LÈSON 21
Kimoun ki ka préché bon nouvèl-la ?
Talè, Jéova ké sèvi èvè wayòm a-y pou fè tout pwoblèm an nou vòlkannizé. Nouvèl-lasa bèl toubònman, é fò toutmoun konnèt-li ! Jézi mandé disip a-y pòté mésaj-lasa ba toutmoun (Matyé 28:19, 20). Kijan sé Témwen a Jéova la ka fè sa Jézi mandé ?
1. Kijan Matyé 24:14 ka réyalizé jòdijou ?
Jézi té anonsé kè ‘yo té’é préché bon nouvèl a Wayòm-la toupatou asi latè’ (Matyé 24:14). A pa ti kontan Témwen a Jéova kontan davwa yo ka fè travay-lasa ! Nou ka préché bon nouvèl-la asi tout latè adan plis ki 1000 lang ! Pou fè travay-lasa, sa ka mandé onlo tan, onlo éfò, é fò ou byen òwganizé. É ou ka tou konprann kè si Jéova pa té ka édé-nou, nou pa té’é jen rivé fè sa.
2. Ki mannèv nou ka pòté pou préché bon nouvèl-la ?
Nou ka préché toupatou nou pé jwenn moun. Nou ka préché « dè kaz-an-kaz » kon sé prèmyé krétyen-la té ka fè (Akt 5:42). Grasa métòd-lasa, nou ka rivé palé èvè plizyè milyon moun chak lanné. Men dépawfwa, nou pa’a rivé jwenn sé moun-la akaz a yo. Kifè, nou k’ay préché an lari-la, asi plas-mawché, adan pawk oben la sé moun-la ka travay la. Dépi nou ka touvé-nou adan on sitiyasyon ki ka pèwmèt-nou palé dè Jéova é dè sa i ni lentansyon fè, nou pa’a dòmi ! Nou ka bay adan !
3. Kimoun ki dwètèt préché bon nouvèl-la ?
Tout disip a Jézikris dwètèt fè moun konnèt bon nouvèl-la. Nou ka pran rèsponsabilité-lasa oséryé menm. Dépi nou pé, nou ka préché, pas nou sav vi a moun andanjé (li 1 Timoté 4:16). Yo pa’a péyé-nou pou nou préché, pas mi sa Bib-la ka di : « Yo ba-zòt pou ayen, fò zò bay pou ayen » (Matyé 10:7, 8). Menmsi a pa toutlè sé moun-la ka kouté-nou, nou ka kontinyé préché paskè sé sa Jéova mandé-nou fè, é nou sav kè sa ka mèt onlo jwa an tchè a-y.
AN-NOU FOUYÉ PI FON
An-nou vwè ki mannèv Témwen a Jéova ka pòté pou yo préché toupatou asi latè, é an-nou vwè osi kijan Jéova ka édé-nou.
Travay a prédikasyon-la ka fèt toupatou asi latè : (A) Kòstarika, (B) Étazini, (C) Bénen, (D) Taylann, (E) Yap, (F) Syèd
4. Nou ka pòté bon mannèv pou préché ba toutmoun
Témwen a Jéova ka fè onlo éfò pou yo préché bon nouvèl-la ba toutmoun. Gadé VIDÉO-la é fè on ti kozé asi kèsyon-la ki ka vin la.
-
Lè ou ka vwè mannèv Témwen a Jéova ka pòté pou yo pé sa préché, ka ou ka touvé fò adan sa ?
Li Matyé 22:39 é Women 10:13-15, é fè on ti kozé asi sé kèsyon-lasa :
-
Kijan travay a prédikasyon-la nou ka fè la ka montré kè nou enmé pwochen an nou ?
-
Ka Jéova ka rèsanti pou moun ki ka préché bon nouvèl-la ? (gadé vèwsé 15 la).
5. Nou ka travay ansanm èvè Bondyé
Ni onlo biten ki ja pasé é ki ka montré kè sé Jéova ki ka dirijé travay-la nou ka fè la. An-nou pran on ègzanp. An Nouvèlzéland, on frè non a-y sé Paul té ka préché on aprémidi, é i frapé akaz a on madanm. Lèmaten-la menm, madanm-la té priyé Bondyé, é i té kriyé-y pa non a-y, kivédi, Jéova. Adan priyè a-y, i di Bondyé fè ansòt pou on moun pasé vwè-y. É mi sa Paul ka di : « Twazè-d-tan apré, an té douvan pòt a madanm-la. »
Li 1 Korentyen 3:9 é fè on ti kozé asi kèsyon-lasa :
-
Ni onlo frè é sè ki ja viv menm biten ki frè an nou an Nouvèlzéland. Kijan sa ka montré kè sé Jéova ki ka dirijé travay a prédikasyon-la ?
Li Akt 1:8 é fè on ti kozé asi kèsyon-lasa :
-
Pou nou fè travay-lasa, fò Jéova édé-nou. Poukwa nou ka di sa ?
Ès ou té sav sa ?
Pannan réinyon-la ki ka fèt an simenn-la, yo ka montré-nou kijan pou nou préché. Si ou ja ni lokazyon ay adan on réinyon kon sila, ka ou ka pansé dè fòwmasyon-la yo ka ban-nou la ?
6. Sé Bondyé ki mandé-nou préché, alò nou ka obéyi
O prèmyé syèk, ni dé moun ki té vlé anpéché sé krétyen-la préché. Sé prèmyé krétyen-la té sav kè yo té andwa préché. Kifè, yo ‘défann bon nouvèl-la douvan lalwa’ (Filipyen 1:7). Jòdijou, sé Témwen a Jéova la ka fè menm biten-la a.
Li Akt 5:27-42 é fè on ti kozé asi kèsyon-lasa :
-
Poukwa nou pé’é jen arété préché ? (gadé sé vèwsé 29, 38 é 39 la).
MI SA YO TÉ’É PÉ MANDÉ-W : « Poukwa Témwen a Jéova ka pasé dè kaz-an-kaz ? »
-
Ka ou té’é réponn ?
ON TI RÉZIMÉ
Jézi mandé disip a-y préché bon nouvèl-la toupatou asi latè. Jéova ka édé sèwvitè a-y fè travay-lasa.
Ka ou woutyenn
-
Kimoun ki ka préché bon nouvèl-la toupatou asi latè ?
-
Travay a prédikasyon-la nou ka fè la ka montré kè nou enmé pwochen an nou. Kijansa ?
-
Ès ou ka di kè travay a prédikasyon-la ka rann tchè an nou kontan ? Poukwa ou ka di sa ?
AY GADÉ SA OSI
Lè sé Témwen-la la ka préché adan on gran vil, kijan yo ka fè ?
Ki éfò Témwen a Jéova ka fè pou préché ba moun ki té oblijé kité péyi a yo ?
Yo ka édé moun ki kité péyi a yo vin bon zanmi èvè Jéova (5:59)
On sè ka di-nou jan vi a-y bèl, davwa i ka pasé tout tan a-y an prédikasyon.
Pou nou té kontinyé préché bon nouvèl-la, nou gangné plizyè afè douvan tribinal, é nou pé’é jen oubliyé sa.
« Les prédicateurs se défendent devant les tribunaux » (Le Royaume de Dieu en action !, chapit 13)
a Sé Bondyé ki di-nou kè fò-nou ay préché. Kifè, nou pa bizwen pon gouvènman ban-nou lotorizasyon pou nou préché bon nouvèl-la.
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
