LÈSON 25
Ka Bondyé ni lentansyon fè pou nou ?
Kon Labib ka di, ‘vi an nou kout, é nou plen pwoblèm toubònman’ (Jòb 14:1). Ès sé sa Bondyé prévwa pou nou ? Si a pa sa, ka Bondyé ni lentansyon fè pou nou ? Ès sa i ni lidé fè la ké fèt on jou ? Sé répons-la ki an Bib-la ka ban-nou onlo rékonfò. An-nou gadé sa.
1. Kijan Jéova vlé nou viv ?
Jéova vlé nou viv alèz an nou menm ! Lè Jéova kréyé Adan é Èv, i mèt-yo adan on bèl paradi yo ka kriyé Jadendédèn-la. Aprésa, « Bondyé béni-yo é i di-yo konsa : “Fè timoun, é miltipliyé-zòt ; ranpli latè, é dominé asi-y” » (Jénèz 1:28). Jéova té vlé yo péplé latè, kè yo fè-y vin on paradi é kè yo okipé dè sé zannimo-la. I té vlé kè toutmoun viv san janmen tonbé malad é san janmen mò.
Jòdijou, vi an nou pa ni ayen a vwè èvè sa Bondyé té prévwa a, men pwojé a-y pa chanjé (Izayi 46:10, 11). Jousalè, Jéova vlé kè tout sé moun-la ki ka kouté-y la viv pou touttan é adoumanman ! (li Révélasyon 21:3, 4).
2. Kijan nou pé fè ansòt pou vi an nou ni on sans dépi konnyéla ?
Lè Jéova kréyé-nou, i fè ansòt pou nou santi kè nou ‘bizwen i gidé-nou adan lavi’. Savédi kè nou bizwen sav ki jan dè moun i yé, é kè nou bizwen adoré-y (li Matyé 5:3-6). I vlé kè nou vin bon bon zanmi èvè-y, ‘kè nou maché adan tout chimen a-y, kè nou enmé-y,’ é kè nou sèvi-y ‘èvè tout tchè an nou’ (Détéwonòm 10:12 ; Sòm 25:14). Lè nou ka fè sa, tchè an nou ka kontan oséryé menm, menmsi nou ni difikilté an nou. Lè nou ka adoré Jéova, vi an nou ka ni on sans davwa nou ka viv kon Jéova té vlé nou viv lèwvwè i kréyé-nou.
AN-NOU FOUYÉ PI FON
Lèwvwè Jéova préparé latè, i fè sa èvè onlo lanmou. Anplisdisa, adan Pawòl a-y, i ka di-nou poukwa nou asi latè. Jistèman, an-nou gadé sa.
3. Jéova vlé nou viv alèz an nou
Gadé VIDÉO-la é fè on ti kozé asi kèsyon-la ki ka vin la.
-
Poukwa Bondyé fè latè bèl konsa ?
Li Éklézyas 3:11 é fè on ti kozé asi kèsyon-lasa :
-
Dapré vèwsé-lasa, ka Jéova vlé pou nou ?
4. Jéova toujou ni lentansyon fè sa i té prévwa
Li Sòm 37:11, 29 é Izayi 55:11, é fè on ti kozé asi kèsyon-lasa :
-
Kijan nou fè sav kè Jéova toujou ni lentansyon fè sa i té prévwa ?
Siwvwè on kaz an mové léta, ni mwayen ranjé-y. Menmjan-la, menmsi lamajorité a moun ki asi latè pa ka okipé dè-y, Bondyé ké réparé-y é sé enki moun ki enmé Bondyé ki ké viv anlè-y.
5. Lè nou ka adoré Jéova, vi an nou ka ni on sans
Lè nou sav pou ki biten nou asi latè, sa ka ban-nou tchè-kontan. Gadé VIDÉO-la é fè on ti kozé asi sé kèsyon-la ki ka vin la.
-
Lè Terumi konprann kè a pa pou ayen nou asi latè, ka sa pwokiré-y ?
Li Éklézyas 12:13 é fè on ti kozé asi kèsyon-lasa :
-
Lè nou ka pran tan réfléchi asi tousa Jéova fè pou nou, ka sa ka ban-nou anvi fè pou-y ?
MI SA YO TÉ’É PÉ MANDÉ-W : « Si sé pou nou vwè tousa mizè, poukwa nou asi latè ? »
-
Ka ou té’é réponn ?
ON TI RÉZIMÉ
Jéova vlé kè nou viv alèz an nou pou touttan asi latè. Lè nou ka adoré Bondyé èvè tout tchè an nou, vi an nou ka ni on sans dépi konnyéla.
Ka ou woutyenn
-
Ki pwojé Jéova té ni pou Adan é Èv odépa ?
-
Sa Jéova prévwa pou lézimen pa chanjé. Kijan nou fè sav sa ?
-
Kijan ou pé fè ansòt pou vi a-w ni on sans ?
AY GADÉ SA OSI
Gadé poukwa nou sèten kè Jadendédèn-la ègzisté poubon.
« Le jardin d’Éden : Un mythe ? » (Tou dè Gad a 1é janvyé 2011 an fransé)
Poukwa nou pé sèten kè latè ké toujou la ?
Dapré sa Labib ka di, pou ki biten nou asi latè ?
Gadé ka ki édé on misyé rann-li kont kè té ka manké-y on biten an vi a-y.
a Adan lèson-la ki ka vin la, nou ké vwè poukwa jòdila nou pa’a viv kon Bondyé té prévwa.
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
