LÈSON 17
Ki jan dè moun Jézi yé ?
Lè ou ka vin dékouvè tousa Jézi di é tousa i fè lè i té si latè, é lè ou ka vin konnèt kalité a-y, pa ni mwayen ou pa anvi vin bon zanmi èvè-y é èvè Pap’a-y. Ki jan dè moun Jézi yé ? É ka nou pé fè pou imité-y adan vi an nou ?
1. Poukwa nou pé di kè Jézi ka aji ègzaktèman kon Pap’a-y ?
Lèwvwè Jézi té an syèl-la, i pran tan òbsèwvé Pap’a-y pannan lanné é lanné é i aprann onlo biten toubònman. Kifè, i ka pansé ègzaktèman kon Pap’a-y, i ni menm santiman ki-y é i ka aji menmjan ki-y (li Jan 5:19). Tèlman Jézi sé fotokopi a Pap’a-y, mi sa limenm a-y di : « Sila ki vwè-mwen la vwè Papa-la osi » (Jan 14:9). Pi ou ké konnèt Jézi, pi ou ké konnèt Jéova. Pa ègzanp, lèwvwè Jézi té ka vwè on moun ka soufè, sa té ka fè-y lapenn. Sa ka montré-nou ka Jéova ka rèsanti pou nou.
2. Kijan Jézi montré kè i enmé Jéova ?
Mi sa Jézi di : « Pou lèmondantyé sav kè an enmé Papa-la, an ka fè ègzaktèman sa i mandé-mwen fè » (Jan 14:31). Lè Jézi té si latè, i montré kè i té enmé Pap’a-y fò toubònman pas i toujou fè sa i té ka mandé-y menm lè sa té rèd. É sé lanmou-lasa osi ki pousé-y palé dè Pap’a-y é ki pousé-y édé dòt moun vin bon zanmi èvè Jéova (Jan 14:23).
3. Kijan Jézi montré kè i enmé pwochen a-y ?
Labib ka di kè pawmi tousa Bondyé kréyé, ‘sé lézimen Jézi té pi enmé’ (Pwovèb 8:31, nòt). Konm Jézi té enmé sé moun-la, i té ka ankourajé-yo é i té ka édé-yo dè bonkè. Sé mirak-la Jézi fè la montré kè i té ni onlo puisans men yo té ka montré osi kè i té ni onlo konpasyon (Mawk 1:40-42). I té ka aji èvè onlo bonté é i pa té ka fè préférans. Lè on moun sensè té ka pran tan kouté sa Jézi té ka di, sa té ka ba moun-lasa onlo fòs é on bèl èspwa. Tèlman Jézi té enmé limanité, i té paré a soufè é a mò pou noutout. Men i pi enmé sé moun-la ki ka suiv sa i anségné la ! (li Jan 15:13, 14).
AN-NOU FOUYÉ PI FON
An-nou vwè ki bèl kalité Jézi ni. É konm i té plen lanmou é i té donan, an-nou vwè kijan nou pé imité-y.
4. Jézi enmé Pap’a-y
Grasa ègzanp-la Jézi lésé ban nou la, i ka aprann-nou kijan nou pé montré Bondyé kè nou enmé-y. Li Lik 6:12, Jan 15:10 é 17:26. Apré ou li chak vèwsé, fè on ti kozé asi kèsyon-lasa :
-
Menmjan ki Jézi, ka nou pé fè pou nou montré kè nou enmé Jéova ?
Jézi té enmé Pap’a-y onlo é i té ka priyé-y toutlè.
5. Jézi ka sousyé-y dè moun ki an difikilté
Jézi té ka fè lézòt pasé an prèmyé, é li, i té ka pasé apré. Menm lèwvwè i té las bon las la, i té ka sèvi èvè tan a-y é èvè fòs a-y pou i té édé lézòt. Li Mawk 6:30-44 é fè on ti kozé asi sé kèsyon-lasa :
-
Kijan Jézi té ka montré kè i té ka sousyé-y dè pwochen a-y ? (gadé sé vèwsé 31, 34, 41, é 42 la).
-
Ka i té ka pousé Jézi édé sé moun-la ? (gadé vèwsé 34 la).
-
Konm Jézi ni menm kalité ki Pap’a-y, ka sa ka aprann-nou si Jéova ?
-
Jézi té ka sousyé-y dè pwochen a-y. Kijan nou pé imité-y adan domenn-lasa ?
6. Jézi sé on moun ki donan
Jézi pa té ni granzafè men i té donan. É i di-nou kè fò nou donan osi. Li Akt 20:35 é fè on ti kozé asi kèsyon-lasa :
-
Sèlon Jézi, ka ki pé rann tchè an nou kontan ?
Gadé VIDÉO-la é fè on ti kozé asi kèsyon-la ki ka vin la.
-
Menmsi nou pa ni granzafè, kijan nou pé montré kè nou donan ?
Ès ou té sav sa ?
Labib ka aprann-nou kè fò nou priyé Jéova an non a Jézi (li Jan 16:23, 24). Lè nou ka priyé konsa, nou ka admèt kè si a pa té Jézi, nou pa té’é jen pé vin bon zanmi èvè Jéova.
MI SA MOUN KA DI : « Bondyé ka lésé-nou soufè pou vwè fondè a fwa an nou. »
-
Jézi ka aji ègzaktèman kon Pap’a-y. Alò, kijan sa i ka fè ka montré-nou kè Jéova pa ka fè-nou soufè ?
ON TI RÉZIMÉ
Jézi enmé Jéova é i enmé-nou osi. I ka aji ègzaktèman kon Pap’a-y. Kifè, pi ou ké aprann konnèt Jézi, pi ou ké aprann konnèt Jéova.
Ka ou woutyenn
-
Jézi montré kè i enmé Pap’a-y. Kijan nou pé imité-y ?
-
Jézi montré kè i enmé pwochen a-y. Kijan nou pé imité-y ?
-
Ki kalité a Jézi ou pi enmé ?
AY GADÉ SA OSI
An-nou vwè déotwa kalité a Jézi kè nou pé imité.
« Pour imiter Jésus, soyons... » (Jésus : le chemin, la vérité et la vie, paj 317)
Jézi ka jouwé on wòl enpòwtan lè nou ka priyé. An-nou vwè kilès la.
« Pourquoi prier au nom de Jésus ? » (Tou dè Gad a 1é févriyé 2008 an fransé)
Dapré Labib, ka Jézi té ka sanm ?
Lè nou ka gadé jan Jézi té ka aji èvè sé madanm-la, ka sa ka aprann-nou ?
« Respect et dignité : deux exigences de Dieu » (Tou dè Gad a 1é sèptanm 2012 an fransé)
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
