LÈSON 11
Lè ou ka li Bib a-w, ka pou ou fè pou bénéfisyé anplen dè sa ou ka li ?
Imajiné ou ni on gran téren pou ou défriché men toutjan ou gadé, ou pa’a vwè pa ki bout pou ou koumansé. Pou travay-la parèt mwen difisil, pétèt kè ou ké désidé nétwayé téren-la mòso pa mòso. Ében pou li Bib-la, sé menm biten-la. Pétèt ou ka mandé-w, pa ki bout pou ou koumansé. Adan lèson-lasa, nou ké vwè déotwa lidé ki ké édé-w li Bib a-w é étidyé-y èvè plézi.
1. Poukwa fò ou ni labitid li Bib a-w ?
On moun ki ni labitid li Bib a-y kivédi « lwa a Jéova », ké ni tchè-kontan é tousa i ké fè ké réyisi (li Sòm 1:1-3). Koumansé pa pran déotwa minit chak jou pou li Bib a-w. Pi ou ké konnèt Bib-la, pi ou ké enmé li-y.
2. Lè nou ka li Labib, ka pou nou fè pou sa fè-nou dibyen ?
Lè ou ka li Bib a-w, pou sa fè-w dibyen, fò ou ‘pran tan réfléchi asi sa ou ka li’ (Joziyé 1:8, nòt). Toupannan ou ka li Bib-la, pozé-w sé kèsyon-lasa : « Ka sé vèwsé-lasa ka aprann-mwen asi Jéova ? Kijan an pé sèvi èvè sa an aprann la adan vi an mwen ? Kijan an pé itilizé sa an aprann la pou édé lézòt ? »
3. Si ou vé touvé on tan pou li Bib a-w, ka ou pé fè ?
Ès ou ni dimal a touvé on tan pou li Bib a-w ? A pa-w tousèl ki an ka-lasa. Fè tousa ou pé pou « sèvi èvè tan-la [ou] ni la méyè fason ki tini » (Éfézyen 5:16). Pa ègzanp, ou pé li Bib a-w chak jou é pou rivé fè sa, chwazi on moman èspésyalman pou sa. Ni moun ki ka li-y granbonnè maten, ni sa ka li-y lèmidi é ni dòt ankò ki ka li-y lèswa avan yo ay kouché. É vou, ki moman ki pi entérésan pou-w ?
AN-NOU FOUYÉ PI FON
Gadé kijan ou pé fè pou ou pran plis plézi lè ou ka li Bib a-w. Gadé osi kijan ou pé préparé étid a-w pou i fè-w dibyen.
Ni mwayen nou vin enmé sèwten manjé. Menmjan-la, ni sèwten biten nou pé fè pou nou enmé li Bib an nou.
4. Sa ou pé fè pou ou enmé li Bib a-w
Délè, sé prèmyé fwa ou ka manjé on biten é ou pa oblijé touvé-y bon tousuit. Men pi ou ka manjé-y, pi ou ka touvé-y bon. Pou Bib-la, sé menm biten-la. Pi ou ké li-y, pi ou ké enmé li-y. Li 1 Pyè 2:2 é fè on ti kozé asi kèsyon-lasa :
-
Si ou ka li Bib a-w chak jou, ès ou ka di ou ké fin pa enmé sa ?
Gadé VIDÉO-la pou vwè ka déotwa jenn fè pou yo té enmé li Bib-la. Aprésa, fè on ti kozé asi sé kèsyon-la ki ka vin la.
-
Adan vidéo-la, ki difikilté sé jenn-la jwenn é kijan yo rivé about a yo ?
-
Sé jenn-lasa toujou kontinyé li Bib a yo. Ka ki édé-yo ?
-
Ka ki pèwmèt-yo rann lèkti a yo pi entérésan ?
Bon ti konsèy pou koumansé li Labib :
-
Chwazi on vèwsyon ki fyab é ki fasil a konprann. Éséyé li Traduction du monde nouveau la si ou ka konprann fransé-la byen.
-
Koumansé pa li on pawti kè ou ka touvé entérésan. Ou ké pé touvé déotwa lidé adan tablo-la « Koumansé li Labib ki adan liv-lasa. »
-
Maké sa ou ja li. Itilizé tablo-la « Pwogram pou li Labib » ki adan liv-lasa.
-
Sèvi èvè aplikasyon-la JW Library®. Grasa aplikasyon-lasa, ou ké pé li Bib-la oben ou ké pé kouté-y nenpòt ki koté ou yé, ki sé èvè on téléfòn pòwtab, ki sé èvè ondòt aparèy.
-
Gadé sé annexes-la ki adan Traduction du monde nouveau la. Pa ègzanp, ou ké pé touvé kat é tablo ki ké rann lèkti a-w pi entérésan.
5. Préparé étid a-w
Li Sòm 119:34 é fè on ti kozé asi kèsyon-lasa :
-
Lè ou ka fè on ti priyè avan ou li Bib a-w oben avan ou préparé étid a-w, sé on bon biten. Poukwa ?
Chakfwa yo ka vin fè étid a-w, ka pou ou fè pou sa pé itil ba-w ? Chakfwa ou ka préparé on lèson an liv-lasa, éséyé métòd-lasa :
-
Li sé paragraf-la ki an prèmyé paj a lèson-la.
-
Pran sé vèwsé-la, li-yo, é éséyé konprann ki rapò yo ni èvè sé lidé-la ki an paragraf-la.
-
Souligné sé mo enpòwtan la oben sé èksprésyon-la ki ka réponn a sé kèsyon-la ; sa ké édé-w lè ou ké ègzaminé lèson-la èvè moun-la ki ka fè étid a-w la.
Ès ou té sav sa ?
Témwen a Jéova ja sèvi èvè onlo vèwsyon a Labib men ni yonn yo pi enmé. Non a-y sé La Bible. Traduction du monde nouveau. Lè yo maké-y, yo fè on éfò pou suiv sa ki té maké adan sé prèmyé woulo-la. Anplisdisa, i fasil a konprann é ou ka touvé non a Bondyé adan-y (gadé awtik-la « Les Témoins de Jéhovah ont-ils leur Bible à eux ? » asi jw.org).
MI SA MOUN KA DI : « An pé’é ni tan pou mwen pé sa étidyé Labib. Sa two rèd. »
-
Ka ou ka di dè sa ?
ON TI RÉZIMÉ
Lè ou ka li Bib a-w, pou sa vréman itil ba-w, éséyé métòd-lasa : pran on tan pou li-y, priyé pou konprann sa ou ka li é préparé étid a-w.
Ka ou woutyenn
-
Lè ou ka li Bib a-w, ka pou ou fè pou sa fè-w dibyen ?
-
Ki moman ou té’é pé chwazi pou li Bib a-w é pou étidyé-y ?
-
Lè ou ka préparé étid a-w, sé on bon biten ou ka fè. Poukwa ?
AY GADÉ SA OSI
Lè ou ka li Bib a-w, mi déotwa lidé ki ké édé-w bénéfisyé anplen dè sa ou ka li.
« Une lecture qui vous apportera beaucoup » (Tou dè Gad no 1 a 2017 an fransé)
Twa mannyè diféran pou li Labib.
« Comment la Bible peut- elle m’aider ? (1re partie) : Explore ta bible » (on awtik ki asi jw.org)
Si ou vé li Bib a-w èvè plézi, ka pou ou fè ?
Déotwa moun ki ka li Labib dépi lontan ka ban-nou sèkré a yo.
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
