LÈSON 09
Lapriyè pé édé-w vin pibon zanmi èvè Bondyé
Ès délè ou ka santi ou bizwen on konsèy pou sav ki dirèksyon pou ou pran adan lavi ? Ès ou té’é enmé ni répons a sèwten kèsyon ou ka pozé-w ? Ès ou ka santi kè ou bizwen yo konsolé-w oben kè yo trankilizé tchè a-w ? Ès ou té’é anvi vin pibon zanmi èvè Jéova ? Ében rimèd-la, sé lapriyè. Kijan pou nou priyé ? Ès Bondyé ka kouté priyè a toutmoun ? Ka pou ou fè pou Bondyé kouté priyè a-w ? Sé sa nou ké vwè adan lèson-lasa.
1. Kimoun pou nou priyé, é ka pou nou di-y lè nou ka palé ba-y ?
Jézi aprann-nou kè sé yenki Jéova, Pap’an nou ki an syèl-la, pou nou priyé. É limenm a-y, sé sa i té ka fè. Mi sa i di : « Donk mi sé konsa pou zò priyé : “Pap’an nou ki an syèl-la...” » (Matyé 6:9). Lè nou ka priyé Jéova, nou ka vin pibon zanmi èvè-y.
Lè nou ka priyé, nou pé palé Jéova dè nenpòt ki biten dépi sa annakò èvè volonté a-y. Sé yenki si nou fè sa, Jéova ké réponn a priyè an nou. Mi sa Labib ka di anrapò èvè Bondyé : « kèlkèswa sa nou mandé-y, dépi sa annakò èvè volonté a-y, i ka kouté-nou » (1 Jan 5:14). Jézi montré-nou dè ki biten nou pé palé adan priyè an nou (li Matyé 6:9-13). Nou pé priyé pou dé biten ki ka konsèwné-nou, men fò pa nou oubliyé di Bondyé mèsi pou sa i ka fè pou nou, é fò-nou mandé-y édé lézòt.
2. Kijan pou nou priyé ?
Labib ka di-nou ‘wouvè tchè an nou ba Bondyé’ (Sòm 62:8). Sa vé di kè fò priyè an nou sòti an fon a tchè an nou. Nou pé priyé Jéova an tchè an nou oben nou pé palé ba-y tou ho. Nou pé priyé adan nenpòt ki pozisyon dépi sé on pozisyon ki plen rèspé. Nou pé priyé nenpòt koté é a nenpòt ki moman.
3. Kijan Bondyé ka réponn a priyè an nou ?
I ka itilizé plizyè métòd. Jéova ban-nou Pawòl a-y, Labib, é byensouvan, sé la nou ka touvé répons a kèsyon nou ka pozé-nou. Dapré Sòm 19:7, ‘lè on moun pa ni èkspéryans, si i ka li Pawòl a Bondyé, sa ka fè-y vin saj’ (li Jak 1:5). Jéova pé trankilizé lèspri an nou lè nou ka jwenn difikilté é i pé sèvi èvè sèwvitè a-y pou édé-nou lèwvwè zafè an nou mélé.
AN-NOU FOUYÉ PI FON
An-nou vwè ki kalté priyè ki ka fè Bondyé plézi é poukwa lapriyè ka fè-nou dibyen.
4. Pou Bondyé kouté priyè an nou, fò-nou fè sèwten biten
Ka pou nou fè pou Bondyé kouté priyè an nou ? Gadé VIDÉO-la.
Jéova vé kè nou priyé-y. Li Sòm 65:2 é fè on ti kozé asi sé kèsyon-lasa :
-
Dapré-w, ès Bondyé vé ‘kouté priyè a-w’ ? Poukwa ou ka di sa ?
Pou Bondyé pé sa kouté priyè an nou, fò nou fè tousa nou pé pou suiv prensip a-y anrapò èvè sa ki byen é sa ki mal. Li Miché 3:4 é 1 Pyè 3:12, é fè on ti kozé asi kèsyon-lasa :
-
Ka pou nou fè pou Bondyé kouté priyè an nou ?
Lè ni on lagè, byensouvan, chak lawmé ka priyé Bondyé pou i fè-yo gangné. Sèlon vou, ès Bondyé ké réponn a sé kalté priyè-lasa ?
5. Fò priyè an nou sòti an fon a tchè an nou
Ni dé moun, yo aprann-yo kè pou yo priyédyé, fò yo répété menm biten-la plizyè fwa menmsi yo pa’a konprann sa yo ka di. Men ès sé konsa Jéova vé kè nou palé ba-y ? Li Matyé 6:7 é fè on ti kozé asi kèsyon-lasa :
-
Lè nou ka priyédyé, ka pou nou fè pou ‘nou pa rété ka répété menm biten-la akontinyé’ ?
Chak jou, éséyé sonjé on bon biten ki rivé-w an jouné-la é di Jéova mèsi pou sa. Si ou fè sa pannan on simenn, ou ké rann-vou kont kè ou palé Jéova dè sèt biten diféran san répété menm pawòl-la.
On bon papa vé kè timoun a-y di-y sa i ni an fon a tchè a-y. Menmjan-la, Jéova vé kè priyè an nou sòti an fon a tchè an nou.
6. Lapriyè sé on bèl tikado Bondyé fè-nou
Lapriyè ka édé-nou tchenbé rèd siwtou lèwvwè nou ka jwenn difikilté. Kijansa ? Gadé VIDÉO-la.
Labib ka pwomèt-nou kè grasa lapriyè, Jéova ké trankilizé tchè an nou. Li Filipyen 4:6, 7 é fè on ti kozé asi sé kèsyon-lasa :
-
Menmsi a pa toutlè lapriyè ka fè pwoblèm an nou disparèt, i ka édé-nou kanmenm. Kijansa ?
-
Ka ou té’é enmé mandé Bondyé adan priyè a-w ?
Ès ou té sav sa ?
Lèmo « amèn » vé di « sé konsa menm pou sa fèt » oben « asirésèten ». Labib ka montré kè ja ni nanni-nannan sèwvitè a Bondyé ka di « amèn » an bout a on priyè (1 Kronik 16:36).
7. Fò nou pran tan priyé
Délè, tèlman nou okipé, nou ka jous oubliyé priyé. Ki valè lapriyè té ni pou Jézi ? Li Matyé 14:23 é Mawk 1:35, é fè on ti kozé asi sé kèsyon-lasa :
-
Ka Jézi fè pou i té ni tan priyé ?
-
Kijan ou pé òwganizé-w pou touvé on tan pou ou priyé ?
MI SA MOUN KA DI : « Bondyé ka pran tan pou i réponn a priyè an nou. »
-
Si on moun di-w sa, ka ou ké réponn ?
ON TI RÉZIMÉ
Lè priyè an nou ka sòti an fon a tchè an nou, nou ka vin pibon zanmi èvè Bondyé, Jéova ka trankilizé tchè an nou é i ka ban-nou fòs-la nou bizwen la pou nou pé sa fè-y plézi.
Ka ou woutyenn
-
Kimoun pou nou priyé ?
-
Kijan pou nou priyé ?
-
Ki bon biten lapriyè ka pwokiré-nou ?
AY GADÉ SA OSI
Mi répons a sèwten kèsyon onlo moun ka pozé-yo anrapò èvè lapriyè.
« Sept choses à savoir sur la prière » (Tou dè Gad a 1é òktòb 2010 an fransé)
Gadé poukwa lapriyè sé on biten ki enpòwtan é ka pou ou fè pou ou priyé pibyen.
Labib ka di-nou kimoun pou nou priyé.
Vidéo-lasa ka montré kè nou pé priyé nenpòt ki koté é a nenpòt ki moman.
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
