ka gadé zétwal oben yo ka li an men a moun. Onlo moun ka kwè kè pa ni pon danjé adan sa, men a pa vré ! Sa danjéré toubònman. Bib-la ka di kè démon é gadèdzafè ka travay ansanm-ansanm. Adan Akt 16:16 a 18 yo ka palé dè on jenntifi ki té ka gadé zafè grasa « on démon ki ka di sa ki ké fèt ». Lè Pòl fè démon-la sòti, tifi-la pèd pouvwa-lasa.

12. a) Poukwa sa danjéré dè chèché a palé èvè moun-mò ? b) Poukwa sèwvitè a Bondyé pa jen ka mélanjé-yo adan pon mès é labitid ki ni on rapò èvè démon ?

¹² Sé démon-la ka éséyé kouyonné-nou ondòt jan ankò. Yo vlé fè-nou kwè kè ni mwayen palé èvè moun-mò, kè sé mò-la ka kontinyé viv ondòt koté, kè yo pé antré an kontak èvè nou, é kè yo pé édé-nou oben fè-nou ditò. Pa ègzanp, lè sèwten moun pèd on fanmi oben on zanmi, yo kay swa owa on gadèdzafè, swa owa on moun ki ka fè sòsyé, pas swadizan moun-lasa pé palé èvè moun-mò. Pétèt i ké ba-yo  on ransègnman asi mò-la é i ké jous imité vwa a-y (1 Samiyèl 28:3-19). Anplis dè sa, onlo mès é labitid anrapò èvè lanmò bazé asi on kwayans konmkwa sé mò-la ka kontinyé viv ondòt koté (pa ègzanp : fèt pou lémò, mès-dè-souvènir, sakrifis ba moun-mò, véyé pou moun-mò é dòt biten ankò). Défwa, lè sé krétyen-la ka di kè yo pa ka mélanjé-yo adan sé biten-lasa, fanmi a yo oben vwazen a yo ka malpalé-yo, yo ka jiré-yo oben yo pa vlé vwè-yo ankò. Men sé krétyen-la sav kè sé mò-la pa ka viv pondòt koté. Pa ni mwayen palé èvè moun-mò, é sé mò-la yomenm pé pa fè ponmoun ayen, ni fè ayen ba ponmoun (Sòm 115:17). Alò, fè atansyon ! Penga zò menm éséyé palé èvè moun-mò oben èvè démon. É pa jen mélanjé-zòt adan pon mès é labitid ki ni on rapò èvè démon (li Détéwonòm 18:10, 11 ; Izayi 8:19).

13. Ka onlo moun ki té pè démon rivé fè ?

¹³ Non sèlman sé démon-la ka kouyonné moun, men anplisdisa yo ka fè moun pè toubònman. Konnyéla, Satan é sé démon-la sav kè sé « on titak tan » ki ka rété-yo avan Bondyé fè-yo disparèt asi latè (Révélasyon 12:12, 17). Sé pousa yo pli méchan é yo pli brital ankò ki avan. Men, onpakèt moun ki té pè démon pa pè-yo ankò. Kijan yo fè ?

14. Kon sèwten krétyen ki té ka rété Éfèz, ka nou pé fè pou sòti anba enfliyans a sé démon-la ?

¹⁴ Bib-la ka di-nou ka pou nou fè pou anpéché sé démon-la pran lanmen asi nou é kijan nou pé sòti anba enfliyans a yo. Pa ègzanp, nou pé palé dè moun  ki té ka rété adan on vil non a-y sété Éfèz. Avan yo té vin krétyen, yo té ni labitid antré an kontak èvè sé démon-la. Kijan yo fè pou sòti anba enfliyans a yo ? Bib-la ka di kè onlo moun « ki té ka fè lamaji sanblé liv a yo é yo brilé-yo douvan toutmoun » (Akt 19:19). Konm yo té vlé vin krétyen, yo détwi tout liv a maji yo té ni. Sé sa osi pou nou fè jòdila. Si on moun vlé sèvi Jéova, fò i débarasé-y dè tousa ki ni on rapò èvè lédémon. Pétèt sé ké liv, jounal, oròskòp, fim, mizik, jé, oben menm imaj : brèf, tousa ki pé ba-w lenprésyon kè maji, démon oben dòt biten mistik, sa amizan é sa pa danjéré. Pétèt osi sé kèk biten moun ka pòté asi yo pou pwotéjé-yo kont lèmal (1 Korentyen 10:21).

15. Ki dòt biten nou pé fè pou tchenbé douvan Satan é sé démon-la ?

¹⁵ Déotwa lanné apré sé krétyen Éfèz la détwi liv a maji a yo, lapòt Pòl di-yo kè fò-yo kontinyé goumé « kont sé lèspri méchan la » (Éfézyen 6:12). Menmsi yo té brilé sé liv-la, sé démon-la té ka chèché a fè-yo ditò toujou. Alò ka pou yo té fè ankò ? Pòl di-yo : « Pran gwo boukliyé a lafwa, èvè-y zò ké pé étenn [arété] tout flèch plen difé méchan-la ka voyé » (Éfézyen 6:16). Lè on sòlda o konba, sé boukliyé a-y ki ka pwotéjé-y. Menmjan-la osi, si nou ni lafwa, sa pé pwotéjé-nou. Si nou sèten kè Jéova pé pwotéjé-nou, nou ké pé tchenbé douvan Satan é sé démon-la (Matyé 17:20).

16. Ka nou pé fè pou fwa an nou adan Jéova vin pli solid ?

¹⁶ Ka nou pé fè pou fwa an nou adan Jéova vin pli solid ? Fò-nou li Labib chak jou. Fò-nou aprann fè  Jéova konfyans é fò-nou sèten i ké pwotéjé-nou osi. Si nou ni on konfyans total adan Jéova, Satan é sé démon-la pé’é pé fè-nou ditò (1 Jan 5:5).

17. Si nou pa vlé sé démon-la pran lanmen asi nou, ki dòt biten pou nou fè ?

¹⁷ Ka sé krétyen Éfèz la té dwèt fè ankò ? La yo té ka rété la, onlo moun té ni labitid antré an kontak èvè démon. Alò Pòl di-yo : « Priyé adan tout kalité sitiyasyon » (Éfézyen 6:18). Fò-yo té mandé Jéova pwotéjé-yo touttan. Nou osi nou ka viv adan on mond ki ni onlo biten ki lyanné èvè mové-lèspri. Alò fò-nou mandé Jéova pwotéjé-nou. É lè nou ka priyé, fò-nou itilizé non a Jéova (li Pwovèb 18:10). Si nou kontinyé priyé Jéova pou mandé-y woté-nou anba men a Satan, Jéova ké réponn-nou (Sòm 145:19 ; Matyé 6:13).

18, 19. a) Ka pou nou fè pou nou gangné konba-la kont Satan é sé démon-la ? b) A ki kèsyon nou kay réponn adan pwochen chapit-la ?

¹⁸ Si nou ka débarasé-nou dè tousa ki ni on rapò èvè lédémon é si nou ka fè Jéova konfyans pou i pwotéjé-nou, nou ké pé tchenbé douvan Satan é sé démon-la. Fò pa nou pè-yo (li Jak 4:7, 8). Jéova lontan pli fò ki sé démon-la. An tan a Noé, i pini-yo, é plita, i ké fè-yo disparèt (Jid 6). Pa oubliyé kè nou pa tousèl pou lité kont Satan é sé démon-la. Jéova ka itilizé zanj a-y pou pwotéjé-nou (2 Wa 6:15-17). Èvè èd a Jéova, nou pé sèten kè nou ké gangné konba-la (1 Pyè 5:6, 7 ; 2 Pyè 2:9).

¹⁹ Piskè Satan é sé démon-la ka fè onlo moun soufè asi latè, poukwa Bondyé poko détwi-yo ? Nou ké réponn a kèsyon-lasa adan pwochen chapit-la.