LÈSON 28
Montré Jéova é Jézi kijan ou ka aprésyé sa yo fè ba-w
Lè ou ni on bon zanmi ki ka fè-w on bèl ti kado, ka ou ka rèsanti ? Tèlman sa ka fè-nou plézi, nou ka montré-y kè nou ka aprésyé sa i fè ban nou. Kon nou vwè adan lèson 27 la, Jéova é Jézi ban-nou pi bèl kado ki tini : ranson-la. Kijan nou pé di-yo mèsi ?
1. Kijan nou pé montré kè nou ka aprésyé sa Jéova é Jézi fè ban nou ?
Labib ka di kè « toutmoun ki ka montré yo ni lafwa adan [Jézi] » ké ni lavi étèwnèl (Jan 3:16). Kijan on moun ka montré i ni lafwa ? Sé vré, i ka kwè an Jézi, men fò i fè plis ki sa. Fò désizyon i ka pran é sa i ka fè ka montré kè i ni lafwa (Jak 2:17). Lè nou ka lésé fwa an nou gidé pawòl an nou é konpòwtasyon an nou, nou ka vin pi bon zanmi èvè Jézi é èvè Pap’a-y, Jéova (li Jan 14:21).
2. Ki lokazyon èspésyal nou ni pou nou montré Jéova é Jézi kè nou ka aprésyé sa yo fè ban nou ?
Avan jou-la i mò la, lavèy oswa, Jézi di disip a-y kè ni ondòt biten yo pé fè pou montré kè yo ka aprésyé sakrifis a-y. I di-yo réini-yo pou sélébré on évènman èspésyal kè Labib ka kriyé « Rèpa a Ségnè-la ». Nou ka kriyé-y osi « Mémoryal a mò a Kris » (1 Korentyen 11:20). Jézi mèt rèpa-lasa anplas pas i té vlé kè apòt a-y é toutmoun ki té’é vin disip a-y apré sonjé kè i bay vi a-y pou limanité. Dayè, jouswa-lasa, Jézi di : « Kontinyé fè sa pou zòt sonjé-mwen » (Lik 22:19). Lè nou ka vin Mémoryal, nou ka montré Jéova é Jézi kè nou ni onlo rèkonésans pou yo davwa yo enmé-nou fò toubònman.
AN-NOU FOUYÉ PI FON
Ni dòt mannyè nou pé montré kè nou ka aprésyé sa Jéova é Jézi fè ban nou. An-nou gadé sa, é an-nou vwè osi poukwa Mémoryal a mò a Jézi enpòwtan konsa.
3. Kijan nou pé montré kè nou ka aprésyé sa Jéova é Jézi fè ban nou ?
Imajiné ou té ka néyé, é on moun vin sové-w. Ès ou ka di ou té’é oubliyé sa moun-lasa fè ba-w ? Awa ! Okontrè, ou té’é fè tousa ou pé pou montré-y kijan ou ka aprésyé sa i fè pou sové-w.
Jéova sové vi an nou lè i bay vi a Gason a-y an sakrifis. Li 1 Jan 4:8-10 é fè on ti kozé asi sé kèsyon-lasa :
-
Sakrifis a Jézi sé on kado èstraòwdinè toubònman. Poukwa nou pé di sa ?
-
Lè ou ka pran tan réfléchi asi sa Jéova é Jézi fè ba-w, ka ou ka rèsanti ?
Kijan nou pé di Jéova é Jézi mèsi pou ranson-la ? Li 2 Korentyen 5:15 é 1 Jan 4:11 ; 5:3. Apré ou li chak vèwsé, fè on ti kozé asi kèsyon-lasa :
-
Kijan nou pé montré Jéova é Jézi kè nou ka aprésyé sa yo fè ban nou ?
4. Imité Jézi
Pou nou montré kè nou ka aprésyé ranson-la, fò-nou fè ondòt biten ankò. Fò-nou suiv ègzanp a Jézi. Li 1 Pyè 2:21 é fè on ti kozé asi kèsyon-lasa :
-
Si ou vlé suiv Jézi alatras, ka pou-w fè ?
Jézi té enmé Pawòl a Bondyé, i té ka préché bon nouvèl-la, é i té ka édé sé moun-la.
5. Vin sélébré Mémoryal a mò a Jézi
Pou sav kijan yo sélébré prèmyé Rèpa a Ségnè-la, li Lik 22:14, 19, 20. Aprésa, fè on ti kozé asi sé kèsyon-lasa :
-
Kijan Rèpa a Ségnè-la pasé ?
-
Ka pen-la é diven-la ka rèprézanté ? (gadé sé vèwsé 19 é 20 la).
Jézi té vlé disip a-y sélébré Mémoryal-la chak lanné, dat-la i mò la. Sé pousa sé Témwen a Jéova la ka réini-yo chak lanné pou sonjé mò a Jézikri. Réinyon-lasa enpòwtan toubònman, é yo ka òwganizé-y kon Jézi mandé. Si ou vlé ni plis enfòwmasyon, gadé VIDÉO-la. Aprésa, fè on ti kozé asi kèsyon-la ki ka vin la.
-
Kijan Mémoryal-la ka pasé ?
Ki pen-la ki diven-la ka rèprézanté on biten. Pen-la ka rèprézanté kò a Jézi ki pawfè, é diven-la ka rèprézanté san a-y.
MI SA MOUN KA DI : « Dépi ou aksèpté Ségnè-la an vi a-w, ou sové. »
-
Kijan ou pé sèvi èvè Jan 3:16 é Jak 2:17 pou montré on moun kè fò i ay pli lwen ki sa ?
ON TI RÉZIMÉ
Lè nou ka vin Mémoryal é kè nou ka montré kè nou ni lafwa an Jézi, toutmoun ka vwè kè nou ka aprésyé sa Jézi fè ban nou.
Ka ou woutyenn
-
Kijan nou ka montré nou ni lafwa an Jézi ?
-
Ka ou pé fè pou montré kè ou ka aprésyé sa Jéova é Jézi fè ba-w ?
-
Chak lanné, fò ou ay Mémoryal. Poukwa sa enpòwtan ?
AY GADÉ SA OSI
Ka mò a Jézi ka pousé-nou fè ?
Lè on moun ni lafwa é lè on moun ka montré i ni lafwa, a pa menm biten-la. An-nou vwè poukwa.
« Exerce ta foi dans les promesses de Jéhovah » (Tou dè Gad a òktòb 2016 an fransé)
An-nou vwè kijan vi a on madanm vin pi bèl lèwvwè i pran tan réfléchi asi ranson-la.
« La Bible transforme des vies » (Tou dè Gad a 1é out 2011 an fransé)
Ni plizyè milyon moun ki ka vin Mémoryal, men sé enki déotwa ki ka manjé pen-la é ki ka bwè diven-la. Poukwa ?
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
