LÈSON 04
Kimoun ki Bondyé ?
Dépi nanni-nannan, lézimen ka adoré onpakèt dyé. Men Labib ka palé dè on Dyé ki « ni plis glwa ki tout sélézòt dyé-la » (2 Kronik 2:5). Poukwa nou pé di i ni plis glwa ki yo ? Adan lèson-lasa, ou ké dékouvè kijan Bondyé ka fè-w konnèt kimoun i yé.
1. Ki non a Bondyé, é kijan nou fè sèten kè i vlé nou konnèt non a-y ?
Adan Labib, Bondyé ka di-nou ki non a-y. I ka di : « An sé Jéova. Sé non an mwen » (li Izayi 42:5, 8). Dapré sèwten èspésyalis a Labib, non a Bondyé, « Jéova », ka vin dè on non ébré ki vé di « I ka fè divini ». Jéova vlé nou konnèt non a-y (Ègzòd 3:15). Kijan nou fè sèten dè sa ? I fè-yo maké non a-y pliski 7000 fwa an Bib-la ! a Sé enki « vré Bondyé-la an syèl-la é asi latè » ki ka pòté non-la, Jéova (Détéwonòm 4:39).
2. Ka Labib ka aprann-nou asi Jéova ?
Poukwa adan tout sé dyé-la sé moun-la ka adoré la, Labib ka di kè sèl vré Dyé-la sé Jéova ? Ni onlo rézon. Sé Jéova tousèl ki « Pli Ho la asi tout latè » (li Sòm 83:18). Labib ka di i sé « Toupuisan-la », kivédi i ni puisans-la ki fo la pou fè tousa i vlé. I « kréyé tout biten », linivè é tousa ki ka viv asi latè (Révélasyon 4:8, 11). Jéova, sé sèl moun ki ka ègzisté dépi touttan, é ki ké ègzisté pou touttan (Sòm 90:2).
AN-NOU FOUYÉ PI FON
An-nou vwè ki diférans ki ni ant non a Bondyé é sé tit-la i ni la. Nou ké vwè osi kijan i fè-nou konnèt non a-y é poukwa.
3. Bondyé ni onlo tit, men i ni onsèl non
Si ou vlé sav ki diférans ki ni ant non a on moun é tit a-y, gadé VIDÉO-la, é fè on ti kozé asi kèsyon-la ki ka vin la :
-
Ki diférans ki ni ant on tit, kon « Ségnè », é on non ?
Labib ka di kè sé moun-la ka adoré onlo dyé é onlo ségnè. Li Sòm 136:1-3 é fè on ti kozé asi kèsyon-lasa :
-
Kimoun ki « Dyé-la ki pli ho ki tout sé dyé-la » é « Ségnè-la ki pli ho ki tout sé ségnè-la » ?
4. Jéova vlé kè ou konnèt non a-y é kè ou sèvi èvè-y
Jéova vlé kè ou konnèt non a-y. Ka i ka montré sa ? Gadé VIDÉO-la é fè on ti kozé asi sé kèsyon-la ki ka vin la :
-
Sèlon vou, ès Jéova vlé ou konnèt non a-y ? Poukwa ou ka di sa ?
Jéova vlé nou itilizé non a-y. Li Women 10:13 é fè on ti kozé asi sé kèsyon-lasa :
-
Jéova sé non a Bondyé. Poukwa sa enpòwtan kè nou sèvi èvè-y ?
-
Lè on moun ka sonjé non a-w é i ka kriyé-w pa non a-w, ka ou ka rèsanti ?
-
Sèlon vou, ka Jéova ka rèsanti lè ou ka sèvi èvè non a-y ?
5. Jéova vlé kè nou vin zanmi èvè-y
Soten sé on madanm ki fèt o Kanbòdj. Lè i vin konnèt non a Bondyé, i di kè sé « prèmyé fwa tchè a-y té kontan konsa an vi a-y ». Gadé VIDÉO-la é fè on ti kozé asi kèsyon-la ki ka vin la :
-
Adan vidéo-la, ès ou vwè ka Soten rèsanti lè i vin konnèt non a Bondyé ?
An jénéral, pou vin zanmi èvè on moun, prèmyé biten ou ka mandé-y sé non a-y. Li Jak 4:8a é fè on ti kozé asi sé kèsyon-lasa :
-
Ka Jéova ka ankourajé-w fè ?
-
Lè ou konnèt non a Bondyé é ou ka sèvi èvè non-lasa, sa pé fè-w vin plibon zanmi èvè-y. Poukwa nou pé di sa ?
MI SA MOUN KA DI : « Konm sé onsèl Bondyé ki ni, ou pé kriyé-y jan ou vlé. »
-
Non a Bondyé sé Jéova. Ès ou dakò èvè sa ?
-
Kijan ou té’é pé èspliké on moun kè Bondyé vlé nou itilizé non a-y ?
ON TI RÉZIMÉ
Non a sèl vré Dyé-la sé Jéova. I vlé nou konnèt non a-y, é i vlé nou itilizé non-lasa pou nou vin zanmi èvè-y.
Ka ou woutyenn
-
Poukwa Jéova pa ni ayen a vwè èvè tout sélézòt dyé-la sé moun-la ka adoré la ?
-
Poukwa nou dwètèt sèvi èvè non a Bondyé ?
-
Jéova vlé kè ou vin bon bon zanmi èvè-y. Ka i ka montré sa ?
AY GADÉ SA OSI
Mi senk prèv ki ka montré kè Bondyé ka ègzisté.
Bondyé toujou ègzisté é sé on biten ki lojik. An-nou vwè poukwa nou ka di sa.
Gadé poukwa fò-nou sèvi èvè non a Bondyé, menmsi nou pa sav kijan yo té ka pwononsé-y odépa.
Ès nou pé kriyé Bondyé nenpòt ki jan ? Pran tan gadé pou ki rézon nou pé di sé onsèl non i ni.
a Si ou vlé ni plis enfòwmasyon asi sa non a Bondyé vlé di é si ou vlé sav poukwa sèwten tradiktè a Labib woté non-lasa adan-y, gadé appendice A4 la ki adan La Bible. Traduction du monde nouveau.
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
