1, 2. Bay non a déotwa zanmi a Jéova.

KIJAN dè moun ou té ké vlé ni konm zanmi ? On moun kè ou byen enmé, é kè ou ka antann-vou byen èvè-y. On moun ki ni on bèl pèwsonalité, é ki ni onlo bèl kalité kè ou ka aprésyé.

² Jéova ka chwazi sèwten moun asi latè pou yo vin zanmi a-y. Pa ègzanp, Abraam sété zanmi a Jéova (Izayi 41:8 ; Jak 2:23). Jéova té enmé David osi. I di kè David té « on nonm ki ka fè ègzaktèman sa ki ka [fè-y] plézi » (Akt 13:22). É pwofèt Danyèl té ni « onlo valè » pou Jéova (Danyèl 9:23).

3. Ka ki fè si Abraam, David é Danyèl vin zanmi a Jéova ?

³ Ka Abraam, David é Danyèl fè pou vin zanmi a Jéova ? Jéova di Abraam : « Ou kouté vwa an mwen » (Jénèz 22:18). Jéova ka vin Zanmi a moun ki ka montré-yo toupiti é ki ka kouté-y. I pé jous vin Zanmi a tout on pèp. I di sé Izraélit-la : « Kouté-mwen, konsa mwen, an ké vin Bondyé a zòt, é zòt, zò ké vin pèp an mwen » (Jérémi 7:23). Si vréman ou anvi vin zanmi a Jéova, fò-w fè sa i ka mandé-w.

4, 5. Ka Jéova ka fè pou édé zanmi a-y ?

⁴ Bib-la ka di kè lè on moun enmé Jéova onlo, Jéova toujou paré pou édé-y (2 Kronik 16:9). Adan  Sòm 32:8, Jéova ka fè zanmi a-y on pwomès : « An ké édé-w konprann onlo biten é an ké fè-w konnèt ki chimen pou-w pran. Toupannan an ka voyé zyé asi-w, an ké ba-w konsèy. »

⁵ Nou ni on lènmi puisan ki vé pa nou vin zanmi a Jéova. Men Jéova vlé pwotéjé-nou (li Sòm 55:22). Konm nou sé zanmi a Jéova, nou ka sèvi-y èvè tout tchè an nou. Nou ka rété fidèl menm lè biten-la rèd. É kon David, nou sèten i ké édé-nou. David té di : « Ayen pé’é soukwé-mwen, pas [Jéova] adwat an mwen » (Sòm 16:8 ; 63:8). Ka Satan ka fè pou anpéché-nou rété zanmi èvè Jéova ?

6. Dè kibiten Satan ka akizé moun ?

⁶ Adan chapit 11 la, nou aprann kè Satan di kè Jéova sé on mantè. É padavwa Jéova pa lésé Adan é Èv désidé yomenm dè sa ki byen é dè sa ki mal, Satan di kè Bondyé pa jis. Men istwa a Jòb ka aprann-nou ondòt biten : Satan ka akizé moun ki vlé vin zanmi a Jéova osi. Satan ka di kè si yo ka sèvi Bondyé, a pa pas yo enmé-y, men sé pou Bondyé ba-yo on biten anrètou. I jous ka di kè i pé fè nenpòt kimoun ba Bondyé do. An-nou vwè ka Jéova fè pou pwotéjé Jòb é ka istwa a Jòb ka aprann-nou.

7, 8. a) Kijan Jéova té ka konsidéré Jòb ? b) Ka Satan di asi Jòb ?

⁷ Ki jan dè moun Jòb té yé ? Jòb sété on bon boug. An tan a Jòb, ni 3 600 lanné dè sa, Jéova té di kè pa ni ponmoun kon Jòb asi latè. Jòb té ni onlo rèspé pou Jéova, é i té hay tousa ki mové (Jòb 1:8). Wi, Jòb sété zanmi a Jéova.

 ⁸ Men Satan di kè Jòb ka sèvi Bondyé pas i ka sonjé yenki limenm é kè i ni on entéré adan sa. Satan di Jéova : « A pa-w ki mèt on bayè alantou a-y, alantou a kaz a-y é alantou a tousa ki ta-y pou pwotéjé-y ? Tousa i fè, ou béni-y, é bèt a-y ka miltipliyé kon tilili an péyi-la. Men konnyéla, pou chanjé, lonji men a-w é mannyé tousa ki ta-y, é asiré pa pétèt i ké doubout an fas èvè-w pou modi-w » (Jòb 1:10, 11).

9. Ka Jéova lésé Satan fè ?

⁹ Satan di kè Jòb té ka sèvi Jéova yenki pou rèsèvwa bénédisyon. Satan di osi kè i té ké fè ansòt kè Jòb arété sèvi Jéova. Jéova pa té dakò èvè Satan. Men i lésé Satan mèt Jòb a léprèv. Sa té’é montré si Jòb té vréman enmé-y.

10. a) Kijan Satan ataké Jòb ? b) Kijan Jòb réyaji ?

¹⁰ Pou komansé, Satan fè ansòt kè yo volé oben kè yo tchouyé tout bèt a Jòb. Aprésa, Satan tchouyé prèstout sèwvitè a Jòb. Jòb pèd tousa i té ni. Lèwgadé, Satan ba Jòb on dènyé bout-rèd, i tchouyé 10 timoun a-y adan on gwovan. Magré tousa, Jòb rété fidèl, i pa jen lagé Jéova. I pa jen di kè Bondyè fè on biten ki pa bon (Jòb 1:12-19, 22).

11. a) Ki dòt biten Satan fè pou ataké Jòb ? b) Kijan Jòb réyaji ?

¹¹ Men Satan pa kontanté-y dè sa. I mété Bondyé odéfi, i di-y : « Mannyé zo a-y é chè a-y, é asiré pa pétèt i ké doubout an fas èvè-w pou modi-w » (Jòb 2:5, 7). Alò Satan fè Jòb tonbé malad. É menmsi i té ka soufè anba maladi a-y, Jòb rété fidèl a Jéova. I di i ké rété fidèl jiska lanmò (Jòb 27:5).

12. Kijan Jòb montré kè Satan sé on mantè ?

 ¹² Jòb pa té sav kè Satan té akizé-y é i pa té sav nonplis poukwa i té ka soufè konsa. An tèt a-y, Jéova té dèyè tousa ki té ka rivé-y (Jòb 6:4 ; 16:11-14). Men kanmenmsa, i rété fidèl. Konnyéla, sa té klè. Jòb pa té on moun égoyis. I té zanmi a Jéova pas i té enmé-y. Tousa Satan té di asi-y, sété mansonj !

13. Jòb rété fidèl a Jéova. Ka sa rapòté-y ?

¹³ Menmsi Jòb pa té okouran a sa ki té ka pasé an syèl-la, i rété fidèl a Bondyé é i montré kè Satan sé on vyé jan dè moun. Jéova rékonpansé Jòb pas i pwouvé kè i té on zanmi fidèl (Jòb 42:12-17).

14, 15. Dè kibiten Satan ka akizé toutmoun ?

¹⁴ Sa ki rivé Jòb ka aprann-nou onlo biten enpòwtan. Jòdijou, Satan ka di kè nou ka sèvi Jéova pas nou ni on entéré adan sa. Adan Jòb 2:4, Satan di konsa : « On nonm ké bay tousa i ni pou vi a-y ». Sa vlé di a pa enki Jòb Satan akizé : pou-y, toutmoun égoyis. Plizyè syèk apré mò a Jòb, Satan té ka kontinyé voyé ba Jéova é i té ka akizé sèwvitè a-y. Laprèv, adan Pwovèb 27:11, Bondyé ka di : « Gason an mwen, aji èvè sajès, é fè tchè an mwen plézi, pou an pé sa réponn sila ki ka chèch’an tren la. »

¹⁵ Ou pé désidé dè fè sa Jéova ka mandé, dè vin zanmi a-y, on zanmi ki fidèl. Konsa ou ké pwouvé kè Satan sé on mantè. Menmsi ou té’é ni gwo chanjman a fè adan vi a-w pou vin zanmi a Jéova, sété ké méyè désizyon ou té’é pran ! É désizyon-lasa enpòwtan.  Satan ka di kè ou pé ké rété fidèl a Bondyé si ni pwoblèm. Anplisdisa, i ka fè tousa i pé pou fè-nou ba Jéova do. Kijan i ka fè sa ?

16. a) Ki métòd Satan ka itilizé pou anpéché moun sèvi Jéova ? b) Ka Dyab-la pé rivé a fè pou anpéché-w sèvi Jéova ?

¹⁶ Satan ka sèvi èvè diféran zatrap pou i détwi lanmityé an nou èvè Bondyé. I ka ataké-nou « kon on liyon ki anrajé », pou i pé sa valé-nou (1 Pyè 5:8). Pa touvé sa fò si pwòp zanmi a-w, pwòp fanmi a-w oben dòt moun ankò ka éséyé anpéché-w étidyé Labib é anpéché-w fè sa ki byen. Pétèt ou ké ni lenprésyon kè sé « ataké » yo ka ataké-w * (Jan 15:19, 20). Anplisdisa, Satan ka fè-y pasé pou on « zanj a limyè » : i ka éséyé kouyonné-nou pou fè-nou dézobéyi Jéova (2 Korentyen 11:14). É ni ondòt biten i ka fè pou anpéché-nou sèvi Bondyé : i vlé fè-nou kwè kè nou pa jen agou a Jéova (Pwovèb 24:10).

17. Poukwa nou ka kouté Jéova ?

¹⁷ Lè nou ka kouté Jéova, nou ka montré kè Satan sé on mantè. Ka ki ké édé-nou obéyi Bondyé ? Labib ka di : « Fò ou enmé Jéova èvè tout tchè a-w, èvè tout nanm a-w, é èvè tout fòs a-w » (Détéwonòm 6:5). Nou ka kouté Jéova pas nou enmé-y. É pi nou enmé-y, pi nou anvi fè tousa i ka mandé. Lapòt Jan ékri : « Mi sa  enmé Bondyé vlé di : suiv komandman a-y. É poutan, komandman a-y pa fòsan » (1 Jan 5:3).

18, 19. a) Jéova ka di kè ni sèwten biten ki pa byen. Kilès ? b) Jéova pé’é jen mandé-nou fè on biten ki two fò pou nou. Kijan nou fè sav sa ?

¹⁸ Jéova ka di kè ni sèwten biten ki pa byen. Kilès ? Ou ké touvé déotwa adan karé-la «  Hay sa Jéova hay ». Pétèt kè, odépa, ou ké pansé kè sèwten biten pa si grav ki sa. Men li sé vèwsé-la adan Bib a-w é pran tan réfléchi asi yo. Konsa, ou ké konprann kè lè on moun ka suiv lwa a Bondyé, i ka aji èvè sajès. Anplisdisa, pétèt ou ké rann-vou kont kè ni dé biten a chanjé adan vi a-w. Menmsi défwa sa pa fasil, si ou fè sé chanjman-lasa, tchè a-w ké kontan é ou ké viv anpé menmjan ki zanmi a Jéova (Izayi 48:17, 18). Poukwa nou pé di kè ni mwayen fè sé chanjman-lasa ?

 ¹⁹ Jéova pé’é jen mandé-nou fè on biten ki two fò pou nou (Détéwonòm 30:11-14). Sé on vré Zanmi é i konnèt-nou myé ki noumenm. I konnèt fòs an nou é féblès an nou (Sòm 103:14). Mi on ankourajman lapòt Pòl ka ban-nou : « Bondyé fidèl, é i pé ké jen lésé on tantasyon zò ka sibi ay pli lwen ki sa zò pé sipòté, men lè tantasyon-la ké rivé, i ké wouvè on pòt ba zòt, pou zò pé sa sipòté-y » (1 Korentyen 10:13). Asiré pa pétèt, Jéova ké toujou ban-nou fòs pou nou rivé fè sa ki byen. I ké ba-w « puisans-la ki ka dépasé sa ki nòwmal », kivédi on puisans èstraòwdinè, pou édé-w tchenbé lè biten-la rèd (2 Korentyen 4:7). Pòl ni lokazyon vwè men a Jéova lè i té ka pran gaz. Sé pousa i di : « An ni fòs pou tout biten, grasa sila ki ka ban-mwen puisans la » (Filipyen 4:13).

20. Ki bèl kalité pou nou ni ? É poukwa ?

²⁰ Pou on moun vin zanmi a Jéova, i dwèt arété fè sa Bondyé pa enmé. Men i ni dòt biten a fè ankò (Women 12:9). Zanmi a Bondyé enmé sa Bondyé enmé. Bib-la ka palé dè zanmi a Bondyé adan Sòm 15:1 a 5 (li-y). Yo ka imité Jéova lè yo ka montré yo ni dé bèl kalité kon « lanmou, lajwa, lapé, pasyans, bonté, lanmou pou sa ki byen, lafwa, dousè é métriz » (Galat 5:22, 23).

21. Ka ki pé édé-w kiltivé bèl kalité ki agou a Jéova ?

²¹ Ka ki pé édé-w kiltivé sé bèl kalité-lasa, ki ka fè Jéova plézi ? Fò-w chèché a konnèt ka Jéova enmé é pou sa, fò-w pran labitid li Bib a-w é étidyé-y (Izayi 30:20, 21). Si ou fè sa, ou ké enmé Jéova pli fò ankò. É pli ou ké enmé Jéova, pli ou ké anvi fè sa i ka mandé-w.

22. Ki rézilta sa ké bay si ou ka obéyi Jéova ?

²² Lè nou ka fè chanjman adan vi an nou, sé konsi nou ka woté on vyé lenj ki sal asi nou pou mèt on lenj ki pwòp. Labib ka di kè fò-nou woté « vyé pèwsonalité-la » anlè nou é kè fò-nou mèt « nouvo pèwsonalité-la » (Kolosyen 3:9, 10). Menmsi sa pa fasil, si nou ka fè sé chanjman-lasa é si nou ka fè sa Jéova ka mandé, i ké ban-nou « on gwo rékonpans » (Sòm 19:11). Sé sa i pwomèt-nou. Alò chwazi dè obéyi Jéova é montré kè Satan sé on mantè ! Pa sèvi Jéova pou trapé on rékonpans ; sèvi-y pas ou enmé-y ! A moman-lasa, ou ké pé di ou sé zanmi a Jéova !