LÈSON 26
Poukwa ni tousa malè é tousa soufrans ?
Lè on gwo malè ka rivé, onlo moun ka mandé-yo : « Men poukwa sa fèt ? ». É sa toutafè nòwmal. Nou kontan toubònman davwa Labib ka réponn a kèsyon-lasa on mannyè ki klè.
1. Kijan lèmal fè parèt asi latè ?
Satan ba Bondyé do é i vin lènmi èvè-y. Konm sé gouvèné i té bizwen gouvèné, Satan kouyonné Adan é Èv é i fè-yo rèbélé-yo osi. Pou i té rivé fè sa, i manti ba Èv (Jénèz 3:1-5). I fè-y konprann kè Jéova té bizwen anpéché-y pwofité dè on biten ki té bon pou-y. I fè Adan é Èv konprann kè lézimen té’é viv pibyen si yo té ka fè sa yo vlé san mélé-yo an Bondyé. Lè Satan di Èv i pé’é mò, i di prèmyé mansonj-la. Sé poukwa, Labib ka di kè Satan « sé on mantè é i sé papa mansonj-la » (Jan 8:44).
2. Ka Adan é Èv désidé fè ?
Jéova té ka ba Adan é Èv tousa yo té bizwen. I di-yo kè yo té pé manjé fwi adan tout sé pyébwa-la ki té adan Jadendédèn-la, sòf adan yonn (Jénèz 2:15-17). Magrésa, yo désidé manjé fwi a pyébwa-lasa. Èv « pran on fwi é i manjé adan-y ». Aprésa, Adan « manjé adan-y » osi (Jénèz 3:6). Ponyonn pa obéyi. Konm Adan é Èv té pawfè, yo té ka fè lèbyen san fòsé. Men lè yo chwazi ba Bondyé do, yo péché é yo montré kè yo pa dakò pou Bondyé gouvèné-yo. Désizyon-lasa kouté-yo chè toubònman pas yo koumansé soufè bon soufè la (Jénèz 3:16-19).
3. Lè Adan é Èv dézobéyi, adan ki sitiyasyon yo mèt-nou ?
Konm Adan é Èv dézobéyi, péché-la rantré an kò a yo é yo mèt toutmoun ki té’é fèt apré yo anba jouk a péché-la osi. Mi sa Labib ka di anrapò èvè Adan : « Sé konsa péché-la rantré an mond-la pa onsèl nonm, é lanmò rantré pa péché-la, kifè lanmò rantré asi toutmoun pas toutmoun té péché » (Women 5:12).
Si nou ka soufè konsa, sé pou onlo rézon diféran. Délè, nou ka soufè pas nou pran on mové désizyon oben pas sé ondòt moun ki pran on mové désizyon. Délè osi, sé on évènman kè nou pa té prévwa ki ka fè-nou soufè (li Éklézyas 9:11).
AN-NOU FOUYÉ PI FON
A pa Bondyé ki ka fè si ni tousa malè ki ka rivé é si ni tousa soufrans jòdijou. An-nou vwè poukwa. An-nou vwè osi ka i ka rèsanti lè nou ka soufè.
4. Kimoun ki rèsponsab a tout soufrans an nou
Ni onlo moun ki ka konprann kè adan mond-lasa sé Bondyé ki ka menné. Men ès sé vré sa ? Gadé VIDÉO-la.
Li Jak 1:13 é 1 Jan 5:19, é fè on ti kozé asi kèsyon-lasa :
-
Ès sé akòz dè Bondyé nou ka soufè é malè ka rivé-nou ?
5. Dépi Satan ka menné, kijan sa ka pasé ?
Li Jénèz 3:1-6 é fè on ti kozé asi sé kèsyon-lasa :
-
Ki manti Satan ba Adan é Èv ? (gadé sé vèwsé 4 é 5 la).
-
Satan fè Adan é Èv konprann kè Jéova té vlé anpéché-yo pwofité dè on biten ki té bon pou yo. Kijan i fè sa ?
-
Dapré sa Satan di, ès nou bizwen Jéova dirijé-nou pou nou ni tchè-kontan ?
Li Éklézyas 8:9 é fè on ti kozé asi kèsyon-lasa :
-
Dépi Jéova pa’a dirijé ankò, ka i ka pasé asi latè ?
-
Adan é Èv té pawfè, é yo té ka viv alèz a yo an paradi-la. Men yo ay kouté Satan é yo ba Jéova do.
-
Apré yo rèbélé-yo, péché, soufrans é lanmò pran lanmen toupatou si latè.
-
Jéova ké fè péché, soufrans é lanmò disparèt. Toutmoun ké wouvin pawfè é nou ké wouviv adan on paradi.
6. Lè nou ka soufè, sa ka fè Jéova lapenn
Lè nou ka soufè, ès sa ka touché Bondyé ? An-nou gadé sa wa David é lapòt Pyè maké. Li Sòm 31:7 é 1 Pyè 5:7, é fè on ti kozé asi kèsyon-lasa :
-
Ka ou ka rèsanti davwa ou sav kè Bondyé ka vwè lè ou ka soufè é kè i ka pran penn a-w ?
7. Bondyé ké fè tout soufrans an nou disparèt
Li Izayi 65:17 é Révélasyon 21:3, 4, é fè on ti kozé asi kèsyon-lasa :
-
Jéova ké fè tout soufrans an nou disparèt. Poukwa sé on lidé ki ka konsolé-nou ?
Ès ou té sav sa ?
Lè Satan bay prèmyé mansonj-la, i malpalé Jéova. Pou i té sali répitasyon a Jéova, i fè lézimen konprann kè Jéova sé on mové dirijan ki pa ka aji èvè jistis é ki pa ni lanmou. Talè, Jéova ké fè tout soufrans disparèt. Konsa, i ké montré kè sé manti Dyab-la té ka manti asi-y. Toutmoun ké konstaté kè pa ni méyè dirijan ki-y. Fò toutmoun sav ki jan dè moun Jéova yé vréman é sa sé on kèsyon ki enpòwtan toubònman (Matyé 6:9, 10).
MI SA MOUN KA DI : « Bondyé ka fè-nou soufè pou vwè si nou ni fwa adan-y. »
-
É vou, ki lidé a-w asi sa ?
ON TI RÉZIMÉ
Sé akòz dè Satan é dè Adan é Èv kifè si ni tousa malè asi latè. Jéova toujou ka voyé zyé asi nou é talè, i ké fè tout soufrans an nou disparèt.
Ka ou woutyenn
-
Satan manti ba Èv. Ka i di-y ?
-
Lè Adan é Èv dézobéyi, adan ki sitiyasyon yo mèt-nou ?
-
Kijan nou fè sav kè lè nou ka soufè, sa ka fè Jéova lapenn ?
AY GADÉ SA OSI
Ka ki on péché ? An-nou vwè ka Labib ka di asi sa.
An Jadendédèn-la, Satan fè Adan é Èv konprann kè Jéova pa té andwa gouvèné. Si ou vlé ni plis enfòwmasyon, gadé awtik-lasa.
« Pourquoi Dieu permet-il les souffrances ? » (Tou dè Gad a 1é janvyé 2014 an fransé)
Si ou ka mandé-w pou ki biten Bondyé lésé-yo tchouyé bon enpé Juif pannan lagè-la, mi déotwa répons ki ké konsolé-w.
Mi istwa a on misyé ki vin aprann pou ki biten vi a-y té rèd konsa.
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
