LÈSON 31
Wayòm a Bondyé, ka sa yé ojis ?
Adan Bib-la, ni on tèm enpòwtan ki ka wouvin souvan, sé wayòm a Bondyé. Jéova ké sèvi èvè wayòm-lasa pou fè sa i té prévwa lè i té kréyé latè. Ka ki wayòm a Bondyé ? Kijan nou fè sav kè i ja ka fonksyonné ? Ka i ja fè é ka i ké fè ? Nou ké réponn a sé kèsyon-lasa adan lèson-lasa é adan sé 2 la ki ka vin la.
1. Ka ki wayòm a Bondyé é kimoun ki wa adan wayòm-lasa ?
Wayòm-la sé on gouvènman kè Jéova mèt anplas. Sé Jézikri ki wa adan wayòm-lasa é twòn a-y ka touvé-y an syèl-la (Matyé 4:17 ; Jan 18:36). Labib ka di kè Jézi ké gouvèné « pou touttan » (Lik 1:32, 33). Onlè, toutmoun ki asi latè ké anba otorité a-y.
2. Kimoun ka gouvèné èvè Jézi ?
A pa Jézi tousèl ki ka dirijé wayòm-la. Bib-la ka di kè ‘moun ki sòti adan tout tribi, tout lang, tout pèp é tout nasyon, ké dirijé latè antankè wa’ (Révélasyon 5:9, 10). Konmen moun ké dirijé èvè Jézi ? Dépi Jézi vin asi latè, ni plizyè milyon moun ki vin disip a-y. Men a pa yotout ki ka gouvèné èvè-y an syèl-la. Pawmi yo, sé yenki 144000 ki kay gouvèné èvè Jézi (li Révélasyon 14:1-4). Tout rèstan disip a Jézi ké touvé-yo si latè anba dominasyon a Wayòm-la (Sòm 37:29).
3. Poukwa wayòm a Bondyé méyè ki tout gouvènman ki asi latè ?
Menm lè on dirijan anvi fè onlo bon biten pou popilasyon-la i pé pa fè tousa i té’é swété. Anplisdisa, onlè, sé ondòt moun ki ké pran plas a-y é moun-lasa ké ka sonjé yenki li. É pétèt menm kè i pa ni lentansyon fè ayen dè bon pou popilasyon-la. Men moun-la ki ka dirijé wayòm a Bondyé, ponmoun pé’é ranplasé-y. Bondyé « mété on wayòm anplas, on wayòm yo pé ké janmé détwi » (Danyèl 2:44). Anplisdisa, Jézi ké dirijé tout latè san fè pon préférans. Jézi plen lanmou, sé on bon moun é i jis. Jézi ké édé toutmoun fè kon-y, i ké aprann-yo aji èvè lanmou, èvè bonté, é èvè jistis (li Izayi 11:9).
AN-NOU FOUYÉ PI FON
An-nou vwè poukwa wayòm a Bondyé pibon ki nenpòt ki gouvènman ki asi latè.
4. Wayòm a Bondyé ké gouvèné tout latè
Pa ni pon dirijan ki ja pasé asi latè ki ni plis pouvwa ki Jézikri. Li Matyé 28:18 é fè on ti kozé asi kèsyon-lasa :
-
Poukwa nou pé di kè Jézi ni plis otorité ki nenpòt ki dirijan ki asi latè ?
Sé gouvènman-la ka chanjé toutlè é sé yenki on pati a latè yo ka dirijé. Ès sé ké menm biten pou wayòm a Bondyé ? Li Danyèl 7:14 é fè on ti kozé asi sé kèsyon-lasa :
-
Dominasyon a wayòm a Bondyé, « sé on dominasyon ki étèwnèl ». Poukwa sé on bon biten ?
-
Wayòm a Bondyé ké dirijé tout latè. Poukwa sé on bon biten ?
5. Fò nou chanjé gouvènman
Fò wayòm a Bondyé pran plas a tout gouvènman ki asi latè. Poukwasa ? Gadé VIDÉO-la é fè on ti kozé asi kèsyon-la ki ka vin la.
-
Ja ni konmen syèk lézòm ka gouvèné. Ki rézilta sa bay ?
Li Éklézyas 8:9 é fè on ti kozé asi kèsyon-lasa :
-
Ès ou ka di fò wayòm a Bondyé ranplasé tout gouvènman ki asi latè ? Poukwa ou ka di sa ?
6. Adan wayòm a Bondyé sé moun-la ki ka dirijé-nou la ka konprann-nou
Jézi, Wa a Wayòm-la, ni lokazyon viv asi latè, kifè i « kapab konprann féblès an nou » (Ébré 4:15). Sé Jéova ki ka chwazi moun ki kay gouvèné èvè Jézi, é yo a 144000. Pawmi yo ni dé nonm é dé madanm « ki sòti adan tout tribi, tout lang, tout pèp é tout nasyon » (Révélasyon 5:9).
-
Lè ou ka vin sav kè Jézi é sé 144000 la pé konprann ki difikilté nou ka jwenn é sa nou ka rèsanti, ka sa ka fè-w ?
Sé misyé-la é sé madanm-la Jéova ka chwazi la pou ay gouvèné èvè Jézi sòti adan tout nasyon.
7. Pa ni pi bon lwa ki ta wayòm a Bondyé
Sé gouvènman-la ka mèt sèwten lwa anplas an péyi a yo pou pwotéjé sé sitwayen-la é pou fè-yo dibyen. Menmjan-la, wayòm a Bondyé ka mèt sèwten lwa anplas pou sé moun-la ki ké viv anba dominasyon a-y. Li 1 Korentyen 6:9-11 é fè on ti kozé asi sé kèsyon-lasa :
-
Lè toutmoun ké ka suiv lwa a Bondyé kijan lavi ké yé asi latè a ?
-
Ès Jéova andwa mandé sitwayen a Wayòm-la rèspèkté sé lwa-lasa ? Poukwa ou ka di sa ?
-
Kijan nou fè sav kè moun ki pa ka suiv lwa a Bondyé pé chanjé ? (gadé vèwsé 11 la).
Sé gouvènman-la ka mèt sèwten lwa anplas pou pwotéjé sé sitwayen-la é pou fè-yo dibyen. Menmjan-la, wayòm a Bondyé ka mèt sèwten lwa anplas. Yo méyè ki ta sé gouvènman-la, é yo la pou fè-nou dibyen.
MI SA YO TÉ’É PÉ MANDÉ-W : « Wayòm a Bondyé ka sa yé ojis ? »
-
Ka ou té’é réponn ?
ON TI RÉZIMÉ
Wayòm a Bondyé sé on gouvènman ki ka ègzisté poubon ; i an syèl-la, é talè i ké dirijé tout latè.
Ka ou woutyenn
-
Adan wayòm a Bondyé kimoun ki ka dirijé ?
-
Poukwa wayòm a Bondyé méyè ki tout gouvènman ki asi latè ?
-
Jéova vlé kè sitwayen a Wayòm-la suiv sèwten règ. Ès ou konnèt déotwa adan yo ?
AY GADÉ SA OSI
Ès Jézi anségné kè wayòm a Bondyé andidan tchè an nou ?
« Ès sé andidan tchè an nou wayòm a Bondyé yé ? » (on awtik ki asi jw.org)
Ka sé Témwen a Jéova la paré a fè pou yo pé sa rété fidèl a wayòm a Bondyé ?
Gadé ka labib ka èspliké anrapò èvè sé 144000 moun-la kè Jéova chwazi pou ay gouvèné èvè Jézi an syèl-la.
On madanm té ka lité kont lenjistis. Vi a-y chanjé bout-pou-bout lè i vin sav kè sé yenki Bondyé ki ké mèt on lòd adan sa.
« J’ai découvert la solution à l’injustice » (Réveillez-vous ! a novanm 2011)
Ay gadé sa osi...
KÈSYON ONLO MOUN KA POZÉ-YO
Sé lèson biblik la Témwen a Jéova ka pwopozé : kijan sa ka pasé ?
Sé lèson-la gratui é ou ka pé fè bèl ti kozé èvè Témwen a Jéova ; ou pé sèvi èvè pwòp Bib a-w é ou pé envité fanmi a-w oben zanmi a-w suiv étid-la èvè-w.
