LÈSON 24
Lavérité asi sé zanj-la
Jéova vlé fè-nou fè konésans èvè fanmi a-y ki ka viv èvè-y an syèl-la. Sé zanj-la ka fè pawti a fanmi-lasa. Dayè pou yonn, Labib ka kriyé-yo « gason a Bondyé » (Jòb 38:7). Ka Labib ka di anrapò èvè sé zanj-la ? Ka yo ka fè ? Ès yotout sé fanmi a Jéova ?
1. Sé zanj-la : kimoun yo yé ?
Jéova kréyé sé zanj-la lontan avan i té kréyé latè. Yo ka touvé-yo kon Jéova. Sé dé lèspri kè nou pé pa vwè é ki ka viv an syèl-la (Ébré 1:14). Ni milyon é milyon zanj, é yochak diféran (Révélasyon 5:11). Yo ‘ka kouté Jéova é yo ka fè sa i ka mandé’ (Sòm 103:20). An tan lontan, Jéova ni lokazyon sèvi èvè déotwa zanj pou palé ba sèwvitè a-y é pou pòté-yo sèkou. Jòdijou, sé zanj-la ka gidé sé krétyen-la pou édé-yo touvé moun ki vlé konnèt Bondyé.
2. Satan é sé démon-la : kimoun yo yé ojis ?
Ni sèwten zanj ki ba Jéova do. Prèmyé-la ki fè sa la sé « sila yo ka kriyé Dyab é Satan, ki ka kouyonné lèmondantyé » (Révélasyon 12:9). Konm i té vlé gouvèné, Satan pousé Adan é Èv rèbélé-yo osi é i jous halé dòt zanj èvè-y. Yo ka kriyé sé zanj rèbèl lasa « démon ». Jéova fè-yo sòti an syèl-la é i voyé-yo asi latè. Talè, i ké fè-yo fè pach (li Révélasyon 12:9, 12).
3. Ka Satan é sé démon-la ka éséyé fè pou yo pé sa kouyonné-nou ?
Satan é sé démon-la ka kouyonné onlo moun. Pou sa, yo ka sèvi èvè diféran biten pou fè sé moun-la kominiké èvè yo. É délè, sé moun-lasa pa menm sav kè sé èvè démon yo ka mèt-yo annafè. Pa ègzanp, ni onlo moun ki ka kouté owòskòp, ni sa ki k’ay owa gadèdzafè oben ki k’ay owa moun ki ka fè sòsyé. Ni dé moun osi ki ka chèché gérizon, men trètman-la yo ka suiv la ni on rapò èvè sé démon-la. Anplisdisa, Satan é sé démon-la ka fè sé moun-la kwè kè ni mwayen yo palé èvè moun ki ja mò. Men Jéova ka avèti-nou : « Penga zò ay vwè sé gadèdzafè-la, é penga zò ay owa pon divinè » (Lévitik 19:31). Si i ka di-nou sa sé pas i vlé pwotéjé-nou. Satan é sé démon-la sé lènmi a Jéova é yo ka chèché a fè-nou ditò.
AN-NOU FOUYÉ PI FON
An-nou vwè ki wòl sé zanj-la ka jouwé adan travay a prédikasyon-la. An-nou vwè osi poukwa sé on biten ki danjéré lè nou ka kominiké èvè sé démon-la, é kijan nou pé pwotéjé-nou pou Satan é sé démon-la pa pran lanmen asi nou.
4. Sé zanj-la ka édé moun ki vlé aprann konnèt Jéova
Sé zanj-la yomenm a yo pa’a préché, men yo ka édé moun ki ka préché pou yo touvé moun ki vlé konnèt Bondyé. Li Révélasyon 14:6, 7 é fè on ti kozé asi sé kèsyon-lasa :
-
Poukwa nou bizwen sé zanj-la édé-nou lè nou ka préché ?
-
Sé zanj-la pé fè ansòt pou nou tonbé anlè on moun ki bizwen konnèt mésaj-la ki an Bib-la. Ès sa ka ankourajé-w ? É poukwa ?
5. Pa mélanjé-w adan ayen ki ni on rapò èvè sé démon-la
Satan é sé démon-la sé lènmi a Jéova. Kifè, yo sé lènmi an nou osi. Li Lik 9:38-42 é fè on ti kozé asi kèsyon-lasa :
-
Kijan sé démon-la ka aji èvè moun ki asi latè ?
Nou vé pa ni pon afè èvè sé démon-la. Li Détéwonòm 18:10-12 é fè on ti kozé asi sé kèsyon-lasa :
-
Ka sé démon-la ka fè pou éséyé kominiké èvè nou é pou pousé-nou fè sa ki pa bon ? Ki biten sé moun-la ka fè é ki ni on rapò èvè sé démon-la ?
-
Lè Jéova ka di kè fò pa nou mélanjé-nou adan ayen ki ni on rapò èvè sé démon-la, ès ou ka di sé on bon biten ? Poukwa ?
Gadé VIDÉO-la é fè on ti kozé asi sé kèsyon-la ki ka vin la.
-
Bébé a Palesa té ni on braslé pou pwotéjé-y swadizan. Dapré-w, èskè sé té on mové biten ? Poukwa ou ka di sa ?
-
Ka Palesa té oblijé fè pou sé démon-la pa té fè-y ayen ?
Sé vré krétyen-la toujou goumé pou sé démon-la pa pran lanmen asi yo. Li Akt 19:19 é 1 Korentyen 10:21, é fè on ti kozé asi kèsyon-lasa :
-
Si ou ni on biten ki anrapò èvè sé démon-la, sa enpòwtan kè ou détwi-y. Poukisa ?
6. Gangné konba-la kont Satan é sé démon-la
Chèf a sé démon-la sé Satan. Men chèf a sé zanj fidèl la sé lawkanj Michèl, kivédi Jézi. Ki puisans lawkanj Michèl tini ? Li Révélasyon 12:7-9 é fè on ti kozé asi sé kèsyon-lasa :
-
Kimoun ki pi fò ? Michèl é zanj a-y, oben Satan é démon a-y ?
-
Sèlon vou, ès disip a Jézi dwètèt pè Satan é démon a-y ?
Si ou ka goumé èvè Satan é sé démon-la, ou pé gangné konba-la. Li Jak 4:7 é fè on ti kozé asi kèsyon-lasa :
-
Ka ou pé fè pou pwotéjé-w kont Satan é démon a-y ?
MI SA MOUN KA DI : « Si ou ka jouwé on jé oben ou ka gadé on fim ki ni sòsyé oben maji adan-y, pa ni danjé adan sa. Sé anmizé ou ka anmizé-w ! »
-
Ki danjé ki tini lèwvwè on moun ka rézonné konsa ?
ON TI RÉZIMÉ
Sé zanj fidèl la ka édé-nou. Satan é sé démon-la sé lènmi a Jéova é yo ka éséyé fè lézimen kominiké èvè yo pou kouyonné-yo.
Ka ou woutyenn
-
Ka sé zanj-la ka fè pou édé moun ki anvi konnèt Bondyé ?
-
Ka Labib ka di asi Satan é asi sé démon-la ?
-
Poukwa ou byen désidé a pa mélanjé-w adan ayen ki ni on rapò èvè sé démon-la ?
AY GADÉ SA OSI
Poukwa nou pé di kè lawkanj Michèl sé Jézi ?
Dyab-la : ka i yé ojis ?
Ka on madanm fè pou sé démon-la té lésé-y trankil ?
« Elle a trouvé un but dans la vie » (Tou dè Gad a 1é juiyé 1993 an fransé)
An-nou vwè kijan Satan ka fè sé moun-la kominiké èvè sé mové-lèspri-la pou kouyonné-yo.
« La vérité sur la magie et la sorcellerie » (La route qui mène à la vie éternelle, 5èm pati)
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
