LÈSON 15
Kimoun ki Jézi ?
Près toutmoun asi latè ja tann palé dè Jézi. Onlo moun konnèt non a-y, men pawkont, yo pa konnèt granzafè anlè-y. Yo pa sav ki jan dè moun Jézi té yé vréman. Ni sa ki ka di kè sé té on bon moun, dòt ka di sé té on pwofèt, é ni dòt ankò ki ka di kè sé-y ki Bondyé. Men ka Labib ka di asi Jézi ?
1. Kimoun ki Jézi ?
Jézi sé on zanj puisan ki ka viv an syèl-la. Sé-y prèmyé Bondyé kréyé, é i kréyé-y avan tout biten. Sé pousa adan Labib, yo ka kriyé-y « prèmyé kréyasyon a Bondyé » (Kolosyen 1:15). Adan Labib, yo ka di osi kè Jézi sé « sèl Gason » a Bondyé, pas sé li tousèl Jéova kréyé dirèktèman (Jan 3:16). Jézi travay men-dan-lamen èvè Pap’a-y pou i té édé-y kréyé tout sélézòt biten-la (li Pwovèb 8:30). Jousalè, Jézi é Jéova bon bon zanmi menm ! I té ka sèvi Bondyé pòt-pawòl, é i toujou fè travay-lasa byen konm i fo. Dayè pou yonn, Labib ka kriyé-y « Pawòl-la », pas i té ka fè moun konnèt mésaj a Bondyé é komandman a-y (Jan 1:14).
2. Poukwa Jézi vin si latè ?
Ni apépré 2000 an dè sa, Jéova fè on mirak èstraòwdinè toubònman ! Alòskè Jézi té on zanj puisan an syèl-la, Jéova itilizé lèspri sen a-y pou transfòwmé Jézi é pou fè-y divini on tibébé adan vant a on jennfi ki té vyèj, é kè yo té ka kriyé Mari. Sé konsa Jézi vin fèt antankè nonm asi latè (li Lik 1:34, 35). Jézi vin asi latè pou i divini Mési-la Bondyé té pwomèt la é pou i té sové limanité a. Jézi réyalizé tousa Jéova té anonsé an Bib-la anrapò èvè Mési-la. Kifè, toutmoun té pé di kè sé-y ki Lèkris, « Gason a Bondyé-la ki vivan la » (Matyé 16:16).
3. Ola Jézi yé konnyéla ?
Lè Jézi mò, Bondyé résisité-y é i ba-y on kò kon ta sé zanj-la pou i wouvin an syèl-la. A moman-lasa, « Bondyé mété-y a on plas ki pli ho » (Filipyen 2:9). Konnyéla, Jézi sé on zanj ki puisan toubònman é sé enki Jéova ki pli puisan ki-y.
AN-NOU FOUYÉ PI FON
An-nou aprann konnèt Jézi plibyen é an-nou vwè poukwa sa enpòwtan toubònman.
4. Jézi, a pa Bondyé Toupuisan la
Menmsi Jézi sé on zanj ki puisan an syèl-la, dapré Labib, i toujou ka kouté Jéova ki sé Bondyé a-y é Pap’a-y osi. Poukwa nou ka di sa ? Gadé VIDÉO-la, é konsa, ou ké vwè ka Labib ka di pou montré ki diférans ki ni ant Jézi é Bondyé Toupuisan la.
Sé vèwsé-la ki ka vin la ka édé-nou konprann ki diférans ki ni ant Jéova é Jézi. Li chak vèwsé, é fè on ti kozé asi sé kèsyon-la ki k’ay èvè yo la.
Li Lik 1:30-32.
-
Ka zanj-la di pou montré ki diférans ki ni ant Jézi é Jéova Dyé, « Sila ki Pli Ho la » ?
Li Matyé 3:16, 17.
-
Apré Jézi batizé, on vwa sòti an syèl-la. Ka vwa-lasa di ?
-
Dapré-w, sé té vwa a kimoun ?
Li Jan 14:28.
-
Ant on papa é gason a-y, kilès ki pli gran é kilès ki ni plis otorité ?
-
Ka Jézi té vlé di lè i kriyé Jéova « Papa » ?
Li Jan 12:49.
-
Pou Jézi, ès li é Pap’a-y sé menm moun-la ? É vou, ki lidé a-w asi sa ?
5. Jézi montré kè sé-y ki sé Mési-la
Adan Labib, nou ka touvé onlo pwofési ki édé moun rèkonnèt Mési-la, kivédi tala Bondyé chwazi la pou sové limanité. Gadé VIDÉO-la pou ni on ti lidé asi jan Jézi akonpli sèwten pwofési lè i vin asi latè.
Li sé pwofési-lasa é fè on ti kozé asi sé kèsyon-la ki k’ay èvè yo la.
Li Miché 5:2 pou sav ola Mési-la té pou fèt b.
-
Ès pwofési-lasa réyalizé ? (Matyé 2:1).
Li Sòm 34:20 é Zakari 12:10 pou vwè ka Labib té anonsé anrapò èvè mò a Mési-la.
-
Ès sé pwofési-lasa réyalizé ? (Jan 19:33-37).
-
Ès ou ka di sé Jézi ki fè ansòt pou sa réyalizé kon sa té anonsé ?
-
Ka sé pwofési-lasa ka aprann-vou asi Jézi ?
6. Lè nou ka aprann konnèt Jézi, sa ka fè-nou dibyen
Labib ka di kè fò-nou aprann konnèt Jézi plibyen é fò-nou konnèt plis biten asi travay-la Bondyé ba-y fè la, pas sa enpòwtan toubònman. Li Jan 14:6 é 17:3, é fè on ti kozé asi kèsyon-lasa :
-
Poukwa fò ou aprann konnèt Jézi ?
Jézi montré ki chimen pou nou pran pou nou vin bon zanmi èvè Bondyé. I aprann moun lavérité asi Jéova, é grasa-y, nou pé ni lavi étèwnèl.
MI SA MOUN KA DI : « Témwen a Jéova pa jen ka palé dè Jézi. »
-
Si on moun di-w sa, ka ou ké réponn ?
ON TI RÉZIMÉ
Jézi sé on zanj ki puisan. Sé Gason a Bondyé, é sé-y ki Mési-la osi.
Ka ou woutyenn
-
Poukwa yo ka di kè Jézi sé « prèmyé kréyasyon a Bondyé » ?
-
Avan Jézi té vin si tè, ka i té ka fè ?
-
Kijan nou fè sav kè sé Jézi ki Mési-la ?
AY GADÉ SA OSI
An-nou vwè kijan nou fè sèten kè Jézi sé Mési-la.
« Èskè sé pwofési-la anrapò èvè Mési-la ka montré kè Jézi sé té Mési-la ? » (on awtik ki asi jw.org)
Gadé si Labib ka di kè Bondyé fè Jézi menmjan on madanm é on misyé ka fè on timoun.
« Poukwa yo ka kriyé Jézi Gason a Bondyé ? » (on awtik ki asi jw.org)
Ni onlo moun ka di kè Bondyé an twa pèwsòn, men a pa sa Labib ka di.
« Jésus est-il Dieu ? » (Tou dè Gad a 1é avril 2009 an fransé)
Li awtik-lasa pou vwè kijan vi a on madanm chanjé lè i vin aprann sa Labib ka anségné asi Jézi.
« Une femme juive explique pourquoi elle a remis sa foi en question » (Réveillez-vous ! a mé 2013)
a Adan sé lèson 26 é 27 la, nou ké vwè poukwa lézimen bizwen on moun sové-yo é nou ké vwè osi kijan Jézi ké fè sa.
b Si ou vlé vwè on pwofési ki ka anonsé ègzaktèman kitan Mési-la té’é parèt si latè, gadé nòt niméwo 2 la ki an bout a liv-la.
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
